Matiyu 22
22
Fulusili tolon ma sana
Luka 14.15-24
1Isa ka sana dɔ la ai yɛ kɔtunun, a vɛɛ: 2«Haijɛnɛ masaya kɛyine iwo masakɛ min na dɔnni ba lɔbɛnna ka bɛn a denkɛ ya fulusili ma. 3Mɔɔ minu kilinin tɛɛ fulusiliya lɔ, masakɛ ka aa bɔidennu lataa wolu kɔ, kɛɛ ai do k'i ban nako ma. 4Wo kɛ, masakɛ ka bɔiden gbɛlɛlu lataa kɔtunun. A vɛɛ ai yɛ: ‹Ài y'a fɔ mɔɔ kilinilu yɛ ko m̀'ɛ tiili ba kɛ. M̀'ɛ ǹa tolalu faa, ani ǹa nisi bolan nɔɔlɔnilu. Fen bɛ lɔ vɛ bɛn. Wo ma, ai yi na fulusiliya lɔ.› 5Kɛɛ ai suu suu ma masakɛ ya kililikan ta foi le. A dɔ vɛ bɔla ka taa aa sɛnɛ lɔ. A dɔ fana vɛ bɔla ka taa aa julayakɛya lɔ. 6A tɔlu vɛ masakɛ ya bɔidennu minala k'ai tɔlɔya bubale, ka ban k'ai faa. 7Mɔnɛya boloma, masakɛ ka aa sɔdasilu lataa mɔɔfaaba wolu kanma, k'ai bɛ faa, ka ban k'aiya so ɲɛnin. 8Wo kɔ, masakɛ vɛɛ aa bɔidennu yɛ: ‹Fulusili dɔnni lɔ vɛ bɛn, kɛɛ mɔɔ kilininnu ni dɔnni min kaannin tɛɛ tɛ. 9Wo lɔ, ài yi taa mɔɔ ɲininya lɔ siyabalu la. Ài vɛ mɔɔ suu suu yena, ài y'ai bɛ kili ko ai yi na fulusiliya lɔ.› 10Wo fɔ, bɔidennu v'i wulila ka taa so kɔnɔ. Ai na mɔɔ minu yena je, ai ka wolu bɛ kili fulusiliya lɔ, mɔɔ yon ni mɔɔ ɲumalu bɛ. Wo le k'a kɛ, fulusilibon la ka fa mɔɔ kilininnu le.
11«Wo kɛ, masakɛ ka don fulusiliya lɔ, fɔsa a yi mɔɔ kilininnu lakɔlɔsi. A do ka kɛ́ dɔ ye je, kɔɲɛmalɔ faani tɛɛ tɛ a kanna. 12Masakɛ do vɛɛ a yɛ: ‹Ǹ tɔva, i donnin jannɔ di, k'a talan kɔɲɛmalɔ faani t'i kanna?› Wo ma foi sɔlɔn k'a fɔ. 13#Matiyu 8.12; 25.30; Luka 13.28.Wo kɛ, masakɛ vɛɛ aa bɔidennu yɛ: ‹Ài y'a sen ni a bolo sili k'a lafili divi lɔ banama, a kasitɔ k'a ɲii sii i ɲɔɔ na dimin bolo je.› »
14Isa ka kuma wo laban, a vɛɛ: «Mɔɔ siyama le kilinin, kɛɛ mɔɔ dana le tanin.»
Niisɔɔn salako
Malɛkɛ 12.13-17; Luka 20.20-26
15Wo kɔ, Falisilu ka bɔ je k'ai kun bilin i ɲɔɔ ma, fɔsa ai yi Isa minako ɲaɲinin a jɛlɛkanu kumakan fɛ. 16Wo le k'a kɛ, ai k'aiya kalannaden dɔlu ni Masakɛ Helodi kɔmɔɔ dɔlu lataa a ma. Wolu do vɛɛ a yɛ: «Kalanmɔɔ, mɔ k'a lɔn ne ko tuɲande le i le. I do yi mɔɔlu kalanna ka bɛn Ala ya siya ma tuɲandeya le boloma. Mɔɔ miliya tɛ i masiyanna, kamasɔlɔn i tɛ mɔɔ bɔla mɔɔ lɔ. 17Wo ma yi ne, i i miliya fɔ mɔ yɛ butu. Ka niisɔɔn sala Lɔmu masakɛba Sezale ma, wo ladaanyine mɔ ma, baa wo ladaannin tɛ?»
18Kɛɛ Isa k'ai miliya yon lɔn. Wo lɔ, a vɛɛ ai yɛ: «Àilu filangafolu, mindɛ lɔ ài yi ǹ lɔsumana? 19Niisɔɔn yi salala wɔligbana min na, ài yi wo dɔ jiya ǹ na, ǹ'a lasaa.»
Ai ka wɔligbana wo kelen don a bolo mingɛ, 20a vɛɛ ai yɛ: «Jene sawula ni jene tɔɔ yi wɔligbana min kɔkan?»
21Ai vɛɛ: «Sezale le.»
Wo lɔ, Isa k'a fɔ ai yɛ, a vɛɛ: «Ni a yi ten ne, ài yi Sezale ta di Sezale ma, ka Ala ta di Ala ma.»
22Wo mɛn ai bolo, ai ka kawakoya. Ai do ka Isa to je ka taa.
Sadusilu ka Isa lɔsuma teme
Malɛkɛ 12.18-27; Luka 20.27-40
23 #
Kɛkolu 23.8. Wo lon kelen, Sadusi dɔlu ka na Isa ma. Wolu le y'a fɔla ko fulenilu lawuliko tɛ tuɲa le. Ai do ka Isa maɲininga, ai vɛɛ: 24«Kalanmɔɔ, Nabi Musa n'a fɔla ko ni kɛ́ dɔ ka sa, a ma den to a kɔ, a dɔɔkɛ le ka kan ka kɛsamoso wo fulu, fɔsa a yi den sɔlɔn a kɔlɔkɛ yɛ. 25Wo ma, badenmakɛ wolowulan tɛɛ mɔ fɛlɔ jan. Kɔlɔmanda ka moso dɔ fulu. A do ka sa, a ma den to a kɔ. Wo kɛ, a dɔɔkɛ k'a moso wo ta. 26Wo suu kelen ka kɛ badenmakɛ filana la, ani a sawana, haan fɔɔ a wolowulanna. 27Wolu bɛ sa kɔ, moso fana ka sa. 28A yi di wo lɔ? Fulenilu Lawulilon, moso wo kɛtɔ a jene ta le badenma wolowulan wolu lɔ? Kamasɔlɔn a n'i siila ai kelenkelenna bɛ kun.»
29Isa k'ai javi, a vɛɛ: «Ài filinin, kamasɔlɔn ài ma kitabulu kɔlɔ ɲaye, kumatɛ Ala ya foniseleya ma. 30Kamasɔlɔn Fulenilu Lawulilon, kɛ́ tɛnala moso fulula, moso fana tɛnala dila fulu boloma, mafɔ ai bɛ kɛtɔle iwo mɛlɛka minu yi haijɛnɛ. 31Fulenilu lawuliko koni, Ala ka min fɔ ài yɛ kitabu kɔnɔ, jalasa ài ma wo kalan ba? 32A vɛɛ: ‹Ǹe le Ala le min yi batola Ibulahima ni Isiyaka ani Janguba bolo.› Wo kɔlɔ le ko niimalu le Ala batola, fulenilu tɛ.»
33Wo mɛn jama bolo, ai ka kawakoya aa kalan na.
Seliya bɛ lɔ bubata
Malɛkɛ 12.28-34; Luka 10.25-28
34Falisilu k'a mɛn mingɛ ko Isa vɛ Sadusilu lajeden, ai k'ai ladɛn. 35Ai lɔ mɔɔ kelen min tɛɛ seliya kalanmɔɔ le, wo ka ɲiningali kɛ Isa la a lɔsumanko lɔ. A do vɛɛ: 36«Kalanmɔɔ, seliyalu bɛ lɔ bubata y'a mindɛ le?»
37Isa vɛɛ a yɛ: « ‹I i Tii Ala kanu i josokun bɛ la, ani i nii bɛ, ani i miliya bɛ.› 38Wo le seliya kunfɔlɔ le ani a bɛ lɔ bubata. 39A filana yi wo ɲɔɔzii le le, ko: ‹I i siiɲɔɔ kanu iwo ile gbu.› 40#Luka 10.25-28.Nabi Musa ya Taulati ani kela dɔgbɛlɛlu ya kitabulu bɛ jusiinin seliya fila wolu le kɔkan.»
Dawuda Tii le Masa Tɔɔmasenin ne
Malɛkɛ 12.35-37; Luka 20.41-44
41Falisilu ladɛnnin ka to, Isa ka ɲiningali kɛ ai la, 42a vɛɛ: «Ài miliya yi di ka bɛn Masa Tɔɔmasenin ya ko ma? Jene bɔzɔn y'a le?»
Ai ka Isa javi, ai vɛɛ: «Dawuda bɔzɔn ne.»
43Isa do vɛɛ ai yɛ: «Ni wo le, mindɛ lɔ Dawuda ka kuma Ala Nii sabu la k'a fɔ a ma ko a Tii? Kamasɔlɔn Dawuda k'a fɔ, a vɛɛ:
44‹Mɔ Tii n'a fɔla ǹ Tii yɛ, a vɛɛ:
«Na i sii m̀ bolokini fannɔ,
haan fɔɔ m̀'ɛ banna i juulu lala i sen kɔlɔ.» ›
45Ni Dawuda gbu y'a fɔla wo tii ma ko a Tii, wo yi se kɛla a bɔzɔn ne di wo lɔ?»
46Mɔɔ ma se Isa javila kuma kelen gbu le, ado ka ta wo lon ma, mɔɔ foi m'a wakali ka Isa maɲininga butu.
Terpilih Sekarang Ini:
Matiyu 22: MBT2023
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Manya Bible Translation, © SIM International, 2023
