Génesis 8
8
Bakan tita ꞌikuatsianx sënë́an ñuikë bana
1Usa ꞌain ka Nukën ꞌIbu Dios Noemí sinánkëxa sinanan ka kamabi ñuina abëa nunti chaiira anu ꞌikë amiribi sinánkëxa. Sinánkin ka Diosan menu suñu bëkinun ꞌimikëbë ka baka aín ꞌëkë sënëni kuëtsëkëni munu kuabuakëxa; 2usaía ꞌikëbë ka me baakikë axribi xëpúakëxa, anun ꞌumpax me mëuküax ukë ax anuishi sënëni nëtë́mainun naí manámi baakikë axribi xëpúkëbë ꞌuñe kushiira ꞌibúkë ax anuishi sënë́ankëxa; 3usai ꞌikëbë ka bakan tita ꞌëkë ax abira abi kuabuakëxa. Kuabuti ka ciento cincuenta nëtë ꞌimi ëski baka kuabuakëxa, 4usai ꞌikëbëa mapai achúshi ꞌimainun rabë́ ꞌuxë ꞌikë ax diecisiete nëtë ꞌain ka nunti chaiira Ararat kakë me anua ꞌikë ain bashi anu bakan ë́skibukin ëankëxa. 5Ëskitamainun ka baka munu kuabuakëxa, kuabúkëbë ka mapai rabë́ ꞌuxë ꞌirukë anun nëtë ꞌirutabakë anun ka bashi rëbukama manainra akamax pain iskë ꞌitánun mërakëxa. 6Mërakë ꞌaían cuarenta nëtë ꞌikëbëtan ka Noénën nunti chaiira ain maskuan meu ꞌikë xëkuë chukúma ꞌakë a xëókakëxa 7xëókatankëxun ka achúshi ñuina pëchiñu nónshiansa a Noénën xuakëxa; xukëx kuanxbi ka bakan tita kuabukin ënpatisamapan ꞌain anu ꞌiruti añu ñubi ꞌaíma ꞌain kuaínbëkini nuanbëkiankëxa.
8Usakin ñuina pëchiñu nónshiansa a xutankëx ꞌibaixanxun ka amiribishi, Noénën numakuru achúshi me kara ë́skibutia isnuxun xuakëxa; 9ꞌaínbi ka amiribishi numakuru anu ꞌiruti ñubi ꞌaíma ꞌain nunti chaiira anubi utëkëankëxa, me bakan ënpatisamapan ꞌain. Utëkënia ka Noénën aín mëkënan bikin numakuru nunti chaiira anu atsímiakëxa.
10Usokin ꞌatankëxun ka mapai achúshi ꞌimainun rabë́ nëtë pain, kaintankëxun Noénën amiribishi numakuru xutëkëankëxa. 11Xukëx kuanpuni ñantabukëbë ukin, ka aín xëtan olivos kakë i pëchi xëñubëtsinkin bëakëxa. Usakin bëia iskin ka Noénën sinánkëxa baka ka ë́skibuti kuabutia kixun. 12Sinánkin ka kaíankëxa mapai ꞌimainun rabë́ nëtë, kaintankëxun ka amiribishi numakuru xutëkëankëxa; xukëx kuanxbi ka numakuru utëkëama ꞌikën. 13Usa ꞌain ka Noé a baritiakaman seiscientos ꞌimainun achúshi baritiañu ꞌiakëxa, mekama ë́skibukë ꞌain. Achúshi ꞌuxë ꞌikëbë nëtë achúshi ꞌain ka, Noénën nunti chaiira aín maskuan meu ꞌikë aín xëkuë chukúma ëchíkin nankin iskëxbi ka me ënpati baka ëskikë ꞌiakëxa. 14Usai ꞌitankëxa veintisiete nëtë rabë́ ꞌuxë ꞌain ka, ꞌaimashi kiani meshi rakátanun baka ë́skibukë ꞌiakëxa.
15Usaia ꞌian ka Nukën ꞌIbu Diosan Noé kakëxa: 16Nunti chaiira anuax ka chikít, min xanu min bëchikë min bëchikënën xanu a kamabëbi kamina chikiti ꞌain kixun ka kakëxa. 17ꞌImainun kamina mibëa ꞌikë ñuina aribi chikínti ꞌain: ñuina pëchiñu a ꞌarakati ñuinakama, axa men niríkë ñuinakama, anu kuankian tuapati ꞌuákamë ꞌëokin me tsitsirutanun. 18Usakian kakëx ka Noé aín xanu, aín bëchikë aín bëchikënën xanu aín piaka akamabë nunti chaiira anuax chikíakëxa. 19Usai chikíkëbë ka ñuinakamaxribi a ꞌarakati ꞌimainun a ꞌarakatima, men niríkë ꞌimainun axa manan nuánkë ñuina pëchiñu akamaxribi chikíakëxa. 20Usai chikítankëxun ka Noénën anuxun Nukën ꞌIbu, rabikin asábi ka kakin kati maxáx maburukin ꞌatankëxun anuxun ñuina upíbushi ꞌimainun ñuina pëchiñu upíira, akama achúshi achúshi bitankëxun Nukën ꞌIbu asábi ka kakin ꞌaímai këñutanun xaroxuankëxa. 21Usokian ꞌaia ka Nukën ꞌIbu aín sanu upíira ꞌikë anu nukutia xëakëxa, xëti ka kiakëxa: Uinsaranbi kana amiribishi menu ꞌikë ñukama unin ꞌucha kupín këñunuxuma ꞌain, unin ka xura ꞌixuinshi ꞌatima ñu ꞌatishi sinania. ꞌImainun kana amiribishi ñuinakama ꞌaisamokin ꞌën bërí ꞌakësokin këñutëkëntima ꞌain.
22“Ënë nëtë këñutisama pain ꞌain ka unin ñu ꞌapátankëxun biti ꞌikën; ꞌimainun ka ꞌitsís ira ꞌianan matsi ꞌianan, suñu bëkianan mitabutankëx baritia ꞌianan nëtë ꞌimainun imë́ ꞌiti ꞌikë kiax ka Nukën ꞌIbu Dios kiakëxa.”
Terpilih Sekarang Ini:
Génesis 8: cbrPB
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1978, 1995, 2008, 2022 Wycliffe Bible Translators, Inc. All rights reserved.