San Mateo 13
13
Nanó Jesús cuentó cheꞌé ꞌnúú trigó tixꞌnuu̱ ꞌo̱ soꞌ a
1Dan me se guun naá do̱j, ne̱ curiha̱nj Jesús rá veꞌ, ne̱ caꞌanj ca̱yáán soꞌ tuꞌva na laguaná a. 2Ne̱ caꞌnaꞌ ri̱i̱ ndoꞌo yuvii̱ rihaan soꞌ, ne̱ cheꞌé dan cavii soꞌ rque ꞌo̱ rihoo chéé rihaan na, ne̱ caꞌanj ca̱yáán soꞌ rque rihoo yoꞌ, ne̱ canicunꞌ nij yuvii̱ tuꞌva na laguaná yoꞌ a. 3Ne̱ nanó ndoꞌo Jesús cuentó rihaan nij yuvii̱, cataj soꞌ a:
―Ni̱ꞌyaj soj á. Curiha̱nj ꞌo̱ síí me rá ti̱xꞌnuu̱ ꞌnúú trigó, 4ne̱ cayuu do̱j ꞌnúú trigó yoꞌ rá chrej chéé yuvii̱, ne̱ caꞌnaꞌ xtâj chá nu̱ꞌ xtâj man ꞌnúú trigó na̱j rá chrej yoꞌ na̱nj ado̱nj. 5Ne̱ ꞌó taꞌa̱j ꞌnúú trigó yoꞌ roꞌ, cayuu rihaan yoꞌóó ta̱j rihaan yuvej a. Cheꞌé dan cuaj xraꞌ stanj leꞌe̱j a. 6Veé dan, ne̱ quisíj güii, ne̱ cuchrii naa̱ leꞌe̱j, quiꞌyaj naán, cheꞌé se ne caꞌve̱e caꞌa̱nj ni̱j yáá naa̱ leꞌe̱j yoꞌ a̱ maan ado̱nj. 7Ne̱ ꞌó taꞌa̱j ꞌnúú trigó yoꞌ roꞌ, cayuu scaꞌnúj coj tanj, ne̱ dan me se yo̱o doj cachij coj tanj yoꞌ rihaan naa̱ leꞌe̱j, ne̱ quiriꞌ nu̱ꞌ naa̱ leꞌe̱j, quiꞌyaj coj tanj yoꞌ na̱nj ado̱nj. 8Ne̱ ꞌó taꞌa̱j ꞌnúú trigó yoꞌ roꞌ, cayuu rihaan yoꞌóó sa̱ꞌ, ne̱ naa̱ yoꞌ roꞌ, cachij sa̱ꞌ a. Dan me se taꞌa̱j coj cavii cientó ya̱ ꞌnúú do̱ꞌ, ꞌó taꞌa̱j coj cavii vaꞌnu̱j chiha̱a̱ (60) ꞌnúú do̱ꞌ, ꞌó taꞌa̱j coj cavii ico̱ chi̱ꞌ (30) ꞌnúú do̱ꞌ na̱nj ado̱nj.
9’Sese ta̱j yuꞌuj xréé soj, ne̱ cuno̱ soj nana̱ nihánj á ―taj Jesús a.
Veé dan quisíj cuentó nanó Jesús a.
Nataꞌ Jesús me cheꞌé nanó ndoꞌo soꞌ cuentó rihaan nij yuvii̱ a
10Ga̱a ne̱ nichrunꞌ nij síí tucuꞌyón snana̱ Jesús rihaan soꞌ, ne̱ xnáꞌanj nij soꞌ man Jesús a:
―Me cheꞌé nanó so̱ꞌ cuentó cheꞌé nij rasu̱u̱n rihaan nij yuvii̱ ga̱ ―taj nij soꞌ, xnáꞌanj nij soꞌ man Jesús a.
11Ga̱a ne̱ cataj Jesús rihaan nij soꞌ a:
―Xa̱ꞌ soj, tza̱j ne̱ tihaa̱n Yaꞌanj nana̱ sa̱ꞌ yuve̱ rihaan soj cheꞌé da̱j vaa uun chij Yaꞌanj ado̱nj. Dan me se nana̱ ne neꞌen cunuda̱nj yuvii̱ me nana̱ tihaa̱n Yaꞌanj rihaan soj ado̱nj. 12ꞌO̱ se síí nariꞌ nda̱a vaa me raj cata̱a nana̱ roꞌ, doj a̱ nari̱ꞌ uún soꞌ, ne̱ gu̱un soꞌ síí cu̱u doj raa̱, quiꞌya̱j Yaꞌanj na̱nj ado̱nj. Ne̱ síí naꞌvej rá nari̱ꞌ sa̱ꞌ nda̱a vaa me raj cata̱a nana̱ roꞌ, tana̱nj caꞌne̱e̱ Yaꞌanj do̱j snana̱ Yaꞌanj a̱j nariꞌ soꞌ, ne̱ quina̱j u̱u̱n soꞌ na̱nj ado̱nj. 13Cheꞌé dan nanoj cuentó cheꞌé nij rasu̱u̱n rihaan nij yuvii̱ yoꞌ, cheꞌé se niꞌya̱j nij soꞌ do̱ꞌ, nanó xre̱j nij soꞌ do̱ꞌ, tza̱j ne̱ ne neꞌen nij soꞌ do̱ꞌ, ne acaj nij soꞌ cuentá do̱ꞌ maꞌ. 14Ne̱ ase vaa nana̱ nihánj nana̱ nataꞌ síí cuꞌna̱j Isaías cheꞌé Yaꞌanj ga̱a naá roꞌ, veé da̱nj vaa nij yuvii̱ ne̱ veé da̱nj ꞌyaj nij yuvii̱ cuano̱ ado̱nj:
Catu̱u̱ uxrá nana̱ xréé nij soꞌ,
tza̱j ne̱ se̱ xcaj nij soꞌ cuentá maꞌ.
Ne̱ ni̱ꞌyaj uxrá nij soꞌ,
tza̱j ne̱ se̱ queneꞌen nij soꞌ maꞌ.
15ꞌO̱ se guun nichra̱j rá nimán nij yuvii̱ nihánj ado̱nj.
Caráán maꞌa̱n nij soꞌ rihaan nij soꞌ,
cheꞌé rej se̱ queneꞌen maꞌa̱n nij soꞌ,
ne̱ caráán nij soꞌ xréé nij soꞌ,
cheꞌé rej se̱ cuno nij soꞌ uún a̱ maꞌ.
Ne̱ ne atúj nana̱ nimán nij soꞌ, ꞌyaj nij soꞌ,
cheꞌé rej se̱ xcaj nij soꞌ cuentá ne̱ ca̱nica̱j nimán nij soꞌ maꞌ.
ꞌO̱ se naꞌvej rá nij soꞌ nahu̱un sa̱ꞌ nimán nij soꞌ qui̱ꞌyáá ꞌu̱nj a̱ maan ado̱nj.
Yoꞌ me snana̱ Yaꞌanj nana̱ nataꞌ Isaías cheꞌé maꞌa̱n Yaꞌanj ga̱a naá a.
16’Tza̱j ne̱ quiꞌyaj Yaꞌanj se lu̱j ga̱ soj cheꞌé se a̱j queneꞌen soj se vaa ꞌyáj, ne̱ a̱j cuno soj nana̱ aꞌmij ado̱nj. 17Ya̱ ya̱ cata̱j xnaꞌanj ꞌu̱nj rihaan soj se vaa cumán ndoꞌo síí ma̱n ga̱a naá síí nataꞌ snana̱ Yaꞌanj do̱ꞌ, síí sa̱ꞌ nimán do̱ꞌ, guun rá queneꞌe̱n se vaa queneꞌen nij soj, tza̱j ne̱ ne queneꞌe̱n nij soꞌ maꞌ. Ne̱ guun rá nij soꞌ cuno̱ nij soꞌ se vaa uno soj, tza̱j ne̱ ne cuno̱ nij soꞌ maan ado̱nj ―taj Jesús rihaan nij síí tucuꞌyón snana̱ soꞌ a.
Nataꞌ Jesús me se me raj cata̱a cuentó cheꞌé ꞌnúú trigó a
18Ga̱a ne̱ cataj uún Jesús a:
―Cheꞌé dan cuno̱ maꞌa̱n soj, cata̱j xnaꞌanj ꞌu̱nj rihaan soj me se me raj cata̱a cuentó cheꞌé ꞌnúú trigó tixꞌnuu̱ síí cuchruj naa̱ yoꞌ á. 19Cunuda̱nj yuvii̱ uno nana̱ cheꞌé da̱j vaa uun chij Yaꞌanj roꞌ, sese ne acaj sa̱ꞌ nij soꞌ cuentá, ne̱ ꞌnaꞌ Síí Chre̱e, ne̱ aꞌnéj Síí Chre̱e nana̱ yoꞌ nimán yuvii̱ yoꞌ a. Dan me se ase vaa ꞌnúú trigó cayuu rá chrej chéé yuvii̱ vaa yuvii̱ yoꞌ a. 20Ne̱ ꞌnúú trigó cayuu rihaan yoꞌóó ta̱j rihaan yuvej roꞌ, ase vaa síí uno snana̱ Yaꞌanj vaa yoꞌ, ne̱ cuaj uun niha̱ꞌ rá soꞌ canoco̱ꞌ soꞌ nana̱ yoꞌ, 21tza̱j ne̱ ataa xca̱j sa̱ꞌ soꞌ cuentá, ne̱ ga̱a uun cheꞌe̱ yuvii̱ ꞌyaj yuvii̱ sayuun man soꞌ cheꞌé nana̱ noco̱ꞌ soꞌ, ne̱ cuaj nu̱ꞌ uun naꞌa̱j soꞌ, ne̱ tanáj soꞌ nana̱ yoꞌ cuaj na̱nj ado̱nj. 22Ne̱ ꞌnúú trigó cayuu scaꞌnúj coj tanj roꞌ, ase vaa síí uno snana̱ Yaꞌanj vaa yoꞌ, tza̱j ne̱ nanó ndoꞌo rá soꞌ cheꞌé rasu̱u̱n ma̱n rihaan chumii̱ nihánj, ne̱ me ndoꞌo rá soꞌ quiꞌya̱j canaán soꞌ saꞌanj, ne̱ cheꞌé dan tihaꞌ yuꞌunj soꞌ man maꞌa̱n soꞌ cheꞌé saꞌanj a. Cheꞌé dan me taj se ꞌyáꞌ canoco̱ꞌ sa̱ꞌ soꞌ nana̱ nariꞌ soꞌ, ne̱ ne nuu sa̱ꞌ nimán soꞌ rihaan Yaꞌanj maꞌ. 23Ne̱ ꞌnúú trigó cayuu rihaan yoꞌóó sa̱ꞌ roꞌ, ase vaa síí uno snana̱ Yaꞌanj vaa yoꞌ, ne̱ xcaj sa̱ꞌ soꞌ cuentá, ne̱ nuu sa̱ꞌ nimán soꞌ rihaan Yaꞌanj a. Ne̱ sa̱ꞌ uxrá ꞌyaj taꞌa̱j nij soꞌ, ne̱ sa̱ꞌ do̱j ꞌyaj ꞌó taꞌa̱j nij soꞌ, ne̱ sa̱ꞌ do̱j tzínꞌ ꞌyaj ꞌó taꞌa̱j nij soꞌ na̱nj ado̱nj ―taj Jesús, caꞌmii soꞌ cheꞌé cuentó yoꞌ a.
Nanó Jesús cuentó cheꞌé coj cachij scaꞌnúj ꞌnúú trigó a
24Ne̱ nanó soꞌ ꞌó cuentó nii rihaan nij soꞌ, cataj soꞌ a:
―Ase vaa quiꞌyaj ꞌo̱ síí tixꞌnuu̱ ꞌnúú trigó sa̱ꞌ toꞌóó soꞌ roꞌ, da̱nj ga̱a̱ quiꞌya̱j Yaꞌanj asa̱ꞌ guun chij Yaꞌanj ado̱nj. 25Dan me se quisíj tixꞌnuu̱ soꞌ ꞌnúú trigó yoꞌ, ne̱ rej nii̱ orá otoj yuvii̱ catúj ꞌo̱ síí ta̱j riꞌyunj man soꞌ toꞌóó soꞌ, ne̱ tixꞌnuu̱ síí chiꞌi̱i̱ yoꞌ caân coj chiꞌi̱i̱ rihaan yoꞌóó na̱j ꞌnúú trigó yoꞌ, ne̱ veé dan me se caꞌanj uún soꞌ a. 26Dan me se xraꞌ ꞌnúú trigó xraꞌ coj xraꞌ, ga̱a ne̱ cayón caa raa̱ ꞌnúú trigó do̱ꞌ, raa̱ coj do̱ꞌ, ne̱ xcaj nij se‑mo̱zó síí toꞌo̱j yoꞌ cuentá se vaa né ꞌnu̱j trigó me nu̱ꞌ naa̱ a. Ma̱an se ma̱n uxrá coj rque naa̱ yoꞌ na̱nj ado̱nj. 27Cheꞌé dan cuchiꞌ nij se‑mo̱zó síí toꞌo̱j yoꞌ rihaan síí toꞌo̱j, ne̱ cataj xnaꞌanj nij soꞌ rihaan soꞌ, cataj nij soꞌ a: “Ya̱ ina̱nj ꞌnúú trigó sa̱ꞌ tixꞌnuú so̱ꞌ naꞌ. Me rej cavii coj chiꞌi̱i̱ nihánj ga̱”, taj nij mozó rihaan síí toꞌo̱j yoꞌ a. 28Ga̱a ne̱ cataj soꞌ rihaan nij se‑mo̱zó soꞌ a: “Síí ta̱j riꞌyunj manj me síí tixꞌnuu̱ caân coj chiꞌi̱i̱ rihaan toꞌój ado̱nj”, taj soꞌ rihaan nij se‑mo̱zó soꞌ a. Ga̱a ne̱ cataj nij se‑mo̱zó soꞌ a: “Me rá so̱ꞌ riha̱a̱ núj coj chiꞌi̱i̱ ne̱ naquiꞌya̱j chre̱ꞌ núj coj chiꞌi̱i̱ naꞌ”, taj nij mozó rihaan ruꞌvee yoꞌ a. 29Tza̱j ne̱ cataj síí toꞌo̱j yoꞌ rihaan nij soꞌ a: “Taj cheꞌé quiꞌya̱j soj da̱nj maꞌ. Sese riha̱a̱ soj man coj yoꞌ, ga̱a ne̱ riha̱a̱ uún soj man taꞌa̱j ꞌnúú trigó yoꞌ ga̱a na̱nj ado̱nj. 30Caꞌne̱ꞌ rá soj cachi̱j rcuaꞌa̱a̱n coj yoꞌ ga̱ ꞌnúú trigó yoꞌ, ga̱a ne̱ yavii quiri̱i̱ níꞌ naa̱ trigó, ga̱a ne̱ cata̱j xnaꞌanj ꞌu̱nj rihaan nij síí quiri̱i̱ naa̱ se vaa asino naquiꞌya̱j chre̱ꞌ nij soꞌ coj yoꞌ, ga̱a ne̱ nu̱míj nij soꞌ coj yoꞌ, ga̱a ne̱ caca̱a̱ coj yoꞌ ado̱nj. Ga̱a ne̱ naquiꞌya̱j chre̱ꞌ nij soꞌ ꞌnúú trigó sa̱ꞌ, ga̱a ne̱ cara̱a sa̱ꞌ nij soꞌ man yoꞌ rá cuchruu̱ ado̱nj”, cataj síí toꞌo̱j rihaan se‑mo̱zó soꞌ a ―taj Jesús rihaan nij yuvii̱ a.
Nanó Jesús cuentó cheꞌé caân cuêj mostazá xlá a
31Ne̱ nihánj me ꞌó cuentó nanó Jesús rihaan nij yuvii̱ a:
―Ase vaa achij caân cuêj mostazá xlá roꞌ, da̱nj ga̱a̱ cachi̱j xꞌneꞌ nij síí uun chij Yaꞌanj rihaan ado̱nj. Dan me se nica̱j ꞌo̱ soꞌ caân cuêj mostazá xlá, ne̱ axríj soꞌ caân yoꞌ rihaan toꞌóó soꞌ a. 32Dan me se sꞌni̱i̱ doj vaa caân cuêj mostazá xlá rihaan cunuda̱nj nij caân, tza̱j ne̱ asa̱ꞌ cachij yoꞌ, ne̱ xi̱j doj vaa yoꞌ rihaan nu̱ꞌ coj axríj nii, ne̱ ase vaa chruun vaa yoꞌ a. Dan me se ayuu nij xtâj va̱j rej xta̱ꞌ raa̱ cuêj yoꞌ, ne̱ ꞌyaj nij xoꞌ saca̱ꞌ nij xoꞌ raa̱ cuêj yoꞌ ado̱nj ―da̱nj cataj Jesús rihaan nij soꞌ a.
Nanó Jesús cuentó cheꞌé levadura se ꞌyaj naraa nana̱ rque rachrúún a
33Ne̱ nihánj me ꞌó cuentó nanó Jesús rihaan nij yuvii̱ a:
―Dan me se nuchru̱j ra̱a̱ níꞌ cheꞌé ꞌo̱ chana̱ caxríj se cuꞌna̱j levadura se ꞌyaj naraa nana̱ rque rachrúún a. Dan me se ase vaa ꞌo̱ chana̱, ne̱ cuxraꞌ taꞌa̱j noꞌ ꞌo̱ vaꞌnu̱j ya̱ agaꞌ yoꞌóó hariná, ne̱ caxríj ndoꞌo noꞌ se cuꞌna̱j levadura, ne̱ caxríj yuve̱ noꞌ man yoꞌ nda̱a navij naraa ndoꞌo nana̱ rque yoꞌ a. Ase vaa naꞌmanꞌ cunj hariná quiꞌyaj levadura roꞌ, da̱nj ga̱a̱ gu̱un noco̱o xꞌneꞌ nij yuvii̱ uun chij Yaꞌanj rihaan ado̱nj ―taj Jesús rihaan nij soꞌ a.
Nana̱ nihánj nataꞌ me cheꞌé ina̱nj cuentó nanó Jesús rihaan nij yuvii̱ a
34Ina̱nj cuentó cheꞌé nij rasu̱u̱n nanó Jesús rihaan nij yuvii̱, ga̱a ne̱ aꞌvee nataꞌ soꞌ rihaan nij yuvii̱ a. 35Da̱nj quiꞌyaj soꞌ, cheꞌé yan me rá soꞌ quiꞌya̱j soꞌ nu̱ꞌ se vaa cataj ꞌo̱ síí nataꞌ snana̱ Yaꞌanj ga̱a naá, cataj soꞌ a: “Ina̱nj cuentó cheꞌé nij rasu̱u̱n nano̱ ꞌu̱nj rihaan yuvii̱, ne̱ dan me se cata̱j xnaꞌanj ꞌu̱nj rihaan nij soꞌ cheꞌé se vaa quiꞌyaj Yaꞌanj asi̱j quiꞌyaj Yaꞌanj man nu̱ꞌ chumii̱ nihánj ado̱nj.” Da̱nj caꞌmii síí nataꞌ snana̱ Yaꞌanj ga̱a naá a.
Nataꞌ Jesús me se me raj cata̱a cuentó cheꞌé coj cachij scaꞌnúj ꞌnúú trigó yoꞌ a
36Ga̱a ne̱ naꞌnéé Jesús chr
ej man nij yuvii̱, ne̱ catúj soꞌ rá veꞌ, ga̱a ne̱ cuchiꞌ nij síí tucuꞌyón snana̱ soꞌ rihaan soꞌ a. Ne̱ xnáꞌanj nij soꞌ man soꞌ, cataj nij soꞌ a:
―Cata̱j xnaꞌanj so̱ꞌ rihaan núj me se me raj cata̱a cuentó cheꞌé coj chiꞌi̱i̱ cachij scaꞌnúj ꞌnúú trigó yoꞌ á ―taj nij soꞌ rihaan Jesús a.
37Ga̱a ne̱ cataj xnaꞌanj Jesús rihaan nij soꞌ, cataj soꞌ a:
―Síí tixꞌnuu̱ ꞌnúú trigó sa̱ꞌ rihaan yoꞌóó roꞌ, ase vaa ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ vaa soꞌ, 38ne̱ ase vaa chumii̱ nihánj vaa yoꞌóó yoꞌ, ne̱ ꞌnúú trigó sa̱ꞌ roꞌ, ase vaa nij síí uun chij Yaꞌanj nimán vaa yoꞌ, ne̱ ase vaa coj chiꞌi̱i̱ yoꞌ roꞌ, vaa nij síí noco̱ꞌ man Síí Chre̱e a. 39Ne̱ ase vaa síí tixꞌnuu̱ caân coj chiꞌi̱i̱ rihaan yoꞌóó yoꞌ roꞌ, vaa maꞌa̱n Síí Chre̱e yoꞌ, ne̱ ase vaa güii caꞌne̱ꞌ Yaꞌanj cacunꞌ cheꞌé yuvii̱ ma̱n rihaan chumii̱ nihánj roꞌ, da̱nj vaa güii quiri̱i̱ nii naa̱ yoꞌ, ne̱ ase vaa nij se‑mo̱zó Yaꞌanj vaa nij síí quiri̱i̱ naa̱ yoꞌ ado̱nj. 40Dan me se ase vaa naquiꞌya̱j chre̱ꞌ nii man coj yoꞌ ne̱ caca̱a̱ yoꞌ rihaan yaꞌan roꞌ, da̱nj ga̱a̱ quira̱nꞌ nij síí noco̱ꞌ man Síí Chre̱e güii caꞌne̱ꞌ Yaꞌanj cacunꞌ cheꞌé yuvii̱ ma̱n rihaan chumii̱ nihánj ado̱nj. 41Dan me se Síí Caꞌnéé Yaꞌanj Ni̱caj Yuꞌunj man Yuvii̱ mej, ne̱ güii dan caꞌne̱j ꞌu̱nj man nij se‑mo̱zó ꞌu̱nj, ne̱ naca̱j nij soꞌ man nu̱ꞌ nij síí ꞌyaj nij ꞌó yuvii̱ rihaan cacunꞌ do̱ꞌ, nu̱ꞌ nij síí naꞌvej rá cuno̱ rihaan Yaꞌanj do̱ꞌ, ꞌni̱j scaꞌnúj nij yuvii̱ uun chij ꞌu̱nj rihaan, 42ne̱ caꞌne̱j nij soꞌ man nij síí chiꞌi̱i̱ yoꞌ rque chrúún yaꞌan acaa ndoꞌo na̱nj ado̱nj. Ne̱ yuvii̱ cuma̱n rej yoꞌ me se taꞌve̱e ndoꞌo nij soꞌ, ne̱ nda̱a cha̱ ru̱j maꞌa̱n nij soꞌ cúú yanꞌ nij soꞌ na̱nj ado̱nj. 43Ga̱a ne̱ cuchugu̱u̱n nij síí sa̱ꞌ yoꞌ ase vaa chuguu̱n güii rej uun chij Rej nij soꞌ síí nicu̱nꞌ xta̱ꞌ ado̱nj. Dan me se sese ta̱j yuꞌuj xréé soj, ne̱ cuno̱ soj nana̱ nihánj á.
Nanó Jesús cuentó cheꞌé chrúún saꞌanj nariꞌ ꞌo̱ soꞌ a
44’Ase vaa ꞌo̱ chrúún saꞌanj ꞌni̱j yuve̱ rque yoꞌóó roꞌ, da̱nj vaa uun chij Yaꞌanj ado̱nj. Dan me se nariꞌ ꞌo̱ snóꞌo man chrúún saꞌanj yoꞌ, ga̱a ne̱ naráán uún soꞌ yoꞌóó xráá yoꞌ, ne̱ guun niha̱ꞌ uxrá rá soꞌ cheꞌé chrúún saꞌanj nariꞌ soꞌ, ne̱ caꞌanj soꞌ cutuꞌvéj soꞌ nu̱ꞌ siꞌyaj soꞌ, ne̱ nica̱j soꞌ saꞌanj, caꞌanj soꞌ, quiránj soꞌ nu̱ꞌ yoꞌóó ꞌni̱j chrúún saꞌanj yoꞌ na̱nj ado̱nj.
Nanó Jesús cuentó cheꞌé chruj perlá tuꞌve̱e̱ ndoꞌo a
45’Ne̱ ase vaa síí naránj natuꞌvéj nanoꞌ chruj perlá tuꞌve̱e̱ ndoꞌo quira̱a̱n roꞌ, da̱nj vaa uun chij Yaꞌanj ado̱nj. 46Dan me se nariꞌ síí naránj natuꞌvéj yoꞌ ꞌo̱ chruj perlá tuꞌve̱e̱ uxrá, ga̱a ne̱ caꞌanj soꞌ cutuꞌvéj soꞌ cunuda̱nj siꞌyaj soꞌ, ne̱ nica̱j soꞌ saꞌanj, quiránj soꞌ man chruj perlá tuꞌve̱e̱ uxrá yoꞌ na̱nj ado̱nj.
Nanó Jesús cuentó cheꞌé xcuaj atúj rque nanj tiguíj nii rá na a
47’Ne̱ ase vaa nanj taꞌaa xcuaj roꞌ, da̱nj vaa uun chij Yaꞌanj a. Dan me se tiguíj yuvii̱ nanj rque na, ne̱ da̱j a̱ xcuaj atúj rque nanj yoꞌ a. 48Nda̱a síj ga̱a caraa nanj yoꞌ, ga̱a ne̱ cuxuun nij yuvii̱ man nanj yoꞌ nda̱a tuꞌva na, ga̱a ne̱ caꞌanj ca̱yáán nij soꞌ rihaan yoꞌóó, ne̱ narii nij soꞌ xcuaj sa̱ꞌ, ne̱ narii nij soꞌ xcuaj nij uún a. Ga̱a ne̱ xcuaj sa̱ꞌ roꞌ, caraa nij soꞌ rá scaa a. Tza̱j ne̱ xcuaj nij roꞌ, quiriꞌíj u̱u̱n nij soꞌ man yoꞌ na̱nj ado̱nj. 49Ne̱ ase vaa quiranꞌ nij xcuaj yoꞌ roꞌ, da̱nj quira̱nꞌ yuvii̱ asa̱ꞌ caꞌneꞌ Yaꞌanj cacunꞌ cheꞌé yuvii̱ a. Cavi̱i̱ nij se‑mo̱zó Yaꞌanj ne̱ cuxra̱ꞌ taꞌa̱j nij soꞌ man nij síí chiꞌi̱i̱ ga̱ nij síí vaa sa̱ꞌ a. 50Quiriꞌi̱j nij soꞌ man nij síí chiꞌi̱i̱ yoꞌ rque chrúún yaꞌan yaꞌa̱an ndoꞌo, ga̱a ne̱ taꞌve̱e uxrá nij soꞌ, ne̱ nda̱a cha̱ ru̱j maꞌa̱n nij soꞌ cúú yanꞌ nij soꞌ na̱nj ado̱nj ―taj Jesús rihaan nij síí tucuꞌyón snana̱ soꞌ a.
Cataj Jesús me síí neꞌen nu̱ꞌ snana̱ Yaꞌanj a
51Ne̱ xnáꞌanj Jesús man nij síí tucuꞌyón snana̱ soꞌ, cataj soꞌ a:
―Cuno soj nu̱ꞌ cuentó nanó ꞌu̱nj cuano̱ naꞌ ―taj Jesús, xnáꞌanj soꞌ man nij síí tucuꞌyón snana̱ soꞌ a.
―Cuno núj nu̱ꞌ cuentó yoꞌ ado̱nj ―taj nij soꞌ a.
52Ne̱ cataj Jesús rihaan nij soꞌ a:
―Cheꞌé dan cata̱j xnaꞌanj ꞌu̱nj rihaan soj se vaa nij síí naquiꞌyaj cu̱u stucua̱nj Moisés me se sese nari̱ꞌ uún nij soꞌ nana̱ cheꞌé da̱j vaa uun chij Yaꞌanj, ne̱ síí neꞌen nu̱ꞌ nana̱ me nij soꞌ, ne̱ síí cu̱u raa̱ gu̱un nij soꞌ, quiꞌya̱j nu̱ꞌ nana̱ nariꞌ nij soꞌ ado̱nj. Dan me se ase vaa síí ruꞌvee ne̱ ma̱n rasu̱u̱n nga̱ do̱ꞌ, rasu̱u̱n naca̱ do̱ꞌ, rihaan roꞌ, da̱nj ga̱a̱ nij soꞌ, ne̱ cavi̱i̱ sa̱ꞌ uxrá nij soꞌ na̱nj ado̱nj ―taj Jesús rihaan nij síí tucuꞌyón snana̱ soꞌ a.
Ne caꞌve̱j rá nij síí ma̱n chiháán Jesús cuno̱ nij soꞌ snana̱ soꞌ maꞌ
53Dan me se quisíj nanó Jesús nu̱ꞌ cuentó nihánj rihaan yuvii̱, ne̱ curiha̱nj soꞌ rej yoꞌ, ne̱ caꞌanj soꞌ a. 54Ga̱a ne̱ nucuiꞌ soꞌ chiháán soꞌ, ne̱ caꞌanj soꞌ veꞌ tucuꞌyón nij síí ma̱n chiháán soꞌ stucua̱nj Moisés, ne̱ tucuꞌyón soꞌ man nij síí ma̱n rá veꞌ yoꞌ a. Dan me se caráyaꞌa̱nj nij soꞌ, ne̱ cataj nij soꞌ a:
―Me rej nariꞌ síí nihánj nana̱ cu̱u avii raa̱ síí nihánj ga̱. Me rej nariꞌ soꞌ se nucua̱j ꞌyaj soꞌ suun sa̱ꞌ noco̱o ga̱. 55Né taꞌni̱j síí acój chruun síí cayáán chiháán níꞌ me soꞌ naꞌ. Ne̱ nii soꞌ me chana̱ cuꞌna̱j Mariá ado̱nj. Ne̱ tinúú soꞌ me síí cuꞌna̱j Jacobo do̱ꞌ, José do̱ꞌ, Simón do̱ꞌ, Judas do̱ꞌ ado̱nj. 56Ne̱ nij raꞌvij soꞌ me chana̱ ya̱nj chiháán níꞌ na̱nj á. Tza̱j ne̱ ne neꞌen níꞌ me rej me nariꞌ soꞌ suun nihánj quiꞌyaj soꞌ maꞌ ―taj nij síí ma̱n chiháán Jesús rihaan tuviꞌ nij soꞌ a.
57Ne̱ guun naco̱o̱ rá nij soꞌ niꞌya̱j nij soꞌ man Jesús a. Ne̱ cataj Jesús rihaan nij soꞌ a:
―Me rej maꞌa̱n va̱j ꞌo̱ síí nataꞌ snana̱ Yaꞌanj, ne̱ aráj cochro̱j nij yuvii̱ rihaan soꞌ, tza̱j ne̱ nij yuvii̱ ma̱n chiháán soꞌ do̱ꞌ, nij tuviꞌ soꞌ síí ya̱nj tucuá soꞌ do̱ꞌ, naꞌvej rá cara̱a̱ cochro̱j rihaan soꞌ maꞌ ―taj Jesús rihaan nij síí ma̱n chiháán soꞌ chumanꞌ cuꞌna̱j Nazaret yoꞌ a.
58Ne̱ do̱j suun sa̱ꞌ noco̱o quiꞌyaj Jesús chiháán soꞌ, cheꞌé se ne cuchuma̱n rá nij síí ma̱n chiháán soꞌ ni̱ꞌyaj nij soꞌ man soꞌ a.
Terpilih Sekarang Ini:
San Mateo 13: trc
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Wycliffe Bible Translators, Inc. 2024 segunda versión electrónica
