The MYANMAR STANDARD BIBLE (MYANMAR AUDIO EDITION)℗ is professionally recorded with a solemn tone and beautiful rhythm, expressing the original flavor of the MYANMAR STANDARD BIBLE©, allowing God's word to echo in the ears and hearts of the listener, providing a brand new experience for those who are hungry for God's word to experinece its power. The MYANMAR STANDARD BIBLE (MYANMAR AUDIO EDITION)℗ is produced and distributed by the Global Bible Initiative.

MYANMAR STANDARD BIBLE (MYANMAR AUDIO EDITION)℗Copyright ℗ 2024 by Global Bible Initiative

မြန်​မာ့​စံ​မီ​သမ္မာ​ကျမ်း

ဘုရားသခင်​သည် နောဧ​မှစ၍ သူ​နှင့်အတူ​သင်္ဘော​ထဲ၌​ရှိ​သော တောရိုင်းတိရစ္ဆာန်​အပေါင်း​တို့​ကို​လည်းကောင်း​၊ ယဉ်ပါးသောတိရစ္ဆာန်​အပေါင်း​တို့​ကို​လည်းကောင်း အောက်မေ့​တော်မူ​၏​။ ဘုရားသခင်​သည် မြေကြီး​ပေါ်မှာ​လေ​တိုက်​စေ​တော်မူ​သဖြင့် ရေ​သည် လျော့ကျ​သွား​လေ​၏​။ နက်ရှိုင်း​ရာ​အရပ်​မှ​ရေထွက်ပေါက်​များ​နှင့် မိုးကောင်းကင်​ရေတံခါး​များ​ကို​ပိတ်​၍ ကောင်းကင်​မှ​မိုး​ကို​လည်း စဲ​စေ​တော်မူ​၏​။ ရေ​သည် မြေကြီး​ပေါ်မှာ ဆက်တိုက်​လျော့သွား​၍ ရက်​ပေါင်း​တစ်ရာ့​ငါးဆယ်​ပြည့်​သောအခါ ရေ​ယုတ်လျော့​သွား​၏​။ သတ္တမ​လ​၊ တစ်ဆယ့်​ခုနစ်​ရက်​နေ့​တွင် သင်္ဘော​သည် အာရရတ်​တောင်ရိုး​ပေါ်မှာ တင်​လေ​၏​။
ရေ​သည် ဒသမ​လ​တိုင်အောင် ဆက်တိုက်​ယုတ်လျော့​သွား​၍ ဒသမ​လ​၊ တစ်ရက်နေ့​တွင် တောင်​ထိပ်​များ​ပေါ်လာ​၏​။ ရက်​ပေါင်း​လေးဆယ်​ပြည့်​သောအခါ နောဧ​သည် မိမိ​တည်ဆောက်​ခဲ့​သော​သင်္ဘော​၏​ပြတင်းပေါက်​ကို​ဖွင့်​၍ ကျီးကန်း​တစ်​ကောင်​ကို လွှတ်​လေ​၏​။ ထို​ကျီးကန်း​သည် မြေ​ပေါ်မှာ ရေ​မ​ခန်းခြောက်​မ​ချင်း လူးလာပျံသန်း​လျက်​နေ​၏​။ တစ်ဖန် မြေပြင်​ပေါ်မှာ ရေ​လျော့ကျ​သည်​၊ မကျ​သည်​ကို​သိမြင်​ရန် ချိုးငှက်​တစ်​ကောင်​ကို​လွှတ်​လေ​၏​။ သို့သော် မြေ​တစ်ပြင်လုံး​၌ ရေ​ရှိ​သေး​သောကြောင့် ချိုးငှက်​သည် ခြေချ​နားနေစရာ​မ​တွေ့​သဖြင့် နောဧ​ရှိ​ရာ​သင်္ဘော​သို့ ပြန်လာ​လေ​၏​။ နောဧ​သည်​လည်း လက်​ကို​ဆန့်​၍ ချိုးငှက်​ကို​ဖမ်းယူ​ပြီးလျှင် မိမိ​ရှိ​ရာ​သင်္ဘော​ထဲသို့​သွင်း​လေ​၏​။ တစ်ဖန် နောက်ထပ်​ခုနစ်​ရက်​စောင့်​ပြီးမှ ထို​ချိုးငှက်​ကို သင်္ဘော​မှ​လွှတ်​ပြန်​လေ​၏​။ နေဝင်​ချိန်​၌ ချိုးငှက်​သည် နောဧ​ထံသို့​ပြန်လာ​၏​။ သူ​၏​နှုတ်သီး​၌ လောလောလတ်လတ်​ဆိတ်​ယူလာ​သော သံလွင်​ရွက်​ပါလာ​၏​။ ထိုအခါ နောဧ​သည် မြေကြီး​ပေါ်မှာ ရေ​လျော့ကျ​သွား​ပြီ​ဖြစ်ကြောင်း​သိ​လေ​၏​။ တစ်ဖန် နောက်ထပ်​ခုနစ်​ရက်​စောင့်​ပြီးမှ ထို​ချိုးငှက်​ကို​လွှတ်​ပြန်​ရာ သူ့​ထံသို့​ပြန်​မ​လာ​တော့​ပေ​။ နောဧ​အသက်​ခြောက်​ရာ့​တစ်​နှစ်​ပြည့်​သော​နှစ်​၊ ပထမ​လ​၊ တစ်ရက်နေ့​တွင် မြေကြီး​ပေါ်မှာ ရေ​ခန်းခြောက်​လေ​၏​။ နောဧ​သည် သင်္ဘော​အမိုး​ကို​ဖယ်ရှား​၍ ကြည့်ရှု​သောအခါ မြေပြင်​သည် ခြောက်​လျက်​ရှိ​သည်​ကို မြင်​လေ​၏​။ ဒုတိယ​လ​၊ နှစ်ဆယ့်​ခုနစ်​ရက်​နေ့​တွင် မြေကြီး​သည် ခြောက်သွေ့​လေ​၏​။

ထိုအခါ ဘုရားသခင်​က နောဧ​အား
“​သင်​သည် သင်​၏​သား​၊ မယား​၊ ချွေးမ​တို့​နှင့်အတူ သင်္ဘော​ထဲမှ ထွက်လာ​လော့​။ သင့်​ထံ၌​ရှိ​သော သက်ရှိသတ္တဝါ​အပေါင်း​၊ သားယဉ်​သားရဲ​အပေါင်း​တည်းဟူသော ငှက်​၊ တိရစ္ဆာန်​နှင့် မြေ​ပေါ်မှာ​တွားသွား​သော တွားသွားတိရစ္ဆာန်​အပေါင်း​တို့​သည် မြေကြီး​ပေါ်မှာ များပြား​ကြ​စေရန်​လည်းကောင်း​၊ မြေကြီး​ပေါ်မှာ​မွေးဖွား​တိုးပွား​ကြ​စေရန်​လည်းကောင်း သူ​တို့​ကို သင်​နှင့်အတူ​ထုတ်ဆောင်​လော့​”​ဟု မိန့်​တော်မူ​၏​။
သို့ဖြစ်၍ နောဧ​သည် သား​၊ မယား​၊ ချွေးမ​တို့​နှင့်အတူ ထွက်လာ​၏​။ တောရိုင်းတိရစ္ဆာန်​ရှိသမျှ​၊ တွားသွားသောတိရစ္ဆာန်​ရှိသမျှ​၊ ငှက်​ရှိသမျှ​နှင့် မြေကြီး​ပေါ်မှာ လှုပ်ရှားသွားလာ​တတ်​သော သတ္တဝါ​ရှိသမျှ​တို့​သည်​လည်း အမျိုး​အလိုက် သင်္ဘော​ထဲမှ​ထွက်လာ​ကြ​၏​။
နောဧ​သည် ထာဝရဘုရား​အဖို့ ယဇ်ပလ္လင်​ကို​တည်​ပြီးလျှင် စင်ကြယ်​သော​တိရစ္ဆာန်​အပေါင်း​တို့​နှင့် စင်ကြယ်​သော​ငှက်​အပေါင်း​တို့​ထဲက​ယူ​၍ ထို​ယဇ်ပလ္လင်​ပေါ်တွင် မီးရှို့ရာယဇ်​ကို​ပူဇော်​ရာ ထာဝရဘုရား​သည် မွှေးကြိုင်​သော​ရနံ့​ကို​ခံယူ​တော်မူ​၏​။ ထိုအခါ ထာဝရဘုရား​က “​လူ​တို့​၏​စိတ်နှလုံး​အကြံအစည်​များ​သည် ငယ်ရွယ်စဉ်​ကတည်းက ဆိုးညစ်​သော်လည်း ငါ​သည် လူ​တို့​ကြောင့် မြေကြီး​ကို နောက်တစ်ဖန် မည်သည့်​အခါ​မျှ​ကျိန်​တော့​မည်​မ​ဟုတ်​။ ငါ​သည် သက်ရှိသတ္တဝါ​အပေါင်း​တို့​ကို ယခု​ပြု​သကဲ့သို့ နောက်တစ်ဖန် မည်သည့်​အခါ​မျှ​ဒဏ်ခတ်​တော့​မည်​မ​ဟုတ်​။ မြေကြီး​တည်နေသရွေ့ မျိုးကြဲ​ချိန်​နှင့်​ရိတ်သိမ်း​ချိန်​၊ ပူ​သော​အချိန်​နှင့်​အေး​သော​အချိန်​၊ နွေရာသီ​နှင့်​ဆောင်းရာသီ​၊ နေ့အချိန်​နှင့်​ညအချိန်​တို့​သည် မပြတ်မစဲ​ရှိ​နေ​မည်​”​ဟု စိတ်​တော်​ထဲ၌ မြွက်ဆို​တော်မူ​၏​။

နားထောင်ပါ။ ကမ္ဘာဦးကျမ်း 8