Jɔn 13

Yesu ka fɔr mbe bebɛsopo be aya be asheŋ

1K ka ba ka kachɛ koŋwule nɛ Kebansonchoŋ be kejigboŋ na e fo nɛ Yesu pin fanɛ mbe kelar durnya ere to n yɔ Etuto na kutɔ na be jemanɛ fo, e daŋ sha mbe basa ashi durnya to, n sha bumo loŋ n ya fo ekar. 2B ka tase ejikpa a shin nɛ b ji kanyɛso be ajibi nɛ alubipo na malɛ teŋ yili kumo Judas Iskareɔt, Saimɔn pibi be kagbene to fanɛ e debɔr Yesu. 3Yesu daa nyi Etuto na ka daŋ ta eleŋ kikɛ m bɔɔ mo ere Yesu na enɔ nseŋ naa nyi e ka shi Ebɔrɛ kutɔ m ba nseŋ naa bɛta a yɔ mo kutɔ. 4Amoso, Yesu daŋ koso ajibi na akpa nna n yili nseŋ gbaŋ mbe piŋi n nase nseŋ ta bɔrdeba n chɛ kashɛr. 5Kumo be kaman nɛ e chulgi nchu n wɔtɔ katishaŋ to nseŋ fara a fɔr mbe bebɛsopoana na be aya so nsaa ta bɔrdeba nɛ e ta n chɛ kashɛr na a melti bumo be ayaana. 6E wora loŋ m ba fo Saimɔn Pita nɛ e bishi mo: “Enyɛnpe, fo yɛ fo fɔr ma aya so a?” 7Nɛ Yesu kaŋɛ mo le: “Naniere bre fo maŋ nyi kusɔ nɛ mee wora ere, ama k maaŋ chɛr nɛ fo pin to.” 8Ndoŋ nna nɛ Pita kaŋɛ: “Ayai, fo maa ba nɛ fo ba fɔr ma aya so kuraa.” Nɛ Yesu kaŋɛ mo: “Nɛ m baŋ maŋ fɔr fo so, ma nɛ fo maaŋ baa kɔ shɛŋ.” 9Nɛ Saimɔn Pita kaŋɛ mo: “Kumo ere, Enyɛnpe, sa maŋ fɔr ma aya so nawule, fɔr ma enɔana nɛ ma kumu so gba n ti so.” 10Nɛ Yesu kaŋɛ mo: “Esa nɛ e teŋ bɛr nchu maŋ naa bɛr ai, she mbe aya nawule nɛ e beeŋ fɔr so. Menyi alɛ nyalɛ so nna, ama mannɛ menyi kikɛ nyam bre e nyalɛ so.” 11E daa nyi esa nɛ e daa shin nɛ e debɔr mo, amoso nɛ e daŋ kaŋɛ fanɛ mannɛ bumo kikɛ nyam e daŋ nyalɛ so na.

12E ka fɔr n fɔr bumo be ayaana na so n loge nɛ e ta mbe asɔ m buu nseŋ bɛta n yɔ mbe echenakpa n ya chena m bishi bumo le: “Men pin kusɔ nɛ n wora menyi ere to a? 13Menyee kaa tre ma Eŋinipo nɛ Enyɛnpe, kashenteŋ nɛ menyi alɛ bee ji, ŋkpal manɛ so, n la Eŋinipo nɛ Enyɛnpe nna. 14Nɛ kananɛ ma alɛ baa la men Nyɛnpe nɛ menyi be Eŋinipo nseŋ fɔr menyi be aya so ere, a daga fanɛ menyi alɛ gba e baa fɔr abar be aya so. 15N wora loŋ nna ŋ ŋini menyi nna na fanɛ men baa wora kananɛ n wora menyi ere. 16Kashenteŋ nɛ mee ji menyi na fanɛ kenya maŋ chɔ mo nyɛnpe, kabɔ kama malɛ maŋ chɔ esa nɛ e shuŋi mo na. 17Men baŋ pin asheŋ ere nsaa wora amo, nɛfa beeŋ baa la menyeya.”

18E yɛ: “Mannɛ menyi kikɛ nɛ n de. N nyi bumo nɛ n lara. Ama ade kikɛ wora nna nɛ kananɛ abɔrɛsibɛ na kaŋɛ le na e bɔla ekpa, a kaŋɛ: ‘Esa nɛ e ji ma ajibi gbagba kilgi nna n tu ma.’ 19Mee kaŋɛ menyi nna na a yili pɔɛŋ nɛ k ba wora, saŋɛ na so, nɛ k ba wora, menyeeŋ pin fanɛ ma e la Esa nɛ e bee ba na. 20Ma e kaŋɛ menyi kashenteŋto na fanɛ ekama nɛ e sɔ esa kama nɛ n shuŋi, sɔ ma nna na. Ekama malɛ nɛ e sɔ ma sɔ esa nɛ e shuŋi ma na nna na.”

Yesu ka wu b ka beeŋ debɔr mo be asheŋ m malga be asheŋ

(Matiu 26:20-25; Maak 14:17-21; Luuk 22:21-23)

21Yesu ka malga kesheŋ ere n loge nɛ mbe kagbene jija mo ga nɛ e bugi to ŋ kaŋɛ bumo le: “Ma e kaŋɛ menyi kashenteŋto na fanɛ menyi be eko beeŋ debɔr ma.” 22Ndoŋ nna nɛ kesheŋ na wul bebɛsopo na to nɛ b kilgi ŋ keni ŋ keni abar a fɛ bumo to be emo nɛ e daa de. 23Bebɛsopo na be emo nɛ Yesu daa sha na daŋ chena nna m mata mo. 24Nɛ Saimɔn Pita wora ebɛsopo na enɔ fanɛ e bishi Yesu bumo to be emo nɛ e de. 25Ndoŋ nna nɛ ebɛsopo na firgi n taga to Yesu nseŋ bishi mo: “Enyɛnpe, wanɛ nna?” 26Nɛ Yesu kaŋɛ: “Mo e la emo nɛ meeŋ ku bodobodo n wɔtɔ epo to n sa na.” E ka loge nɛ e ku bodobodo na n shoŋi epo to n ta n sa Judas, Saimɔn Iskareɔt pibi. 27Judas ka baŋ sɔ bodobodo na nɛ Setani luri mo to. Nɛ Yesu kaŋɛ mo: “Kusɔ nɛ fee sha kewora ere, fo wora kumo manaŋ manaŋ.” 28Ama bumo nɛ b daa tase ejikpa na be ekama daa maŋ pin kusɔ nɛ k daŋ ba nɛ e kaŋɛ Judas Iskareɔt loŋ. 29Ŋkpal Judas ka daa keni katuŋ na be amansherbi so so, bumo be beko daa fɛ fanɛ Yesu daa kaŋɛ mo nna fanɛ e ya tɔ Kejigboŋ na to be asɔ nɛ baaŋ baa sha m ba ŋko fanɛ e ta kusɔ ko n ya sa betirpo. 30Judas ka baŋ sɔ bodobodo na nɛ e lar epul na to. Kanyɛ daŋ biri nna nɛ e lar.

Kamalga naseso popɔr be asheŋ

31Judas ka lar nɛ Yesu kaŋɛ le: “Naniere bre ma, Nyiŋgbasa Pibinyɛn nya kemaŋkura nɛ Ebɔrɛ malɛ gba nya kemaŋkura ashi ma to. 32Nɛ fanɛ Ebɔrɛ malɛ baŋ bɔla ma so n nya kemaŋkura, kumo ere Ebɔrɛ beeŋ maŋkura ma, Ebinyɛn na ashi mo to. Mo alɛ beeŋ naŋ maŋkura ma epul ere to. 33Ma mbia, m maaŋ baa wɔ menyi kutɔ n chɛr. Menyeeŋ fin ma, ama fanɛ kananɛ ŋ kaŋɛ Juwebi na nɛ mee kaŋɛ menyi alɛ gba na fanɛ kakpa nɛ mee yɔ na, men maaŋ tiŋ m ba ndoŋ.

34Ama kamalga naseso popɔr nɛ mee sa menyi e la fanɛ men baa sha abar. Kananɛ mee sha menyi na e daga fanɛ menyi alɛ gba e baa sha abar loŋ. 35Nɛ menyee sha abar, basa kikɛ beeŋ pin men ka la ma bebɛsopo.”

Yesu ka yɛ Pita beeŋ chɛ fanɛ e maŋ nyi mo be asheŋ

(Matiu 26:31-35; Maak 14:27-31; Luuk 22:31-34)

36Ndoŋ nna nɛ Saimɔn Pita bishi mo: “Enyɛnpe, nnɛ nɛ fee yɔ?” Nɛ Yesu kaŋɛ mo: “Fo maaŋ tiŋ m bɛ ma so naniere n yɔ kakpa nɛ mee yɔ ere, ama kachako feeŋ bɛ ma so n yɔ.” 37Ndoŋ nna nɛ Pita naŋ bishi mo: “Enyɛnpe, manɛ e ba nɛ m maaŋ tiŋ m bɛ fo so naniere n yɔ? Meeŋ tiŋ ŋkpal fo so gba n wu.” 38Nɛ Yesu bishi mo: “Fo yɛ feeŋ tiŋ ŋkpal ma so n wu ŋko? Keni, ma e kaŋɛ fo kashenteŋto na fanɛ pɔɛŋ nɛ koshinyɛn e boŋ kanyɛ ere, feeŋ chɛ ale asa fanɛ fo maŋ nyi ma.”

Terpilih Sekarang Ini:

Jɔn 13: GJNb

Highlight

Kongsi

Salin