Luk 14
14
Jisɔs ka nju a nnɛ a Farisi
1Ka ofo esiayɔ bibi Jisɔs ajɔ anɛ ejonɛnɛghɛ ka nju a ntakpa nnɛ a farisi, ajɔ ababɛ ka abɔabɔ. 2Munnu wiwi ya ato ka biji ayimɛ fa ka nibri. 3Ka Jisɔs abɔmmɔ Bafarisi na bekpena ejighi, “Ejighi ɛnɔngɔnɔngɔ si nnɛ atab nnɛ ɔya ka ofo esiayɔ fasɛ ɛnɔngɔm?” 4Bafarisi na bekpena ejighi ari kpɛ. Ka Jisɔs akonɛ ɔbɔ, atabɛ ka ɔya atoɛ sa amo.
5Ka Jisɔs abɔmmɔ mbɔ, “Nnɛ wiwi arere yi mmɔwɛ sɛ mfɔng ɛyɛ agbɔhgɔ anam ka nsɛbɛ a nebe ka ofo esiayɔ, ya arighi mo naosunosu ama tuuɛ ayighi?” 6Sa eyoghoyogho, jaji arifɔ ji aragha.
Jisɔs abo mfɔna eyighi na anɛ ba atebe nɛnɛ
7Ngara yi Jisɔs ayɛ anɛ ba atebe ajɔ nji nogogho ka isi okpokoro, atuu mbɔ ɛbɛɛ jifa; 8“Ngara yi nnɛ ateba na eyighi naban, kimo ɔmɔ jɔ ka mfo a nji isi okpokoro, mkpɛmɔng atama atebe nnɛ ya ayar aga. 9Ka, mfɔna eyighi ya atebe war anɛ ababa abagha ama atɔa, ‘Mma gɔrɔ, tam jɔ ka mfo a nji bintingi ɔkɛ munnu yɔfa mfo a nji ɛbɛ.’ Ka ɔtam na nsɔn, omo ɔmɔ jɔ ka mfo a nji ɛbɔngɔ. 10Ji one ka ngara yi ateba na eyighi, jɔ ka mfo a nji ɛbɔngɔ, sɔng ngara yi nnɛ ya atebe war amanna ba atɔa si, ‘Ntɛ, tam sɔng ka isi okpokoro.’ One na na, ɔfɔ nogogho ka nibri anɛ wɔɔ ba atebe eyighi ji. 11Ka kpere nnɛ ya atab biji ɛbɛ asɛnɛsɛnɛ ka nnɛ ya asɛnɛ biji ɛbɛ atabɛ ayar.”
12Ka jisɔs atɔ nnɛ ya atebe eyighi, “Ɔkpanna tebe anɛ eyighi, ki tebe atɛ ba, abɔannaja bunu na abaka, sɛ afang a anɛ ba are akpera; one nana, atama ateba eyighi mbɔ ka nayɔ ya akɔghɔ agana. 13Ka okpena eyighi tebe akpak, anɛ ba akpeghe nnya biji yamɔng arijɔ kɛfɛn, abɛnnɛ, bɛnagga amar, 14sɔng Ɔsɔwɔ anara. Ɛjɔgasi mbɔ amam agana, Ɔsɔwɔ aganagan ka ngara yi ane afɔ abɔ bɛ afɛnɛ ajɔ ka nekpen.”
Jisɔs atuu ɛbɛɛ ntakpa Eyighi
15Ngara yi nnɛ wiwi ka ɛbɔngɔ anɛ ba ajɔ ka okpokoro nanɛ ayog ji aragha, atɔ Jisɔs, “Ɛnara ɛjɔ ɛkɛ kpere nnɛ ya anɛghɛ eyighi ka ngara yi Ɔsɔwɔ ajɔ ka oton.”
16Jisɔs akpɛ: “Munnu wiwi ajɔ atongo biji sa ane ntakpa eyighi, ka atebe ebe anɛ. 17Ka si ngara asi ato mmɔanju wɛ sa atɔ anɛ ba atebe eyighi si, ‘Aba, si kpere ejo eme benge.’
18“Ka mbɔ wɔɔ agɔngɔ nɛbɛngɛ. Mgbɔghɔ mba asi, ‘Ntɔghɔ tɔghɔ go ɛgbɛ, ka moghomo ma nyɛ. Esusugu, mmɛ bɛngɛ.’
19“Nnɛ yɔga asi, ‘ntɔghɔ tɔghɔ go ɔnya noto wobo, ka mkpomo ma ngara mbɔ. Esusugu, mmɛ bɛngɛ.’ 20Nnɛ yɔga titi arag, ‘Ntɔghɔ tɔghɔ kɔ manka, ka mmam mba.’
21“Mmɔanju afɛnɛ njam ama tɔrɔ ji ɛwɛmɛ atɔ nsɛnju. Ka mfɔna nju asag nete atɔ mmɔanju ɛwɛ, ‘Sɔng ɛbanɛban ka atakpa aba na akokomo aba ya are ka ɛjɛbɛ omo obeng akpak, anɛ ba akpegha nnya biji yamɔng arijɔ kɛfɛn, bɛnagga amar na abɛnnɛ.’
22“ ‘Ntaa,’ mmɔanju arag, ‘Mme ne ji ɔragsi nne, ka ɛyagha ɛkpegere ji anɛ akagha jɔ nji.’
23“Ka nsɛnju atɔ mmɔanju ɛwɛ, ‘Sɔng ka atakpa na akokomo aba bɛjɛbɛ biga ɔmɔ wɛrɛ mbɔ aba, sɔng nju ɛyaa ason. 24Nɔngɔ mmɛ ntɔ war, nnɛ wawi arem ka ɛbɔngɔ anɛ ba mgbɔmba ntebe ba ayongo ejonɛnɛghɛ ɛjaa.’ ”
Ekoro nɔjɔ Nsɔgba
(Mat 10:37,38)
25Ofo bibi ntakpa ɛbɔngɔ ajɔ tɔɔngɔ Jisɔs, amanga abri mbɔ arag: 26“Kpere nnɛ ya aragna sa atɔɔngɔm nkɔrɛ nga nsɔjɛ na nnyɛ, nkawɛ na abɔ bɛ, abɔannyɛ bunu na baka si nekpen ɛnɛ yɛfɔnɔ erinajɔna amam ajɔ nsɔgba ɛwaa. 27Ka kpere nnɛ ya ari sɔn ete njang ɛnɛ ɛjɛ atɔɔngɔm#14:27 sɔn ete njang ɛnɛ ɛjɛ atɔɔngɔm Nnɛ yi erikɔr sa ayɛ niyiri si nuku ka isi ɛjaa amam ajɔ nsɔgba ɛwaa. amam ajɔ nsɔgba ɛwaa.
28“Arenasi nnɛ asɛb sa asii nyar nju agbɔghɔmba akana sɛ ɛkpɔghɔ, sɔng agbɛrɛ arena yi afɔfɔ akpugha abenge ya akan nayi. 29Ka abo na niwinju ka arima akan nayi, kpere nnɛ ya ayɛ ayɔnɛyɔn, 30aragha, ‘Ntɛ yɔfa mbaga ya ajam nisii nju arima akan nayi.’
31“Sɛ bagha nton yi ya amogho bata na nton yiga, ya arighi gbɔmba ajɔ nji akana arena yi ɔsɔja ɛbɛ ɛgɔr atanaba na wobo amama aga ɔsɔja ɛgɔr atanarɔn ba nton yiga amotongo biji ama alɔg nanɛ? 32Arena yi arigima, ayighi anɛ ato ama kɔrɔ nton yiga ka ngara yi akpagha are daghadagha ama tɔ mbɔ si warr ɛsɛb nanaa. 33Ɛtam erena ɛkanɛkan, nnɛ akikono nete ka mbe bi akpe si nasang amam ajɔ nsɔgba ɛwaa.
34“Akang anɔnɔb, Ka nɛyɛbɛ ɛnɛ erinakpɛjɔ ane nang ɛkpɛjɔ akang? 35Kɔ awuru ka nsisi atebsi arikpɛ nɔb araggasi ka nsisi.
“Nnɛ ya akpe atɔng ya ayog mfɛ, ayongo atɔng ayog.”
Terpilih Sekarang Ini:
Luk 14: NDD Nta
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©️2022 Luke Initiative for Scripture Translation
