Matthew 6
6
Apeghtuusaq Tuunilleghmeng Aklumalghiinun
1Jesus‑em apeghtuusani nagneghutkii, “Wataghllak pinitun pillesi esghaghsaqegpenaki. Esghaghsaqegkufsiki Atagpesi qilagmelnguum akileghtughnaanghitiisi.
2“Enkaam tuunikuvek aklumalghiinun, piniiyugneghestun pigpenang. Qalghightaghtestikayuguut tuunivagilgameng esghiisqelluteng. Tawaten piiqut, synagogue‑nillu tumenillu usuqesqelluteng. Ipa ungipaatamsi akileghtuusangwaaghluteng ayuqut. 3Iwernga tuunikuvek aklumalghiinun, kina alngunak ungipaategpenaan, 4kitumun alngunak nallukesqelluku tuuniillghen. Atagpek esghapagaqaaten enkaam akileghtughlleqaaten.”
Apeghtuusaq Yughalleghmeng
5“Yughaneghpesini piniiyugneghestun pigpenasi. Yughaghyuneghtuut nekevghaghmeng synagogue‑nillu tumenillu esghiisqelluteng yugnun. Ipa ungipaatamsi akileghtuusangwaaghluteng ayuqut. 6Iwernga yughaghnaqneghpeni, iteghluten negpenun uumgulluten yughaghaqi Atagpenun aliinneghilgughmun. Atagpek liisimakaa aksaqluku sallghen enkaam akileghtughlleqaaten.
7“Yughaneghpesini Kiyaghnepigmun maniguusigalngughestun pigpenasi. Yughaneghmeggni uteghpagtaghaqiit akuzitet sameng pisiinghilnguut. Sumeghmeggni akuzilleghllagmegteggun kiimsighlleqniluki yughalleteng piiqiit. 8Ellngistun ayuqegpenasi qayughllak Atagpesi liisimakaa aklukegkaghsi, talwa aaptestegpenasi.
9“Enkaam whaten yughaghaqitek,
‘Whangkuta Atavut qilagmelnguq pamani,
agleghnalghii aatghen quulvallengli.
10Yughaghtukut Ataneghpagullghen tagisqelluku,
piyukellghenllu apeghiighesqelluku nunami whani,
katam qilagmelngughestun.
11Neghyaghqaliteqeghtikut aghneghmi whani.
12Seghevutaghtiki seghleghqelleput
seghevusimaluki seghletun pisteput.
13Nanghiiqullengestegpenaamta,
iwernga yugulikut taagken Seghleghmeng.
Ataneghpagulleq, aghtughyaghqaanghilleq, nighughqelleq,
elpek pikaten quunperugllak. Amen.’
14“Seghevuskufsiki seghletun pistesi, Atagpesi qilagmelnguum seghevulleqiisi. 15Iwernga seghevunneghilkufsiki seghletun pistesi, Atagpesi seghevunnaanghitii seghleghqellesi.
Apeghtuusaq Fast‑elleghmeng
16“Fast‑eneghpesini iilqesugnighqegpenasi piniiyugneghestun. Aghmigigatut, mesuunangigatut liigikesqelluteng fast‑enguniluteng. Ipa ungipaatamsi, akileghtuusangwaaghluteng ayuqut. 17Fast‑eneghpeni aghmigaqillu mesuunaaqillu, 18ilagpenun nallukesqelluku fast‑ellghen. Iwernga Atagpek aliinneghilnguum liisimakaa saaquten enkaam akileghtughlleqaaten.
Qilagmelnguut Aklungit
19“Nunami whani kagpagpenasi aklungimeng qayughllak kingugemllu anaghtaallghemllu naafqelleqii, teglegniightetlu naafqiiluteng teglegllequt. 20Iwernga elpesineng katam qilagmi kagpagitek aklungimeng qayughllak moth‑ngituq, anaghtaangituq naafqiiyaghqameng, tegleghniightengituqlu naafqiiluteng teglegughyaghqameng. 21Sumeghtaghaatkumanginaghlleqaghsi aklungigpesinun kagpagvigsi.
Yugusim Nighuga
22“Iyek kenelghutastun ayuquk yugusimun. Iiskegtekuvek iingunaghmi yugusin nighugllagullequq, 23iwernga iyellugmeskuvek iingunaghmi yugusin mamlegllagullequq. Enkaam nighuk ilugpenilnguq mamlegukumi, elngaatall mamlepigtuq!
Kiyaghneghenkuk Maninkuk
24“Kitum alngunak qepghaannaanghitaak maalghuk umiilgek. Maalghugegneng umiilelgukumi ugumikelleqaa ataasiq, piniqelleqaa ilanga. Qaatkutngallequq ataasimun, pitkennaanghitaa ilanga. Enkaam piniqnaanghitaghsi Kiyaghneq piniqumaluku mani.
25“Tamaaken apalluqluku ungipaatamsi, nulqaviighutkegpenaan ungvalleghsi, sameng neghelleghqaghsi, meghelleghqaghsi, nalighmeng sameng aatelleghqaghsi. Sumeghtaghaqaghtekqun, unguvalleq megnunaghataghaghtuq neqmeng, yugusiqlu megnunaghataghaghtuq aatkaneng. 26Esghaqaghtekiqun qawaaget, piitesighiigatut, unatiigatut, kagpagingigatut. Naqamllu Atagpesi qilagmelnguum neghqaqii! Elpesi megnunaghataghanghitsii qawaagneng? 27Nalighpesi nulqaviighutkelluku unguvalleni taakughlleqaguu?
28“Sangan nulqaviightaqetsi aasaghqameng? Esghaqaghtekiqun piitesighaat piitellghit, qepghiigatut talwa aatkanglliigatut ellmeggneng. 29Ungipaatamsi talwa Solomon aklungighllagmini aasigatuq piitesighaghestun pinightutkalghiimeng. 30Kiyaghneghem aasightughaqii vegaaghet, iwernga aga unaami quukaqiit. Kiyaghneghem aasightuqayugukaki veghaaget, aasightughataghaghnaanghitisii elpesi? Ugpeqilleghqestaapigutsi! 31Tamaaken apalluqluku nulqaviightegpenasi whaten, ‘Sameng neghnaqesta?’ nalighmeng ‘Sameng meghnaqesta?’ nalighmeng ‘Sameng aannaqesta?’ 32Gentile‑et tamaana nulqaviighutkaqaat. Atagpesi qilagmelnguum liisimakii qamaglluki aklukegkasi. 33Tamaaken apalluqluku kiyaghtelleghpesini megnunalleghpigaaghtestekek Kiyaghneghem Ataneghpagullghallu, piyukellghallu. Tawaten pikufsi Kiyaghneghem tuunelleqii qamaglluki aklukegkasi. 34Nulqaviighutkegpenaan unaamilleghqaq, qayughllak unaamim seghleliighi itagnaghyaghqaagut tawavek aghneghmun. Seghleliiq pikayuguuq aghhutanga tamaghhaan, ilaaghataghaghpenaan unaamim seghleliilleghqaaneng.”
Terpilih Sekarang Ini:
Matthew 6: ess
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2018, Wycliffe Bible Translators, Inc. All rights reserved.
