Luuk 1
1
1N teri lela Tiɔfiles, fo nyi kananɛ basa 2nɛ bumo gbagba wu asheŋ nɛ a wora anyi to na kikɛ nsaa bɔ kubɔya na ka bɔ amo be kubɔya n sa anyi. Basa damta malɛ teŋ wora ania n sibɛ amo n nase. 3Ebunyampo, ma Luuk gba keni asheŋ na kikɛ to nyam ŋ koya amo nɛnɛ 4nseŋ wu fanɛ a daga fanɛ n sibɛ amo kikɛ kebɛso so n sa fo nɛ fo tiŋ m pin asɔ nɛ b ŋini fo na kikɛ be kashenteŋ chap.
B ka kute Jɔn kabɔrɛbɛrpo be kakurge be asheŋ
5Jemanɛ nɛ Ewura Hɛrɔd daa ji kuwura ashi Judiya be efuli so na, bɔrɛmatapo ko daa wɔtɔ nɛ baa tre mo Zakareya. E daa la Abija be bɔrɛmatapoana be katuŋ na to be eko nna. Mbe eche be ketre e daa la Elizabɛt. Mo alɛ gba daŋ shi bɔrɛmatapoana be kanaŋ to nna, Ɛɛrɔn be kanaŋ to. 6Bumo benyɔ kikɛ daa bɛ Enyɛnpe be mbraana na nɛ mbe asheŋ ŋinisoana na kikɛ so nna nɛnɛ a maa foe ekpa kikɛ nsaa wɔ kebaawɔtɔ cheembi nɛ k bee par Ebɔrɛ to. 7Ama b daa maŋ kɔ mbia, ŋkpal manɛ so, Elizabɛt daa la egbentepo nna, mo alɛ nɛ mo kul Zakareya kikɛ daŋ bel nna.
8Saŋko nɛ bɔrɛmatapoana be daŋkare be kushuŋ na tɔr katuŋ nɛ Zakareya daa wɔ na to ebi so nɛ k ba fanɛ Zakareya e ya kaa shuŋ mbe kushuŋ Ebɔrɛ be anishito ashi bɔrɛlambu na to. 9Bɔrɛmatapoana be daŋkare so nɛ b daŋ bɛ so n to beri nɛ k lara mo fanɛ e luri Enyɛnpe be bɔrɛlambu na to n ya lara sarga. Duwu mo nɛ amo be efɛa bee wora Ebɔrɛ ebel nɛ e chɔɔ bɔrɛsure na so n lara sarga. Ndoŋ nna nɛ e luri bɔrɛlambu na to. 10Jemanɛ nɛ e luri nɛ e chɔɔ duwu na nɛ jimaŋ malɛ wɔ kowu a kule Ebɔrɛ. 11E wɔ ndoŋ nna nɛ Enyɛnpe be malaika ba mo kutɔ epul na to m ba yili bɔrɛsure nɛ e daa chɔɔ duwu kumo so na be jisoso. 12Zakareya ka wu mo nɛ kufu pɛ mo n wul mo to. 13Nɛ malaika na kaŋɛ mo: “Zakareya, sa maa lɔ kufu. Ebɔrɛ nu fo kekule na, amoso, fo eche Elizabɛt beeŋ kurge fo ebinyɛn nɛ men nase mo ketre Jɔn. 14Fo kagbene beeŋ fuli n wora fo ebel ga nɛ kebia na be kakurge na be asheŋ e wora basa damta ebel ga. 15Ŋkpal manɛ so, e beeŋ ba kaa la esagboŋ Enyɛnpe be anishito. Yili jemanɛ nɛ e wɔ mo nio be epun to, Kiyoyu Cheeŋ na e naaŋ bɔlɔ mo to. E ba koso e maaŋ nuu nsa be yiri kikɛ. 16E beeŋ shin nɛ Israɛlebi be bedamta e kilgi m ba Enyɛnpe bumo be Ebɔrɛ kutɔ. 17E beeŋ ba kaa la kenya nɛ e beeŋ juŋkpar Enyɛnpe na a kɔ eleŋ nɛ Kiyoyu Cheeŋ nɛ anebi Elaija daŋ nya na. E beeŋ bar betuto nɛ bibi abar so n shin nɛ amukpakpasowuraana e fara a fɛ basa cheembi be nfɛra. E beeŋ chala basa n sa Enyɛnpe n shin nɛ b bela ase a jo mo.” 18Nɛ Zakareya kaŋɛ malaika na: “Ma nɛ ma eche kikɛ bel, nɛ nuso nɛ meeŋ wora m pin fanɛ k la kashenteŋ nna?” 19Nɛ malaika na kaŋɛ mo: “Ma e la Geebriɛl, emo nɛ e yil Ebɔrɛ kutɔ saŋkama na. Nɛ Ebɔrɛ shuŋi ma nɛ m ba bɔ le be baru n sa fo. 20Ama fo maŋ yirda kubɔya na, kumo alɛ be saŋɛ kaŋ fo, loŋ e naaŋ wora. Ŋkpal fo ka maŋ yirda ma kubɔya ere so, fo maaŋ naŋ tiŋ m malga. Feeŋ ki neemu yili kabre n ya fo kachɛ nɛ ma kamalga ere beeŋ bɔla ekpa.” 21Saŋɛ ere so kikɛ nɛ Zakareya be kechɛr bɔrɛlambu na to na bee chinchiŋ basa nɛ b yil kowu a jo mo na. 22E ka baŋ lar, e maŋ tiŋ m malga bumo kutɔ nɛ b pin fanɛ Ebɔrɛ shin nɛ e wu kusɔ ko bɔrɛlambu na to. Mbe enɔana nɛ e daŋ ta a ŋini asheŋ ŋkpal e ka maŋ tiŋ m malga na so. 23Zakareya be kushuŋ ashi bɔrɛlambu na to be jemanɛ ka ba choŋ nɛ e yɔ epe.
24K maŋ chɛr ko nɛ mbe eche Elizabɛt di kedampo nseŋ ŋana mbe kumu afɔl anu a wɔ laŋ to. 25E yɛ: “Naniere bre Enyɛnpe chɛ ma to ŋ ŋini ma mbe kasha nseŋ lara ma anishinyɔr basa to.”
B ka malga b ka beeŋ kurge Yesu be asheŋ
26Elizabɛt be kedampo be kufɔl shesopo to nɛ Ebɔrɛ shuŋi malaika Geebriɛl Galili be kade ko to nɛ baa tre Nazarɛt. 27Kasuŋgurbia ko nɛ b daŋ yili kumo fanɛ mo nɛ Josɛf, Ewura Deevid be kanaŋ to be esa, daŋ ba kil nna nɛ e daŋ bar kubɔya ko. Kebichebi na be ketre e daa la Mɛɛri. 28Le nɛ malaika na daŋ ba kaŋɛ mo: “Kumulelawura, fo kechɔrɔ nde. Ebɔrɛ yɛ e wɔ fo kutɔ.” 29Malaika na be kamalga daŋ wul Mɛɛri to ga nseŋ chinchiŋ mo nɛ e fara a pin mbe kechɔrɔ na be kifito a gben. 30Nɛ malaika na kaŋɛ mo: “Mɛɛri, sa maa lɔ kufu, ŋkpal manɛ so, Ebɔrɛ bee sha kenɛfa fo nna. 31Feeŋ di kedampo ŋ kurge ebinyɛn n nase mo ketre Yesu. 32E beeŋ ba kaa la esagboŋ nɛ b baa tre mo Ewurgboŋ Ebɔrɛ Pibinyɛn. Enyɛnpe Ebɔrɛ beeŋ shin nɛ e ji kuwura nɛ mo nana Deevid daŋ ji na. 33E beeŋ ba ki Jeekɔb be kanaŋ to be Ewura mbaanaayɔ. Mbe kuwura maaŋ loge kikɛ.” 34Nɛ Mɛɛri bishi malaika na: “M maŋ nyi enyɛn nɛ nuso nɛ le be kusɔ beeŋ tiŋ n wora?” 35Nɛ malaika na shuli so ŋ kaŋɛ: “Kiyoyu Cheeŋ na e naaŋ gbelge fo so nɛ Ebɔrɛ be eleŋ e ba buu fo so. Amoso, baaŋ tre kebia cheembi nɛ feeŋ kurge na Ebɔrɛ Pibinyɛn. 36Fo kurgepo Elizabɛt nɛ b yɛ e la egbentepo na gba di kedampo mbe mbel to, kumo be afɔl ashe nde. 37Ŋkpal manɛ so, kusɔ kama maŋ wɔtɔ nɛ Ebɔrɛ maaŋ tiŋ n wora.” 38Nɛ Mɛɛri kaŋɛ: “N la Ebɔrɛ be kenya nna, shin nɛ kusɔ nɛ fo malga ere e wora ma loŋ.” Nɛ malaika na yɔ ŋ ka mo.
Mɛɛri ka yɔ Elizabɛt be kechɔrɔ to be asheŋ
39K maŋ chɛr ko nɛ Mɛɛri bela ase n nya manaŋ n yɔ kebee so be kade ko to, Judiya be efuli so. 40E ya luri Zakareya pe nna n chɔrɔ Elizabɛt. 41Elizabɛt ka nu Mɛɛri be kechɔrɔ na nɛ mbe kebia na kilgi mbe epun to nɛ Kiyoyu Cheeŋ na bɔlɔ Elizabɛt to kikɛ. 42Nɛ e malga eleŋso ŋ kooba ŋ kaŋɛ: “Kumulelawura, beche kikɛ to fo e nya nɛfa ga. Nɛfa malɛ e baa la kebia nɛ feeŋ kurge na peya. 43Manɛ e ba nɛ le be kesheŋ gboŋ ba ma alɛ so le nɛ n Nyɛnpe mo nio e ba nɛ e ba chɔrɔ ma. 44Ŋkpal manɛ so, ŋ ka nu fo kechɔrɔ nɛ kebia na kilgi ma epun to kagbenefuliso 45Fo ka yirda fanɛ Ebɔrɛ be kubɔya nɛ e bar fo na beeŋ bɔla ekpa na so so nɛ e nɛfa fo kagbenefuliso nna.”
46Nɛ Mɛɛri kaŋɛ:
“Mee ta ma kagbene kikɛ a di Ebɔrɛ epaŋ.
47Ma kagbene fuli ŋkpal Ebɔrɛ ma Emɔlgapo so,
48ŋkpal e ka wu ma alɛ ebɔlpo,
mbe kenya kuwɔr so.
Yili kabre mbaanaayɔ basa kikɛ beeŋ kaŋɛ fanɛ n nya nɛfa,
49ŋkpal asɔgboŋ nɛ Enyɛnpetale Ebɔrɛ wora n sa ma ere so.
50Mbe ketre e du cheeŋ.
Bekama nɛ baa ŋana mo
nɛ e bee wu kuwɔr ashi enananyɛn koŋwule be jemanɛ
n ya fo enananyɛn ko malɛ be jemanɛ.
51E teŋi mbe enɔgboŋ to n
jija kamoowuwuraana be ejina kikɛ n lɛ.
52E gbelge bewurgboŋ ashi bumo be nwurputi so
m ba kaseto nseŋ maŋ bebɔlpo so.
53E sa bumo nɛ akoŋ bee mɔ
na asɔ lela ga nseŋ shin nɛ damawuraana bɛta
n yɔ nɛ enɔfuloŋ.
54E shin nɛ mbe kɔnɔ nɛ e nase
n sa an nanaana na bɔla so nseŋ ba
mbe kenya Israɛl be kechɛto to.
55E nyiŋi kewu Eebraham
nɛ mbe kanaŋ kikɛ kuwɔr mbaanaayɔ.”
56Mɛɛri daŋ ji fanɛ afɔl asa Elizabɛt kutɔ nseŋ naŋ bɛta n yɔ epe.
B ka kurge Jɔn kabɔrɛbɛrpo be asheŋ
57Elizabɛt be kakurgeachɛ ka fo nɛ e kurge ebinyɛn. 58Mbe bechenashapoana nɛ mo kurgepoana ka nu mamachi be kelela nɛ Enyɛnpe wora mo na nɛ bumo kikɛ be ŋgbene fuli bumo.
59Kebi na ka fo nchɛ aburwa nɛ b ba ku mo kututu nsaa shin nɛ b nase mo mo tuto be ketre Zakareya. 60Nɛ mo nio kaŋɛ: “Ayai, mbe ketre e la Jɔn.” 61Nɛ b kaŋɛ mo: “Fo kurgepo malɛ kikɛ maa ji ketre na ai!” 62Ndoŋ nna nɛ b wora enɔ m bishi kebia na mo tuto ketre nɛ e bee sha nɛ e nase kebia na. 63Nɛ Zakareya ŋini n shin nɛ b bar mo kusɔ sibɛso nɛ e sibɛ ŋ kaŋɛ: “Mbe ketre e la Jɔn.” Nɛ k chinchiŋ bumo ga. 64Epul na to nɛ Zakareya be kɔnɔ bugi nɛ mbe kudonduloŋ kilgi nɛ e fara a malga a di Ebɔrɛ epaŋ.
65Kufu daŋ pɛ mbe bechenashapoana kikɛ ga nɛ asheŋ nɛ a wora na be baru sɔ Judiya be kebee be efuli na so kikɛ. 66Ekama nɛ e nu kumo be asheŋ fɛ kumo be nfɛra nseŋ kaŋɛ: “Nuso be esa nɛ kebia ere yɛ e ba ki.” K daŋ baŋ fuli nna fanɛ Ebɔrɛ be eleŋ daa wɔ mo to.
Zakareya be kewuŋkaŋɛ be kamalga be asheŋ
67Nɛ Kiyoyu Cheeŋ na bɔlɔ Jɔn mo tuto Zakareya to nɛ e wu le be kubɔya ŋ kaŋɛ:
68“Men shin nɛ an di Enyɛnpe, Israɛl be Ebɔrɛ epaŋ.
Mo e ba mbe basa be kechɛto to m ba sɔ bumo n yige.
69E sa anyi Emɔlgapo lempo nɛ e shi Deevid
mbe kenya be kanaŋ to.
70Dra na kikɛ nɛ e shin nɛ mbe anebi cheembiana kaŋɛ le:
71‘E nase kɔnɔ fanɛ e beeŋ mɔlga anyi ashi an doŋana
nɛ basa nɛ b kishi anyi kikɛ be eleŋ to.’
72E yɛ e beeŋ wu an nanaana kuwɔr
n nyiŋi mbe kɔnɔ naseso cheembi na.
73E nase kɔnɔ n sa an nana Eebraham
74nseŋ bɔ fanɛ e beeŋ mɔlga anyi ashi an doŋana kutɔ
75n shin nɛ an shuŋ mo a maa ŋana nɛ an baa du cheembi a maa kɔ kulubi kikɛ mo kutɔ ashi an be ŋkpa ere to kikɛ.
76Fo, m pibi, baaŋ tre fo Ebɔrɛ Enyɛnpetale be anebi.
Feeŋ juŋkpar mo,
Enyɛnpe na,
n lɔŋɛ mbe ekpa n sa mo
77ŋ ŋini mbe basa kananɛ baaŋ nya bumo be alubi be ketampaŋ bumo. Baaŋ nya kumɔlga.
78An be Ebɔrɛ la kuwɔrwupowura a du cheembi nna,
79e beeŋ shin nɛ an fara a nya kumɔlga naniere
nseŋ nyaŋɛ kefulto ashi ebɔrɛso
n yuu bumo nɛ b wɔ tentembiri to
nsaa ŋana luwu na so kikɛ
n shin nɛ an bɔla kagbenewushi be ekpa to.”
80Nɛ kebia na daŋ eyur to a kɔ Kiyoyu Cheeŋ na be eleŋ ga. Kiyi to nɛ e daa wɔ n ya fo jemanɛ nɛ e fara a bɔ mbe kubɔya a sa Israɛlebi na.
Terpilih Sekarang Ini:
Luuk 1: GJNb
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2015 GILLBT Ghana Institute of Linguistics, Literacy and Bible Translation
