Matthew 3
3
John‑em Paaptaayestem Ungipaqillgha
1Taakwaningani John Paaptaayesta aglaghluni kilgaanganun Judea‑m, piinliqaq ungipaqimeng. 2Whaten pikaq, “Avuteghqellusi taaqitek seghleghqenneghmeng, qayughllak Ataneghpagullgha Qilagem kaasaghtuumaaq.” 3John‑nguuq uuknaliqistem Isaiah‑am akuzitkegkaa whaten piiqngami,
“Kilgaani kina akilghuugaquq whaten:
‘Yataaghqiteggu Atanghem tuumkaghqaa,
taklaghrukegsaghteggu igleghavigkaa!’”
4John‑em aatkii camel‑em melqwaaneng ulimaaghet, meqameng tafsiluni, neqekluni locust‑mengllu honey‑mengllu. 5Yuget aglaghtuutkat ellnganun Jerusalem‑emengllu Judea‑mengllu uvitanganengllu Kiiwem Jordan‑em. 6Seghleghqelleteng qayvighqenghatki, John‑em paaptaayaaqegkangi Jordan‑egni.
7John‑em esghaghluki Pharisees‑elghutetlu Sadducees‑elghutetlu tagilghiit ellminun paaptaayesqelluteng pikii, “Elpesi nemeghyani! Kitum anagesqisi Kiyaghneghem nanqigtelleghqaaneng kaannaqelghiimeng? 8Sivuklusi pinitun pilleghpesigun ipapighqiteggu seghleghqelleghpesineng avuteghqelleghsi. 9Whatenꞌngam sumeghtaghaghpenasi, ‘Kiyaghneghem nanqiggnaanghitiinkut qayughllak kingunqiinkut Abraham‑em.’ Ungipaatamsi Kiyaghneghem Abraham kingunengllaannayaghaa maaken uyghagneng! 10Whaa maaten qalqalimayaqleggiinaghlluteng ayuqut uqfiget akwiitgun. Qamaglluteng uqfiget pinilghiimeng piitestinghilnguut kepluki, kenghegnun miluusaghqaagut. 11Meghqun paaptaayeghiiqunga avuteghkegkanun seghleghqelleghmeggneng. Iwernga tagiyaghqam kingumneng paaptaayelleqiisi Agleghnalghiignengllu Taghneghagneng, keneghmengllu. Aghtughyaghqaanghiteghllagtuq whangamneng, repall talwa kamegkek tugumiiqepagningitagka. 12Taana tagiyaghqaq nanqigtiyaqleggiinaaguq. Aafsaghqaqii pinilghiit yuget seghleghneng, katam piitesiighaghtem pekutamineng malliillghatun grain‑et. Kagpagluki grain‑et mallaq tamaana miluusaghqaqaa qaamyaghqaanghilnguugnun kenghegnun.”
Paaptaayellgha Jesus‑em
13Taagken Jesus Galilee‑meng tagikaq Jordan‑egnun, John‑mun paaptaayesqelluni. 14Iwernga John‑em akuzinnaqutkegkaqsaqanga whaten, “Whanga elpek paaptaayeyaghqaqsaghaghpenga. Sangavek whangamnun tagizin?”
15Iwernga Jesus‑em pikaa, “Legan saaqsin paaptaayenga qayughllak tawaten pikumtung apeghiighlleqaghpung Kiyaghneghem piyukellgha.”
Enkaam John‑em paaptaayekaa.
16Jesus paaptaayeyatni meghmeng aanegkaq. Taagken qilak qelpeghluni esghaqakek Kiyaghneghem Taghneghakek ukilghiik dove‑etun ayuqlutek, enkaam ellngakun nalukak. 17Taagken ma qilagmeng pikaq, “Unanguuq piniqegkaghllaka Ighneqa, efquqepigtaqa.”
Terpilih Sekarang Ini:
Matthew 3: ess
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2018, Wycliffe Bible Translators, Inc. All rights reserved.
