Lucas 23

Is Ked-imbistigaha ni Pilatu ki Jesus

(Lucas 23:1-5; Mateo 27:1,2,11-14; Marcos 15:1-5; Juan 18:28-38)

1Ne zutun, haazà is langun he menge punuan he nengetig̵um dutun, ne mid-uwit dan si Jesus diyà te ki Gubirnedur Pilatu su wey zin mehukumi. 2Ne hein nekeuma zan dutun ne impezineg dan ki Pilatu is menge sumbung dan. Ke sikandan te, “Midsusi zey heini is etew ne netuenan dey he edsinamuk kayi te inged tew su ibpeengked din is menge etew he ebayad te vuhis diyà te lavew he hadì tew ziyà te inged he Ruma. Ne kenà duen dà taman su egkeg̵iyen din he iyan sikandin si Kristu, he ke và dà egkeg̵iya, hadì.” 3Ne si Pilatu, mid-insaan din si Jesus te, “Hadì ke ve te menge Hudiyu?” Ne midtavak si Jesus te, “Uya, iyan is migkag̵i nu.” 4Ne zutun migkag̵i si Pilatu ziyà te menge punuan he memumuhat wey menge etew te, “Wazà netuenan ku he engayan he idsiluti kayi te etew,” ke sikandin. 5Iyan, nasì nememensag is menge etew zutun he egkag̵i te, “Edsinamuk is menge etew he ebpemineg te menge penurù keniyan! Mibpuunan din is kebpenurù din diyà te prubinsya he Geliliya ne midtukid din daan is menge inged dini te prubinsya he Hudiya, Ne g̵untaan, dini en maan sikandin te Hiruselim.”

Is Ked-imbistigaha ni Hirudis ki Jesus

6Ne hein nezineg ni Pilatu heini ne mid-insà sikandin te, “TigGeliliya ve heini is etew?” 7Ne midtavak dan te, “Uya, tigGeliliya heeyan.” Ne hein netuenan din he sakup si Jesus te prubinsya he ebeyveyaan ni Hirudis ne impeuwit din si Jesus diyà te ki Hirudis. Su neserengà he zutun daan si Hirudis te Hiruselim. 8Ne si Hirudis, ne utew nesuatsuat hein neehè din si Jesus su neug̵et dà he egkesuatan din si Jesus te ed-ahà. Egkesuatan din he meehè din is menge egkein-inuwan he nezineg din he ebpemeelan ni Jesus. 9Ne zutun mezakel is menge insà ni Hirudis ki Jesus, iyan, wazà si Jesus medtavak. 10Ne zutun, haazà is menge punuan he menge memumuhat wey is menge menunudlù te kesug̵uan, ne mid-uvey zan ne utew meinit is gehinawa zan te kedsumbunga zan ki Jesus. 11Ne zutun si Hirudis wey is menge sundaru zin, ne mibaleyvaley zan si Jesus ne mid-eled-eled dan sikandin. Ne midsun-uzan dan te meupiya he bisti su uvag kun hadì, ne zutun impelikù dan diyà te ki Pilatu. 12Ne iyan haazà andew te kebpeked-emig̵u ni Pilatu wey si Hirudis su zutun te nengehuna he timpu ne kenà meupiya is kedepitè dan.

Is Kedhukumi ki Jesus te Kemetayen

(Lucas 23:13-25; Mateo 27:15-26; Marcos 15:6-15; Juan 18:39–19:16)

13Ne hein diyè en maan si Jesus te ki Pilatu ne midtig̵um ni Pilatu is menge punuan he memumuhat wey is menge ebmeg̵urangen te menge Hudiyu wey is menge mezakel he etew. 14Ne ke sikandin diyà te kandan te, “Heini is etew he in-etuvang niw kayi te kedì, migkag̵i niw he edsinamuk sikandin te inged tew, iyan, mibpurungan ku sikandin susiya kayi te etuvangan te langun te sikiyu ne wazè ku egkeahà he salè din. 15Ne si Hirudis daan, wazè din egkeahà he salà kayi te etew su impelikù din kayi te kedì. Wazà iyan ulaula kayi te etew he zait he idhimetayi kandin. 16Ne ibpevug̵el ku zà sikandin ne ibpeg̵awas ku en.” 17Ne iyan ingkekeg̵iya kayi ni Pilatu su neleyaman te menge Hudiyu he kada egketuman haazà is Pista te Kedlevayi ne kinahanglan he ibpeg̵awas ni Pilatu is sevaha he pirisu he Hudiyu. 18Ne hein nezineg te mezakel he etew haazà is migkag̵i ni Pilatu ne mibpememensag dan te, “Ipehimetayi nu heeyan he etew, ne iyan nu ipeg̵awas si Berabas!” 19Ne heini si Berabas, ne iyan ingkepirisu zin su impepekidtebek din te gubirnu is menge etew ne kenà dutun dà taman su nekevunù daan sikandin te etew. 20Ne si Pilatu, ne iyan din egkesuatan he iyan ibpeg̵awas si Jesus, ne mid-uman sikandin med-insà diyà te nengetig̵um he menge etew ke hengkey is egkesuatan dan, 21iyan, nasì mid-iseg sikandan mebpememensag he egkag̵i te, “Iransang te krus! Iransang te krus!” 22Ne migkag̵i si Pilatu te iketelu, ke sikandin te, “Maan? Duen be mezaat he mid-ulaula zin? Wazè ku man egkeahà he salà he zait he idhimetayi kandin. Ibpevug̵el ku zà ne ibpeg̵awas ku en.” 23Ne zutun mid-iseg is kebpememensag dan he ibperansang dan si Jesus diyà te krus. Ne hein neug̵et kenè en ebpeketigker si Pilatu, 24ne midtug̵ut sikandin he idransang si Jesus te krus. 25Ne zutun midlibri ni Pilatu si Berabas he mibpirisu tenged te kedsinamuk din wey kebunua zin te etew. Ne si Jesus, insug̵ù en ni Pilatu he meulaula ziyà te kandin is egkesuatan te menge etew.

Is Kedrensanga ki Jesus Diyà te Krus

(Lucas 23:26-43; Mateo 27:32-44; Marcos 15:21-32; Juan 19:17-27)

26Ne zutun migkuwa zan si Jesus ne migenat dan su ed-uwiten dan pehendiyà te g̵awas dutun te inged. Ne ziyà te zalan nesinug̵ung dan is etew he tigSirini he egngezanan ki Simon. Heini si Simon, diyà ebpuun te unayan ne edhendiyà te inged. Ne mibpeg̵es dan ipetiang dutun te krus he edtiangen ni Jesus.

27Ne zutun te ked-uwita zan ki Jesus, utew mezakel is menge etew he nemenduma. Ne zuen dutun menge vahi he ebpemenlelendag su edsineg̵awan dan si Jesus. 28Ne midlilingey si Jesus diyà te kandan ne migkag̵i te, “Sikiyu is menge vahi he tigHiruselim, kenà a iyan keniyu sineg̵awi, kekenà, iyan niw sineg̵awi is egkeulaula niw wey te menge anak niw. 29Su egkeuma is andew he egkehitavù kayi te keniyu is dekelà he kemeresayan. Ne zutun egkag̵i is menge etew he utew zeyzey sikan is bahi he wazè din anak wey wazà edleg̵imuwen. 30Ne zutun he timpu egkeg̵iyan te menge etew is menge vuntud te, ‘Ketempag̵i key.’ Ne egkeg̵iyan dan daan is menge vuvungan te, ‘Bumbuni key.’ 31Su,” ke si Jesus diyà te kandan te, “emun iyan heini ed-ul-ulahan dan kedì te iring te kayu he wazà meg̵angu su wazà mulà kedì he salà, ne edhuna pa kayi is ed-ul-ulahan dan keniyu te iring te kayu he neg̵angu en.”

32Ne zuen daan dutun dezuwa he tulisan he ed-uwiten dan su edhimetayan dan duma ki Jesus. 33Ne nekeuma zan dutun te vuvungan he egngezanan te Tulan te Ulu ne zutun dan iransang si Jesus te krus ne inransang dan daan haazà is menge tulisan te zezuwa zaan he krus. Impasek dan is sevaha he krus diyà te egkekewanan ni Jesus, ne is sevaha, impasek dan diyà te egkeg̵ivang din. 34Ne zutun te kemulu zan pa idransang si Jesus, ne mid-ampù sikandin diyà te Megbevayà, ke sikandin te, “Amey ku, peseyluwa nu sikandan su wazè dan metueni ke hengkey heini is ed-ul-ulahan dan.” Ne zutun, haazà is midransang kandin, midripa zan ke hentei is ebpekeangken te menge ugelingen ni Jesus. 35Ne is menge etew, ne ebpemenhitindeg dan dutun he ebantey; ne is menge punuan te menge Hudiyu, ne ed-undaunda kandin, ke sikandan te, “Wey zè be! Nelibri zin is duma; ne emun tutuu he iyan sikandin sikan is hadì he mibpilì te Megbevayà, ed-ahaan ta ke egkelibri zin is keugelingen din.” 36Ne kes menge sundaru zaan, ne ebpen-undaunda zaan kandin. Mid-uvey zan diyà te kandin su ibpeinum dan te vinu. 37Ne ke sikandan te, “Emun tutuu iyan he hadì ka te menge Hudiyu ne libriya nu is keugelingen nu!” 38Ne impezeket dan is surat te zivavew zin diyà te krus he edhenduen haazà is surat te, “Iyan heini sikan is Hadì te menge Hudiyu.”

39Ne is sevaha zutun te zezuwa he tulisan he inransang diyà te pesikilizà ni Jesus, ne edsumpalit en daan kandin. Ke sikandin te, “Emun tutuu iyan he iyan ka sikan is hadì he mibpilì te Megbevayà ne hante kun be iyan, libriya nu is lawa nu keniyan ne libriya key zaan kenikew.” 40Ne haazà is sevaha, ne migkeg̵iyan din haazà is duma zin te, “Maan is egkag̵i ka te iring keniyan? Wazè nu ve kegkehandek te Megbevayà? Sikitew is tetelu, ne pudu kiw ebpatey kayi, 41iyan, sikita is dezuwa, ne engayan en he edhimetayan ki su id-ulì dini te kenita is kelelalung ta. Iyan, heini he etew mulà, ne wazè nehimu zin he mezaat.” 42Ne zutun migkeg̵iyan din si Jesus te, “He Jesus, kenà a kenikew lipati zutun te kedhadì nu en keuzemà.” 43Ne migkag̵i si Jesus diyà te kandin te, “Benar heini is egkeg̵iyen ku kenikew he g̵untaan dà ebpezumehè ki zutun te inged te edtulusen.”

Is Kebpatey ni Jesus

(Lucas 23:44-49; Mateo 27:45-56; Marcos 15:33-41; Juan 19:28-30)

44Ne hein neudtu is andew zutun ne midtik-ew mebmerusirem is tivuuk he kelibutan seled te menge tetelu he uras. 45Ne zutun te iyan daan haazà he uras, kes utew mekepal he manggad he ingkurtina zuen te simbahan he Valey te Megbevayà, ne netik-ew mevindas diyà te liwezaan. 46Ne zutun ne migkulahì si Jesus is egkag̵i te, “Amà, ibpeg̵ewezan ku en kenikew is gimukud ku.” Ne iyan dà haazà ne naawà is gehinawa zin. 47Ne zutun, sikan is kepitan te menge sundaru zutun, hein neehè din heini is neulaula ne nekezalig te Megbevayà, ke sikandin te, “Tutuu ves iyan he wazà mezaat he ulaula kayi he etew!” 48Ne haazà is menge etew he nengevurun dutun su ebantey zan, ne hein neehè dan haazà is neulaula, mid-ulì dan he utew memeveg̵at is gehinawa. 49Ne is langun he menge emig̵u ni Jesus, ragkes is menge vahi he nemendumazuma kandin he ebpemuun te Geliliya, ne ziyè dan te malù meziyù is ebantey zutun te langun he neulaula.

Is Kedlevenga ki Jesus

(Lucas 23:50-56; Mateo 27:57-61; Marcos 15:42-47; Juan 19:38-42)

50,51Ne zuen sevaha zutun he etew he egngezanan ki Jose he meg̵inged diyà te inged he Erimetiya he ziyà te prubinsya he Hudiya. Heini si Jose, ne metazeng he etew ne telehuzen daan. Sevaha sikandin te menge Hudiyu he edtag̵ad te kedhadì te Megbevayà dini te kelibutan. Sevaha zaan sikandin te menge zatù te menge Hudiyu, iyan, wazà sikandin mekeuyun te kedhimetayi ki Jesus. 52Ne heini si Jose, ne midhendiyà sikandin te ki Pilatu ne midhangyù din he egkuwaan din is lawa ni Jesus; ne intug̵ut kandin ni Pilatu. 53Ne migkuwa ni Jose haazà is lawa ni Jesus ne mibukusan din te malung he meputì. Ne zuen surung he penlevengà he ingkalut diyà te kelendig̵an he pag̵ang he wazè pa meselezi te minatey. Ne zutun iseled ni Jose is lawa ni Jesus. 54Mahapun en haazà dutun te andew he Birnis ne emun edsanlep en dutun is andew ne iyan puunà te Andew te Kedhimeley.

55Ne sikan is menge vahi he ebpemuun diyà te Geliliya he nemenduma ki Jesus, ne miduma zan ki Jose te edleveng dutun te lawa ni Jesus. Ne neehè dan is midsevukan ki Jesus dutun te penlevengà. 56Ne zutun mid-ulì dan su ed-endamen dan is menge mehemut he sulù wey lana he idhaplas te lawa ni Jesus.

Ne zutun te Andew te Kedhimeley, wazè dan mebaal su edtumanen dan is insug̵ù dutun te kesug̵uan he imbilinbilin kandan.

Terpilih Sekarang Ini:

Lucas 23: mbbNT

Highlight

Kongsi

Salin