Lucas 21

Is Halad Duen te Valu he Vahi

(Lucas 21:1-4; Marcos 12:41-44)

1Naahà ni Jesus is menge sepian he etew he ed-ulug te halad dan diyà te teleg̵uey te halad he selapì. 2Ne naahà daan dutun ni Jesus is sevaha he vahi he valu he utew egkeayuayu ne iyan dà in-ulug dutun te vahi is dezuwa he sintabus. 3Ne migkag̵i zutun si Jesus diyà te menge zuma zin te, “Benar is egkeg̵iyen ku he heeyà is balu he vahi, ne sumalà is ked-isipa te Megbevayà, utew lavew is inhalad din te langun he inhalad kayi te zuma he menge etew, 4su is menge zuma he nemenhalad kayi, subra zà te ketig̵eyunan dan is inhalad dan, iyan, heeyà is egkeayuayu he vahi, minsan pa te edlisedlised sikandin te igkeuyag-uyag din ne inhalad din is namànamè en he ketig̵eyunan din.”

Is Egkeuma he Menge Pesipala

(Lucas 21:5-24; Mateo 24:1-28; Marcos 13:1-23)

5Dutun te menge zuma ni Jesus duen egkag̵i ziyà te kandin he utew mekempet haazà is simbahan he Valey te Megbevayà su mideyzeyanan pinaag̵i te menge mahal he menge vatu he imbevaley zutun wey pinaag̵i te utew meupiya wey mahal he menge inhalad te menge etew ziyà te Megbevayà. Ne zutun migkag̵i si Jesus te, 6“Egkeuma is andew he langun kayi te egkeehè niw ne egkezeetan. Wazà keuzemà minsan sevaha he vatu he ebpekeuntud diyà te sevaha su egkewag̵ey heeyan is langun he vatu; wazà egkesamà keniyan te nesevukan din su is langunlangun keniyan ne egketempag.”

7Ne mid-insaan dan si Jesus, ke sikandan te, “Datù, keg̵iyi key ke keenu egkehitavù heini is langun wey ke hengkey is egkeulaula he tuus he iyan en timpu he egketuman heini is langun he migkag̵i nu g̵eina?”

8Ne midtavak si Jesus te, “Mebpekevantey kew wey kew kenà mekesundan te teruen he etew su mezakel is ebpemenlepew he egamit te ngazan ku he egkag̵i is kada sevaha zutun he iyan sikandin sikan is mibpilì te Megbevayà he ibpahadì. Ne egkag̵i zaan te, ‘Iyan en heini timpu te kedlimasa te Megbevayà te menusiyà,’ ke sikandan. Iyan, kenè niw tuuwi su tarù. 9Ne emun egkezineg niw ziyà te uvey niw is meg̵urub tenged te g̵ira ne egkezineg niw zaan is tudtul te menge g̵ira ziyà te meziyù he tanà ne kenè kew mahandek su kinahanglan he egkeulaula is iring kayi, iyan, kenà iyan heini tuus he egketapus en heini is timpu.” 10Ne mid-uman megkag̵i si Jesus te, “Su ebpekidtebek is sengeinged te zuma zin he inged, ne egira is sengeg̵inhedian te zuma zin he g̵inhedian. 11Egkehitavù diyà te minsan hendei is menge mezesen he linug wey mepait he vitil ne ziyà te mezakel he menge inged ebpekeeneb is daru. Ne zuen egkeehè niw he utew igkeinuinu wey mekehandekhandek he singyal he ebpuun te langit.

12Iyan, kayi te kenè pa heini egketuman ne edekepen kew te menge etew ne ebpesipelahan kew zan. Ibpeetuvang kew zan te menge punuan te menge simbahan te menge Hudiyu ne egkestiguwen kew zan. Ibpeetuvang kew zaan te menge hadì wey menge gubirnedur tenged te kedsundan niw kediey. 13Iyan en heini paag̵i te kebpekepesavut niw te Meupiya he Tudtulanen. 14Heg̵eta niw is isip niw he zaan he kenè kew mesemuki ke hengkey is idtavak niw te menge insè dan keniyu. 15Su iyan e en metau te idtavak niw te menge insè dan. Ne ibeg̵ey ku zutun keniyu is ketau te ked-isip-isip wey kew meketavak. Ne zutun haazà is menge kuntada niw, kenè dan ebpeketavak te ketezengan niw ne kenè dan daan ebpekepeg̵intarù te tutuu he egkeg̵iyen niw. 16Ne zutun he timpu minsan is menge g̵inikanan niw, is tempezè niw en te pused, is menge kezuzumahi niw, wey is menge emig̵u niw, ne ebpalad dan keniyu ziyà te menge hukmanan. Ne zuen duma keniyu he egkehimetayan dan. 17Egkuntedahan kew te langun he menge etew tenged te sumusundan ku sikiyu. 18Ne minsan pa zutun, wazà egkelaga ziyà te keniyu. 19Hamen kew is edsarig kediey su pinaag̵i kayi egkeangken niw is untung he wazà pidtemanan.”

20Ne mid-uman megkag̵i si Jesus te, “Ne emun egkeehè niw heini is inged he Hiruselim he egkelingutan en te menge kuntada niw he sundaru ne egketuenan niw he meg̵aan en egkezeeti. 21Ne zutun, sikan is menge etew he zini te prubinsya he Hudiya, ne mebpelag̵uy zan pehendiyà te menge vuntud. Ne is menge etew kayi te inged he Hiruselim, ne kinahanglan he mebpelag̵uy zan daan. Ne sikan is menge meg̵inged te menge unayan dini te uvey, ne kenè dan med-aput dini te inged. 22Su iyan en haazà sikan is timpu he netagnà dengan he zutun edsilutan te Megbevayà is menge kuntada zin he etew. Ne insurat heini zuen te ebpemeneuven dengan te Megbevayà. 23Ne zutun he andew, kehizu utew te menge vahi he memeg̵ingey wey ebpemenleg̵imu su utew zan egkengereg̵enan he ebpelag̵uy! Utew gerabi he kemeresayan is egkehitavù kayi te inged su edsilutan en te Megbevayà is menge Hudiyu. 24Su heini is menge Hudiyu, is duma kandan, ne egkepatey zutun te g̵ira, ne is samà, ne edekepen ne ed-uwiten diyà te menge meziyù he inged. Ne zutun, heini is Hiruselim he inged te menge Hudiyu, ne edtekutakan te menge etew he kenà menge Hudiyu taman te ebpengelinteuwan te Megbevayà he mekeengked dan.

Is Kedlikù ni Jesus

(Lucas 21:25-33; Mateo 24:29-44; Marcos 13:24-37)

25Ne zutun duen egkeehè niw he singyal ziyà te andew, vulan, wey menge vituen. Ne zini te kelibutan ne ebpekehuyab is gehinawa te tivuuk he menusiyà su egkezineg dan dutun is utew subra he kedselenuhug te zag̵at wey ebpemeteltelukuney he menge zezekelà he vag̵el. 26Ne zuen en dutun menge etew he egkengevidtawan te kegkehandek su egkengeseeng ke hengkey en is egketemanan te langun he ebpeebuten he egkengehitavù dini te kelibutan su egkengehuyung is minsan hengkey he merayag diyà te langit. 27Ne zutun, siak is Kakey te Menusiyà, egkeahà a ziyà te menge g̵apun is ebpekeuma he utew zekelà is gehem ku wey utew merayag is ked-anlag ku. 28Ne emun egkepuun en heini egkengetuman is langun he migkag̵i ku, ne andam kew wey keg̵alew kew su meg̵aan en is kedlibriya keniyu te Megbevayà.”

29Ne impezineg kandan ni Jesus is sempità, ke sikandin te, “Isipa niw is menge kayu, lavew en is kayu he igira 30su zini te kenita emun ebpeneringsing en is subpang din ne ebpenlumbey en, egketuenan ta he meg̵aan en is gulavung. 31Ne iring din ded daan, emun egkeehè niw he egkengetuman en is langun kayi, egketuenan niw he meg̵aan en is kedhedii te Megbevayà te menusiyà. 32Tenuzi niw is egkeg̵iyen ku keniyu he emun egkeehè niw he egkengetuman en heini, kenè kew pa egkeamin ebpatey taman te kenè pa egkengetuman heini is langun. 33Egkehanew is langit wey tanà, iyan, is migkag̵i ku, ne kenà mulà egkehanew te minsan keenu.”

34Ne ke si Jesus te, “Uram kew wey kew kenà kayi zà egketaman te kegkebibu wey kebpemenginum wey te kedlag̵ud niw te menge kelibutanen he menge kinahanglan niw. Su emun kenè kew ed-uram ne egketik-awan kew egkesaut te andew te kedlimasa te Megbevayà te menusiyà. Ne egkeiring kew te egketelebpì he rumat. 35Su iring keg̵aan kayi is kegkeuma kayi te andew te tivuuk he menusiyà. 36Umba, mebpekevantey kew, ne layun kew ampù, su pinaag̵i zà te ked-ampù ne edlig-enan kew te Megbevayà ne kenè kew egkekeizan kayi te langun he egkengeseg̵azan niw, ne human kenè kew zutun egkeeled ke ebpekeetuvang kew kedì,” ke si Jesus. 37Ne kada andew zutun ne ebpenurù si Jesus diyà te simbahan he Valey te Megbevayà. Ne te kada mezukilem ne edhendiyà sikandin te vuvungan he egngezanan te Ulivuwan su zutun sikandin edhizeg̵à. 38Ne is langun he etew zutun te inged, ne edselemselem dan edhendutun te Valey te Megbevayà su ebpemineg dan te menge penurù din.

Terpilih Sekarang Ini:

Lucas 21: mbbNT

Highlight

Kongsi

Salin