Luk Kɛbɨnɛ kɛtɨbi Kɛkpa Manrɛ
Kɛbɨnɛ kɛtɨbi Kɛkpa Manrɛ
Brika-ramu Ɛbrɔkpabi ndɛ keriragi Luk ɔrɛ, Luk ɔgbana-bani ifiɛ, mɔ ɔrɛ manrɛ mmɛ. Amɔ mɨnɛ ɔcɛ rɔcɛ na Pɔl, ɔrɛ mɨnɛ kɛkpa manrɛ Aks. Ɔrɛ bɛkpa manrɛ mbi bɛfa ɔjɛ Tiɔfilus, oni ŋɔ ɔjaga robin, mɨnɛ ɔjɨba ketu rɛsɛ kɛrɛnɛ na rɔrɛ Rom.
Tiɔfilus kegbu kejuju ɔbɛrɔsɔ ofugɛ egbigbɨra Brika-ramu ɔbaŋa Jisɔs Krais. Luk oduga mɔ ya ɔgbɨra ya mbu amɔ owubɛrɔsɔ ofugɛ ɔbaŋa Jisɔs bɔra kpikpɛ. Ewusikafa ɔrɛ tɔlɛtɔlɛ kɛmanci Jisɔs ɔmaɛ, rokpin, rɛsɛ, rɔbɔ, mɨnɛ kɛmanci ɔŋbɨnɛnɛ na rokpin, nansɛrɛ birɛ mbi bɛjaga bunɛ na bunɛ.
Kegbu kanci, bani Rom baju reku na rɔrɛ Isɨrɛl mɨnɛ bara batiba bɛ na nsɨm. Sisa, Ɔkɨm-ɛmaŋ Rom, mɔ ɔra ɔkɨm ŋɔ ociacia, ɔra oni-retu irɛ nji baju-reku Rom bawu ju batam.
Luk ɔrɛ kɔkɔgɛ ya Jisɔs mɔ ɔra Krais, Ɔnyaŋɛ yu ŋɔ Ɛbrɔkpabi ɛsa ɔŋɔŋɔ ya aji kuetigɛ owu nyaŋɛ bani bamɔ. Brika-ramu ndɛ rabaŋa Ɔnyaŋɛ yu ŋɔ Ɛbrɔkpabi etigɛ, ɔra rɛjɛ irɛ fɛb. Luk okisi rɔrɛ Jus ɔrɛ ɔjɛ oni ŋɔ ɔbɔmɨnɛ okisi kafa, ɔbɛ kegbu ɔrɛ ɔkabara rɛmaɛ-rɔcɛ na rokpin bani Jus.
Birɛ mbi Luk ɔrɛ ɔbaŋa
Luk ɔrɛ kɛkpa manrɛ kɛmɔ ɔkɔgɛ ya Jisɔs mɔ ɔra Ɔnyaŋɛ bani fɛb. Brika-ramu rabaŋa Jisɔs Krais rayɔmɛ rajɛ oni naŋɔnɛ na rɔrɛ nandunɛ. Ɔrɛ mɨnɛ ɔbaŋa:
Nsɨm Jisɔs, ya amɔ mɔ ɔra Ɔkɨm-kaju, amɔ mɨnɛ mɔ ɔra Ɔnyaŋɛ-rokuku, Ɔnyaŋɛ bani ŋɔ Ɛbrɔkpabi ɛsa ɔŋɔŋɔ ya aji kuetigɛ
Keriragi-kɛkɔ
Njɔm
Kɔjɛ baram korigɛ etima mɨnɛ kɔjam ɔkɔbirɛ kotu.
Kɛmanci Ɛbrɔkpabi ɛkɔkɔgbɛ esugɛ yu, mɨnɛ ayu rɛkɔkɔgbɛ resugɛ ɔcɛmɛ oni
Kɛmanci babanɛ mɨnɛ banyɛgɛ Jisɔs mɨnɛ batɔnɛ mɔ
Luk 1:1-80 Onyiɛ-rotuma Ɛbrɔkpabi ɔkanɛ rotuma bɔma Jɔn ŋɔ oru bani raku mɨnɛ na nku Jisɔs.
Luk 2:1-52 Bɔma Jisɔs na ɛjɔn ɛmɔ.
Luk 3:1-4,13 Kɛmanci Ɛbrɔkpabi eyuɛ ɛyɔ rɛsɛ Jisɔs.
3:1-22 Jɔn oru bani raku, oru koku Jisɔs mɨnɛ.
3:23-37 Manrɛ bani kɛtɨbi Jisɔs.
4:1-13 Kɛmanci ɔkɨm bɔkɔ-bobi oyumɛ Jisɔs na kwa bani babɔbara.
Luk 4:14; 9:50 Jisɔs ɔkanɛ Brika-ramu mɨnɛ osi birɛ kɔba-ɛkpaju na Galili.
Luk 9:51; 19:28 Jisɔs osugɛ Galili oruŋɛ Jɛrusalɛm, aya oruŋɛ, ɔkanɛ bani Brika-ramu mɨnɛ osi birɛ kɔba-ɛkpaju na kwa eciecii.
Luk 19:29; 23:56 Birɛ mbi bɛjaga na Jɛrusalɛm: batiba Jisɔs mɨnɛ bamura mɔ na bɔkpati-rasinkanɛ.
Luk 24:1-53 Jisɔs ɔŋbɨnɛnɛ ofiɛ na rɔbɔ mɨnɛ oruŋɛ na kaju.
Terpilih Sekarang Ini:
Luk Kɛbɨnɛ kɛtɨbi Kɛkpa Manrɛ: Olulumo-Ikom
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©️2022 Luke Initiative for Scripture Translation