Mak 10
10
Jizọs Yaasịghị Gbolomanyẹ Diem
(Mat 19.1-12; Luk 16.18)
1Anịsáa Jizọs anị ngaa ma warisom warị Judiya párángáa ḅọ́rọ́ akị mú Jọdan tọ́rụ ma sáḅá. Tọgha túminị́ pịghị sima ọ damaḅom ọ warị nyẹ pa n die ori mịẹmịẹnyẹ fịnị ḅara. 2Jẹa Farisiiapụ dia tuú pa ọ pịrịm, warị o gbíla ḅẹẹ, <<Dugho wa pịrị, ólóghó ma anị mini ḅẹ́ owitụ́wọ amịna taa sịghị?>> 3Jizọs warị pịghị gbíla nyẹ pa n págháraa ḅẹẹ, <<Mosis ọ tẹ́ ólóghó pa ọ pịrị?>> 4Nnị ọ pagharam ḅẹ, <<Mosis ólóghó pịrịm ḅẹ́ n yaasịghị birinụ́nụ́ ábálálá gịẹ ọ taa pịrị sị a fịrịma págháma.>>
5Jizọs n ḅẹm, <<Mosis mị ólóghó ma gịẹ ọ pịrịm, tegó ọmịnị opuma ḅụdam nyẹ pa ọ die ḅụ. 6Kụ́ma parị parị sáá, n tuminikiri ma tẹ́mẹ́ sáá, Tamuno owi na ẹ́rẹ́ na ḅụ n tẹmẹm Tọ́ndiri ma dugho ḅara. 7Anị ẹrẹ́sị owitụ́wọ ọ daa na o nyingi wárịsóbẹm sị ọ táa na gboloma 8nnị mmẹapụ ma ḅo gbẹ́rẹ́nyẹ sọ́bẹm; anịgoo nnị mịnị mmẹapụgha, kụ́ma gbẹ́rẹ́ḅọ. 9Tamuno mịẹ gboloma maá nyẹ, tumḅọ anị puuama dọ́ghụ́ma.>>
10Nnị pịghịma warị muu sáá ọḅụduaapụ ma mị ḅẹ́rẹ́ gbolomanyẹ pa Jizọs gbilam o dugho n pịrịm ḅẹẹ, 11<<Amịna táa sịghịḅọ sị muu jẹ́ ọ́rụ́ḅọ yaa, amadọghụ siinyẹ mịẹ ọ táa ma pụ́nụ́mam. 12Anị gbẹ́rẹ́ ḅara ma a dee sịghị ọ́rụ́ḅọ sị jẹ́ owiḅọ yaa amadọghụ ọ́rụ́ḅọ sọm.>>
Jizọs Káláawọ Karịibimam
(Mat 19.13-15; Luk 18.15-17)
13Jẹapụ awọ akuoo ḅoo Jizọs pịrịm ḅẹ́ ọ ḅara pa nna lama, kụ́ma ori, ọḅụduaapụ ma igani túminị́ ma pịrịm. 14Jizọs mịma árị ḅo sáá anị ọ tẹ́mẹ́ igánimam, ọ warị ori ọḅụduaapụ ma ḅẹẹ, <<Awọamaapụ ma wáriso sị nnị i damaḅo ọmịnị n kikima tegó Tamuno Ásẹ́mẹ́kiri ma fịnị nwọfịnịapụ ma pịrịm. 15A karakárányẹ ma dugho ọ pịrịm, ḅẹ́ Tamuno Ásẹ́mẹ́kiri ma daákịghaḅọ kálátụwọ ḅara ine jẹ́ éné jẹ́ éné anị bie sọbịgha.>> 16Anịsáa ọ warị awọamaapụ ma akị ọ ḅarabie, ọ ḅara pa ọ́rụ́ḅọ ọ́rụ́ḅọ ḅụ gbánā warị n karịibima.
Ngọ Nyáná Owitụ́wọ
(Mat 19.16-30; Luk 18.18-30)
17Jizọs saghị jẹ́ pa nwángị sáá gbẹ́rẹ́ owitụ́wọ mangị ọ damaḅom, warị o tọ́rụ́kuu ẹkpẹrẹkị sị o gbíla ḅẹẹ, <<Ibi Nyẹ́dieḅọ, a tẹ́ mịẹbẹ sị duma gbámásó nyáná?>> 18Jizọs ọ pagharam, <<Ị tegó ibiḅọ pa i sịị? Ibiḅọ ofori Tamuno siima. 19I kọkọ ólóghó mamgba nimi: <Kị́nị́ ḅáama; amadọghụma; fúrúma; tumḅọ nimigha nyẹ pa n ḅo sịbị gbánāma; kị́nị́ inómámá; osigha pa i daá na i nyingi pịrịị.> >>
20Owitụ́wọ ma ḅẹm, <<Nyẹ́dieḅọ, saghị a ịrụ sáá éné éné, amịna ólóghó mamgba kokom.>>
21Jizọs ḅẹlẹma tọ́rụ́ pa dada o dighim, warị ḅẹẹ, <<Gbẹ́rẹ́nyẹ ngéré kọọm. Muu ị nyánányẹ mamgba dẹrị sị igbii ma pa igonyiapụ pịrịị, anịsáa anịị i sobie ngọ ma nyáná bẹnyẹ; anịsáa ḅo sị i duaa.>>
22Owitụ́wọ ma mịma náa sáá, ọ tọ́rụ́fụ́rụ́mam, ọ warị tẹ́mẹ́sii pa soo, tegó ori opuma ngọ kọm.
23Jizọs ori ọḅụduaapụ ma dighi ikélémam warị n ḅẹẹ, <<Anị kpọma ḅụdábẹm ngọ nyánáapụ Tamuno Ásẹ́mẹ́kiri ma sọọ!>>
24Ẹ́gẹ́rẹ́ma kpọma ori ọḅụduaapụ ma jighemam, kụma Jizọs pa ẹ́gẹ́rẹ́arị warị ḅẹẹ, <<Ị́yẹ́ awọ, anị ḅụ́da ḅara sị Tamuno Ásẹ́mẹ́kiri ma sọọ. 25Anị ḅụdaḅaa ngọ nyánáḅọ pịrịm sị ọ Tamuno Ásẹ́mẹ́kiri ma sọọ, anịmanakaragha anị sárásáráḅa kameli pa sị nama ma pịrịm si anị alaga tọ́rụ́ ḅụ ḅọ́rọ́.>>
26Mịị ẹ́gẹ́rẹ́ ma ori ọḅụduaapụ ma tọ́rụ́ bulubulumam nnị warị saghị jụghọ jụghọ gbíla, <<Anịsáa tụọ ine dụaḅọ́rọ́ma nyána bẹ?>>
27Jizọs tọ́rụ pa nnị ọgọnọ gbánām warị págháraa ḅẹ́, <<Mịma túminị́ ḅụ, anịị ine mịẹbịgha nyẹ, kụ́ma Tamuno ḅugha, nyẹ gonyẹ́ gonyẹ́ Tamuno ḅụ anị sárásárám.>>
28Anịsáa Pita warị pụghọ saghị ẹ́gẹ́rẹ́ ḅẹ́, <<Dighi wa nyẹ gonyẹ́ gonyẹ́ warisomam sị ị dua!>>
29Jizọs n pagharam, <<Karakárányẹ, a pịghị dugho ọ pịrịm ḅẹ́, ọmịna ḅụ wárị warisoapụ anịgha minaowiapụ wáriso anịgha mịná ẹ́rẹ́ámáapụ warisoapụ anịgha nyingiapụ anịgha daapụ anịgha awọamaapụ anịgha duakiri, i sịbị go na ibi oku ma gosi 30mịma nẹ́ngị nyẹ nyánábẹm, mịị tuminikiri ma ḅụ. Nnị sọ́nọ́ a si kiri nyánábẹm, warịị mịná owiapụ, mịná ẹ́rẹ́ámáapụ, nyingiapụ awọamaapụ na duakiri na pịghị tọ́rụ́siarị; mịị tuminikiri, pịghị ḅoarị tuminikiri nnị duma gbámásó nyánábẹm. 31Kụ́ma tọghaapụ mị́sa bịpịsuapụ ọḅụkọọbẹm, tọghaapụ mị́sa oḅụkọapụ bịpịsụbẹm.>>
Jizọs Tẹ́rẹ́ Kárámá Sa Pa Ori Fịị Gbolomanyẹ Dughom
(Mat 20.17-19; Luk 18.31-34)
32Jizọs na ori ọḅụduaapụ mị́sa asọogbo imii, nwángị Jerusalem muarị. Jizọs nna ḅụ tórúku dam, ori ọḅụduaapụ ma anị n tọ́rụ bulubulumam; anịsáa oduarịapụ ma nna ḅáláfam. Jizọs warị pịghị jẹ́ pa ori ọḅụduarị oyi mmẹapụ findi ma sị angaá pịrị warị ọ ḅụ pághá bẹnyẹ dugho n pịrị. 33Ọ warị dugho n pịrị ḅẹẹ, <<O pughu, wa iwóo Jerusalem múuarị, nnị Tumḅọ yii Tụ́wọ ma saghị sịbịdaa igwagwaalaapụ na ólóghó nyẹ́dieapụ ḅárásua bẹnyẹ. Nnị fịị ḅẹ́rẹ́kọ siri kọọ o pịrịbẹm, sị ọ saghị Juughaapụ ma ḅarabie suabẹm, 34nnị ọ pa dẹrịnyẹ mịẹbẹm, n fị́lā pa ọ sárábẹm, o fomu, si pịghị ọ ḅá, kụ́ma tẹ́rẹ́ a dii ḅọ́rọ́ sáá, ọ fịị ḅụ saghịbẹm.>>
Jems Na Jọn Jizọs Ḅara Bi Nyẹ
(Mat 20.20-28)
35Anịsáa Jems na Jọn, Zebidi awọ Jizọs damaḅom warị ḅẹẹ, <<Nyẹ́dieḅọ, nyẹ imim wa bi sị ị mịẹ wa pịrị.>>
36Jizọs nnị gbilam, <<Anị tẹ́ nyẹ?>> 37Nnị pagharam, <<Ị ị́yẹ́ imine ọgọnọ kpọrọfịnị sáá ị́yẹ́ ipine ásẹ́mẹ́kiri ma ḅụ wa bim ḅẹ́ wa ịrị na kpọrọfịnị, gbẹ́rẹ́ḅọ ị́yẹ́ ámáḅara ngaa, isiḅọ ị́yẹ́ ẹ́rẹ́ḅara ngaa.>>
38Jizọs n ḅẹm, <<Ọmịnị o biiarị nyẹ nimigha. Ọmịnị ine a bie tọ́rụ́siarị mingi ḅuu ọmọngọ ma bie mingi ḅụ bẹ? Ọmịnị ine n pa i sara mingi sara bẹ?>>
39Nnị pagharam, <<Wamịnị inebẹm.>> Jizọs n ḅẹm ḅẹẹ, <<Ọmịnị karakáráma a ḅuu ọmọngọ ma ḅuubẹm ọ pịghị mingi sárábẹm n mingi pa i sara ḅara, 40kụ́ma a kụ́rọ nyanagha sẹ́lẹ́ ị́yẹ́ ámáḅara anịgha ị́yẹ́ ẹ́rẹ́ḅara kpọrọfịnị bẹḅọ Tamuno anịị mị kiri ma pa o tẹ́lẹ́ma pịrịapụ pịrịbẹḅọ.>>
41Isi oyi ọḅụduaapụ anị gbolomanyẹ náa sáá, nnị warị Jems na Jọn dighi bieoḅu. 42Jizọs warị nnị kị́nị́mamgba sịị ọ ḅụ pịrị warị n ḅẹẹ, <<Ọ kọkọ nimi ḅẹ́ n pa táarịapụ ma siiapụ ma kụ́rọ nyánam n táarị Juughaapụ ma ḅụ, nna sịbịdaapụ pịghị kụ́rọ mamgba nyánam. 43Mịma anị ọkọfịnị ḅara ọkọfịnị ḅara anị ọkọ fịnịgha ọmịnị ogboku bie ọmịna bie dụḅa dọghụḅọ fịnịfịnị, n ḅo kọọapụ ma ómóniḅọ sọọ. 44Ḅọ́rọ́ ọmịna bie bịpịsụ dọghụḅọ fịnị fịnịị kị́nị́mamgba omoniḅọ dighibẹm 45Ḅẹẹ Tumḅọ yii Tụ́wọ ma sọ ḅogha ḅẹẹ túminị́ fịrịnwangị ọ pịrị, o ḅoo fịrịnwangị túminị́ pịrịm, pịghị ori duma pa pịrị sị túminị́ dụaḅọ́rọ́ma.>>
Jizọs Tọ́rụ́pụ Batimiyọs Gwọm
(Mat 20.29-34; Luk 18.35-43)
46Nnị Jeriko ḅom, Jizọs na ori ọḅụduarịapụ na tọgha túminị́ soarị sáá, gbẹ́rẹ́ tọ́rụ́pụ nyẹ biiḅọ Batimiyọs pa sịḅọ, Timiyọs tụ́wọ kpọrọfịnịarị asọogbo ma ḅụ. 47O ḅo náa sáá ḅẹ́ ḅọ́rọ́arị ḅo anịị Jizọs Krais Nazarẹtị ḅụ saghị ḅoḅọ, ọ saghị ilúghum, <<Jizọs! Deviti tụwọ! Lolomakúkúbie nyáná i pịrịị!>> 48Tọghaapụ igani ọ pịrịm ḅẹẹ ọ bịpị gbẹ́ẹ̄, kụ́ma anịsáa, anịị ọ pịghị pụghọ saghị ilúghuḅa nyẹ, <<Deviti tụ́wọ, lolomakúkúbie nyáná i pịrị!>> 49Jizọs biasẹm, warị ḅẹẹ, <<Ọ sịị.>> Nnị warị tọ́rụ́pụ owitụ́wọ ma sịị, ḅẹẹ, <<Bieḅẹlẹ! Saghị sẹ! Ori ị sịịarị.>> 50Ọ warị ọ pa ḅụ gbẹ́ẹ̄ bịtẹ ma gbi ḅuuma sị dosi muu Jizọs damaḅo. 51Jizọs o gbilam, <<I dọghụ mọ ḅẹ́ a tẹ́ mịẹ ị pịrịị?>> Tọ́rụ́pụ owitụ́wọ ma warị ọ págháraa, <<Nyẹ́dieḅọ, a pịghị sima nyẹ́arị dọ́ghụm.>> 52Jizọs ọ ḅẹm, <<Soo, ị́yẹ́ minini ị gwọmam.>> Anị gbẹ́rẹ́kirikiri ori ine nyẹ́ arịm sị Jizọs dua nwángị asọogbo ma ḅụ.
လက္ရွိေရြးခ်ယ္ထားမွု
Mak 10: IBY
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2024 Luke Initiative for Scripture Translation