Matthew 12
12
Jesus o Kealiꞌi keaho kapu
(Mrk 2.23-28; Luk 6.1-5)
1I keaho kapu, Jesus ma nakama kaukali aia la ekaꞌa valoko paupaꞌu kela esomo na{uit}. Nakama la hiꞌai, kena iko nahua na{uit} la noꞌai. 2Ia kulana naFarasi la uꞌike nakama kaukali la eko na{uit} la, nakama la eme aꞌe Jesus, “Ila aꞌe. Ame sekonu pela nakama kaukali aꞌoe la eꞌoki nahua la i keaho kapu.”
3Kena iko Jesus ime aꞌe naFarasi la, “Okou napau avale hea David nipena imua. Kama la ma nakama kaukali aia la uhiꞌai. 4Ia kena David ehaele iloko hale kapu la noꞌai nahalaoa ekapu, kena iau aꞌe nahalaoa la i nakama kaukali aia la noꞌai hoi. Ia ekapu kekama vale i keꞌai halaoa la. Namaakua solakou ekau.#12.4
5“Okou semakino nakuaa Moses? Namaakua iloko hale kapu la heaꞌu kahi i naaho kapu, ia nakama la sesala hea lakou epena. 6Anau eme aku okou pela anau ehamakua iluna nakuaa hale kapu la. 7Nikakaa iho i kelauniu kapu, ‘Anau semanaꞌo nahoꞌi okou. Emeia anau hihai okou ihaialoha alakama.’ Poi okou emakino kehakaꞌoko nakakala aia la, okou meselavaa kehai aꞌe nakama ekonu kahi nei. 8Ia {kama ekipu kama} ehamakua iluna keaho kapu.”
Kekama kelima epiꞌo
(Mrk 3.1-6; Luk 6.6-11)
9Jesus ukiaꞌi keꞌina la, kena ihaele iloko hale loku na{Jiu} la. 10Vahola, hekama kelima epiꞌo enoho ilaa. Na{Jiu} la ehihai imau kakala ia Jesus, ia kena ime aꞌe, “Nakuaa kakou emea pehe? Kakou ekau kekonaꞌi kekama i keaho kapu?”
11Kena Jesus eme aꞌe, “Pena punua {sipisipi} okou la ekeiho iloko kelua enoko i keaho kapu, okou ameko punua la ikaha ma kelua la? 12Ia keola kekama elaꞌa iluna ma keola punua {sipisipi} la. Kena ekau pela kakou ikonaꞌi nakama i keaho kapu.”
13Kena Jesus eme aꞌe kama kelima epiꞌo la, “Hola kelima aꞌoe.” Kena iko kama la ihola aꞌe kelima aia. Vahola oia, kelima la ukaualeꞌa, poi kelaa lima aia. 14Kena naFarasi la ukaꞌa ikaha, nosesee hakaꞌoko ma ikaia Jesus imake.
Jesus o kekama heheaꞌu Keakua
15Jesus emakino nahakaꞌoko naFarasi la, kena ihaele ikaha ma keꞌina la. Ia komaꞌi nakama ekaukali aꞌe vamuli aia. Kena Jesus ekonaꞌi nakama lavea la hakoa nomaakala muli. 16Ia Jesus eme aꞌe nakama la isehaꞌali aꞌe hea aia epena la. 17Jesus ekonaꞌi nakama la ihuli aꞌe kehamaoni nakakala kela Keakua nime aꞌe Isaiah, kekama hakae nakakala aia la,
18“Anau ekini kama na mo kama heheaꞌu anau.
Anau haikama laoi kama na,
ia manava kaualeꞌa kama na.
Anau meihaunalia iho kauanana i kama na
Kena kama na mehaꞌali aꞌe nakama enoho pouli la pela anau meihakonukonu naonohenua hakoa.
19Kama na meipasemuu, ia selavaa kepuꞌua hakaukau,
ia selavaa kekakala haeꞌo.
20Kama na menoho pasemuu ma nakama moulalo,
ia mealoha nakama ekipuaina.
Hanokae keualoko aia meimea nakipukipu ekonu kahi la ihananiu.
21Nakama enoho pouli hakoa meihakina i kemale aia la.”
Jesus ia ma Baꞌal Zebub
(Mrk 3.20-30; Luk 11.14-23)
22Alakama ehakaꞌi kekama alemaka seni ia Jesus. Ia kama la selavaa kekakala hoi, maikinimea kipua saꞌino ekau iloko aia. Kena iko Jesus ikonaꞌi kama la nolavaa kekakala, ia noꞌike hoi. 23Keonohenua la hakoa umasalo haeꞌo, kena ime aꞌe, “Kenei o kemopuna David?”
24Ia naFarasi la elono nakakala nakama la, kena ime aꞌe, “Baꞌal Zebub, kekuꞌu nakipua la, eau aꞌe namahi i kama la, ihakui nakipua la ikaha.”
25Ia Jesus emakino nahakaꞌoko naFarasi la, kena ime aꞌe nakama la, “Poi nakama henua la ehavavaꞌee solakou, nakama la memake. Ia poi nakama namakaꞌina, ia ma nakama nahaleaina ehavavaꞌee solakou, nakama la meselavaa kenoho kaualeꞌa hoi. 26Poi Satan ehakui nakipua aia la ikaha, kena nakipua aia la mehavavaꞌee solakou, ia kena kenoholana Satan la meimaseuseu. 27Ia anau sehuli aꞌe namahi Baꞌal Zebub ihaise nakipua aia la ikaha. Seai. Nakama kaukali okou la ehuli aꞌe namahi ai kehaise nakipua la ikaha? Nakama la solakou meme aku pela nakakala okou la esala. 28Ia kela Keanana Kapu Keakua avale eau mai namahi anau nohakui nakipua la ikaha. Ia kena okou emakino pela Keakua uhamai nohamakua kenoholana aia.
29“Pena hekama hihai iulu iloko kehale kekama eivi la noailalao, kama na ekau kesaisai kama eivi la imua, kena uailalao namea iloko kehale kama eivi la.
30“Pena hekama sekuu kevahi anau, kena kama na mehakauꞌaa manau. Pena hekama seheheaꞌu manau ihaopo nakama io mai anau, kena kama la mehaiseise nakama la ikaha manau. 31Kena anau eme aku okou. Poi hekama ehaisala haeꞌo, ia ekakala saꞌino i Keakua, Keakua elavaa kehaialoha aꞌe kama na. Ia poi hekama ekakala saꞌino Keanana Kapu, Keakua mesehaialoha kama na. 32Keakua elavaa kehaialoha nakama kela ekakala hasaꞌino {kama ekipu kama}. Ia poi hekama ekakala hasaꞌino Keanana Kapu, Keakua selavaa kehaialoha kama la vahonei, ia meisehaialoha kama la imuli hoi.
Namea aꞌoe epena huli aꞌe nakipukipu aꞌoe
(Luk 6.43-45)
33“Poi aꞌoe hihai nahua kaualeꞌa, kena aꞌoe ekoli kelaꞌau kaualeꞌa. Poi aꞌoe ekoli kelaꞌau saꞌino, aꞌoe meihakau nahua saꞌino. Nahua la ehuli mai nakipukipu kelaꞌau. 34Okou nikama saꞌino, ehau poi niꞌaka. Ia kena okou selavaa kekakala hakaualeꞌa. Nakama hakoa ekakala kaukali nakipukipu nahakumanava lakou. 35Nakama kaualeꞌa epena namea kaualeꞌa, ikaukali nakipukipu kaualeꞌa naola lakou. Ia nakama saꞌino epena namea saꞌino, ikaukali nakipukipu saꞌino naola lakou hoi.
36“Anau eme aku okou. Kulana Keakua mehakonukonu nakama kemaalama nei, Keakua memea aꞌe kama ma kekama ihaꞌali aꞌe kehakaꞌoko nakakala vale lakou la hakoa. 37Keakua meihakonukonu okou kaukali nakakala okou. Ame okou ekakala kaualeꞌa, kena okou meikonu i namaisu Keakua. Ia amea okou ekakala saꞌino, kena Keakua mehai aku okou.”
NaFarasi eainoa aꞌe Jesus ihuli aꞌe namahi Keakua
(Mrk 8.11-12; Luk 11.29-32)
38Kena naFarasi la ma nakama epolopolo nakuaa la eme aꞌe Jesus, “Rabai, makou hihai aꞌoe ihuli mai nahaꞌaku.”
39Kena Jesus eme aꞌe, “Nakama kela enoho keaho nei esaꞌino ia ehakapanaka, kena hihai iꞌike nahaꞌaku. Ia Keakua meihuli aꞌe haꞌaku hokahi oia, ehau poi aia nihuli aꞌe ia Jonah, kama hakae nakakala aia la. 40Jonah nimoe koukolu naaho ma koukolu napo iloko keiꞌa elahi. Ehau poi {kama ekipu kama} meimoe iloko kaluma koukolu naaho ma koukolu napo. 41Keualoko Keakua meihakonukonu nakama kemaalama nei hakoa, nakama Nineveh mehakonukonu okou, maikinimea nakama Nineveh la uui ikaha ma nahaisala lakou, kulana Jonah nipolopolo aꞌe lakou. Ia anau eme aku okou, kekama hananiu iluna Jonah enoho inei nopolopolo aku okou, ia okou sehihai ihalono i aia.
42“Keualoko Keakua meihakonukonu nakama kemaalama nei hakoa, keꞌavana kekuꞌu i keꞌupu meihakonukonu nakama kaukama nei. Maikinimea kehine la ehamai keꞌina emao nohalono nakakala keakamai Solomon. Anau eme aku okou, kekama hananiu iluna Solomon enoho inei nopolopolo aku okou, ia okou sehihai ihalono i aia.”
Nakipua uvaꞌai
(Luk 11.24-26)
43“Keualoko kipua saꞌino uhaele ikaha ma kekama, kipua la ehaele valoko naꞌina kukuaha, nosesee heꞌina ma aia inoho. Ia sehiꞌina elave. 44Kena kipua la ukakala soia, ‘Anau meivaꞌai muli i kehale anau nikiaꞌi la.’ Kulana kipua la nivaꞌai muli, kama la elave keꞌina la uoki kehakaa noakea. 45Kena kipua la uhaele nohakaꞌi mai koahiku nakipua saꞌino haeꞌo, noulu iloko kama la. Kena keola kama la meisaꞌino, elaꞌa ma imua. Naola nakaukama saꞌino i kemaalama nei meme pela hoi.”
Nakaina ia ma kina Jesus
(Mrk 3.31-35; Luk 8.19-21)
46Kulana Jesus oikakala aꞌe keonohenua la, kina aia la, ia ma nakaina aia la eo aꞌe nokuu imaka hale ma ikakala lakou ma Jesus. 47Kena nakama iloko hale la eme aꞌe Jesus, “Kina aꞌoe la, ia ma nakaina aꞌoe la ekali mai imaka hale ikakala maꞌoe.”
48Ia Jesus eme aꞌe nakama la, “Oai kina anau, ma nakaina anau?” 49Kena Jesus esii aꞌe kelima aia i nakama kaukali aia la, kena ime aꞌe, “Anei nakaina anau ma nakina anau. 50Poi hekama epena nia Kamana anau i kevaelani la hihai, kena kaina anau, keꞌave anau, ia ma kina anau.”
Terpilih Sekarang Ini:
Matthew 12: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
