San Mateo 13
13
VII. SIETE KɅ'SA YETE U JER U NU'KU
(13.1-52)
Jesús ku tsikbʌtik a mok ku pʌk'ba' jay yʌn u jer u nu'ku u kʌ'sa
(Mr. 4.1-9; Lc. 8.4-8)
1A lay u k'ini jok'i Jesús to'o a nʌj ij bij kuta tu xur a peta'. 2Y laj tari ne pim winik; y Jesús oki yok'o a chem, kuri y tu woro a winik tiʌ yok'o u xur a peta'. 3Y ne yap' ba' tu kʌ'so' jay yʌn u jer u nu'ku tu woro u kʌ'sa.
Tu ya'tio': «Junturi' a mok ku pʌk'ba' jok' tu pʌk'ba'. 4Kaj chu'mpʌ u pʌk'ik, yʌn jun ok u nek' u pʌk'a juti ix bej y tari a ch'ich' tu laj luk'a a bich'ikba ix bej. 5U jer jun ok juti ix tunich tu mo' pim u lu'mi; toj se'p' kaj ts'eji tu jay u lu'mi, lʌji' se'p' kaj jok'. 6Chen kaj nʌ'ki k'in, u k'ak'i a kin tu toka a pʌk'a y laj tiji tu ma' tʌm bin a u mots ix lu'm 7U jer jun ok juti ix k'i'x; kaj ch'iji a k'i'x tu laj bʌk'a u pʌk'a y tu chʌkubʌj. 8U jer juti u nek' yok'o tu tsoy u lu'mi ij ch'iji ij tsayi hasta cien u wich, jump'e sesenta u wich y jump'e treinta u wich. 9A mok yʌn u xikin ti' u yui'k, u ki ue baij ki wei'k.»
Lʌji' yok'o tuku kʌ'sik ba' jay yʌn u jer u nu'ku
(Mr. 4.10-12; Lc. 8.9-10)
10U kʌ'sa winik xok'i ti a Jesús, y chu'mpʌ u k'atko' ti': ¿Biken ka' kʌ'siko' yete a kʌ'sa a yʌn u jer nu'ku? 11Jesús tu ya'tio': «A teche'x je' u ye'sa' bik taba u nu'ku tu ku wesintik K'uj a tiʌ kʌ' ti'a wetke'x u t'ʌn, a mo' nʌj ira' a ti' u tar yok'o tu ku wesintik K'uj a tiʌ kʌ'; chen a tio' mʌnʌ' u ye'sa tio'. 12Chen a mok yʌn ti', más ya'p ku bij ts'abati' y a mok mʌnʌ' ti' tak tiʌ chichin ti' binukaj laj taka' ti'. 13Bein ki kʌ'sa' yete in kʌ'sa a yʌn u jer u nu'ku, ka wirik a tio' ku chʌ'ntko' y mix ku yirko' baiki, ku yui'ko' y mix ku yuetko' baiki. 14Toj ti u metchʌ a ba' tu ya'a a profeta Isaías, ka tu ya'a:
“Tak u yui'ko' mʌnʌ' u yuetko' baiki,
tak u yirko', mix ku yirko' baiki.
15Chen a je' a winiko' mix ku kʌnik y mix ku tuko',
a tio' mʌkʌ' u xikino'
y laj mʌkʌ' u wich,
ti' mu' yirko' y ti' mu ch'extiko' baiki,
ti mu' ki' uiko' y ti' mu suto' ti ten.
Y ti mi' ch'ensiko'.”
16»Ku jach bin tsoy ta worex teche'x, tu yʌn a wiche'x y ka wirke'x y yʌn a xikine'x y ka wui'ke'x. 17Jach toj tu jay kin wei'k teche'x, ne pim a bex lʌji' a profetas y a winiko' a ku jach metik u t'ʌn K'uj poch u yire a ba' ta wire'x y u yui'k a ba' ta wue'x, chen mo' tu yuo'.
A Jesús ku tsikbʌtik u nu'ku a kʌ'sa a yʌn u jer u nu'ku yok'o a mok ku pʌk' ba'
(Mr. 4.13-20; Lc. 8.11-15)
18»Ki' ch'exkintawue'x, baiki u nu'ku in kʌ'sa a yʌn u jer u nu'ku a yok'o a mok ku pʌk' ba': 19A mok ku yui'k u t'ʌn K'uj y muj ki uik', lʌji' bex a u wich a pʌk'a a juti yok'o bej; ku tar a kisin, ku laj ts'ek u laj tup'sik u t'ʌn K'uj aj tsikbʌta' ti'. 20A u nek' a ba' a juti yok'o a tunich la' bex a ku yui'ko' u t'ʌn K'uj y toj se'p' tsoy u yoro' u ch'ei'ko' tu pixʌn. 21Chen mo' tʌm bina' u mots tu yʌn, toj muj xʌnta u kuxta, toj ka tak u tunta' u yor, ka tak kʌxmeta' tuku yuiko u t'ʌn K'uj, toj se'p' ku p'ʌtko' u t'ʌn K'uj. 22A to'o pʌk'a tu ne yʌn k'i'x, lʌji' a mok ku yui'k u t'ʌn K'uj, chen jai' ku tukrik u bʌj baij ku bin tar u metik, jai' ne ku tukrik u ts'urchʌ, y tu nej ya'p u ba', y ya muj cha'ba ti' u ki uik' u t'ʌn K'uj ti' u ki metik. 23Chen a to'o pʌk'a tu ne tsoy u lu'mi, lʌji' a mok ku yui'k u t'ʌn a K'uj y ku jach metik, ku jach tsa'ya treinta u wich, a juntu ku ts'ek sesenta u wich y a juntu ku ts'ek cien u wich.»
A kʌ'sa a yʌn u jer u nu'ku yok'o a trigo yete a mo' tsoy aj su'k
24Tu tsikbʌta tio' jump'e kʌ'sa a yʌn u jer nu'ku tu ya'a: «A tuku wesintik K'uj a tiʌ ix kʌ' lʌji' bexi' bix junturi' xi'ra tu pʌk'a ne tsoy u nek' u pʌk'a yok'o u kor. 25A tuk'in tu woro a xi'ro' tʌn u weno', tari a mok pek'yirik, y tu pʌk'a aj su'k a mo' tsoy yok'o a trigo, ij bini. 26Y tuk'in kaj ch'iji a trigo y tuk'in kaj ixnʌ, bexi' jok'i a mo' tsoy aj su'k. 27A mok ku meaj bini u ya'ti' u ts'uri: “Ts'uri, ¿a tech tarech a pʌk'e u nek' pʌk'a a ne tsoy? ¿To' tuj jok'i u mo' tsoy aj su'k?” 28Ti' tu ya'a: “Junturi' a mok p'aktiken tu meta bex.” U winik a ku meajo' tu k'ato' ti': “¿Poch a wik in bino' in laj jo'ke aj su'k a mo' tsoy?” 29Ti tu ya'a: “mo'o, ma' jo'ke'x a mo' tsoy aj su'k, tu bexi' a laj jo'ke'x a trigo. 30Chae'x u ch'iji ket yete a trigo tura u k'uchu u k'ini ku jo'ka'; ka' k'uchuk u k'ini u jo'ka', ki bin in tuchi'te a mok ku bin u jo'ke ku yʌ bin u jo'ke aj su'k a mo' tsoy, ku k'ʌxik ti' u toka' y pachi, a trigo ti ku bin u li'sa to' in kʌ'che'.”»
Jesús ku tsikbʌtik u wich a mostaza jay yʌn u jer u nu'ku u kʌ'sa
(Mr. 4.30-32; Lc. 13.18-19)
31Jesús tu kʌ'sa u jer kʌ'sa a yʌn u jer u nu'ku y bex tu ya'a: «A tuku wesintik K'uj a tiʌ kʌ', bex bix u nek' mostaza, a xi'ra tu ch'a y tu pʌk'a yok'o u kor. 32Chen tuk'in ku pʌk'a u nek' u pʌk'a y ku ch'iji, lʌji' ku ne jach ne nuktaj u ch'iji y ku waya ne nukuch che' y u ka' sut a yʌno' a pʌk'a ts'ots' ku p'ato', ku jach ne jok'o u k'ʌ', y a chich ku tar u meto' u k'uo' yok'o u bo'i u k'ʌ' u che'i a mostaza.»
Jesús ku tsikbʌtik u ts'aki aj pʌn ti' u si't'i jay yʌn u jer u nu'ku u kʌ'sa
(Lc. 13.20-21)
33Jesús tu kʌ'sa u jer kʌ'sa a yʌn u jer u nu'ku y bex tu ya'a: «A tuku wesintik K'uj a tiʌ kʌ' bex bix u ts'aki aj pʌn ti' si't'i, a junturi' ch'upra tu ch'a y tu xak'ta yete oxp'e u p'is harina, ti' u si't'i tu woro u sʌkʌni.»
U laj metchʌ a ba' ts'ibʌ' yok'o u t'ʌn K'uj
(Mr. 4.33-34)
34Jesús tu tsikbʌta u t'ʌn a K'uj ti' a winiko' yete ne ya'p a kʌ'sa a yʌn u jer u nu'ku, y a Jesús muj tsikbʌtik u t'ʌn a K'uj wa ma' ye'sik a bex a kʌ'sa a yʌn u jer u nu'ku. 35A je' bex tu ya'a ti' u metchʌ a ba' tu ya'a a profeta uchik:
«Ki bij kʌ'sa yete woro a kʌ'sa a yʌn u jer u nu'ku;
binika' in wae a ba' a mukrʌ'
toj kaj tu meta a lu'm K'uj.»
Jesús ku tsikbʌtik u nu'ku a kʌ'sa a yʌn u jer u nu'ku yok'o a mo' tsoy aj su'k
36Jesús tu t'ʌna' a winik y tu p'ʌta ij oki ix nʌj, y xok'o u kʌ'sa winik, tu yao' ti: Tsikbʌte baiki u nu'ku a kʌ'sa a yʌn u jer u nu'ku yok'o a mo' tsoy aj su'k yok'o aj ch'iji yok'o kor. 37Ka tu nuka: «A mok ku pʌk'ik ne tsoy u nek' a pʌk'a, lʌji' u Ti'a Xi'ra. 38A kor lʌji' tu woro a lu'm; a tsoy u nek' u pʌk'a lʌji' a mok jach akʌ' ti' u t'ʌn K'uj, a mo' tsoy a pʌk'a lʌji' a mok ku yui'k u t'ʌn a kisin. 39U yʌj p'akti u winki a lu'm a tu pʌk'a a mo' tsoy a pʌk'a lʌji' a kisin; u k'ini ku jo'ka' a pʌk'a lʌji' tuk'in ku bij xu' tʌn; y a mok ku jo'jko' lʌji' a ángeles. 40A bex ku jo'ka' a mo' tsoy aj su'k, y ku pura ix k'ak', bex ku bij mʌn ka' xu'ruk t'ʌn. 41U ti'a xi'ra ku bin u tuchi'te a ángeles u much'e y u jare yok'o tuku wesintik a mok ku metik mo' tsoy ba' y a mok ku ts'ek u metik bexi' mo' tsoy ba' u bojo'. 42Y ku bin u puro' ich a k'ak', y tita ku bij ok'o' y ku bin u k'uxo' u koj yok'o u yʌyi. 43A mok ku jach metik u t'ʌn K'uj ku bin t'a'ba bex a k'in yok'o tuku wesintik K'uj, a mok yʌn u xikin tiu ch'extik u ki' ch'exte.
Ta'kʌ' a ba' a ne ko'o
44»A tuku wesintik K'uj a tiʌ kʌ' bex bix jump'e a ba' a ne ko'o ta'kʌ' yok'o a yʌn mok u lu'm, junturi' xi'ra ku yirik a ba' a ne ko'o tita y ku ka takik titai; yete u tsoy u yor, ku bin u kane tu woro u ba' a yʌnti', y ku mʌnik a lu'm tu tiʌ a ko'o ba'.
A ne ko'o a tunich u k'aba' perla
45»Bexi' a tuku wesintik K'uj a tiʌ kʌ' bex bix junturi' winik a u meaj lʌji' kamba' ku kʌxtik a jach k'ux tsoy tunich a u k'aba' perla. 46Ka tu yira jump'eri' tunich a to'o ne k'ux ko'o, bini u laj kane tu woro u ba' a yʌnti' y tu mʌna a lay a tunich.
A ba'i tu ku chuka kʌy
47»Bexi' tuku wesintik K'uj a tiʌ kʌ' bex bix tuku chuka' kʌy, tuk'in ku pura ix peta' ku laj chukik lara aj kʌy. 48Tuk'in ku turu, ku jara y ku pura tu xur a peta'; tuku kuto' u tejto', ku but'ik yok'o u xako' a ne uts y a mo' uts, ku purko'. 49Bex ku bij mʌn tuk'in ka' xu'ruk t'ʌn: ku bin jok'o a ángeles y ku bin u k'uye a to'o tsoy u tuko' y u ti'ri a to'o mo' tsoy u tuko'. 50Y ku bin u puro' ich a k'ak', y tita ku bij ok'o' y ku bin u k'uxo' u koj yok'o u yʌyi.»
Tumen ba y a uchmen ba'
51Jesús tu ya'tio':
—¿Ta ki ue'x tu woro a je' a ba'?
Tio' tu nuko':
—Tin wuo'.
52A Jesús tu ya'tio':
—Tuk'in a mok a ku kʌ'sa' u t'ʌn K'uj a toj u ts'ibtamʌ a Moisés uchik, ku ki' kʌnik u t'ʌn K'uj, bex bix junturi' au winki a nʌj, ku bin tuku li'sik u ba', y tita ku jarik a tumen ba' y uchmen ba'.
VIII. NE YAP' BA' TU META A JESÚS
(13.53—17.27)
Jesús ku bin ix Nazaret
(Mr. 6.1-6; Lc. 4.16-30)
53Tuk'in ka ts'o'k u kʌ'sa Jesús, yete a kʌ'sa a yʌn u jer u nu'ku, jok'i tita. 54Jesús k'uchi ix u kʌjta, oki ix u nʌji tuku much'ik u bʌjo' a judíos u xake u t'ʌn K'uj, tuba chu'mpʌ u kʌ'sa tita y a winik ne tsoy tu yiro' u kʌ'sa y ka tu yao':
—¿To' tu tu kʌna tu woro a je' a ba' a ne u yue y muk' ti' u metik a ne tsoy ba' to'o tuku ch'eik a lay a muk'?. 55¿A lay xi'ra mo' la' u ti'a a ku meaj yete che' (carpintero)? ¿Mo' la' María u nʌ' y u yits'ino' lʌji' a Jacobo, a José, a Simón y Judas? 56¿Y mo' ket kaj kʌjta yete u ch'upra u bojo'? ¿Tuba ku jarik tu woro a je' a ba' ku metik?
57Y a mok tio' tita mu' k'ato' u ch'ei'ko' u t'ʌn a Jesús. Chen a Jesús tu ya'a:
—Ch'ik tu woro lu'm otsi u yira profeta, chen yok'o u lu'mi y yok'o u yatochi' mix otsi u yira'.
58Y tita mo' tu meta ne yap' ba' yete u muk' K'uj, tu mu' k'ato' u ch'a'ba u t'ʌn a Jesús.
Terpilih Sekarang Ini:
San Mateo 13: PLacNaha
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Sociedad Biblica de México AC
