Matie 11
11
Zhan Batisì kɔ̀hɔ̀n-wá-bɔ̀
(Nyɛ́n nyan Lükɛ̀n 7:18-35 wrú lɔ mɛ̀n)
1Ɛnvra léyi Zhezü yé n'ɛsɛ̀nkɛn-bɔ̀ ɛvà-anhyrɛ̀ lɔ ankà trɔ nɔn, nɛ̀n cɔhɔ́ nanvrɛn, nɛ̀n hɔ́n anmàn hɔ̀n léyi dú ɔkpɔsɔ lɔ wú nɔn, ô nɛ̀n yé, nɛ̀n dɔ́ yɔ Ɔwɔ ankà.
2Zhan Batisì dú anwɔn-mɛ̀n-wá-wɔn mɛ̀n kɩ yá ɛci hɔ̀n léyi Krisì kɛ hán nɔn. Zhan Batisì wá n'ɛsɛ̀nkɛn-bɔ̀ jan ɔkɔ̀hɔ̀n 3kè yrɛ nɛ̀n le: “È dú ɔwrɔn léyi bɔ́ nyrì le kɛ lɛ và, kàle ke ji le bɔ̀ vrá ɔwrɔn nyàntɛn hán?” 4Zhezü mrɛ́n yɔ ɔmùan le: “Nyɛ́n hɔ̀n nyɛ́n dɔ́ Zhan ankà léyi nyɛ yá mán eci léyi nyɛ kàn nɔn: 5Anvɛ̀-boyɛ-bɔ̀ kɛ kán ɛyri, ɛsɔ̀nze-bɔ̀ kɛ nán esù, kokove-bɔ̀ kɛ cɔ́ ɔkɔrɛ̀, nukù-sî-bɔ̀ kɛ yá ankà, owú-bɔ̀ kɛ wrɔ vá ɔkɔrɛ-bɔ̀ mɛ̀n, kɩ ɛmian-bɔ̀ kɛ cɔ́ ɛmɛẅi ankà ankrànkràn kɛ yá. 6Ɛnbɔrɛbru dú tán ɔwrɔn léyi kè sɩ̀ teze ankàẅì-bùtan léyi nɛ̀n ẅɛn m'ɛwú nɔn.”
7Ɛnvra léyi Zhan sɛ̀nkɛn-bɔ̀ lɔ hɔ̀n nɔn, Zhezü bukru kɛ dɔ́ fɛcüè Zhan ankà, kɩ nɛ dɔ̀ le: “Ecitan de nyɛ́n hɔ́n ɛnnùwì ɛnyan-yri nɛ́n? Ɛfi-sè léyi ɛndɔ̀nwrɔ̀n kɛ cüɛ̀n nɛ́n? Hɔ̂a? 8Zɛtɛn ecitan de nyɛ́n hɔ́n ɛnyan-yri nɛ́n? Ɔwrɔn tɔ̀n léyi cɔ́ ɛceci ankrànkràn nɛ́n? Tɛ́n anwrɔn hɔ̀n léyi kɛ cɔ́ ɛceci ankrànkràn nɔn dú ɛnnɛ̀ncüì hɔ̀n bemɛ̀n. 9Zɛtɛn ecitan cehɛ́n de nyɛ hɔ́n ɛnyan-yri nɛ́n? Ɔwɔ-mùanwú-ankà-dɔ́-wrɔn tɔ̀n hàn? Hɛ̀ɛ̀ mɛ dɔ́ nyɛ̀n, kɩ nɛ̀n vru nɛ̀n vrán Ɔwɔ-mùanwú-ankà-dɔ́-wrɔn tɔ̀n mán. 10Ɔmuhi Zhan dú ɔwrɔn léyi Owrú Prɔnprɔn kɛ dɔ̀ le: ‘Ɔwɔ dɔ̀ le: Mɛ lɛ hán m'ɔkɔ̀hɔ̀n-wá-wrɔn kè dú mɛ́n ezì, ô kɛ̀ mrɛ́n mɛ́n ɛnlevri.’ 11Mɛ dɔ́ nyɛ̀n annànwɔrɛ mɛ̀n le: anwrɔnẅì mɛ̀n lɔ, ɔwrɔn zriɛmɛ́n bàdà mrìmrì kè sèvri kɛ̀ vrán Zhan-Batisì: tɛ́n ɔwrɔn léyi dú ɛcɛ Anhobɩ́ nɛ̀ncüì-dúyri nɔn, sevri vrán nɛ̀n. 12Ɛnvra léyi Zhan-Batisì bukru kɛ dɔ́ Ɔwɔ ankà hàn kɩ cɔ́ zɛtɛ̀ lɔ nɔn, Anhobɩ́-Nɛ̀ncüì-dúyri dú ɛjɔ̀kɔmɛ̀n kɩ ɛci-gbàngbàn-hán-bɔ̀ ke ji n'ebɩ́-yri. 13Ɔwɔ-mùanwú-ankà-dɔ́-bɔ̀ lɔ fɛn mán Mohizì nyànmàn, dɔ́ Anhobɩ́-Nɛ̀ncüì-dúyri ankà hàn kɩ cɔ́ Zhan vra lɔ. 14Kɩ ke dú kɛ nye ji nyɛ́n bú m'ankà nyɛ́n tán ankàẅì hô, Zhan dú Eli ndɔ léyi yɛ dɔ́ n'ɛvá-ankà nɔn. 15Nyɛ́n die nukù anvrɛnvrɛn, ke dú kɛ nyɛ́n ẅɛn nukù!
16Antɔnwrɔn de me le bɩ mɛ̀n krɔn ɛnyɔncì bɔ̀ lɔ nɛ́n? Yɔ dù yɔ cá ɛẅì hɔ̀n léyi yɛ́ angbàtà-vri ɛntrɛ, kɩ ndɔ hɔ̀n ke di bobo tán yɔ nyran hɔ̀n le: 17‘Bɔ̀ krɛ́ ɛmràn-bri-cɔ̀ tɔ̀n kètè mɛ̀n bɔ̀ tán nyɛ̀n kɩ nyɛ́n sɩ̀ brì ɛmràn! Bɔ̀ krɛ́ eyú-di-cɔ̀ kɩ nyɛ́n sɩ́ boto hɛ́!’ 18Annànwɔrɛ mɛ̀n lɔ Zhan và, nɛ́n sɩ́ zî ɛci, nɛ́n sɩ́ mi ɛntàn wɔnsɛn, kɩ yɛ dɔ̀ le: ‘Ɛnhɛ́n gbàngbàn tɔ̀n dú nɛ̀n edomɛ̀n!’ 19Ɔwrɔnẅì Ẅì nvà, ne zî ɛci, ne mi ɛntàn kɩ yɛ dɔ̀ le: ‘Nyɛ́n nyan ɔwrɔn ndɔ léyi, ɛci-zî mán ɛntàn-mí-ankà kɩ ke tro, nɛ̀n dú anmàn-wɔɛ̀n-yrɛ-bɔ̀ mán anwrɔn hɔ̀n léyi yɛ krɛ́ ɛci-gbàngbàn-hán-bɔ̀ nɔn yɔ nyran hɔ̀n!’ Tɛ́n ankà-nyrì léyi dú Ɔwɔ mɛ̀n nɔn ke yé n'edomɛ̀n ɛnyrɔnnan ci-hán mɛ̀n.”
Anmàn hɔ̀n léyi ke sɩ́ bú Zhezü ankà kɛ tán ankàẅì nɔn.
(Nyɛ́n nyan Lükɛ̀n 10:13-15 wrú lɔ mɛ̀n)
20Zɛtɛn Zhezü bukru ke fe anmàn hɔ̀n léyi, nanvrɛn lɔ, nɛ̀n hán anvɛmɛ̀n-frɛ́n-ci bobrebe, ɔmuhi anmàn hɔ̀n lɔ bɔ̀, ke sɩ́ crɔn y'eci-hán-ci nɔn. Nɛ dɔ̀ le: 21“Muzhie dú vɛ tɛn, Korazɛn! Muzhie dú vɛ tɛn, Bɛtsahida! Ɔmuhi anvɛmɛ̀n-frɛ́n-ci hɔ̀n léyi yɛ hán nye yri nɔn, ke dú kɛ yɛ hán yɔ, Tirɛ̀n mán Sidɔn anmàn hô, ɛnvra sheshemɛ̀n de y'anmàn-bɔ̀ kɛ lɛ cɔ́ ɛceci gbrɔ̀, kɛ wá ɛnwɔ̀n edomɛ̀n, ô kè yé le, yɔ ji yɔ crɔn y'eci-hán-ci. 22Hɩ le kruhú de mɛ dɔ́ nyɛ̀n le, ɛmrɛ̀nci bì lɔ, y'ɛgbàn-wɔɛ̀n-dì lɔ kɛ lɛ sɔ́ vrán Tirɛ̀n mán Sidɔn tɛn lɔ. 23Kɩ vɛ́n, Kapɛrnahümɛ̀n, e tro le e le sɩ́ v'edomɛ̀n ɛwú hàn kɩ ɛ̀ cɔ́ anhobɩ́ hɛ́? Ye le sɩ́ mɛ́n ɛnhi hàn kɩ ɛ lɛ cɔ́ owú-bɔ̀ anmàn. Ɔmuhi anvɛmɛ̀n-frɛ́n-ci hɔ̀n léyi yɛ hán v'eyri nɔn, ke dú kɛ yɛ hán yɔ Sodɔmɛ̀n anmàn hô, anmàn ndɔ lɔ ke le vru kè dú ɛnyɔncì lɔ. 24Hɩ le kruhú de, mɛ dɔ́ nyɛ̀n le, ɛmrɛ̀nci bì lɔ, v'ɛgbàn-wɔɛ̀n-dì kɛ lɛ sɔ́ vrán Sodɔmɛ̀n tɛn lɔ.”
Nyɛ́n và cɔ́ mɛ̀n, ô nyɛ́n cɔ́ ɔwrɔncüe
(Nyɛ́n nyan Lükɛ̀n 10:21-23 wrú lɔ mɛ̀n)
25Hɩ vra lɔ, Zhezü kɛ dɔ̀ le: “Ô Dade, anhobɩ́ mán ɛnhibù Ẅɛnwrɔn, mɛ tán mɛ́n ɔkùɛn ɔmuhi eci léyi ɛ̀ bán ankà-nyri-bɔ̀ mán ɛnkruemɛ̀n-ẅɛn-bɔ̀ nɔn, e bɩ è yé ɛẅì hɔ̀n. 26Hɛ̀ɛ̀, Dade, ɔmu lɔ de ndù nɔn, ɔmuhi nzrɔ tán mɛ́n le, kè dú ɔmu lɔ nɔn.
27Dade wá mɛ̀n eci lɔ fɛn antamɛ̀n. Ɔwrɔn zriɛmɛ́n ke sɩ̀ nyri Ɛnẅì lɔ ke dú kɛ kè sɩ̀ dù Ɛnẅì-nɛ́n-zi, kɩ ɔwrɔn zriɛmɛ́n ke sɩ̀ nyri Ɛnẅì-nɛ́n-zi ke dú kɛ kè sɩ̀ dù Ɛnẅì lɔ mán anwrɔn hɔ̀n léyi Ɛnẅì lɔ ke ji kɛ̀ tán kè nyrì nɔn.
28Nyɛ́n và cɔ̀ mɛ̀n, nyɛ́n léyi eci srɔnsrɔn ẅɛ̀n dùkà dú nyɛ̀n edomɛ̀n kɩ mɛ lɛ tán nyɛ̀n ɔwrɔncüe. 29Nyɛ́n bɩ́ m'ejüedì gbànkàn lɔ, ô nyɛ́n teze mɛ̀n, mɛ̀n yé nyɛ̀n ankà, ɔmuhi mɛ́n wɔ̀ kɩ mɛ́n dú ɛnhyɔ̀bɔ-wrɔn nɔn, kɩ nyɛ lɛ cɔ́ ɛwrɔncüe léyi dú nyɛ́n dùku nyɛ tɛn nɔn. 30Ɛgbànkàn léyi mɛ lɛ tán nyɛ̀n nɔn, kè sɩ̀ sɔ̀a, kɩ ɛnlowrú léyi mɛ lɛ wá nyɛ̀n antamɛ̀n nɔn, wore.”
Terpilih Sekarang Ini:
Matie 11: ƐAA03
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.
