Andowoon 4
4
Andowoon 4:1-12,25-26
Kein Yoom Abel Yoom
1Adam yamban yoom dangiiwe oyoomiib kereen. Kwanekoru, dana mingki wooneen. Woonekoru, yedmeen, “Yarimanbed awawoonkob mingki woone kandaan kii. Kwani kowe, yaningko kuu Kein.”#4:1 Kein yaningko ye id kuu “Kandaan”. andeen. 2Amaan, angkon dana mingki mamaa Abel wooneen. Abel kuu dingkan amongkob oonembirimaan. Kein kuu yongbon deme ye karub keroon.
3Amaanbed Kein kuu ye yongbonbed bene nengkane agedmo keroone baeb kuu Yariman yaa konoon. 4Kwane, Abel kuu ye dingkan wonob dana aye ye yom kowiib kumbed bunge kanmene nengkane agedmo keroone baeb kuu Yariman yaa konoon. Kwane, Abelbed konoon kuu Yariman ye dowaken kerenoon, 5kumban Keinbed konoon kuu ye dowakenban kerenoon. Dowakenban keroone, Kein kuu norin ye murubia anammo keroon.
6Kwanoone, Yarimanbed Kein yaa yedmenoon, “Eb kuu komandewed norin wandewen? Komoyiibkob norin ye murubia kerewen? 7Amun kamaneeb kuu dowaken kerubdaniine kubaneewoo? Kumban, amun kamaabban keraneeb kuu ambarakmimbed eb awinebdaneen. Ambarakmi inamenbed burudandubdandameen, kumban ebkareb ambarakmi yaa burudande dore!” andoon.
8Kuye yoman kuu Keinbed ye daman yaa yedmenoon, “Mongkob angka wenem.” andoone winiwen. Wene dorekoriwa, ye daman kuu ayoone bobnoon.
9Kwanoona, Yarimanbed Kein yaa kaamonenoon, “Eb daman Abel kuu kunaya doreen?” andoone, Keinbed neman yedmoon, “Nekaadban. Ne kuu ye oone dobiri ye karuwoo?” andoon. 10Kwanandoone, Yarimanbed yedmenoon, “Komo kamewen kee? Wengambere. Eb daman ye umkan okad yiri kubudoroon kumbed ne yaa baandoona wengambaraan. 11Kwani kowe, butun kabdaan kii, eb kuu yongbon deme awinideban amborom kuu ebbed eb daman aye wene ye umkan okad yiri kubudoroon kowe. 12Eb yongbon kuu dembaanban. Eb kuu nane kibine dobiri ye karubban kereeb! Eb kuu wedyamo dewenebi ye karub kereeb kii!” andoon.
13Andoone, Keinbed neman yedmoon “Kee dabab darewoob oi! Ne kuu yiminban! 14Kibikee ne kuu yongbon deme ambangkideban, eb amob kaweeb kowe. Angkon ne kuu eb dia minideban. Ne kuu wedyamo dewenebi ye karub keraan kowe, karub mamaambed wedmewaneen kuu naneene bobnaniin!” andoon.
15Andoone, Yariman Godbed yedmoon “Dowan, kanembed eb aneen kuu neman karub kurubmim inaniin.” andoon. Kwane, Yariman Godbed Kein ye binad ari amob akmi yeman kowe yedmoon “Kane amob akmi yeman wedmenaneen kuu ayi yemanban.” andoon. 16Kwamunekore, Kein kuu Yariman God domonene wenene Dewenebi ambibkin angka doboroon. Aron dembimamuun angka Dewenebi ambibkin Iden yaa doboroon.
Kein Ye Awoya
17Kein yoom ye wonong yoom yi mingki Inok wooniwen. Kwanekore, Keinbed kambong nare yidmene ambib yenbekore kambong kuu ye karub dana yaningko Inok kowoon. 18Inok ye mingki kuu Irad. Irad ye mingki kuu Mehudyael. Mehudyael ye mingki kuu Metusael. Metusael ye mingki kuu Lamek. 19Lamek kuu nima ayoob awanmoon, Adah yoom Silah yoom. 20Adahbed dana mingki Yabal wooneen. Ye kuu dingkan amongkob ooni ye karub yi awoya. Yi kuu parai kombon aombed dobirimamiib. 21Ye daman yaningko kuu Yubal. Ye kuu yok kuweng amun wangkenabi ye karub yi awoya. 22Silahbed dana mingki Tubal-Kein wooneen. Ye kuu yeengbed kumkam korem ongmenabi ye karub. Ye nengkan kuu Naama. 23Lamekbed ye nima ayoob yaa daandoon
“Wengambirime! Kewedmanbed noon kowe ayaane bobnoon.
24Kwani kowe, Kein ayaniib ye kakman kuu karub kurubmimiib yeene inaniib,
kumban ne naniib ye kakman kuu karub 77iib yeene inaniib kumbed yimin.” andoon.
Set Yoom Inos Yoom
25Amaanbed, Adam yoom ye wonong yoom dangiiwe karub dana maa wooniwen. Woonekoru, yedmeen, “Godbed ne yaa mimyob keewene karub dana maa kawoon. Dana kee Abel kuu Keinbed ayoon ye yumbon kandi yeman. Kwani kowe, ne dana yaningko Set#4:25 Set yaningko ye id kuu “Kondoon”. yedma.” andeen. 26Angkon amaanbed Set yoom ye wonong yoom dana mingki Inos wooniwen. Kuyaron kumbed karub Yariman yaa baandi ye inamen andowiwen.
Terpilih Sekarang Ini:
Andowoon 4: yonB
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2003, Wycliffe Bible Translators, Inc. All rights reserved.