ይዃንስት ወንጌል 4
4
ፈወነ 4
እየሱስስመ ሳምራንወ እውነስ
1እንዝ ግረ ፈሪሳንድ፦ «እየሱስ ይዃንስትሽ ንቕፀቍ እቅ ክንደጥ ፃቨኵ፤ ጣምቀኵም» የነው ጂጘ ወሽ። 2ዊገድ ግን ጣምቀውድ እየሱስ ኣዪጝቀ ጝክንደጥድ ዊን። 3ኣደረም እኒንት ኣርቐጘ፣ ይዅዳ ኻግርድየንት በር ገሊለ ትጐ ዋጥር ፊሩ። 4ፊራንድም ሰማርየቱ ፃቭ ዲቍጠ ግድ ኣቑ።
5እንዝ ማጥን ያይቈቭ ጝዅር ዮሴፍስ ይወው ስፍረይዝ ጋቢል ዊንደይ ሲካር ይሽትረይ ሰማርየት ኻትመትል ተሩ።#ዘፍ. 33፡19፤ እያ. 24፡32። 6ጝግልም ያይቈቭቱ ኣቘ ቢ ዊኑ፤ እየሱስም ጒደነ ፃጘነውዝ ዝላቕ ዊናንስቅ፣ ኣቘ ቢⶔዝ ጋቢል ጐዩ፤ ሰትድም ዋልጠ ሳ ኣጠ ኣቕ ዊኑ።
7ኣይንድ ላይ ሳምራንወ እውነ ኣቝ ቐዳተ ጘጝ ቢⶔዝጐ ተርች፤ እየሱስም ጝርት፦ «ኣለቀይ ኣቝ ነቅ» ዩ። 8ጝክንደጥድም ሚ ጅቭጥጘ ኻትመይል ፊርጝ ዊን። 9እውነየንም፦ «ክት ኣይዅዳነው እጅር የጝ፤ እደስለ ያን ሳምርናወ እጅርቲስ ኣወይር የጝ፦ ‹ኣቝ ነቅ› ይረውድ?» ይች፤ እንት ይረውድም ኣይዅዳንድ ሳምራኒጅቅ ኽቭርዳቍ ዊንጛንስቅ የጝ።#እዝ. 4፡1-5፤ ንኽ. 4፡12። 10እየሱስም፦ «እደረት ይውቲዝመ ክት፦ ‹ኣቝ ነቅ› የውድ ኣው ኣቐጘ ኣርቕራን፣ ክት ጝት ጨውተ ዊንዱ፤ ጘጝም ርዅየዝቍ ኣቝ ነይጠ ዊኑ» ዩ። 11እውነየንም፦ «ኣደረወ! ቐዳቐነ እጅረርም፤ ቢድም እክል የጝ፤ እደስለ ርዅየዝቍ ኣቝ ኣዊስ ችጝተ የጝ? 12እኒን ቢድ ነየው ይናኣይር ያይቈቭቲስመ ክት ዲቍረራ? ጝስመ ጝቝርስ፣ ጝጊንዝቫኒዝም እኒን ቢስ ዝይጝኵ» ይች። 13እየሱስም፦ «እንዛይ ኣቚስ ዝየውድቅ ሊጘት ዝቛንድጡ። 14ያን ይወቍ ኣቚስ ዝየው እጅር ግን ዘላልም ዝቛንዳውም፤ ያን ጝጭስ ይወቍ ኣቝድዛይ ጝኣቒል ዘላልምዙ ርዅየ ፍልፍልዘው ኣቘ ምኝጭ ኣጥቍ» ዩ። 15እውነየንም፦ «ኣደረወ! ነስየይስቅ ዝቛንጣይቀጘ፣ እኒን ምኝጪልም ኣቝ ቐዳጨ ዋጥርጥራይቀጘ ኣለቀይ ጛይ ኣቝድ ነቅ!» ይች።
16ጘጝም፦ «ፊጥ ክጕርየት ጭጝር ለው» ዩ። 17ጚይም፦ «ግልወ እጀርም» ይች፤ እየሱስም፦ « ‹ግልወ እጀርም› ይረውድ እማን የጝ። 18እርግጥ ኣኰ ግልቍ ፃይር ዊንዱ፤ ነን ክጅቅ ፅበውድም ክጕርየም ኣየው፤ ኣቓንስቅም እማን ዊግትርኵሩ» ዩ። 19ጚይም፦ «ኣደረወ! ክት ነቭይ ኣረጘ ቓለኵን። 20ይናኣቅልድ እኒን ኣበይል ስግድ፤ ክትን ኣይዅዳንድ ግን፦ ‹እጅር ሲግድጠ ጥውሸውድ እየሩሳልየም የጝ› ይርነኵ» ይች። 21እየሱስም፦ «እውነ ክተ! እኒን ኣበይልም ኣነ እየሩሳልየም ኣቕርን ኣይርስ ሲግዳይርነው ግርየ ተርጠጘ ይት ኣምን። 22ክትን ሳምራንድ ኣርቓይርነው ኣምላኪዝ ሲግድርነኵ፤ ይን ኣይዅዳንድ ግን ቓድት ተረውድ ኣይዅዳኒስ ኣቓንስቅ ኣርቕነው ኣምላኪዝ ሲግድነኵን። 23ዊገድ ግን እማንዝ ሲግደቍድቅ ኣይርስ መንፈስዝመ እማንዝ ሲግድጘው ግርየ ተርጡ፤ እንም ነን ኣቕኩ፤ ኣይርም በነውድ እነይጝ እማንዝ ሲግደቍድዛት የጝ። 24እደረ መንፈስ የጝ፤ ጝጭስ ሲግደቍድም መንፈስዝመ እማንዝ ሲግድጥጘ ጥውሸኵ» ዩ። 25እውነየንም፦ «ክርስቶስ የነው መሲኽ ጠርጠጘ ኣርቐኵን፤ ጘጝ ተራንድ እጝቅትቅ ድቍጡ» ይች። 26እየሱስም፦ «ጘጝ መሲኽድ ያን ነን ክጅቅ ዊግጠርድ የጝ» የው ድቁ።
27ኣይንድ ጝክንደጥድ ፊርጘዊስ ዋጥር፤ ጘጝም እውነ ጅቅ ዊግታንስቅ ዲንቅሽ፤ ኣነጚ፦ «ወረጘ በንሩ?» ዊንም፦ «ውርቃጥ የጝ ጝርጅቅ ዊግትረውድ?» የው ዋቕረው ኣውማውም ዊኒየው። 28እውነየንም ጝርጭንድ ማልድር ኻትመይል ዋጥርድር ፊትር ኽዝቪዝ፦ 29«ያን ሰራጨው ገቨድየንትቅ ዊግተው እጅርድየንት ላቝጥን ቓልጥን! ምናልቫች ጘጝ ክርስቶስመ ኣጡ ኣጢ?» ይች። 30ኽዝቭድም ኻትመይስ ፍ ጘጝ ፅበዊል ፊሩ።
31ኣይንድ ጝክንደጥድ፦ «ክንሰተወ! ኣረ ጣምጚ» ይ። 32ጘጝ ግን፦ «ክትን ኣርቓይርነው ያን ዀው ዅረ ፃቅኩን» ዩ። 33ጝክንደጥድም ጛስ ጛይ፦ «እጅርመ ዀነው ጝጭስ ነስ ዊኑ ኣጢ?» ይሽተይሽት። 34እየሱስም እንት ዩ፦ «ይዅረድ ይት እፃቐዊዙ ፍቃድድ ፃቨነው፣ ጝሰቭድም ፋፅመነው የጝ። 35ክትን፦ ‹ሲዘ ርፍዝ ግረ ማፅወ ኣቐኵ› ይርነኵ ኣየውቀ? ያን ግን፦ ‹እንወ ጭቅ ይርን ኣዝምረድ ችጘጘ ቻፅጝድዛት ቓልጥን› የኵን። 36ኣይረው እጅር ጝወየድ ችጘኵ፤ ዘላልምዙ ርዅየዝ ኣቐው ፍረም ኣኽቨኵ፤ እንዝም ፊዘዊዝመ ኣይረዊዝ ላብጠ ዲስ ይጘኵ። 37ኣቓንስቅም፦ ‹ላውድ ፊዘዅ፤ ላየድ ኣይረኵ› የው ይሽተድ እማን የጝ። 38ያንም ክትን ዝላቒርነውድየንት ኣይርድርናንስ ማጥን እፃቑን፤ ዝላዘው ሰቭድየንት ላጥድ ሰራሽ፤ ክትን ግን ጝታዝላይዙ ፍረድ ኣኽቭርኑ።»
ንቕፀቍ ሳምራን እየሱስት ኣምንጘጘ
39እውነየን፦ «ያን ሰራጨውድየንትቅ ድቁ» ይር ሚዝርድራንስቅ፣ ጚ ኻትመየንቲስ ንቕፀቍ ሳምራን እቅ እየሱስት ኣምን። 40እንዝ ማጥን ሳምራን እቅድ ጝጐ ተርጛንድ ጛጅቅ ሳብጣንስ ማጥን ኪው ሽጝ ጨው፤ ጘጝም ጝግል ሊጘ ግርቅ ሳብጡ። 41ጝቃሊስ ጐውም ላጥ ንቕፀቍ እቅ ጝት ኣምን። 42እውነየንትም፦ «ነስየይስ ይን ጝት ኣምነውድ ክት ይናጭስ ድቍረዊዝ ጭቝም ኣየው፤ ይን ይናቕም ወሽንኵኑን፤ እርግጥ ጘጝ ኣልሚዝ ቐዘተ ኣቐጘ ኣርቕንኵኑን» ይ።
እየሱስ ሽም እጅርዝ ዅር ቓዘጘ
43እየሱስም ሰማርየ ሊጘ ግርቅ ዊነት ግረ ገሊለ ትጐ ፊሩ። 44ነቭይ በገዘ ጝኻግሪስ ኪብራው ኣቐጘ ጝቕም ዊግት ዊኑ።#ማቲ. 13፡57፤ ማር. 6፡4፤ ሉቃ. 4፡24። 45ዊገድ ግን ጝግል ችጛንድ ገሊለት እቅድ ዲስተዝ ለምር፤ ምላሰንድም ጛይ ፈዝየ በሊዝ እየሩሳልየም ዊንጛንስቅ ጘጝ ጝጊስ ፃቨውድየንትቅ ጝታቕም ቓልጝ ዊን።#ይዃ. 2፡23።
46እየሱስም ኣቝድ ወይንዙ ሚዝ ፃቨው ገሊለት ኣውራጀይዝወ ቃነ ኻትመየንትጐ ሊጘት ፊሩ፤ ኣይንድ ቅፍርናዀምስ ጝዅርድ ፅዊተው ላው ሽም እጅር ዊኑ። 47እን እጅርድ እየሱስ ይዅዳ ኻግሪስ ዋጥር ገሊለ ትጐ ተረጘ ወሻንድ፣ ጝጐ ፊር ክርጘል ችጘው ጝዅርድየንት ተር ቓዛንስ ማጥን ጨዉ። 48እየሱስም፦ «ክትን ታምራንዝመ ምልክታንዝ ቓሊርነውዝየ ኣምናይርነቅም» ዩ። 49ሽምድም፦ «ይኣደረወ! ይዅርድ ክሪጝቀ ኣለቀይ ቃዝየዝ ለው» ዩ። 50እየሱስም፦ «ክዅርድ ርዅየዝ እኩ፤ ክጝን ዋጥር» ዩ። እጅርድየንም እየሱስ ዊግተው ቃልድየንት ኣምን ጝጝን ፊሩ።
51ገነ ጒደነይል ፅባም ጝኣገልጋያንድ ችጝጝ፦ «ክዅርድ ቓድኩ» ይጝ ድቍ። 52ሽምድም እፈረድ ዋቐ ሳዝ ቓደጘ ዋቕራንድ፦ «ታትነ ላጝጠ ሳይዝ ጝብረድ ሊቁ» ይ። 53ጘጝም ሰትድ እየሱስ፦ «ክዅርድ ርዅየዝ እኩ» የው ዊግተው ሰትድ ኣቐጘ ኣርቑ፤ ጝስመ ጝበተሰቪዝቅ እየሱስት ኣምን።
54እንም እየሱስ ይዅዳ ኻግሪስ ገሊለ ትጐ ዋጥር ሰራሸው ሊጘትረ ታምርዙ ምልክት የጝ።
Terpilih Sekarang Ini:
ይዃንስት ወንጌል 4: ኽምጣኣኪ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
