Marko 4
4
Ikifwanikisyo kya nsopambeyu
(Mat. 13,1-9; Luk. 8,4-8)
1Popapo alinkwanda kangi ukumanyisya pambali panyanja. Ikilundilo ikikulumba fiyo kilinkubungana nukunsyungutila, bunobuno alinkwingila nukutugasya mwiboti panyanja; loli ikilundilo kyosa kilinkuya pisilya pambali panyanja.
2Alinkubamanyisya si nyingi itolo mfifwanikisyo, alinkubabula
3ndumanyisyo lwake alinkuti: Amupilikisyege! Keta, lumo
4unsopambeyu alinkusoka ukubuka kukusopa imbeyu. Lelo bo ikusopa yimo yilinkwakugwa munjila; popapo silinkwisa
5injuni, silinkusala silinkumala. Iyingi yilinkwakugwa pakisu kya mabwe apa gukalipo umfu mwingi, yilinkusita nukuhaba
6ukumela papo umfu gukali mwingi; loli bo ilisuba lifyukile
7yilinkupya, kangi papo yikali nimisi, po yilinkuma. Yimo iyingi yilinkwakugwa mmifwa, igyene imifwa gilinkukula
8gilinkuyikoma, popapo yilinkusita nukupa iseke. Iyingi loli yilinkwakugwa pakisu ikinunu, bo yimelile yikulile yilinkupa iseke, yimo amalongo matatu, yimo amalongo ntandatu, iyingi
9amalongo kalongo. Alinkubabula alinkuti: Uyu linga ali nasyo imbulukutu sya kupilikila, yo alipilikaga.
Mbubombelo ififwanikisyo
(Mat. 13,10-17; Luk. 8,9-10)
10Bo iyekile, popapo aba bali nagwe pamopene na bala kalongo na babili balinkundalusya isya fifwanikisyo fila.
11Umwene alinkubabula alinkuti: Umwe mupegigwe ukusimanya isya mbutitu isya butwa bwa Kyala, loli kuli aba bali
12panja, syosa itolo sikubisilaga mfifwanikisyo, ukuti,
Ukuketa ko bikuketaga, loli batikusibonaga,
Ukupilika ko bikupilika, loli batikusyagania;
Ukuti bangapindukaga nukuswegigwa.
Yesu ikulingania ikifwanikisyo kya nsopambeyu
(Mat. 13,18-23; Luk. 8,11-15)
13Kangi alinkubabula alinkuti: Mukakimanya ikifwanikisyo iki? Po mwisakufyaganiaga bulebule ififwanikisyo fyosa?
14-15Unsopi ikusopa ilisyu. Aba panjila, bo aba linga ilisyu lisopigwe balipilike, popapo nakalinga Setano ikwisa nukulyega
16ilisyu ili lisopigwe mmyabo. Bunubuno itolo naba basopigwe pakisu kya mabwe, bo aba linga bikupilika ilisyu, nakalinga
17bikulyambilila nulusekelo; loli papo bakaya nimisi mmyabo, po bikuyapo akabalilo kanandi itolo. Panyuma, bo bagile ubutolwe pamo ubufwimigwa bwisile panongwa ya isyu, po
18papo batikuhaba ukugwa. Kangi abangi aba basopigwe
19mmifwa, bo aba balipilike ilisyu, loli ukwikolania nisya nkisu, nubusyobi bwa kyuma, kangi nifinyonyo fya tundu utungi bo
20fingile, fikulipita ilisyu, po litikupa iseke. Loli bala basopigwe pakisu ikinunu, bo aba bikupilika ilisyu nukulyambilila, po lelo bikwenda nukupa iseke; yumo amalongo matatu, yumo amalongo ntandatu, uyungi amalongo kalongo.
Isya kumanyikisya munyale na mumbeyu
(Mat. 13,31-35; Luk. 8,16-18; 13,18-19)
21Popapo alinkubabula alinkuti: Kali aliko yumo uyu ikutwala inyale nukuyibika kusi kukitundu, pamo kusi kuki-
22tala? Bule atikuyibika pamwanya pakikolelanyale? Papo kakayako nakamo akandu aka kibilile aka katisakutupuka,
23kangi nakamo aka kubutitu aka katisakuya pabwelu. Linga yumo ali nasyo imbulukutu sya kupilikila, yo alipilikaga.
24Kangi alinkubabula alinkuti: Mwandege kuli isi mukusipilika. Ikigelelo kikyo mukubagelela umwe abangi, kyo mwisakugeleligwaga kikyo na yuyumwe, kangi mwisakongeleligwangapo
25pamwanya umwe. Namanga uyu ali nako isakupegigwaga, loli uyu akaya nako, yo isakupokigwaga nakako ali nako.
26Kangi alinkubabula alinkuti: Ubutwa bwa Kyala buli bo
27umundu uyu ikusopa imbeyu mungunda, popapo umwene ikugona nukusumuka pakilo na pamusi, iyene imbeyu yikumela nukukula, umwene atikumanya ukuti yikumela bulebule.
28Ikisu kikupa iseke kyene, lukwanda ulusegube, kikukonga
29ikisasa, kunyuma sikuyamo iseke nisasa. Lelo bo iseke sikomile, nakalinga ikutuma isengo, papo untondolo gwisile.
(Mat. 13,31-32; Luk. 13,18-19)
30Kangi alinkubabula alinkuti: Tubufwanikisye bulebule
31ubutwa bwa Kyala, pamo tububike nkifwani kiki? Buli bo akaseke ka mutaka, aka linga kasopigwe mungunda, kanini
32ukukinda utuseke tosa twa nkisu, loli bo kasopigwe, kikumela nukukula ukugakinda amaseke gosa, kikupasika isamba ingulumba, bunobuno ninjuni sya kumwanya sibagile ukutenga ififumbwa nkipepo kyake.
33Mfifwanikisyo fi fingi bo fififi, alinkubabulilamo ilisyu, bo
34mumo babagile ukulipilikila; pabusita kifwanikisyo akayobaga nabo, loli alinkubalingania abafundigwa bake syosa bo biyekile.
Yesu ikugukemela umbelo
(Mat. 8,23-27; Luk. 8,22-25)
35Musi gugo namayolo alinkubabula alinkuti: Atwambukege
36isilya lila. Balinkukileka ikilundilo, balinkumwegela mwiboti bo mumo ayilile; gope namaboti agangi galinkuya pamopene
37nagwe. Popapo gulinkwinuka umbelo unkulumba fiyo, amayiga galinkonekela mwiboti, bunobuno iliboti lilinkwanda
38ukwisula amisi. Umwene ali kumbingo, ko agonile utulo pakinulilo kya kuntu. Popapo balinkundembusya balinkumbula balinkuti: Mmanyisi, utikutupakisya ukuti tukwibila?
39Bo alembwike, alinkugukemela umbelo, alinkuyoba kunyanja alinkuti: Batama! uye mye. Popapo umbelo gulinkubota,
40kulinkuya yonjolo itolo. Alinkuyoba nabo alinkuti: Bo boga
41buki umwe? Mukali mukaya nulwitiko na ulu? Popapo lulinkubaga ulutende ulukulumba, balinkulalusania balinkuti: Ywani lelo yuyuyu? Uyu na gu mbelo ninyanja fikumpilika?
Terpilih Sekarang Ini:
Marko 4: NYY
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Nyakyusa Ngonde New Testament (Ulwitikano Ulupya) © United Bible Societies, 1966.
