Kîam 16
16
Hagari na Ishumaeli
1Sarai mûka wa Aburamu ndaamûciarîrîte ciana. Nwatî Sarai aarî na ndungata yake ya mwîrîtu yetagwa Hagari kuuma Misiri. 2Sarai nîwerire Aburamu atîrî, “Rîu nîûrona atî Ngai-Mûnene nîamvingîte nda ndikagîe na ciana. Nîkwa ûtangîmama na ndungata îno yakwa ya mwîrîtu, na yavota kûnjiarîra ciana?” Aburamu nîwetîkîrire ûrîa eerirwe nî Sarai. 3Kwoguo Sarai nîwanengere Aburamu ndungata îo yake Hagari kuuma Misiri, nîguo îtuîke mûka. Ûndû ûyû wekîkire vuva wa mîaka îkûmi kuuma Aburamu aatûûra Kanaani. 4Nake Aburamu nîwamenyanire kîîmwîrî na Hagari, na Hagari akîgîa îvu. Na rîrîa Hagari aamenyire atî aarî na îvu, nîwetîire na akînyarara Sarai.
5Sarai nîwerire Aburamu atîrî, “We nîwe ûratûma Hagari anyarare. Nînie nakûveere Hagari, na kuuma rîrîa aamenyire atî arî na îvu, nîwambirire. Ngai-Mûnene nîke ûgaatua ciira îno gatagatîrî gakwa nawe!”
6Nwatî Aburamu nîwerire Sarai atîrî, “Îî nwatî ke nî ndungata yaku, îka wa ûrîa ûkwenda nayo.” Sarai nîwacokire akîvinyîrîria Hagari mûno atakûmwîguîra ntha nginya agîtoroka.
7Mûraika wa Ngai-Mûnene nîwacemanirie na Hagari arî vandû rûtererî rwa kîthima werûrî. Kîthima kîu Kîamrî vakuvî na njîra ya kûthiî Shuri. 8Mûraika nîwamûûririe atîrî, “Hagari ndungata ya Sarai, umîte kû, na ûthiîte kû?”
Nake Hagari nîwamûcokerie atîrî, “Nîkwa ndorokete kuuma kûrî Sarai mwathi wakwa”.
9Nake mûraika wa Ngai-Mûnene nîwerire Hagari atîrî, “Coka kûrî ke na ûmwathîkagîre.” 10Nîwacokire akîra Hagari atîrî, “Nîngaatûma njiarwa ciaku ciîngîve ûndû itangîtarîka. 11We nîûkaagîa na kaana ga kavîcî, na ûgatuîre rîîtwa Ishumaeli, nîûndû Ngai-Mûnene nîamenyete mathîna maku. 12Mûvîcîguo agaatuîka ta mvunda mbaganu, arûaga na andû onthe, na andû onthe magaatûûra marûaga nake. Nîagaatûûra kûraca na andû ao.”
13Hagari nîweyûririe atîrî, “Nîkwa monete Ngai na ngatûûra mwoyo?” Kwoguo Hagari nîwetire Ngai-Mûnene ûcio wamwarîrie, “Ngai ûrîa wonaga.” 14Kîu nîkîo gîtûmaga andû mete kîthima kîu kîrî gatagatî ga Kadeshi na Beredi “Kîthima Kîam Ûrîa Ûrî mwoyo na ûmonaga.”
15 #
Agal 4.22
Hagari nîwaciarîre Aburamu mwana wa kavîcî nake Aburamu agîgatuîra rîîtwa Ishumaeli. 16Aburamu aarî na ûkûrû wa mîaka mîrongo înana na îtandatû vîndî îrîa Hagari aamûciarîre Ishumaeli.
Terpilih Sekarang Ini:
Kîam 16: KKB
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©Bible Society of Kenya, 2019