Matthew 11
11
Jesus laua ma John Baptist
(Luk 7.18-35)
1Keualoko Jesus uoki kekakala aꞌe nakama kaukali aia la, kama la uhaele i alamakaꞌina nokaukaꞌu, pela iaoaꞌo nakama naꞌina la hoi.
2Keualoko la, John Baptist nipono iloko kelokapu. Ia kama la elono pela keMesaea ehuli aꞌe namahi aia i alakama. Kena John ehaunalia nakama kaukali aia la novasili aꞌe Jesus. 3Nakama la eme aꞌe, “Aꞌoe o kekama kela Keakua ehaunalia iho? Poi seai, makou amehakali kelaa kama hoi?”
4Kena iko Jesus ime aꞌe, “Vaꞌai muli nome aku John hea okou elono, ia ma hea okou eꞌike. 5Eme pela,
‘Nakama alemaka seni la uꞌike,
Nakama navae make la uhahaele,
Nakama elavea kemahana {leprosi} la ukaualeꞌa,
Nakama naakalina kuli la ulono muli,
Nakama emake la umasiꞌe ikaha ma kemake,
Ia nakama haaloha ehalono kelono kaualeꞌa Keakua.’
6Poi hekama esenapa i nakipukipu anau nei, kena kama na mehakapu lia Keakua.”
7Kulana nakama kaukali John la ukaꞌa ikaha, ko Jesus ikakala aꞌe keonohenua la nakipukipu John. “Okou ekaꞌa i keꞌina kukuaha la nomaka hekama pehe? Hekama enanaue, ehau poi naveve loloa aninia kemakani? Seai. 8Okou eo nomaka hekama eauꞌahu naauꞌahu kaualeꞌa? Seai hoi. Nakama kela eauꞌahu naauꞌahu kaualeꞌa la enoho iloko nahale nakuꞌu. 9Okou ekaꞌa keꞌina la noa? Nomaka hekama hakae nakakala Keakua? Ino. Anau eme aku okou pela John elaꞌa iluna nakama hakae nakakala Keakua la hakoa. 10Nakakala nakipukipu John la emau iloko kelauniu kapu hoi, ‘Anau ehaunalia iho kama hakae nakakala anau la imua aꞌoe, nokanakana keala aꞌoe mehaele la.’
11“Anau eme aku kehamaoni. Sehikama kemaalama nei eme mo kama hananiu poi John Baptist. Ia kama moulalo iloko kenoholana kevaelani la mehananiu iluna John.
12“Keualoko John Baptist nihamai, haele nokae vahonei, komaꞌi nakama ehai namahi lakou iulu iloko kenoholana kevaelani, maikinimea nakama la uꞌike Keakua ehuli aꞌe namahi aia. 13Imua kela John nihamai, Moses ia ma nakama hakae nakakala Keakua ehaꞌali aꞌe nakipukipu kenoholana Keakua. 14Poi okou ehakina nakakala nakama la, okou memakino pela nakama la ehuli aꞌe nakipukipu John, keualoko lakou eme aꞌe ma, ‘Hekama ehau poi Elijah meihamai.’ 15Pena okou hihai ailoa, kena halono mai.
16“Kaukama nei ekipu pehe? Nakama la ehau poi nikamaliꞌi kamumu kahi. Nakama la enoho iloko kalaniu nohavava solakou penei,
17‘Makou kahao keꞌohe ilue okou, ia okou sehilue.
Makou ehua saꞌa ma ikani okou, ia okou sekani.’
18“John ehamakapu ma ihasese hiꞌai, ia sehiunu hoi. Kena nakama la ekamumu pela, ‘Kama la eisi kipua saꞌino.’ 19Ia keualoko ke{kama ekipu kama} uhamai, kama la eꞌai ia eunu. Ia nakama la ekamumu solakou, ‘Ila aꞌe. Kama la aiꞌai vale ia unuꞌunu vale. Ia kama la esoa laoi ma nakama aoao na{kakisi}, ia ma nakama haisala.’ Ia {kama ekipu kama} eakamai. Keola aia ehuli aꞌe pela aia ekonu.”
Jesus ekakala hamakaꞌu aꞌe nakama sehakina
(Luk 10.13-15)
20Kena Jesus ehai aꞌe nakama iloko namakaꞌina kela aia nihuli aꞌe namahi Keakua la. Maikinimea nakama la seikiꞌe ikaha ma nahaisala lakou. 21“Okou nakama Chorazin mehalono lihu. Ia okou nakama Bethsaida mehalono lihu hoi. Anau ehuli aku okou namahi Keakua. Ia poi anau ehuli aꞌe namahi Keakua pela hoi iloko namakaꞌina i Tyre laua ma Sidon, nakama la amekiꞌe ikaha ma nahaisala lakou. Nakama la ameleleu napamalo aupuu, kena inoho i keꞌina nalehu la.#11.21 22Anau eme aku okou pela i keaho kehakonukonu, kehalono lihu okou melaꞌa iluna kehalono lihu nakama i Tyre laua ma Sidon. 23Ia okou nakama i Capernaum ehakaꞌoko pela Keakua mesau okou ialuna nokae kevaelani. Ia seai. Emeia kama la melaku iho okou ilalo i keꞌina keahi. Poi anau ehuli aꞌe namahi Keakua i Sodom, ehau poi anau nihuli aꞌe namahi Keakua i okou, nakama la amekiꞌe ikaha ma nahaisala lakou. Ia kena Keakua ameselavaa keseu kemakaꞌina la, amemoe pela oia. 24Kena anau eme aku okou pela kehalono lihu okou i keaho hakonukonu la melaꞌa iluna ma kehalono lihu nakama i Sodom.”
Hamai nohamalolo
(Luk 10.21-22)
25Kena Jesus eme aꞌe, “Anau hamaha i aꞌoe Kamana, Kealiꞌi kevaelani ia ma kemaalama nei. Maikinimea aꞌoe ehuu namenei ikaha ma nakama kela ehakaꞌoko pela lakou ailoa, ia ehaꞌali aꞌe namenei i nakama sehimea ailoa.#11.25 26Hamaoni Kamana, aꞌoe ehuli aꞌe namenei ikaukali hea aꞌoe hihai.”
27Kena Jesus eme aꞌe keonohenua la, “Kamana anau la ehoꞌi mai namea hakoa. Sehikama eailoa kekama Keakua, kela Kamana soia eailoa. Ia kekama Keakua soia eailoa Kamana aia la. Ia kekama Keakua la elavaa kehuli aꞌe Kamana aia la i nakama aia ekini la.
28“Omai okou hakoa kela ekahi ikeamo namea emaha, ia kena anau meimea okou ihamalolo. 29Anau epasemuu, kena sehai namahi anau. Kakou iheheaꞌu hakoa, kena okou meimakino nakipukipu anau nei, ia kena okou mehamalolo keola kaualeꞌa. 30Maikinimea naheaꞌu anau ehainahie. Ia namea anau eau aku okou iamo la, emamahua.”
Terpilih Sekarang Ini:
Matthew 11: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
