Juan 4

Sikan is Bahi he TigSemarya

1-3Nezineg te menge Perisiyu is tudtul he mezakel is nengehimu ni Jesus he menge sumusundan wey mezakel is nengebewtismuwan ni Jesus kenà te ki Juan; asal wazà iyan si Jesus mebewtismu, kekenà, iyan is menge sumusundan din. Ne hein nezineg daan ni Jesus haazà he tudtul, mid-awà diyà te prubinsya he Hudiya ne mid-ulì diyà te prubinsya he Geliliya. 4Ne zutun te ked-ulì eni Jesus, kinahanglan he ziyè dan ebpekevayà te prubinsya he Semarya.

5Ne nekeuma zan diyà te sevaha he inged diyà te Semarya he egngezanan te Sikar he uvey te tanà he imbeg̵ey zengan ni Hakub diyà te anak din he si Jose. 6-8Ne zutun daan sikan is kalut he mibeelan dengan ni Hakub, ne si Jesus, geina te utew neveley te kedhipanew zin, mibpinuu zutun te uvey te kalut. Ne zutun neudtu is andew. Wazè din duma su is menge sumusundan din, midhendiyè dan te inged su ebpemasa te egkeenen. Ne zuen nekeuma zutun he vahi he tigSemarya su edsekezu ne migkeg̵iyan sikandin ni Jesus te, “Bayi, ipeinum e kun.” 9Ne migkag̵i haazà is bahi te, “Hudiyu ka ne siak, tigSemarya a. Maan is ebuyù ka te wahig kayi te kedì?” Umba nekag̵i zin heini su is menge Hudiyu, kenè dan ebpekidlalag te minsan hentei he tigSemarya. 10Ne zutun midtavak si Jesus te, “Bayi, angin ke netuenan nu is ibeg̵ey kenikew te Megbevayà wey ke hentei a is ebuyù te wahig su ebpekevuyù ka pezem dini te kediey te wahig ne egkeveg̵ayan ka te wahig he ebpekeveg̵ey te untung he wazà pidtemanan.” 11Ne zutun migkag̵i haazà is bahi te, “Mama, wazè nu man sekilut ne mezalem heini is kalut. Hendei nu man egkekuwa heeyan is wahig he ebpekeveg̵ey te untung? 12Is kepuun tew zengan he si Hakub, iyan mibaal kayi te kalut. Ne kayi med-inum sikandin wey is menge anak din wey is menge ayam din. Lavew ke ve ki Hakub?” 13Ne midtavak si Jesus te, “Ke zuen egkemezahan he ed-inum kayi te wahig egkemezahan pa, 14iyan, ke zuen ed-inum te wahig he ibeg̵ey ku kandin kenè en maan sikandin egkemezahan te minsan keenu. Su is wahig he ibeg̵ey ku kandin, egkehimu ziyà te kandin he ulu te wahig he ebpekeveg̵ey kandin te untung he wazà pidtemanan.” 15Ne migkag̵i haazà is bahi te, “Mama, beg̵ayi e kun keniyan te wahig he migkag̵i nu su wey kenà ad maan memezahi wey kenà ad daan maan ebpekesekezu zini.” 16Ne ke si Jesus te, “Umawa nu is esawa nu ne likù ka zini.” 17Ne migkag̵i haazà is bahi te, “Wazè ku esawa.” Ne migkag̵i si Jesus te, “Tutuu heeyan is migkag̵i nu he wazè nu esawa, 18su lelima en is nekeesawa kenikew, ne is maama he ziyà te kenikew g̵untaan, benar iyan he kenè nu esawa.” 19Ne mid-uman megkag̵i haazà is bahi te, “Ebpeneuven ke ves te Megbevayà? 20Sikan is menge kepuun ku he tigSemarya, kayi zan te vuntud ed-ezapa is Megbevayà, iyan, sikiyu is menge Hudiyu, ibpenurù niw he kinahanglan he ziyè tew te Hiruselim ed-ezapa is Megbevayà.” 21Ne migkag̵i si Jesus te, “Benar, Bayi, is egkeg̵iyen ku kenikew he egkeuma is timpu he kenè en maan dini zà te vuntud wey minsan diyà te Hiruselim ed-ezapa is Amey tew he Megbevayà. 22Sikiyu is menge tigSemarya, kenè niw egketuenan ke hentei is ed-ezapen niw, ne sikami is menge Hudiyu, netuenan dey mulà ke hentei is ed-ezapen dey su pinaag̵i kenami te menge Hudiyu edlibriyen te Megbevayà is menusiyà. 23Duen ebperetengen he timpu ne netuman en guntaan he is menge etew he egkesuat he ed-azap te Amey tew he Megbevayà, ne kinahanglan he ezapa zan pinaag̵i te g̵ehem te Wag̵as he Mulin-ulin wey tutuu is ked-ezapa zan kandin. Iyan heini menge etew he edewaten te Megbevayà wey zan mekeazap kandin. 24Mulin-ulin is Megbevayà ne wazè din lawa; umba is langun he ed-azap kandin, kinahanglan he ezapa zan sikandin pinaag̵i te g̵ehem te Wag̵as he Mulin-ulin wey tutuu is ked-ezapa zan kandin.”

25Ne zutun migkag̵i haazà is bahi te, “Netuenan ku he ebpekeuma keuzemà is mibpilì te Megbevayà wey mekehadì, sikan is migeraran ki Kristu. Ne emun ebpekeuma en, ibpesavut din kenitew is langun.” 26Ne midtavak si Jesus te, “Siak is ebpekidlalag kenikew, iyan ad sikan is migeraran ki Kristu.”

Is Kedlikù te Menge Sumusundan Diyà te ki Jesus

27Ne zutun te kemulu pa ebpekidlalag si Jesus dutun te vahi, nekeuma is menge sumusundan din. Utew zan nengeinuinu su maan is ebpekidlalag si Jesus dutun te vahi; iyan, wazà minsan sevaha kandan he mid-insà diyà te ki Jesus ke hengkey is kinahanglan din dutun te vahi. Ne wazè dan daan insai ke maan is ebpekidlalag sikandin dutun te vahi.

28Ne zutun intag̵ak te vahi is sekezu zin ne midlikù diyà te inged. Migkeg̵iyan din is menge etew, ke sikandin te, 29“Hendiyè kiw en wey niw maahà is etew he neketagnà te langun he nengeveelan ku. Kela ke iyan sikandin sikan is mibpilì te Megbevayà he ibpahadì.” 30Ne migenat dan su edhendiyè dan te ki Jesus.

31Ne zutun te kemulu pa haazà is bahi ziyà te inged, migkeg̵iyan si Jesus te menge sumusundan din te, “Datù, kaan ka.” 32Ne midtavak si Jesus te, “Duen egkeenen ku he wazè niw metueni.” 33Ne zutun mibpein-inseey zan te, “Duen be vuwa nekeveg̵ey kandin te egkeenen?” 34“Iring te egkekaan ku,” ke si Jesus, “is kedtumana ku te egkesuatan te Megbevayà he midsug̵ù kediey wey is kedhimesaza ku te impeveelan din kediey su iyan ibmezesen ku.

35Egkag̵i kew he heepat pa he vulan guntaan ne human is tirag̵un! Iyan, emun iyan a egkag̵i, ne tirag̵un en guntaan; su ahaa niw man heini is mezakel he menge etew. Iring sikandan te pinemula he hustu en he edreg̵unen su iyan en heini timpu te kedtuu zan kediey. 36Ne sikan is edrag̵un, he ke và dà egkeg̵iya, is ebpesavut kandan wey zan meketuu kedì, duen suhul kandin te Megbevayà, ne sikan is menge etew he nerag̵un din, ebeg̵ayan te untung he wazà pidtemanan. Ne tenged dutun is ebpemula te Lalag te Megbevayà wey is edrag̵un te veg̵as te Lalag te Megbevayà, pudu zan egkelipey. 37Utew tutuu is erubasa he edhenduen te, ‘Ebpemula is sevaha ne selakew is edrag̵un.’ 38Imperag̵un ku sikiyu zutun te tanà he wazè niw pemulai; su selakew is midsangyew te Lalag te Megbevayà ne tenged te vaal zan iyan kew ebpekepesavut te menge etew wey zan meketuu,” ke si Jesus.

Is Kebpeketuu te Menge TigSemarya

39Ne mezakel is menge tigSemarya zutun he nemeketuu ki Jesus tenged te migkag̵i zutun te vahi he ke sikandin te, “Netagnè din is langun he nengeulaula ku.” 40Ne hein nemekeuma haazà is menge tigSemarya ziyà te ki Jesus, midhengyuan dan sikandin he kenà petuluy medlaus te kedhipanew zin. Umba mid-ubpà ensi Jesus dutun seled te zezuwa he andew.

41Ne mezakel pa is nemeketuu ki Jesus tenged te impesavut din kandan, 42ne migkeg̵iyan dan sikan is bahi te, “Nemeketuu key, kenà tenged dà te migkag̵i nu, kekenà, tenged daan te nezineg dey is menge lalag din, ne netuenan dey en he tutuu iyan he iyan sikandin sikan is Menluluwas te menusiyà.”

Is Anak te Upisyal he Hapit En Ebpatey

43Ne hein netapus dutun is dezuwa he andew, mid-awà ensi Jesus ne midlaus dan diyà te prubinsya he Geliliya. 44Migkag̵i si Jesus te, “Is ebpeneuven te Megbevayà, kenà edtehuzen te menge etew ziyà te kandin he keugelingen he inged.” 45Ne minsan pa zutun, is menge tigGeliliya, hein nekeuma ensi Jesus dutun, nengeg̵alew zan su mezakel zan is nemeketelavuk te Pista te Kedlevayi ziyà te inged he Hiruselim, ne nengeehè dan is langun he nengehimu ni Jesus dutun.

46Ne midlikù si Jesus diyà te inged he Kana he ziyà te Geliliya. Iyan haazà kes inged he impevaluy zin he vinu is wahig. Ne zuen dutun etew he zekelà is ketengdanan din diyà te hadì. Ne zuen anak din diyà te inged he Kepirnaum he egkezeruwan. 47Ne hein nezineg din is tudtul he nekeuma si Jesus diyà te Geliliya he ebpuun te Hudiya, midhendiyà te ki Jesus ne midhengyuan din he medhendiyà te Kepirnaum su wey zin mevewii haazà is anak din su ebpatey en. 48Ne migkeg̵iyan ni Jesus haazà is etew te, “Kenè kew ves ebpeketuu kediey emun kenè kew ebpekeahà te menge egkengein-inuwan wey menge singyal.” 49Ne zutun migkag̵i haazà is etew te, “Datù, duma ka kediey su wey kenà mebpatey is anak ku.” 50Ne midtavak si Jesus te, “Ulì ke en su neulian en is anak nu!” Ne midtuu haazà is etew kayi te migkag̵i ni Jesus ne zutun migenat. 51Ne hein ed-ulì en haazà is etew midsinug̵ung sikandin te menge sulug̵uen din, ne ke sikandan te, “Neulian en is anak nu.” 52In-insè din kandan ke keenu mezeyzey haazà is anak din, ne ke sikandan te, “Gevii te kegkepulid te andew midhimemasan sikandin.” 53Ne zutun netenuzan te etew he iyan haazà kes timpu he migkag̵i si Jesus diyà te kandin te neulian en is anak din. Ne tenged dutun neketuu haazà is etew zuma is pemilya zin.

54Iyan heini ikezuwa he egkein-inuwan he mibeelan ni Jesus. Mibeelan din heini zutun te kedlikù din diyà te prubinsya he Geliliya he ebpuun sikandin te prubinsya he Hudiya.

Terpilih Sekarang Ini:

Juan 4: mbbNT

Highlight

Kongsi

Salin