मत्ती 8
8
ईसु कुड़ायला माणसेक वारु करे
(मरकुस 1:40-45; लुका 5:12-16)
1जत्यार ईसु तीना बयड़ा सी नेचु उतर्यु, ती एक माणसेन मट्लु टुळु तेरे पछळ आयु। 2ने देखु, एक कुड़ायलो तेरे धड़े आवीन ईसुक आंध्यु ने कह्यु, “ए मालीक, कदी तु चाहे, ती मेसेक वारु कर दे।”
3ईसु तीनाक छीमीन असु कह्यु, “मारी मरजी बी असीत छे, तु चुखु#8:3 शुध्द हय जां!” ने हयु तत्यारुत कुड़ सी चुखा हय गुयु। 4ईसु तीना काजे कह्यु, “देख, जी वात कुय काजे घुण कहें, बाकुन जाय्न पुजाराक बताड़जी ने मुसान कायदान अनसारे भेट चड़ावजी, ती आखा माणसे जाण जासे ने गवा बण जासे की तु वारु हय गुयु।”
एक रोमन सुबेदारेन भुरसु
(लुका 7:1-10)
5जत्यार ईसु कफरनहुम सहर मां पुग्यु ती एक सुबेदार तेरे धड़े आवीन तेरे सी लीलघाय्न कह्यु, 6“ए मालीक, मारा पावर्यान लखवु हय गुयु, ने घर मां पड़ीन एला कर रयु।”
7ईसु तीना काजे कह्यु, “मे आवीन तीना काजे वारु कर दीस।”
8सुबेदार जपाप आप्यु, “ए मालीक मे अतरु वारु नी हय की तु मारा घरेन साहळे आवे, बाकुन तु जात रय्न एक बुल कय दे, ती मारु पावर्यु वारु हय जासे। 9काहाकी मे बी दीसरान हक मां रवण्यु एक नानुस हकदार्यु छे, ने सीपायड़ा मारे हक मां रहे जत्यार मे एक सी कहं ‘जां!’ ती चु जाय; ने दीसरा सी कह्, ‘आव!’ ती चु आवे; ने जत्यार मारा पावर्यु सी कह्, ‘ज कर!’ तीना काम काजे करे।”
10ज सामळीन ईसु चक्कर मां पड़ गुयु, ने जे तेरे पछळ आवतेला तीनुक कह्यु, “मे तुंद्रे सी छाचलीन कहं की मे ईस्रायेली माणसे मां बी मेसेक अतरु पाक्कु भुरसु देखणे नी जड़्यु। 11मे तुंद्रे सी कहं की उगेवणा ने बुडवणा सी बेसका माणसे आवीन अब्राहम ने इसाक ने याकुब साते सरग वाळा भगवानेन राज मां बठीन खाणो खासे। 12बाकुन जे भगवानेन सरग राजेन हकदार्या माणसे छे, बाकुन चे भुरसु नी करे, तीनु काजे सरग राजेम सी बाहार आंदारला मां नाख देसे। चां कलपी-कलपीन रड़सु ने दात काजे ककड़ावता रवसु।” 13तत्यार ईसु तीना सुबेदार काजे असु कह्यु, “जां, जसु तारु भुरसु छे, तसुत तारे वाटे बी हय जाय।”
ने तेरु पावर्यु तत्यारुत वारु हय गुयु।
ईसु भाती-भातीन मांदला माणसे काजे वारु करे
(मरकुस 1:29-34; लुका 4:38-41)
14ईसु जत्यार पतरसेन घर मां आयु, ती पतरसेन सासुसेन सेरी आय रवलो देख्यु। 15ईसु तीनी पर हात मेक्यु ने तेरो सेरी तत्यारुत उतरी ज्य, ने ची उठीन ईसुन चाकरी करने बाजी गुय।
16जत्यार सांती वेळाय चे ईसु धड़े बेसका माणसे काजे लाया तींद्रे मां भुतड़ान आत्मा हतली ने ईसु तीनु आत्मा काजे तेरा बुल सी नीकाळ देदु; ने आखा मांदला काजे वारु कर्यु। 17काहाकी ज बुल यसायाह भगवानेन अघी सी आवणे वाळी वात देखान्यान साहरे कह्लो हतलो च पुरो हवे, “चु आपसु हामरी आखी लुल्गाय काजे झेल लेदु ने हामरी मांदवाड़ काजे छेटु कर देदु।”
ईसुन चेला बणनेन कीमत
(लुका 9:57-62)
18जत्यार ईसु तेरे चारे मेर एक मटला टुळा काजे देख्यु, ती डाबरान पली धड़े जाय्न हुकुम आप्यु की, तुहुंं मेसेक ढंड्या मां बठाड़ीन दरीयान पली धड़ ली जाती रवु। 19तत्यार एक यहुदी नीयमेन मास्तर्या ईसु धड़े आवीन कह्या, “ए मास्तर, जांहा बी तु जासी, मे तारे पुठ्ये आवीस।”
20ईसु तीनुक कह्यु, “फुंदाळी खुखड़ीन दर रवे ने सरगे चिरलान बसणेन पुत्रु रवे; बाकुन माणसेन पुर्या वाटे ते मुणको ढाकणेन लग जागु नी हय।”
21एक दीसरु चेलु ईसु काजे कह्यु, “ए मालीक मे तारे पुठ्ये आवीस बाकुन मेसेक मारा बासेन घर जाणी दे, की जत्यार चु मर जासे ती तीनाक गाड़ दीन मे तारे पुठ्ये आवीस।”
22ईसु तीनाक कह्यु, “मरला काजे गाड़ने काम मरलात काजे करने दे; तु ते मारे पुठ्ये चाल।”
आंधी ने दरीयान झलक लग ईसुन हुकुम माने
(मरकुस 4:35-41; लुका 8:22-25)
23जत्यार ईसु ढंड्या मां बठ्यु ती तेरा चेला बी तेरे पुठ्ये बठ गुया। 24ने, तीनी टेम दरीया मां उचकान बेसकी मटी आंधी आवी, ने दरीयान झलक ढंड्ये आपठायन बाकुन ईसु ते, सुवणे बाजी रवलु। 25तत्यार चेला ईसु धड़े आवीन उठाड़्या ने कह्या, “ए मालीक हामुक!” बचाड़ नी ते “हामु आखा डुबीन मरने बाजी रया!”
26ईसु तीनुक कह्यु, “ए! कम भुरसा वाळा, तुहुंं काहा बीही रया!” तत्यार चु उठीन आंधी ने पाणी काजे लड़्यु, ने आखो सेळो पड़ गुयो।
27ने चे चकराय गुया ने कह्णे लाग्या, “गुयु कसलु माणुस छे की आहळी#8:27 आंधी ने पाणी बी हेरी वात काजे माने।”
ईसु भुतड़ान आत्मा भरायला दुय माणुस काजे वारु करे
(मरकुस 5:1-20; लुका 8:26-39)
28जत्यार चु पली धड़े गदरेन्यान ईलाका मां पुग्यु, ती दुय माणसे तींद्रे मां भुतड़ान आत्मा हतली ची मसाण मां सी नीकळ्या ने ईसुक भेळा हवणे आया। चे अतरा ताकतवाळा हतला की कुय बी तीनी वाट सी जाय नी सकतेला। 29चे आयड़ीन असा कह्या, “ए भगवानेन पुर्या, हामरे साते तारो काय काम छे? काय तु हामुक एला पाड़ने आय र्यु?” 30हींद्रे सी ईतरेक छेटेस बेसकु मटु सुहर्यान टुळु चरने बाजी रवलु। 31भुतड़ान आत्मा ईसुक असी कवीन लीलघायणे लागी की, “कदी तु हामु काजे अदमी मां सी नीकाळे, ती पला सुहर्यान टुळा मां मकली दे।”
32ईसु तीनुक कह्यु, “जावु!” ने चे अदमी मां सी नीकळीन सुहर्यान टुळा मां भराय गुया, ने आखा टुळा आड़खा पर सी झपटीन पाणी मां डुबीन मर गुया।
33ने सुहर्या काजे चारन्या गुवाळ्या ढास्या, ने सहर मां जाय्न हयो, च आखो कय देदा ने भुतड़ा लागला माणसेन काय हयो च बी कय देदा। 34तत्यार आखा सहरेन माणसे ईसु सी मेळने करीन आयु, ने ईसुक देखीन लीलघाय्न कह्णे लाग्या की हामरी मुलकेम सी बाहर जाती रव।
Terpilih Sekarang Ini:
मत्ती 8: BSP25
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.
