Matiə 21
21
Mɔ̃ Jeju n lonɩ Jerujalɛm
(Mar 11:1–11; Lu 19:28–40; Jã 12:12–19)
1Ɔbɔɔkɛ wɩ‐n wɔrɔnɩ Jerujalɛm a dã Bɛtɩfaje khʋra, gɔ̃gʋ̃ɔɔkɛ hananɩ olɩvɩ thɩra, le Jeju thɔ̃ ɔɔ kpãkpãadara yenyɔ a so war: 2Nɩ jala dɩɩraakɛ nɩ pɛnɩ ƴɩɛ. Na yɩrɛ dapaara kũkə̃ nɩɩ dɩ wa li na daɓolʋ. Nɩ thʋba a kpa wɩ ɛna ha mɩ. 3Dɩ a tibil bule ni thɩ̃ɛ, nɩ sʋɔraa ayɛ: Kɔ̃tɩn n ƴaalɛ; dɩ dapaara a na sɩ warɛ dɩ na kpa na ɩna. 4Dɩ thɩ̃ɛ thakɛ daan gɩ cʋʋ gɩrɛ Thãgbaa bobon sonɩ gɩ ha oti.
5“Nɩ sɔ Sɩyɔ̃dara ayɛ:
Nɩ hɩnɛ anɩ fãgadaar n pɔr nɛrɛra.
Hɛlɛlɛ fɩlɛ hiirəəre dɩ jʋʋnna kũkə̃ nɩɩ,
kũkə̃ ɓolʋʋkɛ dɔnɩ thɔ̃ do nʋmɩ bi.”#Jak 9:9
6Dɩ kpãkpãadara jaal a cʋʋ gɩrɛ Jeju yɩnɩ wɩ cʋɛ. 7Dɩ wɩ kpar kũkə̃ nɩrɛ na daɓolʋ a pɔna, a gba awɩ kẽkẽsɔ a dɛ̃ɛ war, sa cʋʋ Jeju dɩ jʋʋn. 8Dɩ tibil jɔjʋɔ n belle awɩ kẽkẽ kɔ̃tɩ̃sɔ dɩ wa‐n pɛ hʋɛra, sɩ wɛ cɩ thɩr jɛ̃ɛ dɩ wa‐n pɛ hʋɛra. 9Dɩ tibil jɔɔle kʋʋlɛ Jeju ƴɩɛ, wɛ na‐n kpaan khiro, dɩ wa‐n hulenasɔ ayɩ: “Ojana, Davɩdɩɩ Bikuun. Bɔnanɛ n hana ʋrɛraakɛ n ɩnanɩ gɩrɛ na Kɔ̃tɩnɩ i. Ojana thãgbara ƴũ pər.”#Khɩ 118:25–26
10Ɔbɔɔkɛ Jeju lonɩ Jerujalɛm, dɩɩ fɛʋ kɔɔ tutugore, dɩ wa‐n bule ayɩ: Amɛɛ tibil ca ha olela ya fɛ? 11Dɩ tibil jɔɔle birse wi ayɩ: Jeju Thãgbaa bobon gɩɩkɛ thɛnɩ Najarɛtɩɩkɛ dɔnɩ Galile dɩɩ.
Mɔ̃ Jeju phʋɔlnɩ Thãgba fʋɔr cɔ kɔ̃tɩ̃ɩ
(Mar 11:15–19; Lu 19:45–48; Jã 2:13–22)
12Dɩ Jeju lʋʋn Thãgba fʋɔr cɔ kɔ̃tɩɩna. A weele wɩrɛ fɛʋʋkɛ n dolonenɩ thɩ̃ɛsɔ, na wɩrɛ n thɛnɩ thɩ̃ɛ le Thãgba fʋɔr cɔ kɔ̃tɩ̃ bɩnɔ, a tʋɔrna war debidarasɔɔ tabalsɔ a kpɛɛ, na kʋlã puu dolõdaraa too pasɔ, 13sa so war: Mee gɩ kherere Thãgbaa sɛbɛra ayɩ: “Mɛr Thãgbaa cɔ wa‐n we mɛr Thãgbaa fʋɔr pa”, sɩ dɩ ne wer cʋʋ gɩ dɩɩ do yu hɔ̃hʋɔldaraa wɔ̃ pa.#Eja 56:7; Jer 7:11
14Dɩ yarasɔ na nɛ kʋɛdara pɔr le Thãgba fʋɔr cɔ kɔ̃tɩɩna, dɩ Jeju kpɛɛ wɩ. 15Sɩ nĩkhii fʋlɛlɛ bonɩ jidaar kɔ̃tɩnasɔ, na jɔfʋ dɩɩrdarasɔ mɔ̃ wɩ yɩnɩ nɔ kpaa thɩ̃ɛsɔɔle a‐n cʋʋnɩ, na mɔ̃ bɩsanasɔ n huleni le Thãgba fʋɔr cɔ kɔ̃tɩ̃ bɩnɔ ayɩ: 16Ojana, Davɩdɩɩ Bikuun. Dɩ wɩ buleele: Fɩ nɩɛrɛ gɩrɛra wɩ‐n sonɩɩ? Dɩ Jeju birse wi: Ɔɔ, mɩ nɩɛrɛ. Sɩ a bire bule wi: Na kɔɔ yɩ ga thɩmɩɩ caakɛra Thãgbaa sɛbɛra kpɩɩaa ya? Mee gɩ sor: “Fɛr Thãgba n teere khɩɩrɛɛkɛ thɛnɩ bɩsã yɩrasɔ na ilẽ mamasɔɔ nɔra.”#Khɩ 8:2 17Agɩpɩ a faa wɛr sa the dɩɩra a jal Betanɩ, kãkɛ a cɔnɩ.
Thɩr khonanɛɛkɛ khenɩɩ thɩmɩɩ
(Mar 11:12–14, 20–24)
18A dɩɩ kɔɔ wɩl, mɔ̃ Jeju kɛrnɩ da‐n bir le dɩɩra, kɔmɛr fʋʋrɛ. 19Dɩ mɔ̃ a yɩnɩ thɩr khonanɛ hʋɛra, a gbaar pɔ, sɩ aa yɩɩraa thɩ̃aˈ, fa haar gɩ dɩbara. Dɩ mɛ̃ Jeju so thɩrʋʋlera ayɩ: Fa se yuurakɛ bã. Dɩ dapaara thɩrʋʋle khi. 20Mɔ̃ kpãkpãadara yɩnɩ thɩ̃ɛ thale, nʋɔ kpaa wɛr dɩ wɩ so aa: Mɔ̃ thɩrʋʋle fʋ sa khi dapaara thale ya fɛ? 21Dɩ Jeju birse wi: Sobɔr mɩ so nar, ado nɩ hananɛ ha pɛrɛ sɩɩ do na‐n baalɔaˈ, ga do gɩrɛ dananɩ thɩrʋʋkɛ dɩbara na cʋaˈ, sɩ adorakɛ na so gɔ̃gʋɔnaakɛ ayɩ: Ələ kɩɛr a je pal lanyʋɔnna ga cʋʋrɛ.#Mat 17:20; 1 Kor 13:2 22Dɩ thɩ̃ɛ wo thɩ̃ɛɛkɛ na bɩɛlnɩ Thãgbara na ha pɛrɛ, na yɩ gɛr.
Mɔ̃ Jeju hananɩ hʋɛ
(Mar 11:27–33; Lu 20:1–8)
23Dɩ Jeju gbaar jal lõ Thãgba fʋɔr cɔ kɔ̃tɩɩna, dɩ ɔbɔɔkɛ a hanɩ da‐n dɩɩr tɩbɩla thɩ̃ɛ, bonɩ jidaar kɔ̃tɩna na tɩbɩlaa kɔ̃tɩ̃sɔ pɔr a bulee ayɩ: Ka hʋ caakɛra fɩ hananɩ dɩ fa‐n cʋʋna thɩ̃ɛsɔɔkɛra the, dɩ amɛ hana fɩ hʋɛɛkɛra? 24Dɩ Jeju birse wi: Ma bule ner mer dakha thɩ̃ bɩɛl. Ado nɩ birse mi, mɛrɛ dakha ma so narɛ hʋ ca ʋrɛ mɩ hananɩ, dɩ ma‐n cʋʋna thɩ̃ ca gɩrɛsɔra. 25Jãa yɔ kpɛɛ, ka gɩ the? Thãgbaa dʋɔ gɩ yaa, tɩbɩlaa pa gɩ the? Dɩ wɩ mar dɩ wa‐n bana kha awɩ hasɔ ayɩ: Ado sɩ tu wo ayɩ: Thãgbaa dʋɔ gɩ the, a na bule ser nayɩ, dɩ anye dɔ kɩrʋ dɩ sa kɔɔ pɛ ɔɔ thɩmɩɩ haara? 26Dɩ ado sɩ tu wo ayɩ: Tɩbɩlaa pa gɩ the, sa ˈlɛr sor na tibil jɔɔkɛ gɩdonɩ tɩbɩla fɛʋ kɔɔ gbaar Jã dɩ do Thãgbaa bobon. 27Dɩ gɛr gɩ dɩ wɩ birse Jeju: Sa jaˈ. Dɩ a so warɛ dakha ayɩ: Dɩ a thale gɩ, ma so nar mer ka mɩ yɩnɩ hʋɛ dɩ ma‐n cʋʋna ga thɩ̃sɔɔkaˈ.
Sokpaa bikona yenyɔra
28Mɔ̃ nɩ‐n kpɩɛr? Kũu bɩɛl gɩ a kɔɔ hana bikona yenyɔ, dɩ a sor cacadaarra ayɩ: Ɩ̃ bɩsã, jala nĩ lɔɔ a kʋlɛ mɩ. 29Dɩ birsee: Ma jalaˈ; agɩpɩ dɩ debi kpɩɛrɛ sa jal. 30Dɩ bir so balanyɔdaarra ɔmɛna. Dɩ birsee: Kɔ̃tɩn, ma jaal, sɩ aa jalaˈ. 31Wɛr yenyɔraale, ʋmɔ̃ cʋɛ ɔɔ thɩɩ tuur? Dɩ wɩ birsee: Cacadaar gɩ. Dɩ Jeju so war ayɩ: Sobɔr mɩ so nar, war gbadara na bɔdɛlasɔ, wɛr fien kʋʋl nɩ ƴɩɛ dɩ wa‐n lõ Thãgba fãgadaarɩ dɩra. 32Gɩdonɩ Jã kɔɔ ɩnɛ anɩ pa a nɩ nar fɩl sar hʋɛ, sɩ na kɔɔ pɛ ɔɔ thɩmɩɩ haaraˈ; sɩ war gbadara na bɔdɛlasɔ wɛr pɩɛr ɔɔ thɩmɩɩ haar, sɩ nɛrkɛ kanɩ yɩ gɩ, na debirakɛ haar pɩpɩɩ paar sa pɛ ɔɔ thɩmɩɩ haaraˈ.#Lu 3:12; 7:29–30
Sokpaa nãkʋɔr hɩɩndarara
(Mar 12:1–12; Lu 20:9–19)
33Nɩ pɛ kɛ sokpa kpɩɩ nũu wo. Cɔdaar kũu bɩɛl gɩ, a kɔɔ cʋʋ nãkʋɔr a bã dãgbol diiro, a kpena dakha bi cɔrɔ paar sa mɩ bɛbɛr cɔ gbãa. Agɩpɩ dɩ gba nãkʋɔr hɩɩndara a pɛr wa‐n hɩnɛ ɓo, sa gba jal kpaar paar.#Eja 5:1–2 34Ɔbɔɔkɛ gɩ ɩnɩ dã bi khʋ̃ bɔɔ, a thʋɔn ɔɔ thɔ̃daarsɔ wɩ jala nãkʋɔr hɩɩndarara, a tea war nãkʋɔr thɩr be a pɔna. 35Sɩ nãkʋɔr hɩɩndaraalera fʋlɛlɛ thɔ̃daraale, a bɩɩr bɩɛl sa kʋ bɩɛl wo, sa dʋʋrna bɩɛl bokana. 36Dɩ a bire thɔ̃ wɩ̃ thɔ̃dara dɩ wɩ jɔ cacadaraale, sɩ nãkʋɔr hɩɩndaraalera cʋʋ wɛr otirə wo. 37Pɩpɩɩ paar dɩ thɔna war dɩphã ɔɔ bikuun sa so: Wa cʋrɛ ɩ̃ bikuun. 38Sɩ ɔbɔɔkɛ nãkʋɔr hɩɩndaraale ˈlaanɩ yɩ bikuun, wɩ mɩɩrɛ kha awɩ ha ayɩ: Ʋrɛɛkɛ na dʋɔn thɩ̃ hɩn, nɩ dɔ sɩ kʋʋ, sɩɩ do sɛr hɩna thɩɛna. 39Dɩ mɛ̃ wɩ fʋʋ a dʋna nãkʋɔr khuirə sa kʋʋ. 40Nɛnɛ̃ dɩphã, ado nãkʋɔr kɔ̃tɩn pɔ, anye a na cʋʋ nãkʋɔr hɩɩndaar ca wele? 41Dɩ wɩ birsee ayɩ: A na kʋʋrɛ te puule sɩ bʋɔ na fʋʋaˈ, sɩ a gba nãkʋɔr a ha nãkʋɔr hɩɩndaar kpɩɩsɔ wo, kɛ na khʋnanɩ be wa‐n haa ɔbɔɔkɛ ga ɩnɩ ga‐n se. 42Dɩ Jeju so war: Na kɔɔ hɩɩn gɩrɛ Thãgbaa sɛbɛ sonɩ yuuəə ya? Mee gɩ sor ayɩ:
“Bokaarɩkɛ cɔ mɛ kɔɔ bonɩ
debire a do go tɩ bokaar.
Sɩ Kɔ̃tɩnɩ pa thɩ̃ɛɛlera the,
dɩ sɩ yɩɛrɛ dɩɩ do sar thɩ̃ kɔ̃tɩ̃ɩ.”#Khɩ 118:22–23
43Gɛr gɩ dɩ ɩ̃ so nar ayɩwɔɔ: Thãgba na taa narɛ ɔɔ fãgadaarɩ dɩ na ha caarɩkɛ na‐n sɩɛnnɩ beekɛ na dɔnɩ Thãgba fãgadaarɩ dɩda. [ 44Dɩ tibil wo tibilikɛ na jenɩ bokaarraalera a na khaarɛ; sɩ ʋrɛɛkɛ bokaarɩlera na jironi ga cʋ̃banʋʋnɛ pɛrɛ pɛrɛ pɛrɛ.]
45Ɔbɔɔkɛ bonɩ jidaar kɔ̃tɩna na jɔfʋ bʋ dʋdarasɔ kɔɔ nɩɛnɩ sokpaasɔɔle, wɩ jɩrɛ dɩ wɛr Jeju kɔɔ so. 46Dɩ wɩ kɔɔ ƴaalɛ hʋɛ wɩ fʋʋra, sɩɩ do maar kɔɔ fʋɔn wɩ tibil jɔraale, gɩdonɩ wɩ gbaar Jeju dɩ do Thãgbaa bobon.
လက္ရွိေရြးခ်ယ္ထားမွု
Matiə 21: LOBIRI
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Burkino Faso 1985.