San Mateo 13
13
Milu' Jesús kwan nzhak or nzha'n men
(Mr. 4:1-9; Lc. 8:4-8)
1No zhë ze' nguro' Jesús le'n yo' ze' par ngwa Me ro' lagún; ze' nguzob Me. 2Por dox nayax men migan ze', nkë Jesús le'n tu bark, nguzob Me le'ne, no lë' rë men nzhin ro' nits. 3Orze' midi'zh Me nayax kwa'n lo rë men ze' kun pura kwent, nzhab Me:
―Bingole, tu wëlt nzha tu men, nzhaya'n lazh triu lo yuo. 4No or ngwache'ch xa'i, pla lazhe ngob le'n nez, ndao miyine. 5No más lazhe ngob lo yuo ke; lwega' ngulëne, per niyent be's yuo ze'. 6Or ngulen ngubizh, no or mina ngubizh nayi', mike'x ngubizhe por niyen luche; mibizhe. 7No ziplai ngob le'n ya yich, per or miro'b ya yich, ngala't ya yich ngabane, orze' ngute. 8Per ziplai ngob lo yuo wen, miro'be, no dox miza'i. Tu lazhe miza' tu gayo'i, xtu lazhe miza' chon gale, mbaino xtu lazhe miza' gal bichi'y. 9¡Chi lë' go mbine, bizobyek goi!
¿Kwan gab rë kwent re'?
(Mr. 4:10-12; Lc. 8:9-10)
10Orze' nguzubi rë men che'n Me lo Me par nzhab bixa':
―¿Chon nidi'zh go kun pura kwent tsa lo rë men?
11Orze' nzhab Jesús lo rë men che'n Me:
―Nabtsa go mila' Dios, ne go kwa'n naga'ch kwa'n kinu Dios plo nile' Dios mandad; per rë xa' ba', nangala't Dios ngane bixa'i, 12porke rë xa' kwa'n nzhakla zobyeke, mbaino le' rë kwa'n nidizha, rë xa' re' xa' nzhaknu Dios par más zobyek bixa'i; per rë xa' gat nzhaklat be's zobyek kwa'n nidizha, haxta che'p tsa kwa'n nile' xa' xigab ya nane la xa', per lë'i yubchi lo xa'. 13Kuze' midizha lo rë xa' ba' kun pura kwent tsa, par une bixa'i per nanganet bixa' kwane; mbaino par mbin bixa'i, per nangazobyekt bixa'i. 14Kuze', par yek rë xa' ba' nzha widi'zh kwa'n mizobni' Isaías kwa'n nzhab se':
Ter más gon bixa'i, per nazobyekt bixa'i,
no ter más ne bixa'i, per nanet bixa' kwane,
15porke dox nad laxto' rë men re'.
No gat nzhont nzha bixa'i;
no nak bixa' nela tu men nikal lo ga'.
No chi nangak bixa' sa', lë' bixa' nganei kun zalo bixa',
no ngon bixa'i kun nzha bixa',
no ngazobyek bixa'i dub la bixa',
orze' ngala' bixa' rë kwa'n gat lë' nak bixa',
par ngago' Dios bixa' lo rë kwa'n nazhe'b.
16’Per go, wen nzha go por une goi, no wen nzha go por mbin goi. 17Walika kwa'n nin lo go, nayax xa' midi'zh por Dios, mbaino nayax men, xa' mile' rë kwa'n nzhakla Dios, ngokla bixa' ngane bixa' rë kwa'n kine go, per nanganet bixa'i; mbaino ngokla bixa' ngon bixa' rë kwa'n kiyon go, per nangont bixa'i.
Nzhab Jesús kwan gab kwent che'n yalgo'n
(Mr. 4:13-20; Lc. 8:11-15)
18’Bin go xmod nak kwent che'n nzha'n men lazh triu ze'. 19Or nzhon tu men widi'zh che'n Dios no gat nizobyekt xa'i, orze' laxto' men re' nak nela yuo le'n nez ze', porke or nzhon xa'i, gat ñat laxto' xa', kuze' nizhin Mizhab, nigo' Mizhab kwa'n mixë'n Dios laxto' xa'. 20No lazh kwa'n ngob lo yuo ke ze', nak rë men mbin widi'zh che'n Dios, no or mbin xa'i, nizak laxto' xa', 21per yent be's luche, che'ptsa midi'y. Se' nak rë men, or nizak xa' tu kwa'n nalats, o niyi' men nine xa' por nak xa' men che'n Dios; orze' por kure' tuli nila' xa' Dios. 22No lazh kwa'n ngob le'n ya yich ze', nak rë men ngwayila widi'zh che'n Dios, per por dox nile' xa' xigab por rë kwa'n naki'n xa' yizhyuo re', mbaino por niwix xa' gap xa' dimi, kuze' ña'l laxto' xa' Dios; nak xa' nela tu ya kwa'n gat niza't xlë ga'. 23Per lazh kwa'n ngob lo yuo wen ze', nak rë xa' nzhon widi'zh che'n Dios, no nizobyek xa'i, orze' nile' xa' rë kwa'n nzhakla Dios; nak xa' nela tu yalgo'n kwa'n dox miza', nela tu do che'n triu ga' kwa'n miza' tu gayo' lazhe, no xtube miza' zichon gale, mbaino xtube miza' zigal bichi'y.
Kwent che'n triu mbaino yix kwa'n ngulen le'ne
24No midi'zh Jesús xtu kwent lo rë men ze', nzhab Me:
―Nu plo nile' Dios mandad nak nela tu miyi' kwa'n ngo'n lazh triu wen lo yuo che'n, 25no lë' rë men che'n xa' nax, lë'chi mizhin tu xa' nidil xa', par ngwaxë'n xa' yix kwa'n lë cizaña, xid rë triu ze', orze' ña xa'. 26No or miro'b triu, no miza'i do; orze' nu yix ze' nguluxo'b, 27orze' ngwayab rë mos lo xa' nak che'n triu ze': “Lë'o, ¿chi gat lë't nab tsa lazh triu mixë'n go? No nal, ¿plo nguro' yix kwa'n nzhi'b le'ne re'?” 28Orze' nzhab xa' nak che'ne: “Tu xa' niyi' nine da mixë'n kure'.” No nzhab rë mos ze': “¿Chi nzhakla go yaki'b no yix kwa'n nazu't ba'?” 29Per nzhab xa': “Naki'bta' goi nal, napa' nu triu ki'b go. 30Más wen bila' go ro'be tutsa haxta or yats yalgo'n; orze' xëla go par kan go galo laka yix kwa'n nazu't ba', orze' li'b goi, le' go manoje par yëke; orze'se kan go triu no kichao' goi plo niguchao' go rë kwa'n.”
Kwent che'n lazh mostas
(Mr. 4:30-32; Lc. 13:18-19)
31No midi'zh Jesús xtu kwent lo rë men, nzhab Me:
―No nu plo nile' Dios mandad nak nela tu lazh win mostas kwa'n mixë'n tu xa' le'n yuo che'n. 32Ter más win lazh mostas, lo rë lazh ya kwa'n nixë'n men, per or niro'be, lë'i más nzhak kwa'ro, lo rë ya kwa'n nzhi'b tutsa kun lë'i, no lo rë rram che'ne, ñi'd rë miyin, nixo'b yo che'n.
Kwent che'n levadur
(Lc. 13:20-21)
33No midi'zh Jesús xtu kwent, nzhab Me:
―No se'ska nak plo nile' Dios mandad; nake nela levadur kwa'n nguzen tu una' par migoch una'i, le'n tu bëd harin, par zubeche.
¿Chon nilu' Jesús widi'zh che'n Dios kun nab tsa kwent lo rë men?
(Mr. 4:33-34)
34Midi'zh Jesús rë nak kure' lo rë men kun nab tsa kwent; yent kwan ngadi'zh Me lo bixa' chi gat lë' kun kwente, 35par ngok rë kwa'n midi'zh tu xa' midi'zh por Dios or nzhab xa':
Kun pura kwent tsa dizha lo rë men,
Rë kwa'n naga'ch che'n Dios kwa'n kinu Me or ni naga ko Me yizhyuo.
Jesús nzhab kwan gab yix kwa'n nazu't, nzhi'b xid triu
36Or ngulunez Jesús rë men ze', nguio Me le'n yo', orze' nguzubi rë men che'n Me lo Me, par mina'bdi'zh bixa', kwan gab kwent che'n yix kwa'n nazu't ze'. 37Orze' nzhab Jesús:
―Xa' mixë'n lazh triu kwa'n wen ze' nak Xga'n Dios Me nu nak tu men yizhyuo, 38mbaino lë' yuo che'n Me nak rë men yizhyuo re'. Lazh triu wen ze' nak rë men che'n Dios, no lë' yix kwa'n nazu't ze' nak rë men che'n Mizhab. 39Lë' men kwa'n ngwaxë'n yix nazu't ze' nak Mizhab, mbaino lë' yalgo'n nak or gab Dios xmod gak kun kad men yizhyuo, mbaino rë xa' kan yalgo'n nak rë ganj che'n Dios. 40Nela nigan yix kwa'n nazu't par yëke, se'ta' gak kun rë xa' chigab walika men che'n Dios. 41Na, Xga'n Dios, mbaino nak Da tu men yizhyuo, xëla rë ganj da, par ko' bixa' xid rë men da, rë men kwa'n nile' nzhap xtu men dol lo Dios, mbaino rë xa' naban ngokla ngwa xid rë men che'n Dios. 42Rë men re' ko' rë ganj da par bi bixa' le'n bël che'n gabil, plo go'n bixa' no kwezh lëi bixa' por dox yalne. 43Orze'se rë men xa' nile' kwa'n nzhakla Dios, gak bixa' nela biani che'n ngubizh plo nile' Xuz bixa' Dios mandad. ¡Chi lë' go mbin kure', bizobyek goi!
Kwent che'n kwa'n wen dox
44’Plo nile' Dios mandad nak nela tu kwa'n dox tsak, nzhuka'che le'n yuo, no or ngwazhël tu miyi'y, nguluka'ch ska xa'i. Por dox nizak laxto' xa', miëk xa' lizh xa', ngwato xa' rë kwa'n kinu xa' par nguzi' xa' dub yuo ze'.
Kwent che'n tu ke chul kwa'n dox tsak
45No nzhab Jesús:
―Nu plo nile' Dios mandad nak nela tu xa' nito no nizi', kikwa'n xa' ke chul. 46No or ngwachib xa' lo ke chul kwa'n dox tsak, orze' miëk xa' lizh xa', mito xa' rë nak kwa'n kinu xa' par nguzi' xa' ke tsak re'.
Kwent che'n yex kwa'n nizen mbël
47’No nela tu yex kwa'n nizen rë lo mbël, se'ta' nak plo nile' Dios mandad. 48Or ñazhëi di mbël, nigo' mene ro' nits par nibe bixa' ma wen tsa, niguchao' bixa'. No lë' rë ma nazu', nigubi bixa'. 49Sa'ta' le' Dios kun rë men or gab Dios xmod gak kun kad men yizhyuo. Xë'l Me rë ganj che'n Me par kutin rë men nakap xid rë men wen, 50par bi rë men nakap ze' le'n bël che'n gabil. Ze' go'n bixa', haxta kwezh lëi bixa' por dox yalne.
Xid kwa'n wen nguro' kwa'n kub no kwa'n go'x
51Orze' nzhab Jesús lo rë men che'n Me:
—¿Chi mizobyek go rë kwa'n midizha lo go re'?
Nkab bixa':
―Lë'i mizobyek ka no.
52Orze' nzhab Jesús lo bixa':
―Wenkai. Chi tu xa' nane ley kwa'n mila' Dios lo Muisés, mbaino nizobyek xa' rë kwa'n nilun, xa' re' nak nela tu xa' nak lizh tu yo' ga'; xid rë kwa'n kinuchao' xa', nane xa' xmod le' xa' kun kwa'n kub mbaino kun kwa'n go'x.
Miëk Jesús yezh Nazaret plo miro'b Me
(Mr. 6:1-6; Lc. 4:16-30)
53Or milox midi'zh Jesús kure', nguro' Me ze'. 54Or mizhin Me yezh Nazaret plo nak lazh Me, tuli ka nguzublo Me milu' Me widi'zh che'n Dios lo rë men nzhin le'n yo' plo nitse'd bixa' widi'zh che'n Dios. Xe mia'n bixa' tuli por kwa'n milu' Jesús, orze' nzhab bixa':
―¿Plo mitse'd xa' re' kwa'n nzhak xa', no rë kwa'n nazhon kwa'n nile' xa'? 55¿Chi gat lë't xa' re' xga'n xa' nichao' mes, no Mari lë xna' xa', no gat rë wech xa' lë Jakob, Che, Simón, no Judas? 56¿No chi gat lë't rë bizan xa' nzo kun be re'? ¿Plo ska mitse'd xa' re' rë kwa'n nzhak xa'?
57No por nak bixa' sa', kuze' nangayilat bixa' widi'zh che'n Dios kwa'n milu' Jesús, per nzhab Jesús lo bixa':
―Rë plo, lë' men ñila ka tu xa' nidi'zh por Dios; per mis rë men lazh xa' no rë men lizh xa', nayilat kwa'n nidi'zh xa'.
58No por nangayila rë men ze'i, kuze' nangale't Jesús nayax kwa'n nazhon ze'.
Terpilih Sekarang Ini:
San Mateo 13: zca
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2013, Wycliffe Bible Translators, Inc. All rights reserved.
