The MYANMAR STANDARD BIBLE (MYANMAR AUDIO EDITION)℗ is professionally recorded with a solemn tone and beautiful rhythm, expressing the original flavor of the MYANMAR STANDARD BIBLE©, allowing God's word to echo in the ears and hearts of the listener, providing a brand new experience for those who are hungry for God's word to experinece its power. The MYANMAR STANDARD BIBLE (MYANMAR AUDIO EDITION)℗ is produced and distributed by the Global Bible Initiative.

MYANMAR STANDARD BIBLE (MYANMAR AUDIO EDITION)℗Copyright ℗ 2024 by Global Bible Initiative

မြန်​မာ့​စံ​မီ​သမ္မာ​ကျမ်း

ရှစ်​ရက်​မြောက်​သော​နေ့​၌ မောရှေ​သည် အာရုန်​နှင့် သူ​၏​သား​များ​၊ အစ္စရေး​သက်ကြီးဝါကြီး​များ​ကို ခေါ်​ပြီးလျှင် အာရုန်​အား “​အပြစ်ဖြေရာယဇ်​အတွက် နွားအုပ်​ထဲမှ​နွားသငယ်​တစ်​ကောင်​နှင့် မီးရှို့ရာယဇ်​အတွက် အပြစ်အနာအဆာကင်း​သော​သိုးထီး​တစ်​ကောင်​ကို သင့်​အဖို့​ယူ​၍ ထာဝရဘုရား​ရှေ့​တော်​၌ ပူဇော်​လော့​။ အစ္စရေး​အမျိုးသား​တို့​ကို​လည်း ‘​အပြစ်ဖြေရာယဇ်​အတွက် ဆိတ်သငယ်​အထီး​တစ်​ကောင်​၊ မီးရှို့ရာယဇ်​အတွက် အပြစ်အနာအဆာကင်း​သော​တစ်နှစ်သားအရွယ် နွားသငယ်​တစ်​ကောင်​နှင့်​သိုးသငယ်​တစ်​ကောင်​၊ ထာဝရဘုရား​ရှေ့​တော်​၌ မိတ်သဟာယယဇ်​ကို ပူဇော်​ရန်​အတွက် နွား​တစ်​ကောင်​နှင့်​သိုးထီး​တစ်​ကောင်​၊ ဆီ​နှင့်​ရော​သော​ဘောဇဉ်ပူဇော်သက္ကာ​ကို ယူဆောင်​လာ​လော့​’​ဟု ဆင့်ဆို​လော့​။ ထာဝရဘုရား​သည် ယနေ့ သင်​တို့​အား ကိုယ်ထင်ရှားပြ​တော်မူ​မည်​”​ဟု ဆို​၏​။
ထို့ကြောင့် သူ​တို့​သည် မောရှေ​မှာကြား​သော​အရာ​တို့​ကို တွေ့ဆုံစည်းဝေးရာ​တဲ​တော်​ရှေ့​သို့​ယူဆောင်​လာ​ကြ​၏​။ လူထု​အပေါင်း​တို့​သည် ချဉ်းကပ်​လာ​ကြ​၍ ထာဝရဘုရား​ရှေ့​တော်​၌ ရပ်​နေ​ကြ​၏​။ ထိုအခါ မောရှေ​က “​ဤသည်ကား သင်​တို့​ထံ ထာဝရဘုရား​၏​ဘုန်းအသရေ​ထင်ရှား​တော်မူ​မည့်​အကြောင်း ထာဝရဘုရား​မိန့်မှာ​တော်မူ​သော သင်​တို့​ဆောင်ရွက်​ရ​မည့်​အရာ​ဖြစ်​၏​”​ဟု ဆို​၏​။ တစ်ဖန် မောရှေ​က အာရုန်​အား “​ယဇ်ပလ္လင်​သို့​ချဉ်းကပ်​လော့​။ ထာဝရဘုရား​မိန့်မှာ​တော်မူ​ခဲ့​သည့်​အတိုင်း သင်​၏​အပြစ်ဖြေရာယဇ်​နှင့်​မီးရှို့ရာယဇ်​ကို​ပူဇော်​၍ သင့်​အတွက်​၊ လူ​တို့​အတွက် အပြစ်ဖြေလွှတ်​ခြင်း​ကို​ပြု​လော့​။ လူ​တို့​၏​ပူဇော်သက္ကာ​ကို​လည်း ပူဇော်​၍ သူ​တို့​အတွက် အပြစ်ဖြေလွှတ်​ခြင်း​ကို​ပြု​လော့​”​ဟု ဆို​၏​။
ထို့ကြောင့် အာရုန်​သည် ယဇ်ပလ္လင်​သို့​ချဉ်းကပ်​၍ မိမိ​အတွက် အပြစ်ဖြေရာယဇ်​ဖြစ်​သော နွားသငယ်​ကို​သတ်​၏​။ အာရုန်​၏​သား​တို့​သည် သွေး​ကို သူ့​ထံသို့​ယူဆောင်​လာ​ကြ​ရာ သူ​သည် မိမိ​၏​လက်ချောင်း​ကို သွေး​ထဲသို့​နှစ်​၍ ယဇ်ပလ္လင်​၏​ချို​များ​ကို သုတ်လိမ်း​ပြီးလျှင် ကျန်​သွေး​ကို ယဇ်ပလ္လင်​အောက်ခြေ​၌ သွန်း​၏​။ မောရှေ​အား ထာဝရဘုရား​မိန့်မှာ​တော်မူ​ခဲ့​သည့်​အတိုင်း အာရုန်​သည် အပြစ်ဖြေရာယဇ်ကောင်​၏​အဆီ​၊ ကျောက်ကပ်​နှင့် အသည်း​ပေါ်မှ​အဆီပျဉ်​တို့​ကို ယဇ်ပလ္လင်​ပေါ်၌ ရှို့​၏​။ အသား​နှင့်​အရေခွံ​တို့​ကို​ကား တပ်စခန်း​၏​အပြင်ဘက်​၌ မီး​ရှို့​လေ​၏​။
ထို့နောက် အာရုန်​သည် မီးရှို့ရာယဇ်ကောင်​ကို​သတ်​၍ သူ့​သား​တို့​သည် သူ့​ထံ သွေး​ကို​ယူလာ​ရာ သူ​သည် ယဇ်ပလ္လင်​ပတ်ပတ်လည်​ပေါ်၌ ထို​သွေး​ကို​ဖျန်း​၏​။ သူ​တို့​သည် မီးရှို့ရာယဇ်ကောင်​၏​ခုတ်ဖြတ်​ထား​သော​အပိုင်း​များ​နှင့်တကွ ဦးခေါင်း​ကို​လည်း ယူလာ​ရာ အာရုန်​သည် ၎င်း​တို့​ကို ယဇ်ပလ္လင်​ပေါ်၌ ရှို့​၏​။ အူ​နှင့်​ခြေထောက်​ကို ဆေးကြော​၍ ယဇ်ပလ္လင်​ပေါ်​ရှိ မီးရှို့ရာယဇ်​ပေါ်၌ ရှို့​၏​။
ထို့နောက် သူ​သည် လူ​တို့​၏​ပူဇော်သက္ကာ​ကို​ယူဆောင်​လာ​၏​။ လူ​တို့​အတွက် အပြစ်ဖြေရာယဇ်​ဖြစ်​သော ဆိတ်သငယ်​ကို​ယူ​၍ သတ်​ပြီးလျှင် ယခင်က​ကဲ့သို့ အပြစ်ဖြေရာယဇ်​ကို ပူဇော်​၏​။ မီးရှို့ရာယဇ်​ကို​လည်း ယူဆောင်​လာ​၍ စီရင်ထုံးဖွဲ့ချက်​အတိုင်း ပူဇော်​၏​။ ထို့နောက် သူ​သည် ဘောဇဉ်ပူဇော်သက္ကာ​ကို​ယူဆောင်​လာ​၍ နံနက်​မီးရှို့ရာယဇ်​အပြင် လက်တစ်ဆုပ်စာ​ဘောဇဉ်ပူဇော်သက္ကာ​ကို ယဇ်ပလ္လင်​ပေါ်၌ ရှို့​၏​။
အာရုန်​သည် လူ​တို့​အတွက် မိတ်သဟာယယဇ်​ဖြစ်​သော နွား​နှင့်​သိုးထီး​ကို​သတ်​၍ သူ့​သား​တို့​သည် သူ့​ထံ သွေး​ကို ယူလာ​ရာ သူ​သည် ယဇ်ပလ္လင်​ပတ်ပတ်လည်​ပေါ်၌ သွေး​ကို​ဖျန်း​၏​။ နွား​နှင့်​သိုးထီး​၏​အမြီးပိုင်း​အဆီ​၊ အူ​ကို​ဖုံး​နေ​သည့်​အဆီ​၊ ကျောက်ကပ်​နှင့် အသည်း​ပေါ်မှ​အဆီပျဉ် စသည့်​အဆီ​တို့​ကို ရင်ပုံ​ပေါ် တင်​၍ ထို​အဆီ​တို့​ကို ယဇ်ပလ္လင်​ပေါ်၌ ရှို့​၏​။ မောရှေ​မှာကြား​သည့်​အတိုင်း အာရုန်​သည် ရင်ပုံ​နှင့်​ယာဘက်​ပေါင်​တို့​ကို ထာဝရဘုရား​ရှေ့​တော်​၌ ချီလွှဲရာပူဇော်သက္ကာ​အဖြစ် ချီလွှဲ​လေ​၏​။
ထို့နောက် အာရုန်​သည် လူ​တို့​ဘက်​သို့ လက်​မြှောက်​လျက် သူ​တို့​ကို ကောင်းချီးပေး​၍ အပြစ်ဖြေရာယဇ်​၊ မီးရှို့ရာယဇ်​၊ မိတ်သဟာယယဇ်​တို့​ကို​ပူဇော်​ရာ​မှ ဆင်းလာ​၏​။ မောရှေ​နှင့်​အာရုန်​တို့​သည် တွေ့ဆုံစည်းဝေးရာ​တဲ​တော်​ထဲသို့​ဝင်​ကြ​၏​။ သူ​တို့ ပြန်​ထွက်လာ​၍ လူ​တို့​ကို​ကောင်းချီးပေး​သောအခါ ထာဝရဘုရား​၏​ဘုန်းအသရေ​သည် လူ​အပေါင်း​တို့​အား ထင်ရှားပြ​တော်မူ​၏​။ ထိုအခါ ထာဝရဘုရား​ထံ​တော်​မှ​မီး​ဆင်းသက်​၍ ယဇ်ပလ္လင်​ပေါ်​ရှိ​မီးရှို့ရာယဇ်​နှင့်​အဆီ​တို့​ကို​လောင်ကျွမ်း​လေ​၏​။ လူ​အပေါင်း​တို့​သည် တွေ့မြင်​သောအခါ ရွှင်လန်း​စွာ​ကြွေးကြော်​လျက် ပျပ်ဝပ်​ရှိခိုး​ကြ​လေ​၏​။

နားထောင်ပါ။ ဝတ်ပြုရာကျမ်း 9