Yohanes Kitab ini pe keterangan
Kitab ini pe keterangan
Kabar Bae: Kitab Yohanes ini dapa sebut, Kabar Bae (B. Ind: Injil), karna dia pe carita tentang Tuhan Allah utus pa Yesus Kristus datang di dunia kong sapa saja yang percaya pa Dia, orang itu pe dosa-dosa akan dapa ampun kong dia bole hidup deng Tuhan Allah slama-lamanya.
Orang yang tulis kitab ini: Banya ahli Alkitab bilang, yang tulis kitab ini, Yohanes, biar lagi Yohanes tara langsung bilang dia yang tulis. Yohanes itu satu dari Yesus pe murit, kong dia sebut dia pe diri, ‘murit yang paling Yesus sayang’ (Yoh. 13:23, 19:26, 20:2, 21:2-7, 21:20-24). Yohanes ada sudara yang pe nama Yakobus. Dorang dua Zebedeus pe ana, deng dorang lagi Yesus pe murit. Kong Yesus kase nama pa dorang ‘Boanerges’, yang pe arti, ‘guntur’ (Mrk. 3:17). Waktu Yesus dapa salib, Dia kase percaya Dia pe mama pa Yohanes (Yoh. 19:27). Yohanes ini murit yang pertama percaya, Yesus so hidup ulang (Yoh. 20:8). Dia lagi yang pertama dapa tau, itu Yesus, waktu Yesus hidup ulang kong kase tunju Dia pe diri pa dorang di talaga Tiberias (Yoh. 21:1-7).
Kitab ini untuk sapa: Kitab Yohanes ini ada tulis untuk samua orang, deng dia pe tujuan, supaya dorang percaya Yesus itu Mesias, Raja yang Tuhan Allah janji mo kase slamat pa manusia. Dia itu Anak Allah yang bisa biking manusia bole dapa hidup deng Tuhan Allah slama-lamanya (Yoh. 20:31).
Ajaran-ajaran di kitab ini: Di kitab ini, Yohanes mulai carita tentang Yesus yang dapa sebut, ‘Tuhan Allah pe Firman’. Yesus yang dapa sebut, ‘Tuhan Allah pe Firman’ ini, yang kakamuka so ada sebelum dunia ini ada, kong so jadi manusia, turus tinggal di antara manusia (Yoh. 1:1-18). Yohanes me carita tentang tuju mujizat yang kase bukti, Yesus itu Anak Allah. Mujizat-mujizat itu: Yesus ruba aer jadi anggur (Yoh. 2:1-11), Yesus kase sembu pegawai istana satu pe ana (Yoh. 4:43-54), Yesus kase sembu orang lumpu satu di dekat kolam Bethesda (Yoh. 5:1-18), Yesus kase makang lima ribu orang lebe (Yoh. 6:1-15), Yesus bajalang di atas aer (Yoh. 6:16-21), Yesus kase sembu orang buta (Yoh. 9:1-41), Lazarus mati kong Yesus kase hidup ulang (Yoh. 11:1-44).
Yesus pake banya lambang waktu Dia mangajar orang, macam deng bagini, “Kita ini suda, makanang yang biking orang bole mo dapa hidup deng Tuhan Allah slama-lamanya” (Yoh. 6:35), “Kita ini tarang dunia” (Yoh. 8:12), “Kita ini suda yang bole kase sama deng pintu di kandang domba” (Yoh. 10:7), deng ada yang laeng lagi. Kong di kitab ini lagi ada bilang, Yesus itu so ada lebe kamuka dari Abraham (Yoh. 8:58). Itu kase tunju, Yesus itu Anak Allah yang so ada dari pertama waktu dunia ini bolong ada, kong Dia tetap mo ada sampe slama-lamanya.
Turus di bagian ahir kitab ini, Yohanes carita tentang bagimana pemimpin-pemimpin agama Yahudi cari jalang supaya Yesus dapa bunu. Kong Yohanes carita lagi tentang Yesus dapa tangka, sampe dapa salib kong mati, deng dapa kubur (Yoh. 18–19). Tapi di hari yang ketiga, Yesus hidup ulang kong kase tunju Dia pe diri pa orang-orang yang iko pa Dia (Yoh. 20–21).
Terpilih Sekarang Ini:
Yohanes Kitab ini pe keterangan: PB MMU
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Perjanjian Baru Bahasa Melayu Maluku Utara @ Lembaga Alkitab Indonesia 2020