Wakkagagerak 4
4
Kayin Kaben imbirak eeko nogogwaarak wone
1At aap Aram akwe Kawa imbirak nogo yege logonet, kwe nogo abila age nagagerik, aagaluk manggu wulaga ndareegerak. Ndake nagagerik, “At Aliku ALA nen yeenggwa nege kagak wulaga yi ndaki o,” yinuk, endage Kayin tooneegerak. 2Ti'nuk, kwe Kawa nogo peebi abila age nagagerik, awuluk Kaben aret ndareegerak.
At Kaben nogo ndomba unde wonagagerak, ndi, at oweeluk Kayin nogo yabu eeka wonagagerak. 3Ne ambi paga at Kayin yabu yareegerak nogo anggen mbanogo at Aliku ALA ake pege, 4#Ibr. 11:4 ndi, at Kaben nogo ti, ndomba aa'nduk ndarak warogo punuk amok mban mbanogo Aliku ALA ake pi wage, eeko mbareegwa, at Aliku ALA nen at Kaben inom, ake wogori wagagerak nogo inom, iniki ale'nggen mbake logonet, waganeegerak kwe, 5at Kayin inom, mbi-kom Ala ake pi wagagerak inom, nogo perak, Aliku ALA inikilom lek me wagangga'lek mbo pege mbareegi, at Kayin anini nen etenggen aagi wu eeppunuk wonagagerak.
6Etenggen aagi wu eeppunuk mbareegi, Aliku ALA nen at yoge logonet, “Kat nonggop nduk kanini nen ketenggen aagi wu eeppunuk agandik?” 7Yoge nagagerik, “Kat obeelom aret ee'netak nen kenete paga i'ndok nggi ari keyanetak kwe, obeelom eeriyak mbaka'lek keenok perak, maluk eeriyak kinikime unggwi woraakit nduk, enaakkake logonet, molok kirit nege me, kinikime unggwage kero, mondok liippake logot o,” yoreegerak.
8Ti'nuk, ne ambi paga at Kayin nen awuluk Kaben nogo yoge logonet, “Nimbirak yabume nawok nduk, mok o,” yo'nuk, imbirak yabume nogo nogogwaarik, Kayin nen awuluk Kaben nogo warogo pege mbareegi, kambeegerak.
9Warogo pege nagagerik wonage me, at Aliku ALA nen, “Kayin wae. Kawuluk Kaben ngga nagaarak o?”
Yoge mbareegi, at Kayin nen, “An neenggo'lek o. An nawuluk ti, an nenegen wonok nege me nduk ari agandik ya?”
10Yoge mbareegi, at Aliku ALA nen, “Kat kawuluk nonggop eekendak me, amiya nggween paga nen oone yo'nege agaarik?” 11Yoge nagagerik, “Kat kawuluk wakendak amiya kiluk togon nggween paga wanggerak kenok, pulunogo pakendak me, nggween nogo ambe a aago wonage me, at amiya nen ambe ndoongge kagak abe yarogo nengge logomunggun lek o. 12Yi mendek ndi mendek yaremenggendak kwe, anggen abe ambi yege me mbanogo nengge, kat keebe o ambit me teberogon wonage, eeka'lek we yaluk-ndaluk time aret nege logomunggun o,” yoreegerak.
13Yoge mbareegi, at Kayin nen Aliku ALA yoge, “Yogondak perak, aaninggin nggwok lombok aret noba panegendak me, an nen piyakkoorak ti, meek aret kagi o. 14Ndi, an yime nen kat kenggaawak paga logorak lek, nomba'nuk mugogo wumbanegendak me, neebe o ambi me teberogon wonage lek we yaluk-ndaluk aret nege neenok, aakumi ninom aabuk a'nuk, ugun aret nooko logogun kagi o.”
15Yoge mbareegi, at Aliku ALA nen, “Lek o. Aap ta nen kat kooke keenok, an nen onggo aaninggin ne 7 kuli paga aret oba pigin o,” yoge nagagerik, at Kayin nogo aakumi ugun inom aabuk a'nuk wakwi iyo, ili eerak wonage ineenu ogo logowak nduk, ili agago pereegerak. 16Pege mbareegi, at Kayin nogo Aliku ALA owagam nogome teppunuk, o endage Not o Eren ambo'me oonegen lagi wage menggim pa'nggwe time ari nanuk, wonagagerak.
Kayin apurilogwe wiganak wone
17At Kayin akwe imbirak nogo yege logonet, abila age nagagerik, aagaluk wulaga endage Kenok aret ndareegerak. At Kayin o nogome logonet, tini nggwok ambi nagake nagagerik, o ambik aret wurogo punuk, o nogo aput endage ndak-ndak aret tooneegerak. 18Ndi, at Kenok nen aput Irat ndake, at Irat nen aput Mekuyayen ndake, at Mekuyayen nen aput Metutayen ndake, at Metutayen nen aput Lamek ndake, eereegwaarak.
19Ndi, at Lamek nogo nen perak, akuwi mbere inendage Ara Tila imbirak wogonabeegerak. 20Wogonake nagagerik, kwe Ara nogo aagaluk Yaban ndareegerak. Ndi, at Yaban apuri wiganak nogo ooliya wuppunuk logonet, kambin-ndomba ndegeninabit nogo nogogwaarak. 21Ndi, at nogo awuluk endage Yuban. It aap nggitat inom, nggawiwak inom, eeko nogogwaarak nogo, abok aret wiganak inombo ti, Yuban aret. 22Ndi, at kwe ore Tila nen perak, aagaluk Tuban-Kayin ndareegerak me, at apuri wiganak nogo mbuti inom, tembaga inom, yi mendek ndi mendek apit aret ogobakkigiko menggaarak mendek ogogwaarak. Ndi, ti'nuk, Tuban-Kayin awuluk kolaga endage Naama ndareegerak.
23At aap Lamek nogo nen akuwi yorage logonet,
“Kumi Ara Tila yi wae.
Kit kimbirak kinaruk logonip o.
Kit an nakuwi aret me, noone liippogo logonip o.”
“Aap ambi nen an namiya wunogo nooke,
Wulaga tawe ambi nen
An nooke mbareegi, nagabolo piike,
Eereegerak paga
Onggo wareegirak me,
24At Kayin wakwi iinok,
Onggo 7 kuli inoba pigin o,
Yereegerak kwe,
An nookwi iinok perak,
Onggo aaninggin 77 kuli inoba pigin o,”
yinuk, yoragagerak.
Tet Enok imbirak eereegwaarak wone
25Ndi, peebi Aram akwe Kawa imbirak nogo yege nagagerik, kwe Kawa nogo aagaluk wulaga ambi ndareegerak. Ndake nagagerik, at kwe Kawa nen ari logonet, “An naagaluk Kaben oweeluk Kayin nen wareegerak nogo obaane'me nogoba Ala nen wulaga yi wo'negerak me, endage Tet aret o,” yinuk, tooneegerak. 26Ti'nuk, peebi at Tet nogo aput wulaga ambi ndake nagagerik, endage Enot aret tooneegerak. Ne ti eyom paga it aakumi nen at Aliku ALA endage kunogo tamban eeko logonet, alut eeko nogogwaarak.
Terpilih Sekarang Ini:
Wakkagagerak 4: LAIDNW
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk