Matthew 7
7
Sehakonu alakama
(Luk 6.37-38,41-42)
1“Okou isehakonu alakama, aoki nakama la mehakonu okou. 2Poi okou ehakonu alakama, kena nakama la mehakonu okou pela hoi. Poi okou eau aꞌe namea, kena alamea mevaꞌai aku pela hoi. 3Aꞌoe eꞌike kaꞌele emau iloko keꞌalemaka kaina aꞌoe la, ia aꞌoe seꞌike keunaloko laꞌau epui naꞌalemaka aꞌoe. 4Aꞌoe sekau keme aꞌe kaina aꞌoe la pela, ‘Hamai ipisi kaꞌele emau keꞌalemaka aꞌoe.’ Ia aꞌoe soꞌoe seꞌike keunaloko laꞌau emau naꞌalemaka aꞌoe. 5Aꞌoe ekakala uhiuhi oia. Sau keunaloko laꞌau emau naꞌalemaka aꞌoe na ikaha. Kena aꞌoe melavaa keꞌike laoi nopisi kaꞌele iloko keꞌalemaka kaina aꞌoe la.
6“Okou seau aꞌe napoi la namea ekapu, aoki napoi la meihuli aku noukia okou. Ia okou selaku aꞌe namea suinaka la i na{piki}, aoki na{piki} la meikakaꞌa namea la.
Ainoa aꞌe Keakua nia okou hihai
(Luk 11.9-13)
7“Ainoa aꞌe Keakua, kena kama la meau aku nia okou hihai la. Sesee, kena okou melave. Kikili kokoꞌa, kena kokoꞌa la meikalaꞌi aku maꞌokou. 8Ame okou eainoa, okou meiko. Ame okou esesee, okou melave. Ia ame okou ekikili, kokoꞌa la mekalaꞌi aku maꞌokou. 9Ame nakamaliꞌi okou la eainoa aku halaoa, okou selavaa keau aꞌe kehaku. 10Ia ame nakamaliꞌi okou la eainoa aku keiꞌa, okou selavaa keau aꞌe keꞌaka. 11Niaina nakipukipu okou la saꞌino, okou eailoa keau aꞌe namea kaualeꞌa i nakamaliꞌi okou la. Ia Kamana okou i kevaelani eme pela hoi. Kama la meiau aꞌe komaꞌi namea kaualeꞌa i nakama kela eainoa aꞌe i aia.
12“Konaꞌi alakama, ehau poi okou hihai nakama la ikonaꞌi okou. Kenei kehakaꞌoko hananiu nakuaa Moses, ia kepolopolo nakama hakae nakakala Keakua.
Keala kevaelani ehainakaa haeꞌo
(Luk 13.24)
13“Keala kela ekae keꞌina kehalono lihu la ehainahie. Kokoꞌa keꞌina kehalono lihu la elaha. Kena komaꞌi nakama ekaꞌa iloko kokoꞌa la. Ia okou ihamamahi iulu iloko kokoꞌa eꞌao. 14Kokoꞌa keꞌina keola la eꞌao lo. Keala kela eo keꞌina keola la ehainakaa. Ia nikamaa kama oia elave keala la.
Ilaꞌila hamakonu nakipukipu kekama
(Luk 6.43-44)
15“Ilaꞌila hamakonu nakama kela ekakala aku i kemale Keakua, ia ehailavaꞌa oia. Nakama la eo aku poi ni{sipisipi} ekala. Ia nakama la ehau poi nipoi leikama. 16Okou meimakino nakama la i nakipukipu lakou.
“Selavaa hekama keꞌahi nanaku ikaha ma napavuhu. Ia selavaa hekama kekuu nahui kehala ikaha ma navasa. 17Nalaꞌau kaualeꞌa ehua nahua kaualeꞌa, ia nalaꞌau saꞌino ehua nahua saꞌino. 18Kelaꞌau kaualeꞌa selavaa kehua nahua saꞌino, ia kelaꞌau saꞌino selavaa kehua nahua kaualeꞌa. 19Nalaꞌau sehua nahua kaualeꞌa ekau kekuu imoe ilalo, kena ulaku iloko keahi. 20Nahua la ehuli aku nakipukipu nalaꞌau. Ia namea nakama epena la ehuli aku nakipukipu naola lakou.
Anau semakino okou
(Luk 13.25-27)
21“Komaꞌi nakama meanaa mai anau pela ‘Kealiꞌi.’ Ia nikamaa kama oia epena kaukali hea Kamana anau la ehihai. Nakama na solakou meikae kenoholana i kevaelani. 22I keaho kehakonukonu la, komaꞌi nakama la meime mai hoi, ‘Kealiꞌi, makou ehakae nakakala aꞌoe i alakama. Makou hakui nakipua saꞌino ikaha, ihuli aꞌe namahi kemale aꞌoe.’ 23Ia anau meime aꞌe nakama la, ‘Anau semakino okou. Okou epena namea saꞌino oia. O ikaha manau.’
Kama eakamai ma kama panimu
(Luk 6.47-49)
24“Poi hekama elono nakakala anau, kena upena kaukali hea anau ekakala nei, kama na eakamai, ehau poi hekama kela ehakuu kehale aia la iluna hakupaa. 25Keua la uloꞌu. Kevai la upii. Ia kemakani la umaili haimahi. Ia kehale la sesina, maikinimea kehale la ehakuu iluna kehakupaa la.
26“Ia poi hekama elono nakakala anau, ia sepena kaukali hea anau ekakala la, kama na epanimu. Ehau poi kekama kela ehakuu kehale aia la iluna kaꞌele semau. 27Keua la uloꞌu. Kevai la upii. Ia kemakani la umaili haimahi, kena kehale la usina nomaseu hakoa.”
28Kena keualoko Jesus uoki kekakala aꞌe keonohenua la, nakama la umasalo keaoaꞌo aia la. 29Jesus seaoaꞌo poi nakama epolopolo nakuaa la. Kama la eaoaꞌo i namahi aia.
Terpilih Sekarang Ini:
Matthew 7: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
