Mateo 4
4
Dos Kodgeddam ni Moivuyan ki Disas
(Marcos 1:12-13; Lucas 4:1-13)
1Na, id piyod si Disas to Uhis no Ispiritu riyot noka-awoy-awoy'n lugaa amoy od geddaman ni Moivuyan kod kopiyod sikandin nod puung to saa. 2Id puasa si Disas daom to oppat-no-puun allow woy bulli, woy nopongnga, oraroy sikandin id gutasan. 3Na id porani si Moivuyan kandin woy mid kahi to, “Otik mooggot ka en no Anak to Monama, suhuwow inis batu nod kovovallan no paan.”
4Piru mid tavak si Disas to, “No-ikahi riyot Nosulat no Kahit Monama no,
‘Konna ra koka-an kos od poko-uyag to minuvu, ko konna, iddos ipat kahi to Monama.’ ”#4:4 Od kovasa ini riyot Deuteronomio 8:3.
5Nopongnga idda, id piyod sikandin ni Moivuyan diyot Jerusalem woy id poohinat din diyot oray'n motikang no sakup to templo. 6Na id ikohiyan din si Disas to, “Otik sikkow en kos Anak to Monama, timballu ka riyot dosiyung, su no-ikahi riyot Nosulat no Kahit Monama no,
‘Od suhuwon to Monama iddos mgo ponolihan din to kodtavang kikow amoy dii ka od komonnu.
Od saakon ka nikandan amoy ahad ikos pa-a ru, diid kohisgisan.’ ”#4:6 Od kovasa ini riyot Salmo 91:11-12.
7Piru mid tavak si Disas to, “No-ikahi mandad diyot Nosulat no Kahit Monama no,
‘Yo ru geddami kos Monama nod Longaggon du.’ ”#4:7 Od kovasa ini riyot Deuteronomio 6:16.
8Nopongnga idda, id piyod sikandin ni Moivuyan diyot oray'n mowwet no buvungan. Woy id pokita rin iddos langun no kohoriyan ka-ay to ampow't ingod woy dos mgo korotuwan dutun. 9Kahin Moivuyan to, “Id boggoy ku kikow inis langun otid lingko-od ka woy od simba koddi.”
10Mid tavak si Disas to, “Awa ka, Moivuyan! No-ikahi riyot Nosulat no Kahit Monama no, ‘Iyon du ra simba-ana iddos Monama nod Longaggon du woy sikandin da kos duurumanniyu.’ ”#4:10 Od kovasa ini riyot Deuteronomio 6:13.
11Na mid awa ron si Moivuyan, woy id inguma iddos mgo ponolihan amoy'd tuhanuu ki Disas.
Dos Kodtigkanoy to Pinuungan ni Disas diyot Galilea
(Marcos 1:14-15; Lucas 4:14-15)
12Na, to norinog ni Disas no noprisu si Juan, id livod sikandin diyot Galilea. 13Mid tanan sikandin diyot Nazaret, woy id undiyon to Capernaum amoy'd oubpa rutun. Inin bonuwa, diyon lomig to ibpit to Lanow't Galilea no sakup to livuta to koubbaran ni Zabulon woy Neptali. 14Notomanan ini, su amoy od kotuman iddos id po-ikahi to Monama ki propeta Isaias no mid ungketen to,
15“dos mgo ingod to Zabulon woy Neftali, noko-ibpit to lanow woy nokoripaa to Oweg to Jordan.
Inin mgo lugaa, sakup to prubinsya to Galilea nid oubpan to konna mgo Judio.
16Iddos mgo minuvu rutun, noko-iling tid oubpa riyot mosukirom. Iling to id patoy ron sikandan, oyyos waa ran id kilaa to Monama.
Piru init od ingumon allow, od kokita ran don kos ma-awang no se-aa nod taddow kandan.”#4:16 Od kovasa ini riyot Isaias 9:1-2.
17Na pomon taddon timpu, mid tigkanoy si Disas to kodponudtuu to kahit Monama. Kahi rin to, “Sondit kow woy tanan kowd to mgo saa row, su asow ron kos kodharit Monama.”
Dos Kod-aam ni Disas to Oppat no Tohodngongaap
(Marcos 1:16-20; Lucas 5:1-11)
18Sokkad no allow, laggun tid ipanow si Disas diyot ibpit to Lanow't Galilea, nokita rin iddos oruwon toosuwod no si Simon no id ngoranan mandad ki Pedro woy dos ari rin no si Andres. Id ooppan dan to pukut su mgo tohodngongaap me-en sikandan. 19Kahin Disas kandan to, “Duma kow koddi. Konnad ngaap kos od ingutollon dow, ko konna, od nonawwan ku sikiyu nod ingutoo to mgo minuvu.” 20Idda ron en, id tonanan dan iddos mgo pukut dan woy mid duma ran kandin.
21Na ponayun mid ipanow si Disas diyot ibpit to lanow, woy nokita rin iddos oruwa mandad no toosuwod no si Santiago woy si Juan no mgo anak ni Sebedeo. Id ounsad sikandan diyot bollangay duma to amoy ran no id oupiya to mgo pukut. Na, id umow sikandan ni Disas amoy'd duma kandin. 22Idda ron en, id tonanan dan iddos amoy ran woy dos bollangay woy mid duma ran ki Disas.
Dos Kodnonaw woy Kodbawi ni Disas
(Lucas 6:17-19)
23Na, id lingkus ni Disas iddos intirut prubinsya to Galilea. Id nonaw sikandin diyot mgo simba-an to Judio woy id ponudtuu to Moppiyon Dinoggan moka-atag to kodharit Monama, woy id bowiyan din kos nokod-osso-osson bohok. 24De-en novantug sikandin diyon to intirut lugaa to Siria. Pomon tadda, id piyod to mgo minuvu iddos langun nod kovohokan diyot kandin, dos id geddam to oray'n mosakit, dos id ponlosuran to busow, dos od pombovuyon woy dos mgo minuvu nid patoy kos lawa. Na langun dan, no-uliyan. 25Purisu ahad ingkon sikandin od isau, oray'n mo-uraa kos mgo minuvu nod dumoruma kandin pomon diyot Galilea, diyot Decapolis,#4:25 Dos kohulugan to Decapolis, sopuun bonuwa. diyot Jerusalem woy riyon to dipaat Oweg to Jordan.
Terpilih Sekarang Ini:
Mateo 4: obo
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2011, Wycliffe Bible Translators, Inc. All rights reserved.
