Luk 11
11
Jizɔs atɛs ayɛghɛnɛv anav mɔ vɛ ram ghu Aonz
(Matiyo 6.9-13; 7.7-11)
1Ihɔ igen, Jizɔs aruyi ramen ghu Aonz ahiye ugen. Abɛɛn aram mɔ, ɔr umɔm kɔ ayɛghɛnɛv anav ava kaa ghu un na, “Uwun, tes ɔs ɛnmɔ ghi ram ghu Aonz, ɛn mɔ Jon atɛs ayɛghɛnɛv anav.”
2Jizɔs akaa ghɛ avo na, “Uramen ghu Aonz, kaan na:
“Utir, itughun iru itiye iyow,
utorov uvov uva.
3Hanamɔ ihɔ naa ɔs ukwagh uyan uwas,
4Guwe akaa abe aas,
ɛnmɔ ɔs kpa ghi guwe akaa abe amban vɛ ɛr abegh ghu ɔs.
Kɛgh ɔs ɛn ide ghi igban kɔ avɛmben.”
5Ne Jizɔs akaa ghɛ avo na, “kɛ ana uwon angwe ukar ta aza kɔ ghu un atɛ imiye na, ‘Ukwarǝm pɔrum akpon ubrɛd atar; 6ukwarǝm ugen aru kɔ uzend, ava kan ghu amwe, mɛ ungwe ukwagh uyan ungwen mɛ na un gha.’ 7Ɔ ɛn ukwar uwow kɔ itumbɛ imin akaa na, ‘Ka zam iyɔr gha; Mɛ zema uhunza, mwe ghɛ myem avav ghi iyav; Mbe mugh isa mɛ na uwɛ ukwagh gha.’ 8Mɛ ɔɔr un na, ɔ ɛn abe ana un ubrɛd gha, kpa ɛchi ikar ivo ana un ukwagh ungwen aker, ashigh ana un ukwagh ungwen aker ɛchi mɔ achiya itsuwe gha.
9“Ne mɛ kaa ghu un: pine Aonz ana uwɛ; ker ukor; kɛma Aonz abugh uhunza ɛchi uwow. 10Hanamɔ ɔr ungwen apine, Aonz ana un. Hanamɔ ɔr ungwen ker kɔ Aonz, akor. Ɔr ungwen akɛma Aonz abugh un uhunza.
11“Kɛ ana utir, sɛ uwan apine un isu, sɛ ana un iyɔ ɛn kɛ isu? 12Zan apine egi ikogh, sɛ ana un iyozo? 13Ɔ ɛn un iyɔr abev ufɔn na unan akaa ashiyan kɔ myem avonov, ku mɔ hun ne Utir uwon kɔisa ana Ajingɛjing una kɔ ghi iyɔr amban vɛ pine un!”
Jizɔs avenda na un a ɛrɛn utom una ghi ikɔw Ijɔv gha
(Matiyo 12.22-30; Mak 3.20-27)
14Ihɔ igen Jizɔs ahure ajingɛjing ube kɔ ɔr ukondukor; mɔ ajingɛjing ube aduwen kɔ ghɛ ana iyov, ɔr hun akɔr iramen. Katser isum iyɔro ingin iru hen mɔ. 15Kpa iyɔr agenɛv vɛ akaa na, “Ahuren ajingɛjing abev ghɛ ikɔw Belzebu#11.15 Belzebu Belzebu itiye ina Ijɔv igen. unom ijɔvɔ.” 16Amban vɛ ker na vɛ kɔr Jizɔs, vɛ akaa ghu un na, tes ɔs ikav ingiyen ghi fɔ na Aonz atsɛgha uwɛ.
17Kpa Jizɔs afɔn asɛma avo, akaa ghɛ avo na, “Utar ungun ungu ghɛ mzwang gha ugba, itumbɛ ingin ibur ken igba. 18Ɔ ɛn Ijɔv ibur imɛnɛgh inagh, nan sɛ Utorov unav utire? Mɔ ukaan na mɛ huren ajingɛjing abev ghɛ ikɔw inagh Belzebu mɔ. 19Ɔ ɛn mɛ huren ajingɛjing abev ghɛ ikɔw Belzebu, ayɛghɛnɛv avonov amba huren kɛ nana? Ɔ ɛn ukaan mɔ ayɛghɛnɛv avonov vɛ na un ibe. 20Ne ɔ ɛn mɛ huren ajingɛjing abev ghɛ ikɔw una Aonz, Utorov unav Aonz uva kan ghu un.
21“Ɔ ɛn itargɛr ɔr, awa iyɔr ghi ikaav unɔnguv inav, ghi ikɛghɛn itumbɛ ina, akaa ana arir gha. 22Ne ɔ ɛn itargɛr ɔr ugen achir un unong sɛ ahɛmba un, a ɔz ikaav unɔnguv inav, imbin abɛr isima ivi abur akaa ana ghɛ iyɔr anav.
23“Ɔr ungwen angwe ghu umwe gha angwe ɔr itsɔn uwam, ɔr ungwen atungnun ghu mwe gha asaren asar.
24“Ɔ ɛn ajingɛjing ube iduwe kɔ ɔr, azenden kɔ umuwan kɔ ghi ikɔng, ukeren ihiye hɔ amem; ne ɔ ɛn ikor gha, akaa imɛnɛgh inagh na, ‘Mɛ hire kɔ itumbɛ hɔ mɛ duwe mɔ.’ 25Mɔ ahire, a ɛn itumbɛ ingin kɔ nyin aduwe mɔ, mɔ vɛ os ta vɛ tɔr vɛ ber jing. 26Ne aza rav ajingɛjing abev atsindar tsar umɔm amban vɛ hɛmba un, avo amem vɛ nɔr kɔ ɔr ungumɔ vɛru kɔ ghɛ ana; Mɛza iyɔr ɔr ungumɔ ahɛmba ɛnmɔ avand irun mɔ.”
27Mɔ Jizɔs aru iramen, ukwas ugen kɔ isum iyɔr avang imo na, “Ghɛshiya ungɔ ungwen amaru uwɛ, ghɛ atǝmba angan ɔ amb!”
28Jizɔs arumun una, “Hin ukaa na, ghɛshiya ghu amban vɛ amgba amu ana Aonz ta vɛ a ɛr aa mɔ!”
Iyɔr iker na Jizɔs a ɛr ukwagh kondon iyɔr
(Matiyo 12.38-42)
29Mɔ iweng iyɔr iru isorun, Jizɔs akaa na, “Ichend ingiyen hanagen ingiye ichend ibe; amba ipinen ikav kpa vɛ kor gha, sa ikav ɔ Jonna. 30Ɛnmɔ Jonna aru ikav kɔ iyɔr Ninivɛ, mɔ ne Uwan Ɔro aru ikav ghi ichend ingiyen. 31Utor ukwas ungwen aru kɔ utar Shiba ɔ ɛn atire ijir ghɛ iyɔr amban ichend Ingiyen, ana avo ibe, ɛchi aduwe kɔ utar marɛmbɛ ava imgban ukwagh ufɔn una Salmon. Ɛn sɛ, ɔr uhɛmban Salmon angwe han ghu un. 32Iyɔr Ninivɛ ihɔ ijiri vɛ tire ijir ghɛ ichend ingiyen hanagen, vɛ ana avo ibe, ɛchi vɛ gɛma asɛma vɛ de akaa abe avo mɔ vɛ amgba urɛhɛ una Jonna. Ɔr ungwen ahɛmba Jonna angwe han ghu un.
Jizɔs atɛs ukwagh ghi iyamǝn ghɛ imiye
(Matiyo 5.15; 6.22,23)
33“Ɔr amengɛn uzu aza, ayɛr gha, zan aza awa aku kɔ ghi ikagh gha. Amengɛn abɛr ghi jɛng, ɛn amban vɛ nɔr kɔ itumbɛ vɛ ɛn iyamǝn. 34Ase a ow anga ɛn ghi isav kɔ iyɔr imem. Ɔ ɛn ase a ow anga makun, iyɔr imem iru ghi iyamǝn; ne ɔ ɛn ase a ow anga makun gha, iyɔr imem iyiv ghi imiye. 35Kɔrun ayom ɛn iyamǝn ingin kɔ ghɛ awɛ mɔ iki wayi imiye gha. 36Ɔ ɛn iyɔr imem iyiv ghi iyamǝn sɛ imiye iki ingi ken gha, uru ghi iyamǝn shisha, ɛnmɔ iyamǝn ghi isav ingi imengen ghɛ awɛ.”
Jizɔs aram ghu Ufarasi ghɛ afɔnɛv mɛnna Ujus
(Matiyo 23.1-36; Mak 12.38-40)
37Mɔ Jizɔs aru ghi iramen, Ufarasi ugen arav un ukwagh uyan kɔ itumbɛ; ne Jizɔs aza nɔr atɛma ghi iyan. 38Ne ka akond Ufarasi iyɔr mɔ Jizɔs aru iyan ukwagh uyan sɛ akire avo gha.
39Ne Uwun akaa ghu una, “Un Ufarasi umbu kiren ukɔ ghɛ akpakpa kɔ uwen, kpa asɛma uwon ayiv ken ghɛ ambus ghɛ akaa abe. 40Un iyɔr iranen kwagh! Aonz ne a ɛr kɔ ghi imin ghɛ kɔ uwen gha? 41Kpa na akaa angan anga kɔ ukɔ ghɛ akpakpa uwon kɔ ghɛ achanɛv; ta akaa amem ɛru tsangna.
42“Ichan iva ghu un Ufarasi, umbu dun umɔm kɔ puwɛ kɔ akaa angan usundan ghɛ hanamɔ ukwagh, umbu unan Aonz, kpa uvendan ukɔng ghɛ mɔ ghɛshiya un ghɛ Aonz. Akaa angan amem kɛ angan hin ukɔrun aa.
43“Ichan ghi iva ghu un Ufarasi, ghɛshiya un utɛman kɔ ikɔnuv unomov kɔ atumbɛ izwangnɛn Ujus ghɛ ukeren ikaan ghi iyɔr kɔ ghu ukasuwa.
44“Ichan iva ghu un! Umbun ɛn iwar ingin ingi ayɛr, ingin iyɔr ikaren iyi kɔisa ghi itsuu.”
45Ɔr ufɔn mɛnna Ujus akaa ghu Jizɔs na, “Ɔr Tɛsɛn, uram utɛr ɔs ghɛ akaa angan uram hanagen.”
46Jizɔs akaa na, “Ichan iva ghu un afɔnɛv mɛnna Ujus, umbu wan iyɔr ikaav imbin vɛ kan ghi itɛngnen gha, un uku wan avo kas nom-nom uvo ukondon avo gha.
47“Ichan iva ghu un! Ɛchi utɔr uman iwar aramenɛv ɛchi Aonz amban utir avonov atsɛv vɛ wuwa. 48Mɔ urumonun akaa angan utir avonov atsɛv vɛ ɛr mɔ; vɛ wuwa aramenɛv ɛchi Aonz, un uman iwar ivo. 49Ɛchi man ne, Aonz ghu ukwagh ufɔn una akaa na, ‘Ɛr mɛ tind aramenɛv ɛchi Aonz ghɛ ayɛghɛnɛv amban atsuwa, vɛ wuwa agenɛv, agenɛv vɛ ana avo ichan.’ 50Iyɔr amban hanagen Aonz ana avo ichan ghi ikuv imbin vɛ wuwa aramenɛv ɛchi Aonz, tra kɔ ghɛ mvar utar. 51Vɛ ya ichan hiye kɔ ikugh inagh Ɛbɛl kpem ghi inagh Zakariya, ungwen vɛ wuwa kɔ atɛ atso angan amba asongnun irɛv ghɛ kɔ ghi ihiye utsangna kɔ itumbɛ Aonz. Ukɔng, mɛ ɔɔr un, Aonz ana un ichan ichend ingiyen, ɛchi uvo.
52“Ichan iva ghu un atɛsɛnɛv mɛnna Ujus! Uyɛr aki ukwagh ufɔn. Un umbu unɔrun gha, uyingan iyɔr amban ghɛru na vɛ nɔr, na vɛ aka nɔrɔyi gha.”
53Mɔ Jizɔs aru iduwen kɔ uwen, atɛsɛnɛv mɛnna Ujus ghɛ Ufarasi vɛ chir un, ghu upinen un mpine tsɛng. 54Vɛru ihenen un, na aram kwagh dang ungwen vɛ kɔr un.
Terpilih Sekarang Ini:
Luk 11: UTA
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©️2024 Luke Initiative for Scripture Translation
