Luk 17
17
Abibi afɛ, Ntama, Noto
(Mat 18:6,7,21,22; Mak 9:42)
1Jisɔs atɔ asɔgba ɛyɛ: “Mbe bi ɛsɛrɛ anɛ agbɔ ɛwɛmɛwɛmɛ, ka esiyiri akɛ nnɛ yi mbe bi esing ka biji ɛbɛ ɛba. 2Ka ɛnɔnɔb akɛnnɛ atan ɛgɔgha mbe ka ɛmɛn asibi ama tob ka aya sa ama sɛrɛ abɛnsɛ bafa agbɔ ka abibi afɛ. 3Ma baba nɛnɛrɛ.
“Ka mmɔannaja yɔnu si yɔka ane a na ebibi ejo, yamɛ; ka ayangana, tamsighɛ. 4Araggasi agbɔ a mkpɛ esimma ka ofo, ka mkpɛ yi esimma afɛnɛ njam ama tɔa si ‘Mmayanga,’ tamsighɛ.”
5Bafɔsil atɔ Ntaa, “Ne ntama ɛyɛrɛ aram!”
6Ntaa akpɛ, “Araggasi ntama ɛyɛrɛ asɛb nasi mmog mɔsta, ɔmɔma ɔtɔ ntakpa ete yifa, ‘si yab ɔmɔ yimi ka aya,’ eyoghayog.
7“Arena nnɛ wiwi ka ɛbɔngɔ ɛjɛrɛ akpe mmɔanju ya ababa ɔjɔ. Ka aru ya ɛgbɛ akru, ‘Ɔtɔ tɔ mmɔanju si ba ma jɔ nji ɔnɛ ejonɛnɛghɛ’? 8Ɔtɔɛ si ‘Tɔghɔm kɛ jajaa, otongo biji ɔjɔ ubrim mmanna nɛ wɔɔ nwɔ; ka ɔmɔ ɔnɛ jaja’ 9Nsɛnju akagkag mmɔanju same atebsi ane ji aragsi ane? 10Wɔ titi, ngara si ɔmannane kpere ejo ji atɔa si one, ragsi, ‘Warr abɔanju erisi; ka ene noto ɛnɛrɛɛ nanting.’ ”
Jisɔs atab anɛ ba abini wobo
11Munu Jisɔs are a mba amogho ya Jɛrusalɛm, asing ka aranga Sameria na Galili. 12Ngara si ajɔ amo ya ɛjɛbɛ, anɛ wobo ba afɔ abini arag sa abagha akɔrɛ. Ayimi ga daghadagha 13ka abenge gbogbo, “Jisɔs, Ntaa, fɔ ɛkpɔgisi kɛ warr!” 14Ngara ya ayɛ mbɔ, arag, “Sɔng, ɛmɛ tɔngɔ Baɛjɔ Ɔsɔwɔ nɛnɛrɛ.” Nsɛrɛ sa amo, abini akan. 15Wiwi ka ɛbɔngɔ mbɔ, ngara si ayɛ si amɔnɔb, afɛnɛ njam, atighi Ɔsɔwɔ gbogbo. 16Ajɛrɛ akpere Jisɔs akaghɛ nnyɔ ka ji ane akiɛ ka nnɛ Sameria yɔ.
17Jisɔs abɔmmɔ, “Anɛ wobo wɔɔ sang anɔbɔ? Ka baga asibawobo ma? 18Nnɛ wawi arifɛnɛ ama tig Ɔsɔwɔ erising njɛnanɛ yɔfa nanting ya afɛnɛ amager Ɔsɔwɔ?” 19Ka atɔɛ, “Tam sɔng; ntama ɛya amane ɔnɔb.”
Jisɔs akpene ateb ngara Oton Ɔsɔwɔ aragha ɛbagha
(Mat 24:23-28,37-41)
20Mkpɛyiyi, Bafarisi abɔmmɔ bagha ngara yi oton Ɔsɔwɔ ɛbagha, Jisɔs akpɛ, “Oton Ɔsɔwɔ erem ejo ji ɔyɛ ka amar, 21ka anɛ ama ragsi ‘Fayɔ yi ere,’ ‘Kɛfɛnɛ ɛjɔ fa,’ atebsi oton Ɔsɔwɔ ere fa nanɛrɛ.”
22Ka arag na asɔgba ɛyɛ, “Ngara araghabagha yi ɛsɛb si ɛyɛ ofo bi Mmɔ a Munnu abagha, ka ɛyɛm. 23Anɛ atɔ war, ‘Fayɔ ya are!’ Ka ‘Afana ajɔ fa!’ Kimbɔ tɔɔngɔ. 24Nsɛrɛ si mgbambri anyanga bɔsɔ ɛfɔngɔ ɛjam ka nkannisi yiga etob ka nkannisi yiga, nayɔ yi Mmɔ a Munnu ajɔ ka ofo ɛbɛ. 25Ka oterem ɔsɔ niyiri, eying jifa atɛnɛtɛn.
26“Nsɛrɛ si ɛjɔ ka afo Nua, nayɔ yi ɛtammɛ ɛjɔ ka ofo Mmɔ a Munnu. 27Ka afo ya amisingsing anɛ ajɔ anɛ, awɔghɔ, ane mban akia abɔ ka mban tɛtɛ isi ka ofo bi Nua anam ka ɔgbaa, Ka nnyɛn aba ama tanna mbɔ wɔɔ.
28“Ɛtammɛ ɛjɔ na ka afo a Lɔt. Anɛ ajɔ anɛ awɔghɔ, ago mbe agoro, abɔmmɔ asii buju. 29Ka ofo bi Lɔt atam ka Sɔdɔm ngon eru ka bɔsɔ ɛsɛnɛ ifi mbɔ wɔɔ.
30“Ɛtammɛ ɛjɔ na ka ofo bi Mmɔ a Munnu afɛnɛ ka negere. 31Ka ofo bifa nnɛ wawi arem ya akomo ka bɔsɔ nobono nju, na mbe ɛbɛ ka nnanju, ya asɛnɛ ama ton. Ɛtammɛ ere na, wawi arem ya are ka ɛgbɛ ya afɛnɛ njam ateb mbe. 32Gbɔntera nka Lɔt! 33Kpere nnɛ ya alɔg sa ababa nekpen ɛnɛ ɛtanɛtan, ka kpere nnɛ ya asighi abɔ ka nekpen ɛnɛ akɛ Ɔsɔwɔ, yɛ ya afɔ nekpen. 34Nɔngɔ ntɔ war, ka enokon jifa anɛ aba ajɔ ka ntefeghe yiyi; akɔ wiwi, wiwi asa. 35Abaka aba ajɔ na agɔg mbe; akɔ wiwi yɔga asa. 36(Abunu aba ajɔ ka ɛgbɛ; akɔ wiwi yɔga asa).”
37“Ntaa, fangyɔ?” Asɔgba abɔmmɔ.
Jisɔs akpɛ, “Mfo bi iku nnɛ ɛnɔng, fayɔ yi atɛrɛ agba.”
Terpilih Sekarang Ini:
Luk 17: NDD Nta
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©️2022 Luke Initiative for Scripture Translation
