JENESIS 7
7
Ka jingshlei um
1U Trai u ong ha u Noah, “Khie leit shapoh ka lieng lem bad ka longïing longsem jong me baroh; nga la shem ba dei tang ma me marwei ha ka pyrthei baroh uba leh ïa kaba dei. 2Shim lem bad me hynñiew jur ki mrad ïa kiba la ñiew ba ki long kiba khuid; hynrei tang shi jur pat na ki jait mrad ïa kiba la ñiew ba ki long ki bymkhuid. 3Shim ruh hynñiew jur na ki jait sim baroh. Leh ïa kane ba kawei pa kawei ka jait jong ki mrad bad ki sim yn ri pynim ïa ki khnang ba kin kha roi pat ha ka pyrthei. 4Hynñiew sngi naduh mynta ngan pynhap ïa u slap ha ka khyndew sawphew sngi bad sawphew miet, khnang ban pynduh khoit ïa ki jingthaw ba-im baroh kiba nga la lah thaw.” 5Bad u Noah u leh ïa kita baroh kiba U Trai u la hukum.
6U Noah u la dap hynriewspah snem mynba kata ka jingshlei um ka la wan ha ka pyrthei. 7#Mat. 24:38,39; Luk. 17:27Ma u bad ka tnga jong u, bad ki khun shynrang jong u lem bad ki tnga jong ki, ki la leit rung shapoh ka lieng ban lait na ka jingshlei um. 8U shynrang bad ka kynthei na kawei pa kawei ka jait mrad bad jait sim, la ki long kiba khuid ne ki bymkhuid, 9ki la leit rung shapoh kata ka lieng bad u Noah, kumba U Blei u la hukum. 10Hadien hynñiew sngi, ka jingshlei um ka la wan.
11 #
2 Pet. 3:6
Haba u Noah u la don hynriewspah snem, ha ka sngi kaba khathynñiew jong u bnai uba ar, ki umpohliew kiba kyrsoi na ki um kiba jylliew hapoh khyndew ki bthei kynsan, bad ïa ki khyrdop um jong ka bneng la plie wang, 12bad u slap u hap ha ka khyndew haduh sawphew sngi bad sawphew miet. 13Ha kata hi ka sngi, u Noah bad ka tnga jong u lem bad ki khun shynrang jong ki lai ngut, u Shem, u Ham, bad u Japheth, bad ki tnga jong ki, ki leit rung shapoh kata ka lieng. 14Ryngkat bad ki la rung lang kawei pa kawei ka jait mrad, kito kiba u briew u ri bad kita kiba im ha khlaw, kiba rit bad kiba heh, kawei pa kawei ka jait sim. 15U shynrang bad ka kynthei na kawei pa kawei ka jait jingthaw ba-im ki leit rung shapoh kata ka lieng bad u Noah, kumba U Blei u la hukum. 16Hadien ba u Noah u la rung shapoh, U Trai u khang noh ïa ka jingkhang.
17Ka jingshlei um ka la neh sawphew sngi, bad ka um ka la nang jylliew kat ban pynper ïa kata ka lieng. 18Kata ka um ka la nang kham jylliew, bad kata ka lieng ka la per ha sla um. 19Kata ka um ka la jylliew haduh katta katta kat haduh ba ka la tap lup ïa ki lum kiba jrong tam; 20ka um ka la nang kiew haduh ba ka la kot kumba 7 mitar halor ki kliar jong ki lumbah. 21Baroh ki jingthaw ba-im ha ka khyndew ki la ïap lut — ki sim, ki mrad ki mreng, bad ki briew baroh. 22Baroh kiba ha ka pyrthei kiba ring mynsiem ki la ïap lut. 23U Trai u la pynduh khoit ïa ki jingthaw ba-im baroh kiba don ha ka pyrthei — ki briew, ki mrad ki mreng, bad ki sim. Kiba lait im ki long tang u Noah lem bad kito kiba don lem bad u hapoh kata ka lieng. 24Kata ka um kam shym la sdang ban hiar haduh shispah sanphew sngi.
Terpilih Sekarang Ini:
JENESIS 7: KHACLBSI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Khasi CL Bible
Copyright © Bible Society of India, 2016.
Used by permission. All rights reserved worldwide.