Mako 7
7
1˻Walse˼ Parisi ye mare kinie Pulu Yemonga ungu manemanga puluma pilku mane siringi ye mare kinie ene Jerusalleme munduku kelko Yesusi molorumuna ongo maku toko moloringimene 2yu lombili andolimene ki kalaro molopili ou kulumiye naa toko langi we ambolko noringi kinie kanokolie kanoko keri kanoringi. 3(˻Sike kalaro naa molorumu nakolo˼ Parisi yema kinie we Juda yamboma kinie enenga anda kolepalimene “Teai.” niringi mele pilku liku tengendo ou ki pali nona munduku kulumiye toko konjikulie langi pe noringi. We naa noringi. 4Makete koleana puku ulkendo ongolie ki ou kulumiye naa tokolie ˻maketena topo toko liringi˼ langime naa noringi. Anda kolepalimenga teringi ulu pulu lupe lupe aisili pilku liku teko moloringila. Kápoma kinie, mingime kinie, langi noringi poloma kinie, aku sipe melema taki taki we kulumiye toringi.)
5˻Juda yambomane aku siku teringi˼ ne Parisi yema kinie, Pulu Yemonga ungu manemanga puluma pilku mane siringi yema kinie, enene ˻Yesusi lombili andolimene aku siku ki kulumiye naa toko langi we noringi kanokolie˼ Yesusindu walsiku pilkulie ningindu: “Anda kolepalimene “Teai.” niringi mele nunge lombili andolimene nambemuna naa pilku liku telemeleye? Enenga kime kalaro molopili langi nolemele kanumu.” niringi.
6Yesusini enendo pundu topa nimbendo: “Ene ˻ungu manema pilku mane silimele yema kinie Parisi yema kinie˼ ene topele mapele toli yema molemele! Pulu Yemone ungu umbu tonjirimuma pilipe yamboma nimbe sirimu ye Aisayane enendo nirimu mele papu nirimu. ˻Enene kinié telemele mele yuni ou nimbe Pulu Yemonga˼ bokuna torumu molemo mele i sipe:
˻Pulu Yemone nimbendo:˼
“Kanu yamboma enenga keremane na kapi ningu
‘Ye aili olandopamo.
Nu lipu ai silimolo.’ ningu
na imbi ambolko ola linjilimele nakolo
enenga konopuma kinie nanga konopumu kinie
teluna naa pulimo. lupe lupe pelemo.
7Enene ‘Nanga imbi
ambolopo ola linjemili.’ ningu
na we popo toko kapi nilimele.
Mana yambomane mane silimele unguma mindi
mane sikulie
‘I ungu manema Pulu Yemone
“Teai.” nilimo ungu manema.’
ningu pilku liku telemele,
akumunge na popo tonge kinie
uluri naa temba.”
nirimu kanumu. 8Pulu Yemone “Teai.” nirimu ungu manema munduku kelkolie anda kolepalimene “Teai.” niringi mele mindi ambolko molemele.” ˻nimbe Yesusini˼ nirimu.
9˻Yesusini˼ ungu mare pea enendo nimbendo: “Enenga anda kolepalimene “Teai.” niringi mele pilku liku tengendo Pulu Yemone “Teai.” nirimu ungu manema bulu silimele mele papu telemeleye? 10Akumunge Mosisini nimbendo:
“Aminieli lanielinge unguma pilku liku,
liku ai siku teai.”
nimbe
“Yambo tene yunge anumundu molo lapando
ungu te nimbe kenjipe iri tomu liemo
kanu yambomo toko konjengi.”
nirimu kanumu. 11Nakolo ene yemane ningindu: “Ye tene yunge anumu lapatolondo nimbendo: “Nane elte mele mare lipu taponjipu silkema koronga ‘Pulu Yemo simbu.’ nimbu panjirindu kanumunge elte manda naa lipu taponjipu simbu.” nimbelie 12yunge anumu lapatolo naa lipe taponjimbe kinie papu.” ningu mane silimele. 13Aku siku mane silimele ungumuni ‘Anda kolepalimene mane siringi ulu puluma olandopa.’ ningu ‘Pulu Yemone nirimu ungumu uluri molo. Manie pupili.’ nilimele. Enene ulu lupe lupe aisili aku siku teko molemele.” nirimu.
14Aku nimbelie Yesusini maku toko moloringi yambomando “Na moliona wai.” nimbelie enendo nimbendo: “Nane ˻aku nikirumunge ungu te˼ nimbú tekero ungumu enene pali komu tenjiku ungumunge pulumu pilku konjeyo. 15Yambomanga kangine ulsukundu lepalie kerena pupe olona suku pulimo meltene ˻Pulu Yemo manda popo tonge aulkemo pipi silimo˼ kalaro te manda naa monjilimo. Yambomanga konopuna sukundu pepalie wendo olemo ulumane mindi yamboma kalaro monjilimo. 16(Yambo komu peo lemba yamboma i ungumu mimi siku piliengi!” nirimu.)
17Kanuna maku toko moloringi yamboma Yesusini mundupe kelepa ulkena suku purumu kinie yu lombili andolimene yu walsiku pilkulie ningindu: “Aku ungu ikumunge pulumu nambolkanje? Ningu para sieni.” niringi kinie
18-19Yesusini enendo nimbendo: “Kinié kepe naa pilkimiliye? Yambo tenga kangine ulsu lepalie sukundu pulimo melte yunge konopuna naa pupe, olona suku pupe ulsu omba le muruna kamu pulimomonga yu kalaro manda naa monjilimo mele naa pilkimiliye?” nirimu. (Yesusini aku sipe nirimumunge “Langimene pali yamboma kalaro te naa monjilimo.” nimbendo nirimu.)
20-21˻“Kerena sukundu pulimo melemane aku sipe uluri naa telemo.” nimbelie˼ yuni kelepa nimbendo: “Yambo tenga konopuna sukundu pepalie wendo olemo kanu melemane yambo te ˻Pulu Yemo popo tomba aulkemo pipi silimo˼ kalaro te monjilimo. Ulu pulu kerime ou konopumuni pilkulie ˻pe kamu telemelemonga˼ “Konopuna pepalie wendo olemo melemane kalaro monjilimo. ˻We naa telemele.˼” ˻nikiru.˼ Kanu melema i sipe:
konopumuni ulu kerime pilimele;
wa ulu kerinele lupe lupema andoko telemele;
wa nolemele; yamboma toko konjilimele;
ambo ye pulime molo ye ambo lilime yambo lupema kinie ulu kerinele telemele;
22yambomanga mele nosilimelema ‘Na liembo.’ nilimele;
ulu pulu keri lupe lupema telemele; kolo tolemele;
yambomane kanokolie pipili kolemele uluma pipili naa kolko sumbi siku telemele,
yambo lupema molemele mele kepe enenga melema yama mengo ‘Yu malo.’ konopu lemele;
‘Yamboma pipili kolko molko kenjengi!’ ningu ungu bulkundu ninjilimele;
‘Na imbi ola molemo. Na pilipe konginjili olandopa pelemo. Yambo lupema tondolo te naa pelemo.’ ningu kara pulimele;
kekelepa toli uluma telemele;
ulu pulu akuma pilku telemele. 23Aku ulu pulu kerime pali yambomanga konopuna sukundu pepa wendo olemomane yamboma ˻Pulu Yemonga kumbikerena pungí aulkemo pipi silimo˼ kalaro monjilimo. ˻Ulsu lepa olona pulimo melemane uluri naa telemo˼.” nirimu.
24Kanu kinie Yesusi molorumu kolea ˻Geneserete˼ mundupe kelepa ˻Juda yamboma moloringi kolea Gallilli disiriki ulsukundu˼ kolea aili Taya kinie Saidonotolo lerimu koleana sukundu purumu. Akuna purumu kinie yu ‘Yamboma na naa kanangi.’ nimbe ulke tenga sukundu pupe molorumu nakolo yu omba molorumu mele yamboma piliringi. 25-26Yesusi yu omba molorumu akumu pilipelie ambo te yu molorumuna sumbi sipe omba yunge kumbikerena manie molopa tamalu perimu. Kanu ambomo yu ˻Pulu Yemonga˼ Juda yambomanga talapena ulsukundu ambo te, kolea Siria poropinji sukundu kolea Ponisia disiriki yunge pulu koleamo. Ambomonga lemenunge konopuna kuru te molopa ambolorumuna Yesusi molorumuna omba manie molopa tamalu pepa yundu mawa tepalie nimbendo: “Nanga ambolamo kuru te konopuna sukundu molemo kene yu ˻kondo kolko˼ kurumu toko makoroi.” nirimu.
27˻Ambomo yu ambo lupe, Juda ambo te molo, nimbe kanopalie˼ Yesusini ambomondo ˻ungu iku te topalie˼ nimbendo: “Ambolangoma langi ou nangi olo tepili. Enenga langime lipu owama simulú kinie kapola naa temba.” nirimu.
28Ambomone yundu nimbendo: “Ailimu, sike nikinu nakolo owamane kepe ambolangomanga langi pundu manie pulimoma liku nolemele kanumu.” nirimu.
29Kanu kinie Yesusini yundu nimbendo: “Ambomo, nu aku siku nikinumu papu nikinu. Aku siku nikinumunge kuru kanumu nunge ambolamonga konopuna sukundu molopa omba wendo pumu kene nu ˻konopu wayongo siliku˼ pui.” nirimu. 30˻Yesusini aku sipe nirimu pilipelie˼ ambomo kelepa ulkendo pupe kanorumu kinie lemenu konopuna kuru te naa molopili uru peli polona ola we molorumu kanorumu.
31Yesusi kolea aili Taya mundupe kelepa kolea aili Saidono sukundu omba pupe, ‘Kolea Aili Rureponga Talo’ niringi koleana sukundu omba pupe, nomu Gallilli kélona ˻sukundu˼ orumu.
32Akuna moloringi yambomane yu molorumuna ye komu sipe ungu sumbi sipe naa nirimu ye te mengo ongo “˻Yu konde pupili˼ nunge kimuni amboloi.” ningu tondolo munduku mawa teringi.
33Kanu kinie yambo kakapu teko moloringime mundupe kelepa “Oltolo molambili.” nimbe kanu yemo tenga memba pupelie nirimumuni, komutolonga ki sundu suku mundupe, lkambe topa yemonga alimbelumu kimuni ambolopalie, 34mulúna olando sipe kanopa, tondolo mundupe múlu lipe, Juda yambomanga ungu lepa yemondo nimbendo: “Epata!” nirimu. (Kanu ungumunge pulumu “Komumuni pilí!” nirimu.) 35Aku nirimu kinie tamburembu yemo komu peo lepa yu ungu kapola pilipe, alimbelumu takele terimu kanumu pe nimbe umbu alimbelu angilirimu kinie yu ungu sumbi sipe nirimu.
36Kanu kinie Yesusini enendo tondolo mundupe nimbendo: “Nane i ulu tekero mele anju yambo telurindu kepe paa naa ningu siei!” nirimu. Nakolo yu “Molo.” nimbe karaye terimu mele ta ningu anju yamboma yuni terimu mele temane toko siliku mindi andoringi. 37˻Yu terimu mele kanoringi yamboma kinie, anju temane toko siringi piliringi yamboma kinie˼ ene paa mini wale munduku suru ningulie ningindu: “Apa! Yu telemo uluma peangama mindi telemo. “Komu silimoma ungu pilku, ungu naa nilimelema ungu ningu, teai.” nilimo kinie kepe unguma pilku unguma ningu telemele.” niringi.
Terpilih Sekarang Ini:
Mako 7: ubuN
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1995, Wycliffe Bible Translators, Inc. All rights reserved.
