Luuk 4

Alubipo ka chɔ Yesu ŋ keni be asheŋ

(Matiu 4:1-11; Maak 1:12-13)

1Kiyoyu Cheeŋ na ka bɔlɔ Yesu to nɛ e shi Jɔɔdan be lɔr na akpa nɛ Kiyoyu Cheeŋ na shin nɛ e yili ndoŋ n yɔ kiyi to. 2Nɛ alubipo na ya chɔ mo ndoŋ nchɛ adena ŋ keni.

Mbe kechɔŋkeni be jemanɛ na malɛ kikɛ nɛ e daa maa ji shɛŋ, amoso, kumo be kaman akoŋ daŋ pɛ mo nna. 3Ndoŋ nna nɛ alubipo na kaŋɛ mo le: “Nɛ fo baa la Ebɔrɛ Pibinyɛn gbagba nna, fo shin nɛ kejembu ere e ki bodobodo.” 4Nɛ Yesu kaŋɛ mo le: “Abɔrɛsibɛ na bee kaŋɛ fanɛ: ‘A maŋ daga nyiŋgbasa ka wɔtɔ ŋkpal ajibi nawule so.’ ”

5Nɛ alubipo na naŋ shin nɛ b ya dii kakpa jeŋgreŋ ko so n yili nɛ e ŋini Yesu durnya ere to be kuwurjiana kikɛ nyam epul na to nseŋ kaŋɛ mo le: 6“Nɛ fo baŋ gbir m bunyaŋ ma, meeŋ ta durnya ere to be eleŋ nɛ kumo be kemaŋkura be asheŋ kikɛ nyam n sa fo. 7B daŋ ta kumo kikɛ nna m bɔɔ ma enɔ, amoso, meeŋ tiŋ n ta kumo n sa ekama nɛ mee sha.” 8Nɛ Yesu kaŋɛ mo: “Abɔrɛsibɛ na bee kaŋɛ fanɛ: ‘Bunyaŋ Enyɛnpe fo Ebɔrɛ na nseŋ shuŋ mo nawule.’ ”

9Ndoŋ nna nɛ alubipo na naŋ shin nɛ b yɔ Jerusalɛm n ya shin nɛ Yesu yili bɔrɛlambu na be kakpa jeŋgreŋ ko so nseŋ kaŋɛ mo le: “Nɛ fo baa la Ebɔrɛ Pibinyɛn gbagba nna, fo shi nfe n tɔr kasawule, 10ŋkpal manɛ so, abɔrɛsibɛ na bee kaŋɛ: ‘Ebɔrɛ beeŋ shin nɛ mbe emalaika e keni fo so 11nseŋ suse fo to hale nɛ fo sa maŋ doro fo anashibi kejembu so.’ ” 12Nɛ Yesu kaŋɛ mo le: “Abɔrɛsibɛ na bee kaŋɛ: ‘Sa maŋ kaŋ wora Enyɛnpe fo Ebɔrɛ ŋ keni kikɛ.’ ”

13Setani na ka chɔ mo ŋ keni ŋ gben nɛ e yige mo nseŋ yɔ gbrɛ.

Yesu ka fara mbe kushuŋ ashi Galili be asheŋ

(Matiu 4:12-17; Maak 1:14-15)

14Ade be kaman nɛ Kiyoyu Cheeŋ na be eleŋ bɔlɔ mo to nɛ e yɔ Galili be kasawule so. Epul to nɛ mbe keba na be baru sɔ kasawule na so kikɛ. 15E ka ŋini abɔrɛsheŋ bumo be nshɛrbuana na to nɛ ekama chɔrɔ mo ga.

B ka kini Yesu ashi Nazarɛt be asheŋ

(Matiu 13:53-58; Maak 6:1-6)

16Amo be kaman nɛ Yesu bɛta n yɔ Nazarɛt kakpa nɛ e daŋ ki esa na. Kewushiachɛ ka fo nɛ e ya n yɔ ndoŋ be nshɛrbu to n ya yili nɛ e kraŋ abɔrɛsibɛ na. 17Nɛ b ta anebi Aizaaya be kawɔl n sa mo nɛ e bugi kumo be kakpa nɛ k bee kaŋɛ le na ŋ kraŋ:

18“Enyɛnpe be Kiyoyu nɛ e kɔ a sa basa kikɛ na wɔ ma so.

E lara ma nna n nɛfa ma

nɛ m bɔ baru lela na n sa betirpo,

mo e shuŋi ma nɛ n ya bɔ kesɔnyige be baru

n sa bumo nɛ b ki beko be anya

nseŋ bɔ anishi be kebugi be baru n sa betanpo.

E yɛ n sɔ bumo nɛ baa mɛaŋ na n yige.

19E yɛ ŋ kaŋɛ basa kafɛ nɛ Enyɛnpe na beeŋ mɔlga mbe basa.”

20Yesu ka kraŋ n loge nɛ e gberge kawɔl na m buu so nseŋ ta kumo n naŋ sa nshɛrbu na to be echɛtopobi ko nseŋ kilgi n chena nɛ basa kikɛ be anishi yuu mo so. 21Nɛ e fara a malga a sa bumo: “Kakraŋ nɛ men nu naniere bɔla kabre.” 22Mbe asheŋ daŋ bɔlɔ basa na be kenishi ga nɛ mbe kubɔya belbelso na be asheŋ chinchiŋ bumo ga nɛ b bishi abar: “Mannɛ mo e la Josɛf pibi na a?” 23Nɛ e kaŋɛ bumo: “M baa nyi geeŋ men ka beeŋ bɔ ma keŋasa nɛ k bee kaŋɛ: ‘Echɛpo, chɛ fo kumu.’ N nyi menyi alɛ ka beeŋ naŋ kaŋɛ ma: ‘Wora asheŋ nɛ an nu fo ka wora Kapɛɛniam na ashi fo kade gbagba to nfe.’ 24Ama ma e kaŋɛ menyi kashenteŋto na: Anebi maa nya bunyaŋ mo gbagba be kade to kikɛ. 25Men nu nfe, kashenteŋ nna fanɛ anebi Elaija be jemanɛ na bekulpoche damta e daa wɔ Israɛl be efuli so saŋɛ nɛ bɔrɛ daa maŋ ba nfɛ asa nɛ bargato nɛ akoŋ daŋ tɔr efuli ere so kikɛ na. 26Ama Ebɔrɛ daa maŋ shin nɛ Elaija yɔ bumo be ekama kutɔ she ekulpoche ko nɛ e daa wɔ Zarefat nɛ k wɔ Saidɔn be efuli so na nawule kutɔ nɛ Ebɔrɛ daŋ shin nɛ e yɔ. 27Anebi Elaisha malɛ be jemanɛ na bebotipo damta e daa wɔ Israɛl be efuli so, ama Ebɔrɛ daa maŋ shin nɛ e chɛ bumo be ekama she Neeman nɛ e shi Siriya na.” 28Basa nɛ b daa wɔ nshɛrbu na to na ka nu loŋ nɛ b diewu 29ŋ koso ŋ gberge Yesu n lar n yɔ kebee nɛ bumo be kade na daa yil so na be kaboŋ chulgiso nɛ b ya yili ndoŋ n da mo n lɛ kasawule. 30Ama Yesu kilgi m bɔla jimaŋ na to n lar n yɔ ŋ ka bumo.

Kanyɛn nɛ mbuibi lubi tɔr so na be asheŋ

(Maak 1:21-28)

31Ndoŋ nna nɛ Yesu yɔ Kapɛɛniam, Galili be kade ko to, n ya ŋini basa abɔrɛsheŋ kewushiachɛ ko. 32Mbe keŋini na daŋ chinchiŋ basa na ga, ŋkpal manɛ so, mbe mmalga na daa kɔ eleŋ nna amo to. 33Kanyɛn ko daa wɔ nshɛrbu na to a kɔ kiyoyu lubi mo to nseŋ koso m boŋ to m bishi: 34“Hei, Nazarɛt be Yesu manɛ nɛ fee fin anyi kutɔ? Fo ba nna nɛ fo ba mur anyi a? N nyi fo. Fo e la Ebɔrɛ be Esa cheembi na!” 35Nɛ Yesu ponte kiyoyu lubi na so: “Lo to ndoŋ n lar kanyɛn na to!” Ndoŋ nna nɛ kiyoyu lubi na da kanyɛn na n lɛ bumo kikɛ be anishito ndoŋ nseŋ lar mo to n yɔ ŋ ka mo nɛ kayurwushi. 36K daŋ chinchiŋ basa na kikɛ ga nɛ b fara a bishi abar: “Nuso malɛ be keŋini nde? Ŋkpal manɛ so, kanyɛn ere bre kɔ ekpa nɛ eleŋ a ponte ayoyu lubi so fanɛ b lar esa to nɛ baa lar.” 37Nɛ Yesu be asheŋ na n sɔ kasawule na so be kaplɛkama.

Kananɛ Yesu chɛ basa damta be asheŋ

(Matiu 8:14-17; Maak 1:29-34)

38Yesu ka koso n lar nshɛrbu na to nɛ e yɔ Saimɔn pe. Saŋɛ na so nɛ Saimɔn mo shache be eyur bel mo edɛ ga nɛ b kule Yesu fanɛ e chɛ mo to. 39Nɛ e yɔ mo kutɔ n ya yili mbe kumu ase nseŋ kaŋɛ kayurbeldɛ na fanɛ k lar mo to nɛ k yige mo nɛ e koso epul na to n fara a keta bumo kufɔ.

40Epeŋi ka tɔr nɛ basa bar bumo teri lɔpoana nɛ bumo be alɔ be yiri kikɛ Yesu kutɔ nɛ e ta mbe enɔana n deŋi n deŋi bumo be ekama so n chɛ bumo. 41Mbuibi lubiana gba daŋ lar basa damta to m boŋ to ŋ kaŋɛ: “Fo e la Ebɔrɛ Pibinyɛn na.” Ama Yesu daŋ fiɛ bumo so a maŋ shuli nɛ mbuibi lubi na kaŋɛ shɛŋ, ŋkpal manɛ so, b nyi e ka la Kristo na.

Yesu ka malga abɔrɛsheŋ ashi Judiya be asheŋ

(Maak 1:35-39)

42Ŋklade chipurdidi nɛ Yesu koso n lar kowu n yɔ ketamanto chil. Nɛ basa na fara a fin mo. B ka wu mo b daa maŋ naa sha nɛ e yɔ kaplɛkama. 43Nɛ e kaŋɛ bumo: “A daga ŋ ka bɔ Ebɔrɛ be kuwura na to be baru lela na n sa nde ko malɛ gba to ebi, ŋkpal manɛ so, loŋ so nɛ Ebɔrɛ shuŋi ma.” 44Amo be kaman nɛ e ya kaa malga abɔrɛsheŋ na ashi Judiya be kasawule so be nshɛrbuana to.

Terpilih Sekarang Ini:

Luuk 4: GJNb

Highlight

Kongsi

Salin