The MYANMAR STANDARD BIBLE (MYANMAR AUDIO EDITION)℗ is professionally recorded with a solemn tone and beautiful rhythm, expressing the original flavor of the MYANMAR STANDARD BIBLE©, allowing God's word to echo in the ears and hearts of the listener, providing a brand new experience for those who are hungry for God's word to experinece its power. The MYANMAR STANDARD BIBLE (MYANMAR AUDIO EDITION)℗ is produced and distributed by the Global Bible Initiative.

MYANMAR STANDARD BIBLE (MYANMAR AUDIO EDITION)℗Copyright ℗ 2024 by Global Bible Initiative

မြန်​မာ့​စံ​မီ​သမ္မာ​ကျမ်း

ဒါဝိဒ်​မင်းကြီး​သည် အသက်ကြီး​၍ အိုမင်း​လာ​သောအခါ မိမိ​၏​သား​တော်​ရှောလမုန်​ကို အစ္စရေး​ဘုရင်​အဖြစ် တင်မြှောက်​၍ အစ္စရေး​အကြီးအကဲ​အပေါင်း​တို့​နှင့်တကွ ယဇ်ပုရောဟိတ်​များ​၊ လေဝိ​အမျိုး​များ​ကို စုဝေး​စေ​၏​။ အသက်​သုံးဆယ်​အရွယ်​နှင့်​အထက် လေဝိ​အမျိုး​များ​ကို ရေတွက်​ကြည့်​ရာ ယောက်ျား​စုစုပေါင်း သုံးသောင်း​ရှစ်ထောင် ရှိ​၏​။ ထို​သူ​တို့​တွင် ထာဝရဘုရား​၏​အိမ်​တော်​နှင့်ဆိုင်သော​အမှု​များ​ကို ကြီးကြပ်ကွပ်ကဲ​သူ အယောက်​နှစ်​သောင်း​လေး​ထောင်​၊ အုပ်ချုပ်ရေး​နှင့် တရားစီရင်​ရာ​တာဝန်ယူ​ရ​သူ အယောက်​ခြောက်​ထောင်​၊ တံခါး​ကို​စောင့်ကြပ်ရသူ အယောက်​လေး​ထောင်​၊ ချီးမွမ်းသီဆို​ဖို့ ဒါဝိဒ်​မင်းကြီး ပြုလုပ်​ထား​သော​တူရိယာ​များ​ဖြင့် ထာဝရဘုရား​ကို ချီးမွမ်းသီဆို​ရ​သူ အယောက်​လေး​ထောင် ဟူ၍​ခွဲထား​၏​။
ထို့ပြင် ဒါဝိဒ်​မင်းကြီး​သည် လေဝိ​၏​သား​များ​ရှိ​သည့်​အတိုင်း ဂေရရှုန်​၊ ကောဟတ်​၊ မေရာရိ ဟူ၍ အဖွဲ့​ခွဲ​ထား​ပြီး ဂေရရှုန်​အမျိုး​တွင် လာဒန်​နှင့် ရှိမိ​တို့​ပါဝင်​၏​။ လာဒန်​၏​သား​သုံး​ယောက်​မှာ သားဦး​ယေဟေလ​၊ ဇေသံ​၊ ယောလ တို့​ဖြစ်​ကြ​၏​။ ရှိမိ​၏​သား​သုံး​ယောက်​မှာ ရှေလောမုတ်​၊ ဟာဇေလ​၊ ဟာရန် တို့​ဖြစ်​ကြ​၏​။ သူ​တို့​သည် လာဒန်​၏​ဘိုးဘေး​အိမ်ထောင်စု​အကြီးအမှူး​များ ဖြစ်​ကြ​၏​။ ရှိမိ​၏​သား​များ​မှာ ယာဟတ်​၊ ဇိဇ​၊ ယုရှ​၊ ဗေရိယ တို့​ဖြစ်​ကြ​၏​။ သူ​တို့​သည် ရှိမိ​၏​သား​လေး​ယောက် ဖြစ်​၏​။ သားဦး​မှာ ယာဟတ်​၊ ဒုတိယ​သား​မှာ ဇိဇ​ဖြစ်​၏​။ ယုရှ​နှင့်​ဗေရိယ​တွင် သား​များစွာ​မ​ရှိ​သောကြောင့် သူ​တို့​သည် ဘိုးဘေး​မိသားစု​တစ်စုတည်း​ကဲ့သို့ စာရင်းဝင်​ကြ​၏​။ ကောဟတ်​၏​သား​များ​မှာ အာမရံ​၊ ဣဇဟာ​၊ ဟေဗြုန်​၊ ဩဇေလ ပေါင်း​လေး​ယောက် ရှိ​၏​။ အာမရံ​၏​သား​များ​မှာ အာရုန်​နှင့်​မောရှေ တို့​ဖြစ်​ကြ​၏​။ အာရုန်​သည် အသန့်ရှင်းဆုံးဌာန​ကို သန့်ရှင်းစင်ကြယ်​စေ​ရန်​၊ သူ​နှင့်​သူ့​သားမြေး​တို့​သည် ထာဝရဘုရား​ရှေ့​တော်​တွင် ယဇ်ပူဇော်​ရ​သော​အမှု​ကို အစဉ်​ဆောင်ရွက်​ရန်​နှင့် နာမ​တော်​ကို အစဉ်​ချီးမွမ်း​ရန် ခန့်ထား​ခြင်း​ခံရ​သူ​များ​ဖြစ်​၏​။ ဘုရားသခင်​၏​လူ​မောရှေ​၏​သားမြေး​များ​မှာ လေဝိ​မျိုးနွယ်​အဖြစ် စာရင်းသွင်း​ခံရ​၏​။
မောရှေ​၏​သား​များ​မှာ ဂေရရှုံ​နှင့်​ဧလျေဇာ တို့​ဖြစ်​ကြ​၏​။
ဂေရရှုံ​၏​သား​များ​တွင် ရှေဗွေလ​သည် သားဦး​ဖြစ်​၏​။
ဧလျေဇာ​၏​သား​တို့​တွင် ရေဟဘိ​သည် သားဦး​ဖြစ်​၏​။ သို့သော် ဧလျေဇာ​တွင် အခြား​သား​မ​ရှိ​။ ရေဟဘိ​တွင် သား​အများအပြား​ရှိ​၏​။
ဣဇဟာ​၏​သား​တို့​တွင် ရှေလောမိတ်​သည် သားဦး​ဖြစ်​၏​။
ဟေဗြုန်​၏​သား​များ​မှာ သားဦး ယေရိ​၊ ဒုတိယ​သား အာမရိ​၊ တတိယ​သား ယဟာဇေလ​၊ စတုတ္ထ​သား ယေကမံ တို့​ဖြစ်​ကြ​၏​။
ဩဇေလ​၏​သား​များ​မှာ သားဦး မိက္ခာ​၊ ဒုတိယ​သား ဣရှိယ ဖြစ်​၏​။
မေရာရိ​၏​သား​များ​မှာ မဟာလိ​နှင့်​မုရှိ​၊ မဟာလိ​၏​သား​များ​မှာ ဧလာဇာ​နှင့်​ကိရှ တို့​ဖြစ်​ကြ​၏​။
ဧလာဇာ ကွယ်လွန်​ချိန်​ထိ သား​မ​ရှိ​၊ သမီး​များ​သာ ရှိ​၏​။ ဧလာဇာ​၏​သမီး​တို့​သည် သူ​တို့​၏​ဆွေမျိုးသားချင်း​ဖြစ်​သော ကိရှ​၏​သား​တို့​နှင့် စုံဖက်​ကြ​၏​။
မုရှိ​၏​သား​များ​မှာ မဟာလိ​၊ ဧဒေ​၊ ယေရမုတ် ပေါင်း​သုံး​ယောက် ဖြစ်​၏​။
ဤ​သူ​တို့​ကား ထာဝရဘုရား​၏​အိမ်​တော်​တွင် အမှု​တော်​ထမ်းဆောင်​ရန် လေဝိ​သားမြေး​တို့​ကို သူ​တို့​ဘိုးဘေး​တို့​၏​အိမ်ထောင်စု​အလိုက် အသက်​နှစ်ဆယ်​နှင့်​အထက်​ရှိ​သူ​များ​အား စာရင်းကောက်ယူ​ရာ​တွင် နာမည်​နှင့်တကွ​စာရင်းဝင်​သော​အကြီးအမှူး​များ ဖြစ်​ကြ​၏​။ ဒါဝိဒ်​မင်းကြီး​က “​အစ္စရေး​လူမျိုး​၏​ဘုရားသခင်​ထာဝရဘုရား​သည် မိမိ​လူမျိုး​တော်​တို့​အား အေးချမ်းသာယာ​စွာ​နေ​စေ​မည်​။ ကိုယ်တော်​သည်​လည်း ဂျေရုဆလင်​မြို့​တွင် အစဉ်​စံနေ​တော်မူ​မည်​။ လေဝိ​အမျိုး​တို့​သည်​လည်း ကိန်းဝပ်​တော်မူ​ရာ​တဲ​တော်​နှင့် အမှု​တော်​ထမ်းဆောင်​ရာ​တွင်​သုံး​သော တဲ​တော်​၏​အသုံးအဆောင်​တို့​ကို သယ်ဆောင်​ရ​တော့​မည်​မ​ဟုတ်​”​ဟု မိန့်ဆို​၏​။ ထိုသို့ဖြင့် ဒါဝိဒ်​မင်းကြီး​၏​နောက်ဆုံး​အမိန့်​တော်​အတိုင်း အသက်​နှစ်ဆယ်​နှင့်​အထက် လေဝိ​သားမြေး​တို့​ကို စာရင်းကောက်​ကြ​၏​။ သူ​တို့​၏​တာဝန်​မှာ အာရုန်​၏​သားမြေး​များ ထာဝရဘုရား​၏​အိမ်​တော်​တွင် အမှု​တော်​ထမ်းဆောင်​သောအခါ ဝိုင်းကူ​ပေး​ရန်​ဖြစ်​၏​။ အိမ်​တော်​ဝင်း​၊ အိမ်​တော်​အခန်း​များ​၊ သန့်ရှင်းရာဌာန​ရှိ​အရာ​အားလုံး သန့်ရှင်းသပ်ရပ်​အောင်​ဆောင်ရွက်​ရန်​နှင့် ဘုရားသခင်​၏​အိမ်​တော်​အမှု​ကို ထမ်းဆောင်​ရန်​အတွက်​ဖြစ်​၏​။ ဆင့်​ထား​သော​ရှေ့တော်မုန့်​၊ ဘောဇဉ်ပူဇော်သက္ကာ​ဖို့ အကောင်းဆုံး​ဂျုံမှုန့်​၊ တဆေးမဲ့​မုန့်ကြွပ်​၊ ဒယ်ပြား​နှင့်​လုပ်​သော​မုန့်​၊ ဆီ​နှင့်​ကြော်​သော​မုန့် စသည်​တို့​နှင့် ချိန်ခွက်​အရွယ်အစား အမျိုးမျိုး​တို့​ကို တာဝန်ယူ​လုပ်ဆောင်​ရ​၏​။ နံနက်တိုင်း ထာဝရဘုရား​၏​ကျေးဇူး​တော်​ချီးမွမ်း​ဖို့ ရှေ့​တော်​တွင် ရပ်​နေ​ရ​သကဲ့သို့ ညနေခင်း​တွင်​လည်း ထိုနည်းတူ​ပြု​၏​။ ဥပုသ်နေ့​၊ လဆန်းနေ့​၊ သတ်မှတ်​ထား​သော​ပွဲတော်​နေ့​များ​တွင် ထာဝရဘုရား​ထံ ပူဇော်​ရ​မည့်​မီးရှို့ရာယဇ်​အားလုံး​ကို စီရင်ထုံးဖွဲ့​ထား​သော​အရေအတွက်​နှင့်အညီ ထာဝရဘုရား​ရှေ့​တော်​၌ ပုံမှန်​ပူဇော်​ရ​၏​။ ထိုသို့ သူ​တို့​သည် တွေ့ဆုံစည်းဝေးရာ​တဲ​တော်​၌​ဆောင်ရွက်​ရ​မည့်​အမှု​များ​၊ သန့်ရှင်းရာဌာန​၌​ဆောင်ရွက်​ရ​မည့်​အမှု​များ​၊ အာရုန်​၏​သားမြေး​နှင့် သူ​တို့​၏​ဆွေမျိုးသားချင်း​တို့​အတွက်​ဆောင်ရွက်​ရ​မည့်​အမှု​များ စသည်ဖြင့် ထာဝရဘုရား​၏​အိမ်​တော်​အမှု​ကို လိုက်နာဆောင်ရွက်​ကြ​ရ​၏​။

နားထောင်ပါ။ ရာဇဝင်ချုပ်ပထမစောင် 23