S. Juan 6
6
A Jesús ku ts'ek u jʌnʌ cinco mil winik
(Mt. 14.13-21; Mr. 6.30-44; Lc. 9.10-17)
1Chen ts'o'ki u tsikba a Jesús, bini tu pach u yʌj petaj a Galilea a lʌiti' u petai u k'aba' ku ya'ba ti' Tiberia. 2Y ne pim winik tu t'u'ra u pach a tu tu ye'sa' u ch'ensik u ya'ji a winiko' yete u muk' K'uj. 3A Jesús nʌ'ki yok'o jump'e wits y tita kuri yete u kʌ'sa winiko'. 4Xok'o u k'uchu u k'ini a Pascua a ku metik u yo'cho' a judíos. 5Y Jesús ka tu yira ne pim winik tari tu pach, tu ya'ti' a Felipe:
—¿Tu kak bij mʌne pʌn ti' u jʌno' tu woro a je' a winiko'?
6Chen bex tu ya'a Jesús ti u tuntik u yor a Felipe, a Jesús toj u yej baij ku bin u mete. 7Felipe tu nuka ti':
—Tak yʌn docientos u k'ini u bo'ri u meaj junturi' xi'ra, toj mix ku bij chukbʌ wa kak mʌnik pʌn ti' ak laj ts'ekti' tak chichin tu woro a winik.
8Chen u jer junturi' u kʌ'sa winik a lʌji' u k'aba' Andres, a lʌji' u bojo' a Simón Pedro, tu ya'ti' a Jesús:
9—Way tiʌ junturi' mejen, yʌnti' jumujk'ʌ' pʌn a menʌ' yete cebada y bexi' yʌnti' ka'p'e kʌy, chen, ¿bay a je' ti' ne pim a winik?
10Jesús tu nuka:
—A'e'x u laj kuta tu woro a winik.
Y a winik laj kuro' tita tu ne yʌn su'k a lay tu tio', y a winik toj cinco mil u pimai. 11Y Jesús tu ch'a aj pʌn y tu yʌj t'ʌna K'uj y tu ya'a: Baij tech K'uj, pachi tu laj ts'ati' u kʌ'sa winik y u kʌ'sa winik tu laj jʌtsa ti' tu woro a winiko' a kurukbʌjo' y bexi' tu meta yete a kʌy y tu woro a winiko' laj jʌno' bex u ya'p'i u k'ato'. 12Kaj laj nʌjcho' y ts'o'ki u jʌno', Jesús tu ya'ti' u kʌ'sa winiko':
—Much'e'x tu woro u yʌrʌ' aj p'atij, ti mu' sa'ta mix chichin.
13Tu much'o', y doce xak tu turo' yete u yʌrʌ' u meje u xo't'o aj pʌn a menʌ' yete cebada, a jari yʌn ka'chik jumujk'ʌ' pʌn. 14Chen ka tu yiro' a winik baij tu ye'sa u metik Jesús, tu yao':
—A je' jach lʌji' a profeta a mok lʌji' ku bin tar ix lu'm.
15Chen Jesús ka tu yira a winiko' poch u chich ch'eik a Jesús ti' u metko' u wesi, Jesús jok'i tita ij bini ix a wits ti u p'ata tu juna.
Jesús ku xima yok'o a peta'
(Mt. 14.22-27; Mr. 6.45-52)
16Kaj tʌn u yak'ʌchʌ, u kʌ'sa winik a Jesús emo' ix peta' 17ij nʌ'ko' yok'o chem ij chu'mpʌjo' u ch'ʌktiko' a yaj peta' y ti' u nu'ku bino' ix Capernaum. Yaj ki ak'ʌ'chʌ, y Jesús mo' tey sutuk yete tio'. 18Lʌji' kaj chu'mpʌ u lik'i ne k'ʌ'm ik yok'o a yaj peta' y lik'i ne nuk u yʌ'mi. 19Tuk'in ne ch'ikibino' yok'o a peta' u nʌchi cinco o seis kilómetros, tu yiro' a Jesús tʌn u xima ix a peta' y tʌn u xok'o yok'o a chem tu tio', y tio' tu sʌjto'. 20Chen Jesús tu nuka:
—¡Tenen a Jesús, Ma' sʌjtike'x!
21Ne tsoy u yoro' tu yakso' ix chem y se'p' kaj k'ucho' ix u lu'mi a tuku bino'.
A winiko' ku kʌxtiko' a Jesús
22Kaj sasi u jer k'in, a winiko' a tio' tu pach a lay a peta' tu yiro' mʌnʌ' u kʌ'sa winiko' a Jesús tita y tu yiro' tu ch'ao' jari junts'iti' a chem a yʌn, y bexi' u yeo' moj bini Jesús yete tio'. 23Chen u jer chem k'ucho' ix Tiberia a xok'o tu tu jʌto' aj pʌn a tu tu yʌj t'ʌna K'uj a Jesús y tu ya'a: baij tech K'uj. 24A winiko' ka tu yiro' mʌnʌ' Jesús tita mix u kʌ'sa winiko', laj nʌ'ko' yok'o a chem ij bino' u kʌxto' a Jesús ix nu'ku a Capernaum.
Jesús lʌji' aj pʌn a ku ts'ek kuxta a winik
25A winiko' tu yiro' a Jesús tu pach a peta' y tu yao' ti':
—Rabí, ¿tuk'in k'uchkech way?
26Jesús tu nuka tio':
—Jach to jai' ki wei'k teche'x, a teche'x ka kʌxtiken mo yok'o a tu taj wire'x in metik ne tsoy ba' yete u muk' K'uj, a teche'x ka kʌxtikene'x yok'o a tu ne jʌne'x y nej ki nʌjche'x. 27Ma' meaje'x yok'o a o'chi a to'o ku xu'pu, meajne'x yok'o a o'chi a ku ts'ek a kuxta a mʌnʌ' yʌ kimi, a to'o lʌji' ku bin u ts'ae u Ti'a Xi'ra, a to'o toj lʌji' K'uj a lʌji' Tet tu ye'sa jach taj kin wei'k a jach t'o'jen.
28A winiko' tu k'ato' ti' Jesús:
—¿Baiki yʌnti' in metko' ti ki laj metik tu woro a ba' tu ya'a K'uj u meta'?
29Jesús tu nuka tio':
—A je' lʌji' a ba' u k'at a metik K'uj, poch u yirik a ch'eik u t'ʌn a mok lʌji' tu tuchi'ta.
30Kaj k'ata ti' Jesús:
—¿Baiki jea' we'sik to' a metik ti' in ch'eik a t'ʌn? ¿Baiki tech je' a metik? 31Ak nuke'x tu jʌta a maná ix u lu'mi a tu mʌnʌ' che', a bex ku yei'k tu ts'ibʌ' u t'ʌn a K'uj: “Tu ts'ati' u jʌte uj pʌni a ti' u tar ix kʌ'.”
32Jesús tu nuka tio': Jach to jai' ki wei'k teche'x:
—Mo' la' a Moisés a tu ts'atech aj pʌn a ti' u tar ix kʌ', lʌji' in Tet ku ts'ek au jach pʌni a ti u tar ix kʌ'. 33Aj pʌn a ku ts'ek u kuxta winik lʌji' a tu tuchi'ta K'uj a ti' u tar ix kʌ'.
34Y tio' tu k'ato':
—Ts'uri, ts'ato' tu woro k'in a lay aj pʌn.
35Y Jesús tu nuka tio':
—A Ten Lʌjien aj pʌn a kin ts'ek u kuxta ba', a mok ku tar ti ten, mʌnʌ' u yʌj wijchʌj, a mok ku ch'eik in t'ʌn mʌnʌ' u yʌj uk'ajchʌ. 36Chen bex ti wa'te'x, tak ta wirene'x mix ta ch'a in t'ʌn. 37Tu woro a mok tu ts'aten in Tet binukaj tar ti ten, y a mok ku tar ti ten, mʌnʌ' in jarik. 38A ten emen ix kʌ', mo' ti in metik a baij kin k'at, a ten taren tin metik a baij u k'at in Tet K'uj a mok lʌji' tu tuchi'ten. 39A je' lʌji' u k'at in Tet a tu tuchi'ten: u k'at a ti', mi' naj sʌtik mix junts'iti' a ku bin u ts'aten, u k'at a ti' ki laj li'sik tu ka' kuxta tu woro a tu ts'aten, ka k'uchuk u k'ini u xu' t'ʌn. 40A je' lʌji' u k'at in Tet a tu tuchi'ten: Tu woro a mok ku yirik u Ti'a a K'uj y ku ch'ei'ko' u t'ʌn, ku bin ts'abati' u kuxta a mʌnʌ' u ya kimi y ten kin bin u ka li'sik u ka' kuxta ka k'uchuk u k'ini u xu' t'ʌn.
41A judíos chu'mpʌjo' u jumo' yok'o a Jesús a tu tu yuo' u yei'k: «A Ten Lʌjien aj pʌn aj emi ix kʌ'.» 42Y tʌn u yei'ko' a winiko' bex:
—¿A je' a Jesús mo' la' u ti'a a José? ¿Mo la' a je' aj k'o'mʌ u nʌ' yete u tet? ¿Y biken ku yei'k a ti' emi ix kʌ'?
43Jesús tu nuka tio':
—Xure'x a wei'ke'x mo' tsoy ba'. 44Mix mok je'e u tar ti ten wa muj tasik in Tet a tu tuchi'ten, y ten bin in ka' li'sik u ka kuxta ka k'uchuk u k'ini u xu' t'ʌn. 45Toj ts'ibʌ' yok'o u juni' a tu ts'ipta' uchik a profetas a ku yei'k: “K'uj ku bin u laj kʌ'sik tu woro a winik.” Ben tu woro a mok ku yui'k u t'ʌn in Tet y ku k'ʌnik a baij ku ye'sik, lʌji' ku tar ti ten.
46«Mʌnʌ' in wei'k o yʌn mok u yirmʌ in Tet, to jari ten in wirmʌ in Tet K'uj a lʌji' tu tuchi'ten. 47Jach to jai' kin wei'k teche'x: A mok ku yaksik tu yor ti ten, lʌji' ku bin ts'aba ti' u kuxta y mʌnʌ' u ya kimi. 48A Ten Lʌjien aj pʌn a ku ts'ek kuxta. 49A teche'x a nuke'x tu jʌto' a maná ix u lu'mi tu mʌnʌ' nukuch che' woro tikin lu'm yʌn, ij kimo'. 50A ten ki wei'k la' aj pʌn a ku yeme ix kʌ' a mok ku jʌntik a lay aj pʌn, mʌnʌ' u kimi. 51A Ten Lʌjien aj pʌn a kuxʌ' a ti u tar ix kʌ', wa mok ku jʌntik a je' aj pʌn, binukaj kuxta tu woro k'in. Aj pʌn a kin bin in ts'ati' lʌji' in bʌk'e, ten kin bin u k'ube in kuxta ti a winiko' a yʌn yok'o a lu'm.»
52A judíos chu'mpʌjo' u ts'iko' yete u bojo' y bex ku yei'ko':
—¿Bij ku bin u ts'ato' ak jʌte a je' u bʌk'e?
53Jesús tu ya'tio':
—Jach to jai' kin to ki ei'k teche'x: Wa teche'x ma' jʌntke'x u bʌk'e u Ti'a Xi'ra y maj wu'ke'x u k'ik'e, mʌnʌ' u ts'aba teche'x a kuxta a ne ya'p k'in a mʌnʌ' a ya kimi. 54A mok ku jʌntik in bʌk'e y ku yuk'ik in k'ik'e binukaj ts'abati' u kuxta ne ya'p y mʌnʌ' u ya kimi y ten ki bin in li'se u ka' kuxta ka' k'uchuk u k'ini u xu' t'ʌn. 55In bʌk'e lʌji' jach o'chi y in k'ik'e jach lʌji' jach uk'u. 56A mok ku jʌntik in bʌk'e y ku yuk'ik in k'ik'e, tiʌ yete ten, y ten ti'en yete ti'. 57In Tet, a mok yʌn kuxta ti', a mok lʌji' tu tuchi'ten y lʌji' tu ts'aten in kuxta, bexi' ben a mok ku jʌntik in bʌk'e bexi' ti je'e u ts'abati' u kuxta ne ya'p k'in yok'o ten y mʌnʌ' u ya kimi. 58A je' lʌji' aj pʌn a ti u tar ix kʌ', y mo bex a bex tu jʌto' a nukie'x a maná ij kimo', chen a mok ku jʌntik in bʌk'e, binukaj ts'aba ti' u kuxta a mʌnʌ' u ya kimi.
59Jesús tu kʌ'sa a je' a ba' ix u nʌji tuku much'ik u bʌjo' a judíos u xake u t'ʌn K'uj ix u kʌjta u k'aba' Capernaum.
Jesús ku ye'sik bik ku ts'aba tech a kuxta y mʌnʌ' a ya kimi
60Ka tu yuo' bex u kʌ'sa Jesús ne pim u kʌ'sa winik a Jesús, tu yao':
—A je' a tu tsikbʌta ne ya a je' a t'ʌn, ¿moki jeu che ch'eik u t'ʌn? 61Chen a Jesús tu yueta' baij ku muku ei'ko' u kʌ'sa winik, ben ka tu k'ata tio':
—¿A je' a ba' kin yaj ta wu'a in wei'k teche'x? 62¿Baij ku bin mʌn wa ka wirke'x u Ti'a Xi'ra u ka nʌ'kʌ ix kʌ' a to'o toj tiʌ ka'chik? 63U Pixʌn K'uj lʌji' a ku ts'ek kuxta, a bʌk' mix ba' ku ts'ek, tu woro a ba' a ti tsikbʌta ti u tar ti u Pixʌn K'uj a ku ts'ek kuxta. 64Chen yʌn mok yok'o a teche'x muj ch'eik a lay t'ʌn.
A Jesús toj lik' toj u yue moko' a muj ch'eik u t'ʌn y moki u winki ku bin k'ubik. 65Bexi' tu ya'a bex:
—Ben ki wei'k teche'x mix mok ku tar ti ten wa in Tet muj cheik.
66Lʌji' tuk'in ne pim tu p'ʌto' u t'u'rik u pach a Jesús y ya mu' u yet mʌn. 67Y Jesús tu ya'tio' a doce u apóstoles:
—¿Bexi' teche'x poch a bine'x?
68A Simón Pedro tu nuka ti':
—Ts'uri, ¿ti' mok kak bin? Jari tech a t'ʌn ku ts'ek kuxta y mʌnʌ' y yʌ kimi. 69Y teno' ya tin ch'ao' a t'ʌn y in weo' a tech lʌji' a jach u Ti'a K'uj.
70Jesús tu nuka tio':
—A teche'x a doce apóstoles ten tin tejte'x chen yʌn junturi' yok'o teche'x lʌji' kisin. 71A Jesús lʌji' ku yei'k a Judas u ti'a a Simón Iscariote, a to'o lʌji' ku bin k'ubik ti' u kinsa' a lʌji' tiʌ bexi' yok'o a doce apóstoles.
Terpilih Sekarang Ini:
S. Juan 6: PLacNaha
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Sociedad Biblica de México AC
