San Mateo 8
8
Rusiajc Jesús te bejṉ ni raḻ tiejxhni
(Mr. 1:40‑45; Lc. 5:12‑16)
1Che biäjt Jesús yec dajn, xhidajl bejṉ huinajlni. 2Dxejcti biääd te beṉracxhuu ni raḻ tiejxhni nez loj Jesús. Bazuxhijbni, räjpni:
―Dad, palga rlajzlu, sajc gusiajclu narä.
3Dxejcti basgaa Jesús ṉaani, gudajnni dade'ga con ṉaani, räjpni:
―Rlazä jiajclu. Siajc tiejxhlu.
Lagajc dxejc gubicaj guejdx ni raḻ tiejxhni. 4Dxejcti räjp Jesús lojni:
―Arniä, rut lojdi gäblu xhi guzajclu. Huijtis lo rebixhojz te badeed gojn ni gunii toMoisés gudeed bejṉ ni riajc, te fii rebixhojzga abiajclu.
Rusiajc Jesús te xmos capitán romaṉ
(Lc. 7:1‑10)
5Che biu' Jesús guedx Capernaum, bidzujṉ te capitán romaṉ nani rnibee te gayuu soldaad. Gunabduxhni lo Jesús, 6räjpni:
―Dad, xmosä naga' rolizä. Di gacdi guiniibni luxh cayanduxhni.
7Räjp Jesús:
―Do'o te gusiacäni.
8Dxejcti räjp capitán lojni:
―Dad, xhet sacädi; di nungäjḻ jiu' guejblu rolizä. Guiniitis te diidx, siacgajc xmosä. 9Narä nacäza xmos rebejṉ ni rnibee, niluxh rnibeäza te gayuu soldaad. Che rniä lo tejni: “Huij”, rijni. Che gäpä loj steeni: “Gudaa”, riädgajcni. Che gäpä loj xmosä: “Bejn dee”, rungajcnini.
10Che biejn diajg Jesús si'c, bidxeloduxhni, räjpni loj renani siädnajlni:
―Rniliä́pac lojtu, nicla neṉ guideb reguedx Israel dina nidxälä te bejṉ ni rililajz si'c rililajz dade're. 11Niluxh rniä, sirii xhidajl beṉzijt nez ladjiaa, nez ladjiät, te jiädcuenäjreni Abram, Isaac, Jacoob lajdx Dios xhaguibaa. 12Luxh rebeṉ Israel nani niajc xi'n Dios sijreni te laad lo yäḻcäjy cadro soonreni, sauya'reni läjyreni, sidejdtisreni trabajw par tejpas.
13Dxejcti räjp Jesús loj capitán:
―Gubi' rolijzlu. Sigajcni huililajzlu, sigajcza gacni.
Dxejc lagajc oṟga biajc xmosni.
Rusiajc Jesús xnansueegr Pedr
(Mr. 1:29‑31; Lc. 4:38‑39)
14Che bidzujṉ Jesús rolijz Pedr, bahuiini naga' xnansueegr Pedr, cayacxhuuni, yu'ni xliaa. 15Dxejc gudajntis Jesús ṉaani, birigajcni xliaaga. Dxejcti huistie nane'ga, gusloj cagudeedni xhi gau Jesús.
Rusiajc Jesús xhidajl beṉ racxhuu
(Mr. 1:32‑34; Lc. 4:40‑41)
16Che biu' guxhijṉ, biädnäreni loj Jesús xhidajl bejṉ ni yu' rebeṉdxab lostooreni; con xtiidxni gunibeeni birii guiraa rebeṉdxabga. Basiajczani guiraa rebeṉ racxhuu. 17Si'c bejnni te guzojb diidx ni bacuaa todad Isaías, ni gunii xtidx Dios, che räjpni:
Lagajc laani cua'ni rexcäḻracxhuunu, sanäzani rexcäḻnayannu.
Reni rlajz ninajl Jesús
(Lc. 9:57‑62)
18Che bahuii Jesús tre' xhidalduxh rebejṉ guideb gabi cadro suga'ni, gunibeeni tednäjni rexpejṉpacni stelaad ro' nis. 19Dxejcti biääd te beṉnajn loj Jesús, räjpni:
―Mastr, sisiaäza cadrotis chäälu.
20Räjp Jesús lojni:
―Rebäjz rajpreni xpiliääreni, remane' ni rutajt xhaguibaa rajpreni xpitiääzreni, niluxh narä Xi'n Dios ni gujc Niguii dina gapä cadro gaa yecä.
21Stee rexpejṉpacni räjp lojni:
―Dad, basaan chaxgaä ladxä te chacuatzä xtadä.
22Räjp Jesús lojni:
―Gudanajl narä. Basaan sugucua'tz resabeṉgutreni rebejṉ nani najc si'c beṉgut sa'csi najcreni beṉdojḻ.
Basiacdxi Jesús te beduxh
(Mr. 4:35‑41; Lc. 8:22‑25)
23Che biu' Jesús neṉ barcw, biu'za rexpejṉpacni lagajc neṉga. 24Dxejc huäjs te bedonduxh lo nisdoo. Lirusiääzni barcw neṉ nisdoo. Luxh Jesús nagayejsni. 25Dxejcti huij rexpejṉpacni huicuäänni, räjpreni:
―Dad, gucnäj nuure te di guetnu.
26Dxejc räjp Jesús:
―¿Xhicuent rdxejbtu, bejṉ ni guxii rililajz?
Dxejcti huistieni, gudidxa'ni lo bej näjza lo nisdoo, te biacdxireni. 27Dxejc bidxeloduxh rexpejṉpacni, räjpreni:
―¿Chuni'c najc niguiire? ¡Ahuilaa xho rucuadiajg bej näjza nisdoo xtiidxni!
Rebeṉdxab ni yu' lajdx regadarenos
(Mr. 5:1‑20; Lc. 8:26‑39)
28Che bidzujṉ Jesús stelaad nisdoo cadro najc lajdx regadarenos, tio'p bejṉ ni yu' beṉdxab lastooreni biädchaglojreni Jesús. Rebejṉga riireni neṉ rebaa, nialazduxhreni, ni'cni rut rajcdi rdejd nezyujga. 29Guredxa'reni räjpreni:
―¿Xhicuent siädchu'lu loonu luj ni najc Jesús Xi'n Dios? ¿La siäädlu ree te gusacsílu nuure luxh gad gaḻdi xoṟnu, ä?
30Nez te laad, zijte' cadro suga'reni, cayajp bejṉ xhidalro cuch. 31Dxejcti gunab rebeṉdxabga loj Jesús, räjpreni:
―Palga cuäälu nuure, basaan jiu'nu neṉ recuchre.
32Dxejcti räjp Jesús:
―Coḻchäj.
Dxejcti biriireni neṉ lastoo redade'ga, huichu'reni neṉ recuchga. Dxejcti guiragajc recuchga caguxuṉreni, huitejbreni ro' te guilaj, biääzreni neṉ nisdoo, gujttireni neṉ nis.
33Rebejṉ ni cayajp recuchga, baxuṉreni, huijreni lajdxreni, huiyeireni diidx guiraa ni guzajcreni näjza ni guzajc redade' ni guyu' rebeṉdxab lastooreni. 34Dxejcti guiraa rebeṉguejdxga huichaglojreni Jesús. Che bahuiireni lojni, gunabduxhreni lojni, jiunejzni lajdxreni.
Terpilih Sekarang Ini:
San Mateo 8: zaw
Highlight
Kongsi
Salin
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fms.png&w=128&q=75)
Ingin menyimpan sorotan merentas semua peranti anda? Mendaftar atau log masuk
© 2006, Wycliffe Bible Translators, Inc. All rights reserved.