San Mateo 8

Jesuuz bicy yac mi tub mbecy nu taꞌ tub lo gyedz nu la lepra cuerp niy

1Ornu Jesuuz bet mi nu bruum logyiꞌ, orzeꞌ tonaꞌ la mbecy zigy gua ca dey ich mi. 2Orzeꞌ bruꞌña tub mbecy nu taꞌ gyedz nu la lepra lom. Orzeꞌ gusu tib yu lom. Orzeꞌ nay rab yum:

―Jesuuz, benu rlagy ru, orzeꞌ gac gyicy yac ru ya̱ ni güii ne̱ ―nay.

3Orzeꞌ Jesuuz gul yaam yu. Orzeꞌ nam rab mi yu:

―Rlagya̱. Na byac ru ―nam rab mi yu.

Orzeꞌ lueg la byac yu. 4Orzeꞌ na gaꞌ Jesuuz rab mi yu:

―Na ne̱e̱ lor nu cueꞌ la niir lo ni tub la mbecy, sinu gua lo uz nu cha lyuur ub ru loy. Orzeꞌ cuic ru gun nir nu rniiñ lo leey ni Moisees par nu gad lagy dela mbecy nu bi byac ru ni güii nir ―nam.

Jesuuz bicy yac mi tub moz ni tub yu nu riib ic tub gaynal soldad Rom

5Ornu Jesuuz guꞌm ruꞌ gyedz Capernaum, orzeꞌ bruꞌña tub yu nu riib ic tub gaynal soldad lom. Orzeꞌ bdiiñ yu tub faboor lom. 6Orzeꞌ nay:

―Jesuuz, ya̱ zu tub moz ne̱ yu̱ꞌ mbish rat yu. Na byac yu mbecy chi̱ nunu dzi rzac yu ―nay.

7Orzeꞌ Jesuuz nam rab mi yu:

―Ya̱ cha̱ nu gyicy yaca̱ yu ―nam.

8Orzeꞌ na gaꞌ yu nu riib ic zeꞌ:

―Rila wangyapa̱ nu char yu̱ꞌ, nomaas benu nii ziꞌl ru nu gyac moz ne̱, orzeꞌ gyac yu. 9Gun niꞌ ya̱ ricya̱ de coz nu rnii de yu nu gya zir zu par ya̱. Nunu niꞌ yuꞌ gaꞌ soldad nu gash zir zu par ya̱ nu ricy yu de coz nu rne̱e̱. Ornu rne̱e̱ lo tub yu nu “Char re”, ne̱e̱, orzeꞌ rzay. Zeꞌ tuubay, ornu dredza̱ yu nu cyid yu, orzeꞌ ryiid yu. Nunu ornu rca̱a̱ moz ne̱ nu gyicy yu la coz, orzeꞌ ricy yuñ ―nay.

10Ornu güeñ Jesuuz de riidz zeꞌ, orzeꞌ tonaꞌ la za nu ic mi. Orzeꞌ nam rab mi de yu nu za ca ich mi:

―Ya̱ rishli rne̱e̱ lo der nu lat de mbecy Israeel rila nigul gyapa̱ ni tub la mbecy nu ricy cup consuel lo̱ gal nu na consuel nu ricy cup yu ii ―nam―. 11Ya̱ rne̱e̱ lo der nu dub yub la gyishlombecy gruu mbecy nu gzub dey goy gyit tublaazh la nu Abraham, nu Isaac gal nu Jacob lugaar zeꞌ nu riib ic Ñgyoozh. 12Tees de yu nu rlyu nu gya cyiiñ lo Ñgyoozh, de yu zeꞌ duneꞌ dey zeꞌ nu cow, zeꞌ nu chuꞌ mbecy nu gun yu nunu nu siigy lay yu ―nam.

13Orzeꞌ Jesuuz nam rab mi yu nu riib ic zeꞌ:

―Yaa la yuꞌr, gun gac ñii gal nu ru mnii toor ―nam.

Orzeꞌ laab or la zeꞌ byac moz ni yu nu riib ic zeꞌ.

Jesuuz bicy yac mi ñaa gud Bed

14Orzeꞌ Jesuuz guam yuꞌ Bed. Orzeꞌ zeꞌ bzaac mi ñaa gud yu riib rat mi. Pcaañ zig nim. 15Orzeꞌ Jesuuz bduꞌ yaam yaa biñ rat zeꞌ. Orzeꞌ lueg la bruu zig mi. Orzeꞌ wesh tem brugyiꞌ rzu bich mi nu nac dey.

Jesuuz bicy yac mi zañ mbecy rat

16Na ornu bi yecheñ, orzeꞌ de mbecy bruꞌña nu dey zigy mbecy nu bicy ni nuras lo Jesuuz. Orzeꞌ bloo chum de nuras zeꞌ nu tub zi riidz nim. Nunu bicy yac mi zañ de mbecy rat. 17Ni guuc ñi par nu gyuꞌ ni de riidz nu pcaa Isaías, tub yu nu mnii por cuen ni Ñgyoozh ornu bzat yu Mesías ornu mniiy: “Mi zeꞌ co chum de güii gyidz nu yuꞌ nañ cuerp nin, nunu gyicy yac mi de ub na ni de güii.” Ni pcaa Isaías.

De mbecy nu ngulagy cha ca ich Jesuuz

18Ornu bzaac Jesuuz nu dzi bdeꞌ mbecy lom, orzeꞌ mniim lo de yu rsyaꞌ lom nu cha dey tub laꞌ gaꞌ ruꞌ nisyudoo. 19Orzeꞌ bruꞌña tub yu nu rlyuu leey ni Ñgyoozh. Orzeꞌ nay:

―Masht, ya̱ bi zu lilya̱ nu cha du̱ ru ca ziꞌl zeꞌ nu char ―nay.

20Orzeꞌ na Jesuuz rab mi yu:

―De bez ricy cup ma blyuu ni ma. Zeꞌ de chigyiñ ricy cup ma teez ma. Tees ya̱, biñ nu byac mbecy, a̱ꞌ ricy cupa̱ ni tub lugaar miꞌ par nu gabisha̱ zu lagya̱ ―nam.

21Orzeꞌ bruꞌña tuubaꞌ yu nu rsyaꞌ lom. Orzeꞌ nay rab yum:

―Jesuuz, ¿a wazaan ru nu leza̱ gashtal gat uza̱? Orzeꞌ cacha̱ yu ―nay.

22Orzeꞌ na Jesuuz rab mi yu:

―Na la da ca icha̱. Bzaan ndeꞌ par de mbecy nu na gal na mbecy gut nu cach dey losaꞌ gut yu ―nam.

Jesuuz mniim lo gyey bi nu gariñ

23Orzeꞌ Jesuuz guꞌm nañ barc nu de yu nu rsyaꞌ lom. 24Orzeꞌ lat nu za dey zeꞌ, sij la bruꞌña tub gyey bi ily lo nisyudoo, nunu tonaꞌ la coz ily bicy gyey bi zeꞌ. Orzeꞌ de nguuly lo nisyudoo psoow lañ barc. Zeꞌ Jesuuz mbish mi nas mi nañ barc zeꞌ. 25Orzeꞌ de yu nu rsyaꞌ lom pcueeñ dey mi. Orzeꞌ na dey rab yum:

―¡Shuaan de̱, bloo mbañ den! Gun bi rnit lo den lo nis ―na dey.

26Orzeꞌ Jesuuz nam rab mi dey:

―¿Lagu dzi rdzib der? ¡Dzi ga ñuu miꞌ consuel ricy cup der lo̱! ―nam.

Orzeꞌ wesh tem mniim lo bi nu lo nisyudoo nu gariñ. Orzeꞌ rup laañ gucañ. Se ri zu la byac. 27Orzeꞌ za nu la ic dey. Orzeꞌ na dey rab yu losaꞌy:

―¿Zeꞌ cyuꞌ mbecy nac mi ii? Gashtal bi nu nisyudoo rzuub gyidag ñi nim ―na dey.

Jesuuz bicy yac mi cyup mbecy nu bicy ni nuras

28Ornu Jesuuz bruꞌñam tub laꞌ gaꞌ ruꞌ nisyudoo, orzeꞌ bruum nañ barc par lo yu ni Gadara. Orzeꞌ bruꞌña cyup mbecy nu bruu nañ de blyuu nu rcach dey añ lom. De yu zeꞌ yu nu bicy ni nuras. Nunu raloc dey. Ni tub la mbecy wagac ded dey nez nu rded cyup de yu zeꞌ par nu dzi tañ dey. 29Orzeꞌ brugyiꞌ rbish ti dey:

―¿La ryub ru yad ru lo̱ ii Jesuuz iꞌñ Ñgyoozh? ¿A yad ru nu ted zir de̱ ya̱ anzir nu shuub tiem? ―na nuras.

30Na sñuu miiñ par lo rded row tub nac cuch zigy. 31Orzeꞌ de nuras mnishbaa dey lo Jesuuz. Orzeꞌ na dey:

―Zeꞌ benu co chur de̱ ya̱, bzaan nu chuꞌ de̱ nañ de cuch re ―na dey.

32Orzeꞌ Jesuuz nam rab mi dey:

―Gua der ―nam.

Orzeꞌ de nuras zeꞌ gua dey guꞌy nañ de cuch zigy zeꞌ. Laab or la zeꞌ dela de cuch zigy zeꞌ rzab la de ma carer bzu tiily ma par gyoow. Orzeꞌ bet lag de ma lo nisyudoo. Orzeꞌ gut de ma lo nis.

33Orzeꞌ de yu nu rña de cuch zeꞌ gush dey carer yay par lat gyedz. Orzeꞌ brugyiꞌ ryoo dey riidz de coz nu guc nu de mbecy nu bicy ni nuras zeꞌ. 34Orzeꞌ dela de mbecy nu yuꞌ gyedz zeꞌ bruu dey zay lo Jesuuz. Na ornu bzaac dey mi, orzeꞌ mnishbaa dey lom nu gruum ledz dey.

Terpilih Sekarang Ini:

San Mateo 8: zpz

Highlight

Kongsi

Salin