Matius 8
8
Yesus kim sop sang-sang karek nabare zini dawem takake:
(Mrk. 1:40-45; Luk. 5:12-16)
1Yesus kim kwatap tek nakon ati gwe zaka, zini beya tangan nik zep ang nëblazak. 2Zao zep hen sop sang-sang karek nabare zini Yesus onak dep hata zaka, boklesa zep Yesus mo nwenak kom so zaka. Dekon zep abe ta seka, “Bian, Eme dwam gweꞌanam, Em emaka asa dawem taꞌara.”
3Yesus ki zep towanblan naban ding gulbluka, #8:3 Musa mo tïtï tabin olak, sop sang-sang karek zini bëjen ënak gwën, hen but srëm golak bëjen tïn, hen aha zi bëjen desa golek de tan, ahaksa towanblan. Hwëna ayatnak awe Yesus man towanblaka. “Ëe ama dwam gweꞌan. Em dawem gwen.” Dekam zep hëndep sop sang-sangna in kon dawem gweka. 4Zao zep etan gubluka, “Insa emsa dawem tanan, bahem mae ahasa tonbiridan. Diki nonol Alap mo golak de syal tan zi hip ahana kip enaka zertrëbla. Zao gublu, ‘Emki asa hla tan. Ëe san ha mesë dawem gwer?’ Musa Bak mo tïtï tabin olak men kirekam sop sang-sang karek zi de dawem gwennak dep dena lwakke, zen kirekam em syal gwibin.#Im. 14:1-32 Zen dekam sa tïngan emsa anakan tame dal, ‘Zen eiwa mes tangan dawem gweka.’”
Yesus kim Kapernaumk jana nabare zi hon de babu gwen zini dawem takake:
(Luk. 7:1-10; Yoh. 4:43-54)
5Yesus kim Kapernaumk hata onka, ki zep zë Roma mo jana zi mo mamna Zëbon onak dep hata zaka, zao zep Yesussu mas gweblan hap abe ta gweꞌanka. 6Man zë gubluka, “Bian, abon de babu gwe-gwen zini golak sang-sang sabak nik gwëꞌara. Zen ni ensa ta gweꞌara. Luwen maena banakan dep.”
7Yesus ki zep ding gulbluka, “Ëe asa desan dawem tan hap song gwer.”
8Hwëna jana zi mo mamna in ki zep ding gulbluka, “Bahem, Bian. Ëe dawem naka hom, zep ëe ama saher gweꞌan– em de ano golak hatan hapye. Hwëna anakan-en Em gun, ‘Zi sang-sangna in zen dawem gwen,’ dekam sa dawem gwera. 9Sap ëe mesë Emsa taïblïblak, ‘Eno ol-gunnu bëjen kirekam lwa srëm gwen.’ Sap abon onakon de teipsïn zini ki. Ano otdenak dena hen ki. Ëyë ëre mo otdenak denaka gubluꞌanam, ‘Em song gwen,’ zen dekam maka song gweꞌara. Hen ahanakaë gubluꞌanam, ‘Haen,’ zen hen dekam maka song gweꞌan zala. Ëyë ëre hon de babu gwen zisi gubluꞌanam, ‘A desa syal gwibir,’ zen dekam maka hëndep syal gwibiꞌira. Ëe sap teipsïn tola, zep ano ol san kirekam ang ta gwenan. Hwëna Em in teipsïn tanganna, zep eno ol san sa ki kirekam lwal.”
10Yesus man tangan tenggwanblaka– zëbon onakore olsa de kirekam sane gwenkam. Dekam zep zi trana in zen ang nëblan daꞌak desa lero gwibiridaka hen gubiridaka, “Eiwa, zini in man Asa taïblïblaꞌara. Ëe homë mae Israelk kirekam de sërkam Asa taïblïblan zini zertowek. 11In zebë emsa gubiridaꞌan: Yakla hata sezan nakon hen nikin anen nakon, Yahudi srëm zini beya tangan nik sa tagal gwer– Alap mo ïrïk gïn kon gwisibir hanan tembane yawalak de apdekam ëisrip-sri gwen hapye, Abraham, Isak, hen Yakob mae han. 12Hwëna Yahudi zini, zen diki zen tangan– Alap mo ïrïk gïnnïk de sap bïtï gwen hap de wenyaye. Desa hwëna beyakam sa kawesïn sïn dep yal nulin– men dekon zi mo angna yusyustïn nïban gona ta gwenanke, hen sang-sang hap ëkna ngalk-ngalk da gwibirinke.”
13Hwëna Yesus ki zep etan jana zi mo mamna insa gubluka, “Angkam sap esa song gwera. In kirekam ena Asa taïblïblala, in zep sa ki kirekam lwal.” Zëre hon de babu gwe-gwen zini in hëndep dekam zep ki dawem gweka.
Yesus kim zi beyam-byana dawem tabirkike:
(Mrk. 1:29-34; Luk. 4:38-41)
14Yesus ki zep Petrus mo gol san song gweka. Zëwe zep Petrus mo we marena hlauꞌun zaka. Ewen naban nisi taꞌak. 15Zao zep wenya insa tahanak towanbir ineka. Ewenna in kon dekam zep hëndep sër gwek. Dekam zep hëndep luwek, hen dekam zep tembanekam mas gweblak.
16Yaklana kim dum gwe heka, dekam zep zini dowal de tïlbiridan zi sang-sang beyam-bya naban Yesus onak dep nolëyaïng gwezak. Yesus ol-gun enkam zep dowal-dowala insa golëalsa sone gweꞌanka, hen tïngare zi sang-sang beyana insa dawem ta gwibiꞌinka. 17In kim kirekam syal gwibirki, dekam zep zauk– zëre hap dena mensa Alap mo ol ayang gul gwen zini Yesaya Bak orep ayang gulzimkiye,
“Zen sa nëno mae mo karek-karekna hen sang-sangna mensa nihin makan wei kulsuk gwenan tonzim iri.”#Yes. 53:4
Mae hap de ol: Yesussu de ang gwe-gweblanna, zen dam-dam naka hom.
(Luk. 9:57-62)
18Yesus kim zi beyam-byana insa anakan hlauludaka, “Zen mes Asa dot dasïnïn,” dekam zep zëre hon de ang ta gwen wenyaka gubiridaka, “Nen ho gutuna an mo men eihya san tablan gwe kïnïn.”
19Hwëna ki zep zë Musa mo olsa de tawa ta gwibin zini Yesus hon dep hata zaka. Zao zep gublu zaka, “Bian Guru, men desane ki të gweꞌanka, ëe asa Emsa ang gweblanda gwer.”
20Ki zep hwëna ding gulbluka, “Gwenya witir zem ki. Hen mawana zol zem ki. Hwëna ngatan zi mo lang nakore Zi Tanganna ano ni ta gwen gola hom.” #8:20 Yesus kim okamanak gwë gweka, Zen man Zënaka “Anak Manusia”kam gu gweblaka. Hwëna walaskam de enlalana zëwe hom. Ibrani olkam zëno enlalana “zi tangan.” Yesus mae hap kirekam Zënaka bose taka: Sap Zen man enlala gweka– mensa Daniel Bak zëbe hap dena hamal hap Dan. 7:13-14nak ale gulkuke. Sap Daniel man nwe nik de lirisin nëblankam “zi tangan” makan Yesussu ngatan zi mo langnak hla ta seka– Alap kim Desa Zen de kïtak teipsibiridan hap gublukake.
21Zi beyana in zen dekam ang nëblanda gweꞌak, etan ahanik zep hwëna gubluka, “Bian, ëe asa lamkam Emsa ang gweblanda gwer, hwëna nonol ë san anik lwahak. Ëre mo bian de tïn hyanak asa Ebon dep hatazal.”
22Hwëna Yesus ki zep ding gulbluka, “Em angkam emki hëndep Asa ang gweblan. Eno bian de tïnkïm, dikire tok bose zik lo dasïk.”
Yesus kim ho ngëp naban asese naban jalse gwizimkike:
(Mrk. 4:35-41; Luk. 8:22-25)
23Dekam zep hëndep Yesus zëre hon de ang ta gwen wenya ban bulkum men eihya san dep golësek gweka. 24Mumuk ennak zep hwëna ho gutuna in mam enkam ngëp-ngep gweka, hëndep bulu in dekam sek gweꞌak sop gun hup zep alp gwesïꞌïk. Hwëna Yesus Zëna dekam nama nisi mumukkum taꞌanka. 25Hwëna dekam zep anakare ola ban lï dak, “Bian, nënaka Em ngaya tabin! Nen an em-am angkam juweꞌan!”
26Ki zep ding gulzimki, “Em ba habe ëaïrïꞌan? Em an eiwa home Asa laïblïblaꞌan.” Ki zep hëndep luweka, dekam zep asese naban ho ngëp naban jalse gwizimki. Dekam zep tangan hëndep së nëhek. 27Zëre hon de ang ta gwen wenya in dekam zep tenggwaran naban ëguk, “Eiwa, zini an wehasa hom! Ba hap tangan asese naban ho ngëp naban betek nëblanan!”
Yesus kim dowal-dowal mo bi gwizimdin zi darena dawem sokake:
(Mrk. 5:1-20; Luk. 8:26-39)
28Ho gutu men eihyanak kim golëyaïng gwe naka, Gadara mo langnak, zao zep dowal beyam-bya mo bi gwizimdin zi darena Yesus onak dep apta zaka. Zi darena in zi tok lo tasïk gwibin kaso-hul kaso-hulak ënda gweka. Zen sërkam de jal-jal darena, zep zini desan ëgwahal srëm gwe-gwek. 29Zen dowal beyam-byana in mo hërhen ola ban wet oso zaka, “Alap mo Tane, Em aban mae toton banakan de syal tan hap? Em san ere mo yakla yawalak de zaun srëmnak de asa karek tabin hibe hataꞌara?” 30Zëno mae mo nwe kara gwen san zaho beyam-byana tembane hap kwatap tïnï san ëhakaꞌak. 31Dowal-dowala in ki zep Yesussu aberbe da gweꞌak, “Em de zi darena an kon wet so gwen hap asa gubiridankam, Em wëhë asa zaho trana wakuwe de bïtï gwen hap gubiridaꞌanka?”
32Yesus ki zep gubiridaka, “Em sek gwen.” Dowal-dowala in dekam zep hëndep zi darena in kon wet so gwek, dekam zep hwëna zaho trana iwe bïtï gwek. Zahona in dekam zep hëndep heya-hya gwenkam li san syalk ta tinek, hëndep ho gutunak zep ëkei-king gwek. 33Zahona in zen kara da gwibik, dekam zep ë san dep heya-hya gwek, hen ëaïsïl gwenak– tïngan in zen ki zë owasna lwakke, zahonak hen dowal mo tïlzimdin zi darenak. 34Dekam zep ëna iwe de zini kïtak sek gwek– Yesussu de zertowen hap. Kim zë hla dak, zao zep blikip gwesïblïn naban abe dak– Zen de nabakam zëno mae mo langna in kon song gwen hap.
Terpilih Sekarang Ini:
Matius 8: ury
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2005, Wycliffe Bible Translators, Inc. All rights reserved.
