Mak 8
8
Jizọs Fị́nyẹ Pa Túminị́ Oyia Ndẹ́ẹ Pịrịm
(Mat 15.32-39)
1Mịma ḅọ́rọ́, ḅọlọgha sáá ḅụ, jẹ́ mánámāná túminị́ ḅo kobirim. Nnị ma mịnị ḅẹ́ fị́nyẹ ḅẹ́ fị́nyẹ nyanagha sáá, Jizọs ori ọḅụduaapụ sịị ọ ḅụ pịrịm sị ḅẹẹ, 2<<A tọ́rụ́kụrụkụ́rụ́ nyána mịnaapụ ma pịrịarị tegó, mịị tẹ́rẹ́ a dii nnị irị na fịnịmam, sị mị́sa ḅẹnyẹ ḅẹnyẹ nyanagha n fị bẹnyẹ. 3A ḅọ́rọ́ n fịrịma so so, fị́nyẹ pa n pịrịgha pa, n fụmbẹm asọogbo, tegó nna ḅụ jẹ́apụ ḅọlọ angaá saghịḅom.>>
4Ori ọḅụduaapụ o gbilam, <<Mịị elesiri ma ḅụ tumḅọ tọrọ́ pa ine mịnaapụ ma fúrōbii bẹ fịtúrú fẹ ḅo bẹ?>>
5Jizọs warị n gbíla? <<Ọ nyáná fịtúrú tọ́rọ láa.>>
Nnị paghram, <<Sọ́nọ́ma fịtúrú kpo.>>
6Ọ warị túminị́ ma mịẹsị n kiri kpọrọfịnị. Anịsáa ọ warị sọ́nọ́má fịtúrú kpo ma saghị akị warị ịmịẹḅam pa Tamuno ḅẹ́, warị anị puu, pa ori ọḅụduaapụ pịrị si nnị anị die túminị́ ma pịrị; ori ọḅụduaapụ ma warị pịghị ọkọ mịẹ. 7Nnị pịghị kálá nji nyẹ nyánam, Jizọs mịma ḅụ sọ ịmịẹḅam ḅẹm, warị ori ọḅụduaapụ ḅẹ́ ḅẹẹ nnị anị die túminị́ ma pịrịị. 8Kị́nị́mamgba fị fúrōbimam jẹa nyẹ pịghị kọọ, anị ngaa fịnị owiapụ ma oyia ndẹ́ẹ lam. 9Ori ọḅụduaapụ ma warị sọ́nọ́ma nkana bi fịtúrú gbalaḅo kọnyẹ́ ḅụ. Jizọs túminị́ ma fịrịmam sị n soo 10warị anị gbẹ́rẹ́kirikiri árụ́ ḅụlọ ori na ori ọḅụduaapụ warị Dalimanuta ama párángáa muu.
Farisiiapụ Ma Ḅẹm Nnị Ḅụ́gbérépuma Nyẹ Árị Dọ́ghụm
(Mat 16.1-4)
11Jẹa Farisiiapụ Jizọs damaḅom, warị saghị ori na ḅẹ́rẹ́fangalama. Nnị dia tuú ọ pịrị dọ́ghụm sị o koro, anịgo nnị ọ ḅẹm ḅẹ́ ọ ḅụ́gbérépuma fịrịnwangị pa die ḅẹẹ, o mịẹarịnyẹ ma Tamuno ḅụḅẹ́lẹm. 12Jizọs warị iku ịnyọ́sárá, warị ḅẹẹ, <<O tegó ọmịnị mị éné bẹapụ ma ḅụ́gbérépuma nyẹ gbilaarị? Ọkọfịnị nyẹ́ ofori a dugho ọ pịrịm mịnaapụ ma n gbẹ́rẹ́ ilíghíma nyẹ sọ arịbịghaa.>> 13Ori n warisom, sima árụ́ ma ḅụlọ warị sáḅá kóró isi párángáa muu dappa ma ḅụ.
Farisiiapụ Fịturu Sughumaarị Nyẹ
(Mat 16.5-12)
14Ori ọḅụduaapụ bieḅárámam sị kara bẹ fịtúrú akịịghaa, gbẹ́rẹ́ fịtúrú kpo ngéré anịị n nyánányẹ árụ́ ma bie. 15Jizọs warị n ḅẹ́, <<Ọmịnị ọ ḅụ ẹbị, ọ pịghị ọ tọ́rụ findi warị Farisiiapụ ma fịtúrú sughumaarị nyẹ na Hẹrọd fịtúrú sughumaarị nyẹ pịrị.>>
16Nnị warị saghị n ḅụ na bịpịḅẹ́lẹ́ma ḅẹẹ, <<O go mịma dughoarị nyẹ ọ́ ḅẹ́ wa gbẹ́rẹ́ fịtúrú sọ nyanagha gosi.>>
17Jizọs nimim n dughoarị nyẹ, warị n gbíla, <<Ọ tegó fịtúrú nyanagha bịpị ḅẹ́lẹ́maarị? O nimigha, na ọ pịghị akanyaḅogha? Ọmịnị ọkọ pa itila ọmịna kóróma ḅụ? 18Ọ tọ́rụ́ nyánam, ọmịnị ine nyẹ arịgha? O biri nyánam, ọmịnị ine nyẹ naagha? Ọ pịghị nyẹ pa biekórómaḅogha. 19A sọ́nọ́ a fịtúrú kpo ma puu túminị́ oyi mmẹẹ́ a ndẹ́ẹ oyia si findi ma pịrị sáá, ọmịnị ndẹ́ẹ a nkana táa bimaa kọnyẹ́ ḅụ?>>
Nnị ọ pagharam ḅẹẹ, <<Oyi mmẹẹ́ findi.>>
20Ọ pịghị jẹ́ pa n gbilam, <<A Sọ́nọ́ma fịtúrú kpo ma puu túminị́ oyia ndẹ́ẹ pịrị sáá, ọmịnị ndẹẹ́ a nkana taa bima kọnyẹ́ ḅụ?>>
Nnị pagharam <<Sọ́nọ́ma.>>
21Ọ warị nnị gbíla ḅẹẹ, <<Na ọ pa akanyaḅogha?>>
Jizọs Tọ́rụ́pụụ́ Owitụ́wọ Gwọm Bẹtịsaida Ḅụ
22Nnị ḅo Bẹtịsaida lam, túminị́ warị anị ngaa gbẹ́rẹ́ tọ́rụ́pụ owitụ́wọ akuoo Jizọs pịrị, warị ọ tẹ́ghẹ̄ ḅẹẹ, o ḅara pa ọ lamaa. 23Jizọs ḅara ḅụ tọ́rụ́pụụ́ owitụ́wọ ma akịm sị ọ pa kẹ́lẹ́ ama ma ḅụ darịmam. Ori fị́lā pa ọ tọ́rụ́mgbọlụ sara fama sáá ọ́ ḅara pa owitụ́wọ ma ḅụ gbánām warị o gbíla ḅẹẹ, <<Ịrị ine ḅẹnyẹ ḅẹnyẹ arịị.>>
24Owitụ́wọ ma tọ́rụ́ saghị ọgọnọ dighim warị ḅẹẹ, <<A ine túminị́ árịarị kụ́ma nnị sị́ kịkam sị nwángịma ḅọ́rọ́arị.>>
25Jizọs pịghị mmẹẹ́ kárámá ma sa ḅara pa owitụ́wọ ma tọ́rụ́mgbọlụ lámam. Mị́sa ngaa nyẹ ma owitụ́wọ ma kpọma dighim warị saghị nyẹ árị, ọ pịghị ibiḅara pa nyẹ mamgba arịm. 26Jizọs ọ fịrịma sọm warị ólóghó sua ọ pịrị ḅẹẹ, <<Mịnị jẹ́ pa anị káláma ma muu ma.>>
Pita Jizọs Gboloma Sị O Dugho Págháma Nyẹ
(Mat 16.13-20; Luk 9.18-21)
27Anịsáa Jizọs na ori ọḅụduaapụ warị sọọ Sizariya Filipai ḅụ fịnị káláama mamgba múm. Asọogbo ori n gbilam ḅẹẹ, <<O dugho i pịrị, túminị́ dugho ḅẹ́ ịrị tụọ?>>
28Nnị o pagharam ḅẹẹ, <<Jẹ́apụ ḅẹm ḅẹẹ ịrị anịị Jọn Mingi Saraḅọ. Jẹ́apụ ḅẹm ḅẹẹ, ịrị anịị Elaija, jẹ́apụ pịghị ḅẹm, ịrị ikiakoroapụ ma ḅụ gbẹ́rẹ́ḅọ.>>
29Ọ warị n gbíla ḅẹ́, ọmịnị <<Ọ ḅẹ́ mọ bẹ irị tụọ?>>
Pita pagharam, ḅẹẹ, <<Ịrị anị Mesaya ma.>>
30Jizọs warị ólóghó sua n pịrị ḅẹẹ, <<Ọmịnị i gbólómanyẹ dugho bẹḅọ bẹḅọ pịrịma.>>
Jizọs Ori Tọ́rụ́siarị Na Ori Fịị Gbolomanyẹ Dughom
(Mat 16.21-28; Luk 9.22-27)
31Anịsáa Jizọs warị saghị nyẹ pa ori ọḅụduaapụ die ḅẹẹ: <<Tumḅọ yii Tụ́wọ ma opuma tọ́rụ́siarịbẹm, sẹ́nịapụ na igwagwaalaapụ na ólóghó nyẹ́dieapụ ma ọ sịghịbẹm. Nnị ọ́ ḅaabẹm, kụ́ma ọ pịghị fịị ḅụ saghị sị dumabẹm tẹ́rẹ́ a dii ḅọ́rọ́ sáá.>> 32Ọ mịma mịẹm sị anị nna ḅụ kóró, Pita Jizọs sị angaá pịrịm warị saghị igani ọ pịrịị.
33Kụ́ma Jizọs pịghịm sị tọ́rụ pa ori ọḅụduaapụ dighim, warị igani Pita pịrịị ḅẹẹ, <<Ị́yẹ́ ọ ḅụ ḅọrọọ Satanị! Ị́yẹ́ kóróma Tamuno ḅara saghị ḅogha kụma túminị́ ojumẹnị!>>
34Jizọs warị túminị́ kpo ma na ori ọḅụduaapụ sị ọ ḅụ pịrị ḅẹẹ, <<Ḅọ́rọ́ ọmịnị ịrị na asọ nwángị bi, ọmịnị ọmịna ḅụ pa bieḅárámabẹm, ọmịna mgbẹsẹ sị dighiákị sị ị dua. 35Amịna duma dụapághámaḅo dọghụḅọ anị famabẹm, kụ́ma ḅọ́rọ́ ị ị́yẹ́ duma fama i sịbị goo na ibi oku ma goo, ị anị dụapághámaḅobẹm. 36I tẹ́ sọnyẹ nyána bẹ ḅọ́rọ́ i tuminikiri gbọrụ ma nyána, kụ́ma, ị́yẹ́ duma fama? Ọkọfịnị nyẹ ibighaa. 37Ị pa pịrịbẹnyẹ ofori sị pa ị́yẹ́ duma dima akị 38I ḅọ́rọ́ i dighi ḅụ́gịrịrị na pịghị ị́yẹ́ dienyẹ ma dighi ḅụ́gịrịrị, mị Tamuno nimigha na pịghị sisịbịbie éné ma ḅụ, anịsáa Tumḅọ yii Tụ́wọ ma sọ i dighi ḅụgịrịrịbẹm ọ ḅoo bẹ sáá ọ Daa ma ipine ḅụ ori na ori tọ́ntọ́ sookumuapụ.>>
လက္ရွိေရြးခ်ယ္ထားမွု
Mak 8: IBY
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2024 Luke Initiative for Scripture Translation