Matio 6
6
Ke ici witcihakaniwitcik ka kitimakisitcik
1“Aiekwamisikwe e miro totamekw! Aka itotiskekw wiec e ici mitcetinaniwok, kitci ki tca wapamikoiekw. Kecpin tca itotiskeiekwe, nama ki ka cawerimikowaw Kotawiwaw wakwek ka taciketc.”
2“E cawerimatc kekociciriw awik ka kitimakisitc, aka tota kaskina awik kitci kiskeritak, kotc e totakik ko ka miro iriniwikasotcik aiamihe mikiwamik kirika meskanak, tepirak kitci mirwatcimakaniwitcik. Tapwe ohwe ka witamatakok: aci ickwa pe otitikowok ka ki ici kackitamatisotcik. 3Kir aric e cawerimatc ka kitimakisitc kekociciriw, kinihiwini kitcitci e totaman, nama awik ki ka witamawaw, aka wawatc kitci kiskeritcikatek kinamatciwini kitcitcik itekera ki ka itotiskan, 4mia e katain. Ki ka tca cawerimikw Kice Manito, Kotawi, anahwe kaskina ka wapatak ka itotiskaniwonik e katakaniwonik.”
Kiskinohamakewin e aiamihaniwok
(Natawapata kaie Luc 11.2-4)
5“E aiamihaiekw, pitoc ki ka totenawaw kirika iriniwok ka miro iriniwikasotcik. Micta ko mireritamok e wapamakaniwitcik e aiamihatcik, aiamihe mikiwamik e icikapowitcik kirika neta meskanak kotc e aiticimonik, e pa pimotetcik e wi kicterimikositcik. Tapwe ohwe ka witamatakok: aci ickwa pe otitikowok aniheriw ka ki ici kackitamatisotcik. 6Kir aric, apitc wa nta aiamihain, ki ka ican kitaricapimik. Ki ka kipahen ickwatem, kitci nta pakoserimatc Kotawi e taciketc neta, neta aka e ici wapamikoin. Ki ka tca mirikw aniheriw ka ki ici kackitamatisoin, anahwe ka wapatak kaskina ka aitotiskein kimotc aka kitci wapamikoin.”
7“Mekwata e aiamihaiekw, aka micta kinowec aiarimwekw, mia e itotisketcik iriniwok aka ka kiskerimatcik Kice Manitowa. Iteritamotakenak kirawe kitci natotakotcik kecpin kinowec e aiamihatcik. 8Aka keskinowapamakok. Nikan kiskeritam meka Kice Manito Kotawiwaw wa ici nataweritamekw epwamoci nataweritamawekw. 9Ekoni tca ke ici aiamihaiekw:
‘Notawinan, wakwek ka tacikein,
ni nataweritenan kitci kicteritcikatek kiticinikasowin,
10kitci otcitciparik kokimawin,
kaie e iteritaman kitci totcikatek ota askik tapickotc wakwek.
11Miricinan anotc ke mitciak.#6.11 anotc ke mitciak: Mia itemakan: tcipaw, pakwecikan.
12Kaie kasihamawicinan e matci totamak,
tapickotc e ici ponerimakitcik aniki ka matci totawimitcik.
13Kaie akawir pakitinicinan kitci kokwetcihikoiak kitci pactatiak,
kirika witcihicinan aka kitci cakotcihimitc Matci Manito.
[Kir meka ka ici tataman okimawin, mackawisiwin, acitc icperitakosiwin, kakike nespitc. Kekora ki iki.]’”#6.13 Nama takon ohwe ka masinatek mitcet weckatc masinahikanik.
14“Kecpin meka ponerimekwe awik ka ici matci totatakw, Kotawiwaw wakwek ka taciketc kaie wir ki ka kasihamakowaw ka ici matci totamekw. 15Kecpin aric aka poneritamekwe ka ici matci totakoiekw, Kotawiwaw kaie wir nama ki ka kasihamakowaw kipactatowiniwariw.”
E roskosonaniwok
16“E roskosoekw, aka kackeritamikasokw, mia e itotisketcik iriniwok ka miro iriniwikasotcik e atcinakositcik otactamikowak kitci wapamikotcik kaskina awiriw e roskosotcik. Tapwe ohwe ka witamatakok: aci ickwa pe otitikowok aniheriw ka ki ici kackitamatisotcik. 17Kir tca roskosoine, ki ka kisikwehon kirika ki ka pinakwehitison,#6.17 ki ka pinakwehitison: Mia itemakan: pimite ka miromakok ki ka actan kictikwanik. 18aka kitci kiskeritakok e roskosoin. Wircike Kotawi kata kiskeritam, anahwe ka witci tacikemisk neta aka ka ici wapamikoin. Kirika anahwe mocak ka wapatak aniheriw katanok ka aitotiskein, Kotawi, ki ka mirikw aniheriw ka ki ici kackitamatisoin.”
Micikitawin wakwek e ici takok
(Natawapata kaie Luc 12.33-34)
19“Aka mawotcitakw micikitawin ota askik, ota ko ka ici mitcikik kekociciriw mantcocak, matci kaie ka ici akokwapiskak kekocic, kekotc ma kimoti iriniwok ke ki ici cehakik kitickwatemiwariw e kipwaskohamekw kitci tca kimotimitakok. 20Ohwe kirawe mawotcitakw: wakwek kitci ici micikitaiekw, neta aka ka ici tatcik mantcocak, kaie aka ka ici akokwapiskak, kaie aka ka ici tatc kimoti iriniw ke ki cehak kitickwatemiwariw e kipwaskohamekw kitci tca kimotimitakw. 21Neta meka e ici takok kimicikitawin, enko anihe ke kicteritaman kitehik.”
Ka ici miro waskorek kitci ici pimatisiikw
(Natawapata kaie Luc 11.34-36)
22“Kickicikw mia wactenamakan iteritakon kiwiaw otci. Kecpin e mirwacik kickicikw, kaskina kiwiaw miro wactenikatew. 23Kecpin aric e akosapiin, kaskina e itikitiin mia e kiski tipiskak e ici tacikein. Kecpin tca aka e wactek anihe wactenamakan kitehik ka takok, tekaci kata kiski tipiskaw!”
Kice Manito kekotc coria
(Natawapata kaie Luc 16.13)
24“Nama awik kata ki atoskectawew tapickotc nicw okimawa. Peikw kata cikerimew, kotakihi tca kata sakihew. Kekotc peikw kata miro atoskectawew, kotakihi tca kata atimikapowictawew. Nama kaie tapickotc ki ka ki atoskectawawaw Kice Manito kirika tca mekwata coria e atoskectamekw.”
Kitci asperimonaniwok Kice Manito
25“Ki witamatinawaw tca: aka arimeritamokw e mamitoneritamekw ke mitciekw kekotc ke minikweiekw kitci otci pimatisiekw, aka kaie kitci takok ke owikasimiekw. Kirawe meka kicteritakon pimatisiwin patok mitcim, kirika kiwiawiwaw kirawe kicteritakon patok wikasi, taina? 26Kanawapamakok kotc pirecicak. Nama matce kitikewok, nama kaie mawotcitawok mitcimiriw, actasokiwamik kitci ici nahikakik. Kotawiwaw wakwek ka taciketc acamikowok! Nama ia kirawe kirawaw ki kicteritakosinawaw patok pirecicak? 27Awin neta e taciekw ke ki kackitatc kitci rikitatc opimatisiwin irikik e acterik kitci pimatisitc, tepirak e arimeritak e mamitoneritak ke ki isparinik?”
28“Kekwan kaie wetci arimeritamekw e mamitoneritamekw kitci owikasimiekw? Kanawapatamokw wapikonia kotc e ici nitawikiki notcimik. Nama otamiromakano, nama kaie ocitamakano wikasia. 29Ki witamatinawaw tca, misawatc e ki micikitatc okimaw Salomon, nama tca peikon ki otci takoniw wikasiriw kirawe kitci mirwacinik patok peikw e tatiki ohwi wapikonia. 30Ekoni e ici ocitatc kitci mirwacinik wapikoniriw Kice Manito, misawatc tepirak memacic e pimatisimakanik, wapake tca ke motcictewepinikaterik. Kirawe tca kata mantokaso kirawaw kitci wespititakw pwatoki niheriw wapikoniriw e wespitatc! Wesa nama micaw kit asperimowiniwaw!”
31“Aka tca arimeritamokw, kitci iteiekw: ‘Kekwan ke mitciak? Kekwan ke minikweiak? Kekwan ke ki apatcitaiak kitci ki wespisoak?’ 32Enkweriw meka aspinikotc ka nanto kiskeritakik iriniwok aka ka kiskerimatcik Kice Manitowa. Aric Kotawiwaw, wakwek ka taciketc, kiskeritam e wi apatcitaiekw. 33Nictam tca nanto kiskeritamokw Kice Manito Okimawin, kaie icikowisk kitci itatisiekw, kotc e ici nataweritak. Ki ka tca mirikowaw kaskina ke wi ici apatcitaiekw kitci otci pimatisiekw. 34Aka tca arimeritamokw e mamitoneritamekw ke ki isparik wapake. Wapake kata takon kotak ke ki arimeritamihikoekw. Tato kickwa tipi takon arimeritamowin, aka takatc kitci mamitoneritamekw ke ki iciwepak wapake.”#6.34 Wi itemakanotake: Anotc e kicikak tepirak ki ka mamitoneritenawaw e asperimototawekw Kice Manito, mina tca wapake kiapatc ki ka witcihikowaw.
Terpilih Sekarang Ini:
Matio 6: ATMK
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Canadian Bible Society, 2014
