Mark 10
10
Kipukipu kekiaꞌi keꞌavana
(Mat 19.1-12; Luk 16.18)
1Kena Jesus uhaele ikaha ma kemakaꞌina la, nohaele i Judea, i kelaa vahi ke{liva} Jordan. Ia kena naonohenua eo aꞌe Jesus hoi. Kena Jesus uaoaꞌo nakama la, poi aia niaoaꞌo alakama imua la hoi.
2Kena alakama naFarasi la uo aꞌe nokaiꞌi Jesus, kena ivasili aꞌe, “Nakuaa kakou eme pehe? Elavaa kanaka kekiaꞌi keꞌavana aia la?”
3Kena Jesus eme aꞌe, “Kuaa Moses niau aku la eme maea?”
4Nakama la eme aꞌe, “Moses ehaakana makou ikakaa kelauniu noꞌave nahine makou la, pela makou iseꞌavana, kena ihaise naꞌavana makou la ikaha.”
5Ia Jesus eme aꞌe, “Moses ekakaa aku kuaa na, maikinimea okou ehakapanaka haeꞌo. 6Ia kulana Keakua nipena kemaalama nei la, Keakua epena koꞌolua nakama; kanaka, kehine. 7Kela hea kaupeala la mekiaꞌi kamana ia ma kina aia la, kena ihanoa ma kaupu la. 8Ia kena koꞌolua na uo mai pela hekama hokahi. Seai koꞌolua. 9Keakua esuꞌui koꞌolua na. Kena sehikama ekau kekuu keꞌavana koꞌolua la.”
10Kulana Jesus ia ma nakama kaukali aia la unoho i hale, nakama la uvasili aꞌe halaoi kipukipu keseꞌavana. 11Kena Jesus ume aꞌe, “Pena hekama seꞌavana kehine aia la, kena iꞌavana kelaa hine, kanaka na esala keꞌavana huli. 12Ia pena hehine seꞌavana keꞌavana aia, kena iꞌavana kelaa kanaka, kehine na esala keꞌavana huli hoi.”
Jesus hihai nakamaliꞌi io aꞌe aia
(Mat 19.13-15; Luk 18.15-17)
13Alakama eau aꞌe nakamaliꞌi lakou la ia Jesus, pela aia mehapili nalima aia iluna nakamaliꞌi la. Ia nakama kaukali la ehai aꞌe nakama la. 14Ia keualoko Jesus uꞌike nakama kaukali aia la epui nakamaliꞌi la iseo aꞌe, kama la eloko, kena ime aꞌe, “Kiaꞌi nakamaliꞌi na io mai anau. Okou isepui nakamaliꞌi na. Maikinimea kenoholana Keakua heꞌina nakamaliꞌi na. 15Anau eme aku kehamaoni. Nakamaliꞌi soliꞌi la ehihai Keakua ilolosi lakou. Pena hekama sehihai Keakua ilolosi aia, poi hekamaliꞌi soliꞌi, kena kama na meselavaa kekae kenoholana Keakua la.” 16Kena Jesus esau nakamaliꞌi la, kena ihapili kelima aia iluna lakou, kena ihakapu nakamaliꞌi la.
Kevasili kama haiheaꞌu
(Mat 19.16-30; Luk 18.18-30)
17Kulana Jesus nihaele, kela hekama ekele aꞌe nokoukuli imua Jesus, kena ime aꞌe, “Rabai, aꞌoe hekama kaualeꞌa. Anau mekaualeꞌa pehe iko keola eola kahi?”
18Kena Jesus ume aꞌe kama la, “Aiea aꞌoe eme mai manau ekaualeꞌa naea? Keakua soia ekaualeꞌa. 19Aꞌoe emakino nakuaa; sekaa kama, seꞌavana huli, seailalao, sekakala nukulaoi alakama, sehailavaꞌa alakama. Hamaha kamana aꞌoe ia ma kina aꞌoe la.”
20Kena kama la ume aꞌe Jesus, “Rabai, amaka mai keualoko anau nisoliliꞌi la, anau ekauhano kekaukali nakuaa la hakoa.”
21Jesus eꞌila aloha aꞌe kama la, kena ime aꞌe, “Kena kelaa mea aꞌoe ikau kekaukali. Haele noko naheheaꞌu aꞌoe la hakoa. Au aꞌe namela i alakama isui. Kena uvavae aꞌe namoni la i nakama haaloha. Ia kena aꞌoe meiko namea kaualeꞌa i kevaelani. Kena aꞌoe hamai nokaukali mai anau.” 22Ia keualoko kama la nilono nakakala Jesus, kama la ukipuaina haeꞌo, kena ihaele ikaha, maikinimea kama la ehaiheheaꞌu.
23Kena Jesus uꞌila aꞌe nakama kaukali aia la, kena ime aꞌe, “Mehainakaa haeꞌo nakama haimoni kekae kenoholana Keakua.”
24Ia kena nakama kaukali la umasalo nakakala Jesus la. Kena Jesus ume aꞌe halaoi nakama la, “Aukama, hainakaa kekama kekae kenoholana Keakua. 25Hainakaa ke{kamelo} keulu iloko kelua kelina kela ekui pamalo. Ia hainakaa haeꞌo nakama haimoni la kekae kenoholana Keakua.”
26Ia nakama la umasalo haeꞌo nakakala Jesus, ia kena ikakala solakou, “Kena oai kekama amekae na?”
27Jesus uꞌila aꞌe nakama la, kena ime aꞌe, “Kela hainakaa kekama, ia sehainakaa Keakua. Namea hakoa ehainahie Keakua.”
28Kena Peter eme aꞌe Jesus, “Makou ukiaꞌi namea hakoa, kena makou ukaukali aꞌoe.”
29Kena iko Jesus ime aꞌe, “Anau eme aku kehamaoni. Pena hekama ekiaꞌi nahale aia, nakaina aia, naꞌave aia, kina aia, kamana aia, nakamaliꞌi aia, ia ma napaupaꞌu aia la, kena ikaukali mai anau, ia ehakina kelono kaualeꞌa Keakua, 30kena Keakua meihoꞌi aꞌe kama la komaꞌi*f11* nahale, nakaina, naꞌave, nakina, nakamaliꞌi, ia ma napaupaꞌu i kemaalama nei. Ia alakama meikahao sala nakama kaukali anau la. Ia nakama la meiola naualoko hamau i kelaa maalama. 31Komaꞌi nakama hananiu meikeiho ilalo. Ia nakama moulalo meihananiu.”
Jesus ukakala kanamake hoi
(Mat 20.17-19; Luk 18.31-34)
32Keualoko Jesus ia ma nakama kaukali aia la nio nokae Jerusalem, Jesus ehaele imua nakama la. Kena nakama kaukali la emasalo. Ia keonohenua kela ekakaꞌa ma nakama la emakaꞌu. Kena Jesus eanaa aꞌe sehui ma lua nakama kaukali aia la, kena ikakala aꞌe lakou hea meikae aꞌe i aia. 33“Halono. Kakou eo i Jerusalem. Hekama meiau aꞌe {kama ekipu kama} i namaakua hamakua, ia ma nakama polopolo nakuaa la. Kena nakama la meihai aꞌe kama la, kena iau aꞌe kama la i nakama enoho pouli, ikaa kama la imake. 34Nakama la meikokousua kama la, ia mesasavale kama la, ia meilili kia kama la. Ia kena ikaa kama la nomake. Ia keaho kanahakolu, kama la meimasiꞌe ikaha ma kemake.”
Kipukipu nakama hihai hananiu
(Mat 20.20-28)
35Nakama kela Zebedee, James laua ma John, uo nome aꞌe Jesus “Rabai, maua hihai aꞌoe iau mai hea maua hihai.”
36Jesus eme aꞌe hanau la, “Hea olua hihai anau iau aku ma olua na?”
37Kena hanau la ume aꞌe, “Kulana aꞌoe meihananiu i kenoholana aꞌoe la, maua hihai kekama inoho kevahi laua aꞌoe, kelaa kama enoho kevahi selaua aꞌoe.”*f12*
38Ia Jesus eme aꞌe, “Olua semakino hea olua eainoa mai anau. Elavaa olua keunu ke{kapu} anau meiunu la? Olua elavaa kehaauꞌau kapu, poi anau meihaauꞌau kapu la?”*f13*
39Kena iko hanau la ime aꞌe Jesus, “Maua elavaa.” Kena Jesus eme aꞌe hanau la, “Olua meiunu ke{kapu} anau meiunu la. Ia olua mehaauꞌau kapu, poi anau meihaauꞌau kapu la. 40Ia emeia anau selavaa kekini oai meinoho i kevahi laua anau, ia oai meinoho i kevahi selaua anau. Keakua soia mekanakana naꞌina koꞌolua la meinoho.”
41Keualoko kelaa sehui nakama kaukali la nilono nakakala James laua ma John, nakama la uloko haeꞌo i koꞌolua la. 42Ia Jesus uanaa aꞌe nakama kaukali aia la ihaꞌuku aꞌe, kena ime aꞌe, “Nakama hananiu kela nakama enoho pouli la ehakanaka haeꞌo, ia napalekuꞌu la ehuli aꞌe namahi lakou iluna keonohenua la. 43Ia okou iseme penaa. Poi hekama okou hihai ihananiu, kama la ekau kekonaꞌi alakama. 44Ia poi hekama okou hihai ihananiu, kama na ikuu iho soia, eme mo kama heheaꞌu okou. 45{Kama ekipu kama} eme pela hoi. Kama la sehamai nohananiu nakama hakoa. Emeia kama la ehamai nokonaꞌi alakama, kena ihoꞌi aꞌe keola aia. Kama la emake ihaakana komaꞌi nakama ikaha ma nahaisala lakou.”
Jesus ekonaꞌi kama alemaka seni
(Mat 20.29-34; Luk 18.35-43)
46Vahola, Jesus ia ma nakama kaukali aia la ukae kemakaꞌina Jericho. Ia keualoko nakama la nio ikaha ma Jericho, komaꞌi haeꞌo nakama ekaꞌa vamuli. Vahola, hekama alemaka seni enoho kevahi keala, iainonoa namoni. Kemale kama la Bar-Timaeus, (emea ma, kama Timaeus) 47Keualoko kama la ulono pela Jesus kekama Nazareth ukae keꞌina la, kena kama la eanaa aꞌe, “Jesus, kemopuna kekuꞌu David, aloha mai anau.”*f14*
48Kena keonohenua la uhai aꞌe kama la inoho semuu. Ia kama la eanaa aꞌe hamaloa ma, “Kemopuna kekuꞌu David, aloha mai anau.”
49Ko Jesus ihamau, kena ime aꞌe, “Me aku kama na ihamai.” Kena nakama la ume aꞌe kama alemaka seni la, “Aꞌoe isekipuaina. Masiꞌe iluna. Kama la eanaa aku aꞌoe.”
50Kena kama la ukiaꞌi napupulou aia eꞌahu la, imasiꞌe vave nokuu iluna, kena ihaele ia Jesus.
51Jesus ume aꞌe kama la, “Hea aꞌoe hihai anau ikonaꞌi aꞌoe na?” Kena iko kama alemaka seni la ime aꞌe “Rabai, anau hihai iꞌike.”
52Kena Jesus ume aꞌe, “Haele. Aꞌoe ukaualeꞌa, maikinimea aꞌoe ehakina.” Vahola ia, kama la uꞌike, kena ikaukali vamuli Jesus.
Terpilih Sekarang Ini:
Mark 10: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
