Jɔn 10

Mbolpɔkpapo nɛ mbe mbolpɔ be keŋasa be asheŋ

1Yesu e daŋ bɔ keŋasa ere ŋ kaŋɛ: “Ma e kaŋɛ menyi kashenteŋto na fanɛ esa kama nɛ e maa bɔla mbolpɔ be kuluu be kabuna to a luri kuluu na to nsaa bɔla kaboŋ pɔtɛ a tɛ a luri kumo to la eyu nɛ esugepo nna. 2Esa nɛ e bee bɔla kuluu na to be kabuna to a luri mbolpɔ na to e la mbolpɔkpapo na. 3E baa ba, kabunakenipo na bee bugi kabuna na nna a sa mo nɛ e bee luri to a tre a tre mo gbagba be mbolpɔ na be atreana nɛ bumo alɛ bee pin mbe ebɔl nsaa bɛ mo so nɛ e bee keta bumo a lar kuluu na to. 4E baŋ lara bumo kikɛ kuluu na to n loge, e bee choŋ nna n juŋkpar mbolpɔ na nɛ b bɛ mo so, ŋkpal manɛ so, b nyi mbe ebɔl. 5Ama efɔ bre, b maaŋ bɛ mo so kikɛ. Baaŋ shile gba nseŋ ka mo, ŋkpal manɛ so, b maŋ nyi mbe ebɔl.”

6Yesu daŋ bɔ le be keŋasa ere nna n sa bumo, ama b daa maŋ pin kusɔ nɛ e daa kaŋɛ bumo na be kifito.

7Ndoŋ nna nɛ Yesu naŋ kaŋɛ bumo: “Kashenteŋ nɛ mee kaŋɛ menyi na fanɛ ma e du fanɛ kabuna a sa mbolpɔ na. 8Bekama nɛ b daŋ juŋkpar ma m ba na kikɛ la beyu nɛ besugepo nna nɛ mbolpɔ na malɛ maŋ nu n sa bumo. 9Ma e la kabuna na, esa kama nɛ e bɔla ma to n luri, beeŋ nya kumɔlga. Mo alɛ beeŋ baa luri a lar a nya ajibi. 10Eyu bre bee kaa ba nna m ba kaa yuri ŋko a mɔ ŋko a jija nawule, ama ma ere ba nna nɛ basa e nya ŋkpa nseŋ nya kumo nɛnɛ ga.

11Ma e la mbolpɔkpapo lela na, mbolpɔkpapo lela na bee shin nɛ baa lara mbe ŋkpa ashi mo to nna a sa mbolpɔ na. 12Esa kama nɛ b ber paa nɛ e bee keni mbolpɔ so, mo alɛ ŋkaa maŋ la mbolpɔkpapo gbagba na, mo alɛ ŋkaa maŋ naa la mbolpɔ na wura na baŋ wu kuntuŋ ka bee ba, e bee shile nna a ka mbolpɔ na. Saŋɛ na so nɛ kuntuŋ na e pɛ mbolpɔ na be ako nɛ amo nɛ a ka e pesaŋ to. 13Amodoŋwura bee shile nna a yɔ a ka mbolpɔ na, ŋkpal manɛ so, b ber mo paa nna nɛ e bee keni amo so nɛ mbe shɛŋ maŋ wɔ amo to. 14Ma e la mbolpɔkpapo lela na, n nyi ma mbolpɔ nɛ ma mbolpɔ malɛ gba nyi ma, 15fanɛ kananɛ Etuto na nyi ma nɛ ma alɛ gba nyi Etuto na. Ma alɛ bee ta ma kumu nna a mɔ a sa bumo. 16Ŋ kraa kɔ mbolpɔ ko nɛ a maŋ wɔ mbolpɔ ere to. A daga fanɛ m bar loŋ be mbolpɔ na gba nɛ amo alɛ gba e ba kaa nu ma ebɔl nɛ amo kikɛ e baa la kukoŋwule nsaa kɔ ekpapo koŋwule. 17Kusɔ nɛ k ba nɛ n Tuto na bee sha ma na e la fanɛ ŋ ka shuli n ta ma ŋkpa a sa basa nɛ n naŋ bɛta n nya kumo so. 18Esa kikɛ maa sɔ kumo ŋ kutɔ. Ŋ gbagba e naa ta kumo a sa basa. Meeŋ tiŋ n ta kumo n sa basa nseŋ naŋ tiŋ n ta kumo a wɔtɔ. Loŋ nɛ n Tuto na yili fanɛ n wora.”

19Ndoŋ nna nɛ Juwebi na yaŋ barga to ŋkpal mmalga na so. 20Le nɛ bumo be bedamta daŋ kaŋɛ: “Kiyoyu lubi e wɔ mo to. E bee lɔ eboŋ nna. Manɛ so nɛ esa bee nu ede be mmalga!” 21Ama le nɛ beko malɛ daŋ kaŋɛ: “Asheŋ nɛ kanyɛn ere bee malga ere maŋ la mbuibilubiwura be mmalga. Nɛ nuso nɛ kiyoyu lubi bee wora a bugi betanpo be anishi?”

Juwebi na ka paŋ yirda be asheŋ

22B wɔtɔ loŋ nɛ bɔrɛlambu na be daŋkare be nshɛr ashi Jerusalɛm ya fo. Kumo be jemanɛ daa la awo to nna. 23Nɛ Yesu wɔ bɔrɛlambu na akpa a na kakpa nɛ baa tre Ewura Sɔlɔmɔn be kedɛdɛ na. 24Ndoŋ nna nɛ Juwebi na chala m ba mo kutɔ m ba bishi mo: “Manɛ e ba nɛ fo ta asheŋ ŋ ŋana anyi so n chɛr loŋ? Kaŋɛ anyi kashenteŋto preen: Fo e la Mesaya na a?” 25Nɛ Yesu kaŋɛ bumo: “N teŋ kaŋɛ menyi, ama menyi alɛ maŋ yirda ma. Emamachi be asheŋ nɛ ŋ kɔ n Tuto be ketre a wora ere e naa ji shɛda a kaŋɛ ma asheŋ. 26Ama menyi alɛ maŋ yirda ma ŋkpal men ka maŋ la ma mbolpɔ so so. 27Ma mbolpɔ bee nu ma ebɔl nɛ n nyi bumo nɛ baa bɛ ma so. 28Mee sa bumo ŋkpa nɛ k maŋ kɔ ekar na nɛ b sa maŋ wu kikɛ. Esa kama malɛ maaŋ tiŋ n suge bumo ashi ma enɔ to. 29N Tuto e ta bumo m bɔɔ ma enɔ, mo alɛ e chɔ kusɔ kikɛ, amoso, esa kama maaŋ tiŋ n suge bumo ashi n Tuto na be enɔ to kikɛ. 30Ma nɛ n Tuto na la kukoŋwule nna.”

31Ndoŋ nna nɛ Juwebi na yaŋ ta ajembu nɛ b kpa mo. 32Nɛ Yesu bishi bumo le: “Asheŋ lela damta nɛ a shi Etuto na kutɔ nɛ n wora ŋ ŋini menyi. To, nɛ amo be kumo so nɛ menyee kpal a sha nɛ men kpa ma ajembu ere?” 33Nɛ Juwebi na kaŋɛ mo: “Mannɛ kusɔ lela ko fo ka wora so nɛ anyee sha kekpa fo ajembu, ama ŋkpal fo ka baa la nyiŋgbasa nsaa tre fo kumu Ebɔrɛ nsaa malga a gbiti Ebɔrɛ na so.” 34Nɛ Yesu bishi bumo le: “Mannɛ menyi be mbra to nɛ Ebɔrɛ bee kaŋɛ fanɛ: ‘Men la ebɔrɛana nna na’ a? 35To, an nyi abɔrɛsibɛ na ka maa chɛrga kikɛ. Amoso, a ka kaŋɛ fanɛ Ebɔrɛ tre basa mo nɛ mbe kamalga ba bumo to ebɔrɛana ere, 36manɛ e ba nɛ menyee kaŋɛ ma, esa nɛ Etuto na gbagba lara n yili a sa mbe kumu nseŋ shuŋi durnya ere to na, fanɛ mee malga nna a gbiti Ebɔrɛ ŋkpal ŋ ka kaŋɛ fanɛ ma e la Ebɔrɛ Pibinyɛn na so? 37Nɛ m maa shuŋ n Tuto na be ashuŋ nna, kumo ere men sa maŋ yirda ma. 38Ama nɛ mee shuŋ mbe ashuŋ na nna nɛ men maŋ yirda ma gba, a daga fanɛ men yirda ashuŋ na bre, saŋɛ na so menyeeŋ pin fanɛ Etuto na wɔ ma to nɛ ma alɛ wɔ Etuto na to.”

39Ndoŋ nna nɛ b naŋ wora ania a sha kepɛ mo nɛ e gelge n lar bumo to n choŋ.

40Yesu ka lar ndoŋ nɛ e naŋ bɛta n yɔ Jɔɔdan be lɔr be kaba ndoŋ, kakpa nɛ Jɔn kabɔrɛbɛrpo daa bɛr basa kabɔrɛbɛr na. Ndoŋ nɛ e daŋ ya kaa wɔ. 41Nɛ basa damta daa ba mo kutɔ m ba kaa kaŋɛ: “Kashenteŋ nna fanɛ Jɔn kabɔrɛbɛrpo daa maŋ wora mamachi be kesheŋ kama, ama asheŋ nɛ e ji shɛda ŋ kaŋɛ kanyɛn ere be asheŋ na kikɛ la kashenteŋ nna chap.” 42Basa damta daŋ yirda mo ndoŋ.

Terpilih Sekarang Ini:

Jɔn 10: GJNb

Highlight

Kongsi

Salin