Luuk 13

Kelar alubi to be asheŋ

1Basa ko daa wɔ ndoŋ jemanɛ na so gbagba nseŋ kaŋɛ Yesu Galiliebi nɛ b daŋ lara esarga nɛ Gomena Pailat mɔ bumo n shin nɛ bumo be ŋklaŋana luri n wea bumo be esargaana to be asheŋ. 2Nɛ Yesu bishi bumo: “Menyee tama fanɛ Galiliebi nɛ b ji loŋ be tɔrɔ na be alubi ka shi a chɔ Galiliebiana kikɛ be alubiana so so nɛ b ji loŋ be tɔrɔ na a? 3Ayai, ma e kaŋɛ menyi na fanɛ nɛ menyi maŋ lar menyi be alubi to, menyi alɛ gba kikɛ beeŋ mur. 4Ŋko menyee tama fanɛ basa kuduaburwa nɛ Sailowam be kejaŋ jeŋgreŋ daŋ tɔr bumo so m mɔ na e daŋ wora n da Ebɔrɛ so ga a chɔ basa nɛ b daa wɔ Jerusalɛm to na kikɛ a? 5Ayai, ma e kaŋɛ menyi na fanɛ nɛ menyi maŋ lar menyi be alubi to, menyi alɛ gba beeŋ mur.”

Kedibi nɛ k maa sɔr na be keŋasa be asheŋ

6Ndoŋ nna nɛ e bɔ keŋasa ere ŋ kaŋɛ: “Kanyɛn ko e daa kɔ figi be kedibi sɔrso ko ashi mbe ndibi sɔrso to be kudɔ to. Kachako nɛ e bee sha kusɔrso kumo so nɛ e chuge nseŋ fin ŋ gben. 7Ndoŋ nna nɛ e kaŋɛ ndibi na be ekenipo: ‘Keni, nfɛ asa nde ŋ ka ba kaa fin kesɔrso kedibi ere so a gben, amoso, ku kumo n lɛ, ŋkpal manɛ so, k bee jija kasawule nna na.’ 8Nɛ kudɔkenipo na kaŋɛ kudɔ na wura: ‘Ebunyampo, shin nɛ k naŋ ji kafɛ koŋwule nɛ n wɔtɔ anabin kumo be kifito nseŋ lɔŋɛ kumo be kifito ase. 9Nɛ fanɛ kafɛ a ba nɛ k sɔr, kumo ere asheŋ beeŋ nyalɛ, ama nɛ k maŋ sɔr bre, kumo ere feeŋ tiŋ ŋ ku kumo n lɛ.’ ”

Yesu ka chɛ kashɛrlɔpowura ko ewushiachɛ be asheŋ

10Kewushiachɛ ko Yesu wɔ nshɛrbu ko to a ŋini nɛ kache ko malɛ daa wɔ ndoŋ a kɔ mbuibi lubi. 11Mbuibi lubi na daŋ nyɔŋ mo nna m murgi nfɛ kuduaburwa nɛ e maa tiŋ a niŋi to kikɛ. 12Yesu ka wu mo nɛ e tre mo ŋ kaŋɛ: “Kache manɛ, fo kulɔ lar fo to.” 13Ndoŋ nna nɛ e ta mbe enɔana n deŋi mo so nɛ e niŋi to epul na to nseŋ di Ebɔrɛ epaŋ. 14Ndoŋ nna nɛ nshɛrbu na to be enimu nya agbo n wora Yesu ŋkpal e ka chɛ kache na kewushiachɛ so nseŋ kaŋɛ basa na le: “Nchɛ nshe a daga fanɛ an baa kɔ a shuŋ, amoso, men baa ba nfe nchɛ nshe na to m ba kaa shin nɛ b baa chɛ menyi be alɔana. Men sa maa ba kewushiachɛ.” 15Nɛ Enyɛnpe kaŋɛ mo: “Kebirkɔnshiwuraana e la menyi! Menyi be emo e maa saŋɛ mbe kena ŋko mbe kurma ashi kumo be kuluu to kewushiachɛ na a yɛr kumo nchu akpa nɛ k ya kaa nuu? 16Nɛ keni kananɛ Setani nyɔŋ kache ere to, Eebraham mo nanabi, nfɛ kuduaburwa kikɛ! Le be esa maŋ daga b ka suge mo ashi Setani be enɔ to kewushiachɛ a?” 17E ka bishi kesheŋ ere na nɛ anishinyɔr pɛ mo doŋana na kikɛ nɛ basa pɔtɛ malɛ be ŋgbene fuli bumo ŋkpal emamachisheŋ kama nɛ e daŋ wora so.

Kakilia be keduuso be keŋasa be asheŋ

(Matiu 13:31-33; Maak 4:30-32)

18Nɛ Yesu naŋ bishi: “Nuso nɛ Ebɔrɛ be kuwura na du ŋko manɛ nɛ meeŋ ta kumo m ber? 19K du fanɛ kakilia be keduusobi nna nɛ esa ta n duu mbe kasawulebi so nɛ k daŋ ŋ ki keeyagboŋ nɛ mbuibi ba kaa tɔ asha a wɔtɔ kumo be ayabiana to.” 20Keŋasa ere be kaman nɛ e naŋ bishi: “Manɛ nɛ meeŋ ta Ebɔrɛ be kuwura m ber? 21K du fanɛ yiisi nna. Eche baŋ ta yiisi n wɔtɔ katishaŋgboŋ nɛ nyifu to ŋ gbiti amo, a bee dii nna le fɔŋgrɔŋ.”

Kabuna kpɛterbi na be asheŋ

(Matiu 7:13-14, 21-23)

22Ade be kaman nɛ Yesu pɛ Jerusalɛm be ekpa m bɔla ndegboŋana nɛ ndewurbiana to a ŋini basa abɔrɛsheŋ a yɔ. 23Ndoŋ nna nɛ esa ko bishi mo: “Enyɛnpe, basa gbrɛbi nawule e naaŋ nya kumɔlga a?” 24Nɛ e kaŋɛ bumo: “Men wora ania ga m bɔla kabunabi na to n luri, ŋkpal manɛ so, basa damta beeŋ wora ania nɛ b luri, ama b maaŋ tiŋ. 25Saŋɛ nɛ kowurnyɛn baŋ koso n ti kabuna na, yili saŋɛ na so nɛ menyi alɛ beeŋ yili kabuna to a ŋmɛa kabuna na a kaŋɛ: ‘Enyɛnpe, bugi anyi.’ Ama e beeŋ kaŋɛ menyi: ‘M maŋ nyi kakpa nɛ menyi shi.’ 26Jemanɛ na so nɛ men fara a kaŋɛ: ‘Anyi nɛ fo e daa ji a nuu, nɛ fo daa ŋini abɔrɛsheŋ anyi be alɔnɛ so.’ 27Nɛ e kaŋɛ menyi: ‘Ma e kaŋɛ menyi na, m maŋ nyi kakpa nɛ men shi, alubiworapoana ere, men shile ma so.’ 28Saŋɛ na so, menyeeŋ wu Eebraham nɛ Aizek nɛ Jeekɔb nɛ anebiana na kikɛ ashi Ebɔrɛ be kuwura na to, ama menyi alɛ maaŋ nya n luri. Ndoŋ nɛ menyeeŋ shu nseŋ we anyi to. 29Basa beeŋ shi epeŋilarkpa nɛ epeŋitɔrkpa nɛ kelarga to be esoso nɛ kelarga to be kaseto na kikɛ to m ba chena Ebɔrɛ be kuwura na to n ji. 30Men keni, bumo nɛ b shir kaman naniere beeŋ ba ki bejuŋkparpo nɛ bumo nɛ b juŋkpar naniere e ba ki bemantopo.”

Kasha nɛ Yesu kɔ a sa Jerusalɛmebi be asheŋ

(Matiu 23:37-39)

31Jemanɛ na so gbagba nɛ Efarisiana ko ba kaŋɛ Yesu le: “Keni, lar nfe n yɔ kakpa ko, ŋkpal manɛ so, Ewura Hɛrɔd bee fin fo kemɔ nna.” 32Nɛ Yesu kaŋɛ bumo: “Men ya kaŋɛ kuntuŋ na le: ‘Keni ma, Yesu, bee ju mbuibi lubi basa to nsaa chɛ alɔana, kabre nɛ echefo nɛ n loge kushuŋ na kachɛ sasopo to.’ 33Ama a daga fanɛ m pɛ ma ekpa kabre nɛ echefo nɛ eklade a yɔ, ŋkpal manɛ so, a maŋ daga anebi kikɛ ka wu kaboŋ pɔtɛ she Jerusalɛm to. 34O Jerusalɛmebi, Jerusalɛmebi, menyi e naa mɔ anebiana nsaa kpa bumo nɛ Ebɔrɛ shuŋi menyi kutɔ na ajembu a mɔ. Ela afanɛ nɛ n wora ania nɛ n chala menyi abar so fanɛ kananɛ koshi bee koli mbe mbia a wɔtɔ mbe atɛ to na, ama men kini. 35To, naniere bre Ebɔrɛ lara mbe enɔ ashi menyi be asheŋ to. Ma alɛ e kaŋɛ menyi na fanɛ yili kabre a yɔ, men maaŋ naŋ wu ma kikɛ, ama jemanɛ nɛ menyeeŋ kaŋɛ le na fo nna:

‘Kagbenefuli e baa wɔ emo nɛ e shi Enyɛnpe be ketre to a ba na.’ ”

Terpilih Sekarang Ini:

Luuk 13: GJNb

Highlight

Kongsi

Salin