Matyu 2
2
Ande umara iro pirpogl singwa yomba wu Yesus kanigwa
1Herot king moglkwa enge igle#2:1 King Herot i we ye Judia sugl mogltre te distrik tau Judia kamun magl yei eingwa i akiye sugl moglkwa. Herot king moglmara ba ye Rom king kande moglko ye atne kra moglkwa. Ana kingmo kande i kangiye Sisa. Judia taun Betlehem kamun igle Maria Yesus kugl yongwa. Yesus kugl yongwa moglko, ande umara iro pirpogl singwa yomba ye wu Jerusalem undre ana krapogl yegl dingwa, 2“Juda yomba ene kingno, gak kuglambu i aglo moglme? No ande umara iro kugl-kurimo kandre, ana no dembiye karaugl ere tenamnedi pre umga.”
3Yegl digo King Herot ka i pirtre kinde prukwa, te Jerusalem yomba ye bogl akiye meglkwa i prapra pirkwa. 4Ana Herot eremogl pris kande wagle ya te lo beke teingwa yomba dimakaisi krapogl prukwa, “Yomba ere-inambuka yagle ye morambe dingura i kamun aglo morambedi dune?” 5Ana ye yegl diteingwa, “Betlehem kamun Judia makan. Propet ka yegl muno boglko pangwa. 6God yegl dungwa,
“‘Betlehem kamun ene,
Juda makanomugl, sugl
meglkwa yomba kamuno
yongwa ye mina ene atne
kaima ta moglkitnga.
Ene mina king ta morambuka
ye na yombanma Israel sugl morambuka.’”#Maika 5:2
7Yegl digo Herot pirtre ana ye ande umara iro pirpogl singwa yomba wingwa ikra uglmange ere di-indre kugl-kuri wu nongugl ongwa engemo i kirendi dipera ere prukwa. 8Ana yegl ertre Betlehem kamun enaglme dungwa,#2:8 Betlehem kamun i Jerusalem yomara i eglke ta yeikrukwa. Yoko 8 kilomita mereyegl, yongwa. “Ene pi wakai ere doko gak kembra kaniyo, ana kanimbi kade wu na di narimbi na ama pi kan dembiye karaugl eretenaglka.”
9Ana king kamo pirtre okuwo ye ende eingwa, ye pi konbo ande umara iro kugl-kuri kanigwa ikra aglke wu nongugl pi okuna yeite pipi gak giglte moglmara yungu igle mitna kogl gidi pangwa. 10Ye kugl-kuri pango kandre gun kandekinde kaima yeingwa. 11Ye ende yungugl pi gak giglte mam Maria bogl miurko kandre ana mangidi goglkuno bondugl dembiye karaugl ereteingwa. Yegl ere pandigl ana gagl bona yauro gol ya, kungo ya te paura demine orkwa i munduwo argan pre teingwa. 12Ana God uglkumbu mina ye ende ikine Herot moglmara pikriyo ditongo, ana ye konbo pereta ende ikine yungunomugl eingwa.
Josep ya Maria wano bogl teke ende Isip kamun eingwa
13Pirpogl singwa yomba ikra endpi endeingo, ana Josep ugl pamara Yaglkande angelomo wu uglkumbu mina yegl dungwa, “Ene andigl gak kembra mam bogl auro imin teke ende Isip makan piyo. Igle pi mogl paimbi na ka aglketa ene ditenaglka, sraglpre Herot ye gak kembra doko kan indre sigoragle dungwa.”
14Yegl ditongo, Josep ye enduwer andigl gak kembra mam bogl auro yungo, teke ende Isip eingwa. 15Ye Isip mogl paingo Herot goglkwa. Ana propet ye Yaglkande kamo ta dungwa i paiyungwa. Ye yegl dungwa, “Na wana Isip makan moglko aglendi menda endiga.”#Hosea 11:1
King Herot dungo gak kembra merkinde sigeglkwa
16Enge igle King Herot yegl prukwa, ande umara yomba ye kakimbi ditendre ende eingwa ipre ye dem pond kumbrukwa. Yeglpre yomba diendungo Betlehem kamun kande ya kembra winambodi yagl gak kembra buglayungu suwo mogl ende atne wingwa i sigogl kondingwa. Sraglpre, Herot eremogl yagl gak buglayungu suwo neingwa sigolo dungwa i okuna kana nomano pai pogl sungwa yomba ye kugl-kuri koglkwa engemo i ditengo ye prukwa pre yegl orkwa. 17Yegl erikwa i propet Jeremaia ka ta dungwa pangwa i paiyungwa:
18“Rama dumo kande suna
kai kaglkane kande ere
tembrumba yei meglkwa.
Resel ye nangiglma wagle
kaino orkwa, ye dem
munduwo siyau dinamune
dingwa ba ye manedi prukwa,
sraglpre, ye nangiglma prapra gogl kondingwa.”#Jeremaia 31:15
Josep embiye ya wam bogl ende ikine Nasaret wingwa
19Herot goglko ana Yaglkande angelomo ye Isip makan iro Josep uglkumbu mina wu nongugl pi tongwa. 20Angelo yegl di Josep tongwa, “Ene andigl gak kembra mam bogl auro imin ende ikine Israel makan enaglmiwo. Yomba gak kembra sigoramune dingwa yombamo ikra gogl kondingwa.”
21Yegl dungo, Josep andigl gak kembra mam bogl auro yungo ye ende ikine Israel makan eingwa. 22Ba Josep yegl di prukwa. Arkeleas ye nem Herot wu suglosi Judia kingno moglkwa yeglpre Josep igle enambuka kundugl goglkwa. Ba God uglkumbu mina ye ka ditongwa pre ende Galili makan taun eingwa.#2:22 King Herot goglkwa enge Rom wagle eremogl ye dumo makan sugl moglkwa i yumbusi wama teingwa. Arkeleas Herot wam moglkwa ye distrik Samaria ya distrik Judia king moglkwa. Ye buglayungu 10 king igle moglkwa. 23Ye endpi taun ta kangiye Nasaret we dimara igle meglkwa. I propet ka dingwa pangwa i paiyungwa, “Ye Nasaret nem we dinaglkwa.”
Terpilih Sekarang Ini:
Matyu 2: kue
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2008, Wycliffe Bible Translators, Inc. All rights reserved.
