Matu 21

Yerusalɛm nyaŋerɛ kɛ̃'a

(Maki 11.1-11; Luki 19.28-40; Yɔn 12.12-19)

1Ban kiŋɛ na pɔra Yerusalɛm na la, paaɛ Bɛtefege en lɛm, Olive Zoore la, ti a tum a zahereba bayi, 2yele ba yeti, “Kiŋɛ ya timbila n boi ya nɛŋan ha wa, yan kɛ̃'ɛ̃ri ka puan la, bilam bilam ya wan nyɛ boŋa n lu' zɛ'a, la ka bia, lorege ya si na bo' mam. 3Se'em han soke ya se'ere, yeen yele en yeti ‘Daana la en boti si.’ Gee a wan bahɛ ti si lebe kalam na.” 4Dina wa iŋɛ ti la doohe la yelese'ere n tɔgɛ doohe nɔtɔgeha la puan se'em yeti,

5 # Zɛk 9.9 “Yele ya Zaayɔn poyua wa yeti,

Bihɛ ya, ya naba la en bala yɛ'a ya zi'an na la,

a sigehe la a mɛa, ba' boŋa,

a ba' la bombilepaalega.”

6Ti a zahereba la kiŋɛ ta iŋɛ wuu Yezu n pa'ali ba se'em la, 7tari boŋa la, la ka bia la paaɛ na, dikɛ ba futo pagelɛ si zuto, ti Yezu nyaa ba'. 8Ti nɛrekuuŋɔ me digehɛ ba futo yarum sore la zuo, ti sɛba aafum tiihi vɔtɔ me yarum sore la zuo. 9#Yoo 118.25, 26 Ti nɛrekuuŋɔ sɛba n boi nɛŋa la, la sɛba n boi pooren la vɔɔla gee yɛta yeti,

“Hozaana Deviti dayua wa.

Sum boi mɛ la se'em n wa'am Daana la yu'urɛ puan na.

Hozaana n boi zuin zuin ha.”

10Yezu en ta kɛ̃ Yerusalɛm la, tiŋa la za'a gbirege mɛ, sɔkera yeti, “Ani n de ena wa?” 11Ti nɛrekuuŋɔ la en dole en la yeti, “Ena n de Yezu, dɛna nɔtɔgeha yehe Nazareti n boi Galilii puan la.”

Yezu sa'ɛ kɔɔheba

(Maki 11.15-19; Luki 19.45-48; Yɔn 2.13-22)

12Ti Yezu ta kɛ̃' pu'uhegɔ yire la puan, sa'ahɛ sɛba en koohe gee da'ara lɔgerɔ pu'uhegɔ yire la puan la, gee tulehe sɛba n teehe ligeri la teebula kpabɛ, la sɛba n koohe dayɛma la me kugehi kpabɛ. 13#Aza 56.7; Yɛr 7.11 Gee yeti, “La gulehɛ yeti,

‘Ba wan yi'ira mam yire wa la pu'uhegɔ yire.’

Gee yamam dikɛ de lebege la nageyigehi suka zi'an.”

14Ti Fɔɔhi la wɔbehi wa'am a zi'an pu'uhegɔ yire la puan na, ti a tibɛ ba. 15Gee malema kiinduma la, la gɔnmi'ineba la n nyɛ daalehum la ti Yezu tum la, gee me wum ti kɔma la vɔɔla pu'uhegɔ yire la yɛta ti, “Hozaana Deviti Dayua wa la,” ti ba suya nyiie paaɛ paaɛ. 16#Yoo 8.2 Ti ba soke Yezu yeti, “Fum wuni ban yeti se'em wa?” Ti Yezu yele ba yeti, “Ɛ̃ɛ n wuni. Yamam ka kãalɛ lan gulehɛ se'em yeti,

‘Kɔma, la kɔmbilɛɛhi nɔya

ti fum maahum ti ba pɛgɛ fum la’?”

17Ti Yezu bahɛ ba, gee yehe tiŋa la puan kiŋɛ Bɛtani tinkãtɛ la puan ta gã'arɛ.

Yezu pɔ bahɛ Kinkaŋa zuo

(Maki 11.12-14, 20-24)

18Nananawa, bulika ti a lebe tinkãtɛ la puan la, ti a kom duna. 19Ti a nyɛ ti kinkaŋa zɛ'a sore la nuuren, ti a paaɛ ka tiŋa, gee a ka nyɛ sɛsɛla ka zuo, gee vuurɔ ma'a. Ti a yele tia la ti, “Fum kan le malum wam dia!” Ti kinkaŋa la kɔ'ɔm ku'ɛ bilam bilam. 20A zahereba la n nyɛ ŋwana la, la iŋɛ ba la pakerɛ, ti ba yɛta yeti, “La iŋɛ la ŋwani ti kinkaŋa la ki bala kalam?” 21#Mat 17.20; 1 Kor 13.2 Ti Yezu lerege ba yeti, “Yelemɛŋerɛ ti en yɛta ya wa, ti ya han tara sakerɛ gee ka bu'ura, dagi la ya wan iŋɛ la sɛla n iŋɛ kinkaŋa wa ma'a, gee ya han pun yele zoore wa yeti, ‘Vuuɛ ka'lam lobe fum mɛŋa bahɛ ateko wa puan,’ la wan iŋɛ la bala mɛa. 22Sɛla woo ti ya soke pu'uhegɔ puan nam, ya wan to'e.”

Ba Soke Yezu Paŋa yele

(Maki 11.27-33; Luki 20.1-8)

23Yezu en kɛ̃' pu'uhegɔ yire la, ti malema kiinduma, la yizuto kiinduma wa'am Yezu zi'an na ti a boi bini pa'ala mɛ. Ti ba soke en yeti, “Beni paŋa ti fum tara tuna yele ana wa. Ani n bo' fum kpe'eŋo kuna?” 24Ti Yezu yele ba yeti, “Mam me wan soke ya sokere deyina, ti ya han lerege mam, mam me wan yele ya pansɛka ti n tara tuna n tuuma wa la. 25Yɔn ko'om sua la, bu ze'ele la saazuo na bii asaala zi'an?” Ti ba bu'ura la taaba yeti, “Tu han yeti, bu ze'ele la saazuo na, a wan soke tu yeti, ‘Ŋwani ti ya yi ka nam bo' en?’ 26Gee tu me han yeti, ‘La ze'ele la asaala zi'an na,’ tu ye mina nɛrekuuŋɔ la, se'ere en sɔi la, bamam za'a bihɛ ya Yɔn dela nɔtɔgeha.” 27Bala la, ba lerege Yezu yeti, “Tu ka mi.” Ti Yezu yele ba yeti, “Mam me kan yele ya kpe'eŋo seko ti n tara tuna yele ana wa.

Dayɔɔhi siyi Makerɛ

28“Yamam puti'irɛ dela deni yele dina wa puan? Buraa en tari a dayɔɔhi siyi, ta yele kiima la daarɛ deyima yeti, ‘N dayua, kiŋɛ tiihi dia va'am la puan va'amen ta tum zina.’ 29Ti a lerege en yeti, ‘Mam kan nyaŋɛ.’ Gee pooren ti a tee a puti'irɛ kiŋɛ. 30Ti sɔ la kiŋɛ yibega la zi'an ta yele en bala mɛa, ti a lerege en yeti, “N daana, n wan kiŋɛ.’ Gee pooren tee a puti'irɛ ka kiŋɛ. 31Kɔma bayi' wa puan, ba ani n tum ba sɔ la puti'irɛ?” Ti ba yeti, “Yia daana la.” Ti Yezu yele ba yeti, “Yelemɛŋerɛ ti en yɛta ya wa, ti kubetɔ'ɔhereba la yalunduma la pun diŋɛ ya nɛŋa mɛ kɛ̃'ɛ̃ra Yinɛ sɔ'ɔlum la puan. 32#Luk 3.12; 7.29-30 Se'ere en sɔi la, Yɔn n wa'am na pa'ala ya tuuntɔɔ sore la, ya ka nam bo' en, gee kubetɔ'ɔhereba la, la yalunduma la nam bo' en mɛ. Ti yamam n pun nyɛ ŋwana wa la, ya ka tee ya suya nam bo' en.

Putova'am bihereba makerɛ

(Maki 12.1-12; Luki 20.9-19)

33 # Aza 5.1-2 “Le Kelehe ya makerɛ deyima. Yidaana en burɛ tiihi wala a va'am, mɛ nangoone kaaɛ bu, gee tu' daam ŋmɛkerɛ boko ti ba ŋmɛkera tiihi la wula daam la bini, gee mɛ limehego dewoko bini, nyaa dikɛ va'am la bo' bihereba, gee kiŋɛ satiŋa n zaaɛ. 34Go'ohego saŋa n ta paaɛ la, ti a tum a yamehi bihereba la zi'an ti ba kiŋɛ ta to'e a tɔtɛ na bo' en. 35Gee sɛba en biheri va'am la gi' a da'aba la mɛ, ŋmɛ da'aba, ku ayima, gee lobe ayima la kuga. 36Ti a le tum da'aba sɛba n gani yia duma la, ti ba le iŋɛ bamam me bala mɛa. 37Ba'ahegɔ za'a, a tum la a mɛa dayua yeti, ‘Ba wan na'ahɛ en.’ 38Gee va'am bihereba la n nyɛ a dayua wa la, ba ɛbegɛ la taaba yeti, ‘Asooevaaɛ daana la n ŋwana. Wa'am ya na, ti tu ku en gee sɔi vaaɛ.’ 39Bala ti ba gi' en, vuue en yehe tiihi wala va'am la yiŋa ha ta ku en. 40Nananawa, Va'am daana la han wa'am na, a wan iŋɛ va'am bihereba wa la beni?” 41Ti ba lerege en yeti, “A wan dikɛ bunyaalehi la putɔpa bana wa, sagum ba, gee ti a dikɛ va'am la tee bo' sɛba n wan bu en a tɔtɛ va'am la dia go'ohego saŋa.”

42 # Yoo 118.22-23 Ti Yezu yele ba yeti, “Yamam ka tabelɛ kãalɛ gɔŋɔ la puan n yeti,

‘Tɔŋɔ seko ti mɛteba la zagehɛ la,

tɔŋɔ kuŋɔ n ni ta dɛna ɛ̃berɛ de mɛŋa tɔŋɔ la.

Daana la n tuun-dina wa bala,

ti tu biha ti la dɛna pakerɛ paaɛ paaɛ.’

43Bala zuo, n yeti ya mɛ wa, ti ba wan ta to'e Yinɛ sɔ'ɔlum ya nu'uhen tee dikɛ bo' nɛresɛba n wan wuna sɔ'ɔlum la wala. 44[Se'em woo n lu kugere wa zuo wan kɔ zɔra zɔra. Gee kugere wa me n lu se'em woo zuo, de wan mɛregɛ a daana mɛrehɛ mɛrehɛ.”]#21.44 Diimen diimen gulehɛgɔ la tuseto ka tari ka'lam.

45Malema kiinduma, la Farasiiduma la n wum makerɛ wa la, ba baŋɛ ti a yeti la bamam. 46Ti ba bɔta ba nyɔkɛ en gee ba zoti la nɛrekuuŋɔ la dabeem, Se'ere en sɔi la, nɛrekuuŋɔ la bihɛ ti Yezu dela nɔtɔgeha.

Terpilih Sekarang Ini:

Matu 21: GBTP

Highlight

Kongsi

Salin