SAN MATEO 14

Jotsaꞌen kꞌen Juan Bautista

Mr. 6:14-29; Lc. 9:7-9

1ꞌBa kui nixtjinbiu Herodes xi tjinre xa nangi Galilea ꞌba nde kjintꞌe ngatꞌare mé= xi titsaꞌen Jesús. 2ꞌBa kitsure nchja xi tsaꞌexatꞌare:

—Juan Bautista= kibiu. Je jaꞌaya nganire ngajinre mikꞌen, kui= kjua tjinnire kjuaꞌñu nga tsaꞌen kjuakun.

3Ngatꞌa Herodes jaꞌba je ꞌexa nga kjinduba Juan ꞌba kisꞌeꞌñu ꞌba kisꞌeya nduya. Tu kjuare Herodia= nini nga ꞌba kitsaꞌen. Kui xi chjunre Felipe, xi ntsꞌe mani Herodes. 4Ngatꞌa Juan ꞌbi tsure Herodes:

—Bi tixaꞌnderi nga kuenikue chjunre ntsꞌé.

5ꞌBa Herodes kuamejénre nga sikꞌen Juan tsakaiñu, tunga tsakjun nga ꞌba saꞌen, ngatꞌa naxinando tsu nga Juan jngu profeta. 6Tunga kionga tsꞌaxje sꞌire Herodes nga kichu nu, kiꞌndire Herodia kite ngixkun ngatsiꞌi xi jaꞌe sꞌibiu, ꞌba Herodes ꞌñu tsja kuánre. 7Kui kjuañu kitsikꞌaxkini ngatꞌare Naꞌenchana nga sjare kiꞌndi chjunbiu tumeñu xi skuiꞌare. 8ꞌBa jaꞌba je tjun inyaꞌa nare nga kitsure:

—Ngaya jngu tiba tꞌeyana nindaku Juan Bautista ꞌba taꞌena.

9ꞌBa ꞌbatsaꞌen rey Herodes kuabare, tunga ngatꞌa je kitsikꞌaxki ngatꞌare Naꞌenchana ngixkun ngatsiꞌi nchja xi tsikꞌendutꞌako yamixo, kui kjua ꞌexani nga kuaꞌere kiꞌndi chjunbiu mé= xi tjimiꞌa. 10Ngu kitisin Juan Bautista ngaya nduyo. 11ꞌBa ngaya jngu tiba kisꞌeya nindaku Juan ꞌba kitsaꞌere kiꞌndi chjunbiu, ꞌba kui kitsja nganire nare.

12ꞌBa xutare Juan jaꞌekjaꞌa yojore ꞌba kikꞌeyanijin, ꞌba jaskan kikeꞌere nijmi Jesús mé xi kuán.

Nga Jesús tsikjén ón mi xuta

Mr. 6:30-44; Lc. 9:10-17; Jn. 6:1-14

13ꞌBa kionga Jesús kjintꞌe mé xi kuán, tsikꞌejñayare jngu barku ꞌba kiji tajngu jngu ngaꞌnde tꞌaxin ꞌba ña kjin. Tunga kionga naxinando kjintꞌe nga je tifi Jesús, ꞌbatsaꞌen ꞌetju nangibiu ꞌba kiji ndsakuni nga kitjenngi. 14ꞌBa kionga Jesús ꞌetukajen barku, tsabe xutankjiun ꞌba jaꞌanimare ꞌba kitsinda xi inyafesun. 15ꞌBa kionga je tjimaꞌña, xutare Jesús kitsitiñatꞌare ꞌba kitsure:

—Ne tꞌaxin ngaꞌe, ꞌba je ne ngixun ngayeje. Tusa tikixantꞌai xutankjiun ꞌba ngatji naxinanda xi tjindu tiña ngaꞌe, tuxi kuatseni xi skine.

16Tunga Jesús kitsingojore:

—Bi machjen nga kuaje. Tusa jun taꞌe_ru xi skine.

17ꞌBa xutare kitsu nganire:

—Tunga tu ón chi ma sani niñuxtila xi kichꞌee̱ ꞌba jó tjiuti.

18ꞌBa Jesús kitsu:

—Ndekonu ngaꞌe.

19ꞌBa kio kitsure xutankjiun nga ngatꞌendujin xka ngijño, ꞌba kiskjebe nga ón niñuxtilo ꞌba ngojó tjiutiu. ꞌBa kiskutsejennkꞌa ꞌba kitsjare kjuanda Naꞌenchana, ꞌba saꞌe kitsixkua niñuxtilo ꞌba kitsjare xutare, tuxi sikaꞌbisunnire xutankjiun. 20ꞌBa ngatsiꞌi tsakjen kaꞌnda nga̱ nda kitsere. ꞌBa kio ꞌeku xi xi tsꞌangiu, ꞌba tejó nisin kuán ngisa. 21ꞌBa ónru mi kuán xuta xiꞌin xi kiskine niñuxtilo, kjaꞌere yanchjin ꞌba ko kiꞌndi nisti.

Nga tsuꞌbasun Jesús ndachikun

Mr. 6:45-52; Jn. 6:16-21

22ꞌBa taꞌa Jesús ꞌexare xutare nga kuijin ngaya barku tuxi kuajetitjunni xingunda ndachikun, yejerañu titsikixantꞌa xutankjiun. 23ꞌBa kionga Jesús je kitsikixantꞌa xuta, tsijin jngu nindu tuxi kuikjako tajnguni Naꞌenchana. ꞌBa tojo kio tijña tajngu nga kuajñu. 24ꞌBa kui chubabiu, jeru masen ndachikun tjejin barku. ꞌBa tsindiure nando titsiteya, ngatꞌa ntjo ꞌbatsaꞌen tibeꞌe jotsaꞌen inyafi. 25ꞌBa kionga je tjisꞌe isen, Jesús tsuꞌbasun ndachikun nga kintꞌe xutare. 26ꞌBa kionga xutare tsabe nga ndibasun ndachikun, ꞌñu kitsakjun, ꞌba ꞌbi kitsu nga kiskiꞌndayakun:

—¡Jngu isennixtjin ndiba kio!

27Tunga taꞌa Jesús kitsure:

—¡Tiꞌñu kakún! ¡An= ña̱! ¡Bi kun!

28ꞌBa ꞌbatsaꞌen Pedro kitsure:

—Tsa kjuakixi nga ji, Naꞌen, tꞌexanaa̱ nga kjuisaa̱n nando nga kjuintꞌera̱.

29—Jabi, tsuꞌba —kitsu Jesús.

ꞌBa ꞌbatsaꞌen Pedro ꞌetukajen ngaya barku ꞌba kisun nando nga kintꞌe Jesús. 30Tunga kionga tsabe nga ꞌñu tjima ntjo, kitsakjun. ꞌBa kionga je titiungijndiu, ꞌbi kitsu nga kiskiꞌndaya:

—¡Naꞌen, tikꞌanginaa̱!

31ꞌBa taꞌa Jesús kitsuba ntsja Pedro, ꞌba kitsure:

—¡Á tsaꞌen chuba makjainniri! ¿Ánñu jó ján kikjani inimari?

32ꞌBa kionga jaꞌasꞌen ngaya barku, kisꞌexiu ntjo. 33ꞌBa xi tjinduya barku tsikinyakunchꞌintꞌare Jesús ꞌba kitsure:

—Kjuakixi= nga ji xi Kiꞌndire Naꞌenchana.

Nga tsinda Jesús xuta xi sefesun xi tjin nangi Genesaret

Mr. 6:53-56

34ꞌBa kionga je jaꞌaxtiu ndachikun, echu nangi Genesaret. 35ꞌBa xuta xi kio tseꞌe tsabexkun Jesús, ꞌba nde yeꞌe tsiꞌire nijmi naxinanda xi kio tjindundaire ꞌba jaꞌekore ngatsiꞌi xi inyafesun. 36ꞌBa ꞌetsꞌare tsa sjaꞌndere nga siko tetjun najñure. ꞌBa ngatsiꞌi xi kitsiko najñure Jesús kuanda.

Terpilih Sekarang Ini:

SAN MATEO 14: vmy

Highlight

Kongsi

Salin