Tharu, Dangaura: Dangaura Tharu (New Testament)

Dangaura Tharu

तबदोस्र येशू गालील क्षेत्रम घुमफिर कर्ल। उहाँ यहूदिया क्षेत्रम जाइ नैचहल, काकरकि उ ठाउँक यहूदीहुँक्र उहाँह मुवादेना दाउम रलह। उ ब्‍याला यहूदीहुँक्र झोँप्री बनाक मनैना टिहार आइटह। येशूक भैयाओँ उहाँह कल, “आब अप्‍न गालीलसे यहूदिया क्षेत्रम जाई। अप्‍नक कर्टिरहल अचम्‍मक काम उहाँ फे चेलावँ देखहीँ। नाउँ चलाइ चहना मनै गुपचुपम काम नैकर्ट। अप्‍न फे अचम्‍मक काम कर्टिबाटी, ओ यी अचम्‍मक काम संसारम सबजहन थाहाँ ह्‍वाए।” काकरकि उहाँक भैयाओँ फे उहाँकम विश्‍वास नैकरँट्‍।
येशू हुँकन कल, “म्‍वार लाग ठीक समय आम्‍ही नैअइलहो। टुन्‍हक लाग त जौन समय रलसे फे ठीक बा। संसारक मनै टुँहन हेल्‍हा कर नैसेक्‍ट, तर महीह त हेल्‍हा कर्ठ, काकरकि मै हुँकन्‍हक चालचलन खराब बाटन कैक कैदेठुँ। टुह्र टिहार मनाइ जाओ, मै यी टिहारम नैजाइठुँ, काकरकि म्‍वार समय आम्‍ही नैअइलहो।” हुँकन अत्रा कैक उहाँ गालीलम पलरल।
तर येशूक भैयाओँ टिहारम गैल त पाछ उहाँ फे गैल। उहाँ कुई नैथाहाँ पैना हिसाबले गोप्‍य रूपम गैल। टिहारम यहूदी अगुवाहुँक्र येशूह ख्‍वाजटलह। हुँक्र “उ मनैया कहाँ बा?” कैक पुछटलह।
भीडम उहाँक बारेम मनै बात बट्‌वाइटलह। कुई कहँट्‍, “ऊ असल बाट।” कौनोजन कहँट्‍, “नाहीँ, ऊ त मनैन बहकुइया केल हो।” तर फे यहूदी अगुवन्‍हक डरले उहाँक बारेम कुई फे खुल्‍लमखुल्‍ला बात नैबट्‌वाइँट्‍।

लगभग आधा टिहार ओराइलम येशू मन्‍दिरम गैल ओ शिक्षा देहलग्‍ल। यहूदी अगुवाहुँक्र एकदम छक्‍क पर्ल ओ कल, “यी मनैया कौनो गुरुकठे नैजाक फे कसिक अत्रा जन्‍नाहा हुइल्?”
येशू हुँकन जवाफ देटी कल, “म्‍वार सिखाइल बात म्‍वार आपनऽ नैहो, तर महीह पठुइया परमेश्‍वरक हो। परमेश्‍वरक इच्‍छा अनुसार काम कर खोजुइयन म्‍वार शिक्षा परमेश्‍वरसे आइल हो कि म्‍वार आपनऽ शिक्षा हो उ बात थाहाँ पैहीँ। आपन तर्फसे बोलुइयन आपन आदर खोज्‍ठ, तर अपन्‍हेह पठुइयक आदर खोजुइया इमानदार रठ। हुँकन्‍हकम छलकपट नैरटन। का मोशा टुँहन व्‍यवस्‍था नैदेलह? तर टुह्र कुई फे उ व्‍यवस्‍था पालन नैकर्टो। टुह्र काजे महीह मुवाइ खोज्‍ठो?”
भीडम रहल मनै कल, “टुँहीन भूत्‍वा लागरहल। टुँहीन के मुवाइ ख्‍वाजटा?”
येशू हुँकन कल, “मै एकठो अचम्‍मक काम कर्नु कलसे टुह्र सबजन छक्‍क पर्ठो। मोशा टुँहन खतना कर्ना आज्ञा देलह (वास्‍तवम उ आज्ञा मोशक देहल नैहो, तर पितापुर्खन्‍हक सुरु करल हो), ओ बिसैना दिनम फे टुह्र आपन छावन्‍हक खतना कर्ठो। काकरकि यदि बिसैना दिन टुन्‍हक छावन्‍हक खतना कर्ना दिन पुग्‍ठन त, मोशक व्‍यवस्‍था भङ्‌ग जिन ह्‍वाए कैक टुह्र आपन छावन्‍हक खतना कैदेठो कलसे, मै एकठो मनैयह बिसैना दिनम पूरा चोखादेनु त टुह्र काजे महीसे रिस कर्ठो? मुह हेर्क न्याय जिन करो, तर ठीक किसिमले न्याय करो।”

यरूशलेमक कत्रा मनै कल, “हुँक्र मुवाइ ख्‍वाजल मनैया यिह नैहुइट का? हेरो, यी त खुल्‍लमखुल्‍ला ब्‍वालट, ओ हिँकहीन कुई फे कुछु नैकहट्‍। यी मनैया ख्रीष्‍ट हुइट कैक हमार अगुवाहुँक्र जाट्‌टीसे विश्‍वास कैडर्ल कि का? तर यी मनैया कहाँसे अइलह कैक हम्र सबजहन थाहाँ बा। ख्रीष्‍ट अइलसे त, उहाँ कहाँसे अइलह कैक कुई फे थाहाँ पउइया नैहो।”
उ ब्‍याला येशू मन्‍दिरम सिखैटीरलह। उहाँ सबजन सुन्‍नागरी कल, “का टुह्र महीह चिह्‍न्‍ठो? का मै कहाँसे अइनहुँ कना बात फे टुँहन थाहाँ बा? मै आपन खुशीले अइलक नैहुइटुँ। तर महीह पठुइया सत्‍य बाट। टुह्र उहाँह नैचिन्‍ह्‍टो। तर उहाँह मै चिन्‍ह्‍ठुँ, काकरकि मै उहाँकठेसे अइनहुँ, ओ उहाँ महीह पठैलह।”
यी सुन्‍क हुँक्र येशूह पक्र खोज्‍ल। तर उहाँकम कुई फे हाँठ नैडारल, काकरकि उहाँक समय आम्‍ही नैअइलरलहन। उ भीडम रहल धेर मनै उहाँकम विश्‍वास कर्ल। हुँक्र कल, “जब ख्रीष्‍ट अइहीँ, तब का उहाँ यी मनैयसे फे धेर शक्तिशाली चिन्‍ह देखैहीँ तो?”
फरिसीहुँक्र भीडमक मनैन् येशूक बारेम असिन बात खस्‍याकखुसुक बट्‌वाइट्‍ सुन्‍ल। उहओर्से मुख्‍य पूजारीहुँक्र ओ फरिसीहुँक्र येशूह पक्रक लाग मन्‍दिरक द्वरपालेन पठैल।
येशू ओठे भेला हुइल मनैन कल, “आम्‍ही कुछ समयसम मै टुन्‍हकसँग रहम, तबदोस्र मै महीह पठुइयकठे जैम। तब टुह्र महीह खोज्‍बो, तर नैभेटैबो, काकरकि मै गैल् ठाउँम टुह्र आइ नैसेक्‍टो।”
यी सुन्‍क यहूदी अगुवाहुँक्र अप्‍न-अप्‍न कल, “यी मनैया कहाँ जाइक लाग बा ओ टुह्र महीह नैभेटैबो कैक कठा? यी विदेशम ग्रीक मनैन्‍हक बीचम तितरबितर हुइल् यहूदीन्‍हकठे जाइक लाग बा कि का? कि ग्रीक मनैन सिखाए जाइक लाग बा? ‘टुह्र महीह खोज्‍बो, तर नैभेटैबो, काकरकि मै गैल् ठाउँम टुह्र आइ नैसेक्‍टो’ कठा! यी कलक का हो?”
आब टिहारक अन्‍तिम दिन अर्थात् सबसे मुख्‍य दिन येशू ठह्रेइल ओ सबजन सुन्‍नागरी कल, “टुह्रमध्‍ये पियासल मनै म्‍वारठे आक पिओ। धर्मशास्‍त्रम लिखलअस म्‍वारम विश्‍वास कर्ना मनैयकमसे जीवित पानीक लद्‍या बहटीरहुइयाबा।” यी बात येशू पवित्र आत्‍मक बारेम कलह, जौन पवित्र आत्‍मा उहाँकम विश्‍वास करुइयन पाइक लाग रलह। उ ब्‍यालासम परमेश्‍वर पवित्र आत्‍मह नैपठैलरलह काकरकि येशू आम्‍हीसम महिमामय स्‍वर्गम नैगैलरलह।
येशूक बात सुनुइयन भीडमक कुई-कुई मनै कल, “हमार आशा करल अगमवक्ता जाट्‌टीसे यिह मनैया हुइट।”
और जन कल, “यी मनैया ख्रीष्‍ट हुइट।”
तर कत्रा जन कल, “का ख्रीष्‍ट गालीलसे अइहीँ तो? ख्रीष्‍ट दाऊदक वंशमसे ओ दाऊदक सहर बेथलेहेममसे अउइयाबाट कैक धर्मशास्‍त्रम लिखल नैहो का?” असिक येशूक कारण मनैन्‍हक बीचम फूट हुइलन। हुँक्रमध्‍ये कत्रा जन उहाँह पक्र खोज्‍ल, तर उहाँकम कुई फे हाँठ नैडारल।

येशूह पक्रक लाग पठागैल् द्वरपालेन छुच्‍छ घुम्‍ल। मुख्‍य पूजारीहुँक्र ओ फरिसीहुँक्र हुँकन कल, “टुह्र येशूह पकर्क काजे नैअन्‍लो?”
द्वरपालेन जवाफ देल, “यी मनैयकअस छक्‍क लग्‍टिक बात त और कुई फे कबु नैबट्‌वैल!”
फरिसीहुँक्र हुँकन कल, “ऊ टुँहन फे छकादेहल कि का? का हमार अगुवा अथवा फरिसीमध्‍ये कुई वाकरम विश्‍वास कैरख्‍ल? कुई नैकर्लहो! तर यी भीडक मनै व्‍यवस्‍थम लिखल बातऽ नैजन्‍ट, हुँकन्‍हकम त सराप परल बाटन।”
उहाँ रहल फरिसीहुँक्रमध्‍ये येशूह रात्‍क भेँटाए गैलक निकोदेमस कल, “हमार व्‍यवस्‍था दोष लगागैल् मनैयक बात बिना सुन्‍ल ओ ऊ का कर्टिबा कैक बात बिना बुझ्‍ल ओहीह दोषी ठह्रैठा का?”
हुँक्र हुँकहीन कल, “टुँ फे गालीली हुइटो कि का? धर्मशास्‍त्र मजासे पह्रो ना, तब थाहाँ पैबो, कि गालीलसे कौनो अगमवक्ता नैआइट्‍।”
[तबदोस्र सबजन आपन-आपन घर गैल।

နားထောင်ပါ यूहन्‍ना 7