Nengeulaula 21
21
Is Kedhendiyà ni Pablo te Hiruselim
1Ne zutun hein nekepemazè key en kandan, mid-untud key en maan te barku ne migenat key. Ne midtandang key ziyà te ebeyaan dey ne nekeuma key ziyà te pulu he Kus. Ne zutun te mid-ilis he andew nekeuma key ziyà te pulu he egngezanan te Rudas. Mid-awè key zutun ne nekezunggù key ziyà te inged he Petara. 2Ne ziyè dey meuma is barku he edhendiyà te Pinisya ziyà te prubinsya he Sirya ne nekeuntud key zutun ne migenat key en maan. 3Nekeuvey key ziyà te pulu he Sipru, iyan, midseg̵azan dey ziyà te egkeg̵ivang dey. Ne midlaus key ziyà te Sirya. Nekezunggù key ziyà te inged he Tiru su zutun idhaw-as is menge karga te barku. 4Neturedu zey zutun is menge tumutuu ne midhulavung key ziyà te kandan taman te sengesimana. Ne g̵eina te zuen impezayag kandan te Wag̵as he Mulin-ulin midleg̵uyan dan si Pablo he kenà ibpelaus diyà te Hiruselim. 5Iyan, hein neume en is kegenat dey, mid-awè key zutun te inged. Ne nemenduma kenami is langun he menge tumutuu, maama se vahi wey menge anak dan. Ne midluhud key zutun te veyvey te zag̵at is ed-ampù. 6Ne zutun mibpepempemezeey key ne mid-untud key en maan te barku ne sikandan mulà, midlikù dan diyà te inged.
7Ne mid-ewaan dey is inged he Tiru ne midlaus key ne nekezunggù key ziyà te inged he Tulimeyda. Mibpenumbelayan dey is menge tumutuu ne midhulavung key ziyà te kandan. 8Ne hein nepawà, migenat key en maan ne nekezunggù key ziyà te Sisarya. Ne ziyè key medhulavung te valey ni Felipe, sikan is ebpesavut te Meupiya he Tudtulanen. Iyan sikandin sevaha zutun te pitu he maama he nepilì dengan diyà te Hiruselim he timbang te menge epustul. 9Duen heepat he menge anak din he rag̵a he ebpeneuven te Megbevayà. 10Hein nepipira en he andew is kedhulavung dey zutun, nekeuma si Egebu is sevaha he maama he ebpeneuven te Megbevayà he ebpuun diyà te Hudiya. 11Mid-uvey ziyà te kenami ne migkuwa zin is bakes ni Pablo ne imbakus din te kandin he menge paa wey menge velad din ne ke sikandin te, “Ibpesavut kenitew te Wag̵as he Mulin-ulin he is teg̵ig̵aked kayi te vakes, iring kayi is kebekusa kandin te menge Hudiyu ziyà te Hiruselim ne ibpalad dan sikandin diyà te kenà menge Hudiyu.” 12Ne hein nezineg dey haazà, sikami wey is menge tumutuu zutun, midhengyuan dey si Pablo he kenà medhendiyà te Hiruselim. 13Iyan, midtavak si Pablo te, “Maan is edhimuwen niw he utew a meseeng pinaag̵i te kedsineg̵ew niw? Su emun intug̵ut en te Nengazen tew he si Jesus he iyan heeyan egkehitavù kedì, andam ad, kenà te kebpepirisu zà, kekenà, minsan te kebpehimatey ziyà te Hiruselim.” 14Ne hein netuenan dey en he kenà egkeeg̵ut si Pablo, mid-engkezan dey te edhangyù ne migkag̵i key te, “Berakat he iyan metuman is egkesuatan te Nengazen.”
15Ne hein malù en neug̵et is ked-ubpè dey zutun, mibpenines key ne migenat key is edhendiyà te Hiruselim. 16Ne zuen menge tumutuu he tigSisarya he miduma kenami ziyà te Hiruselim. Inhated key zan diyà te valey he ebpemenehikan dey, diyà te valey ni Menasun he tigSipru. Sevaha sikandin dutun te nengehuna he menge sumusundan ni Jesus.
Is Kebpekeuma ni Pablo Ziyà te Hiruselim
17Ne zutun te kebpekeuma zey ziyà te Hiruselim, midtelavuk kenami he nengeg̵alew is menge tumutuu. 18Ne nepawà dutun nenumbaley key ki Pablo ziyà te ki Epustul Santiago, ne zutun daan is langun he menge ebmeg̵urangen te menge tumutuu. 19Ne mibpengemusta kandan si Pablo ne zutun mibpenudtul zin kandan is langun he nengehimu te Megbevayà diyà te menge etew he kenà menge Hudiyu, pinaag̵i te kedwali zin. 20Ne hein nezineg dan haazà is tudtul ni Pablo, nemekezalig dan te Megbevayà. Ne migkeg̵iyan dan si Pablo te, “Netuenan nu, Suled, he utew zaan mezakel is menge zuma tew he Hudiyu he nemeketuu en ki Jesus, ne mibpurungan dan tumana is imbilinbilin kenitew he kesug̵uan. 21Nezineg dan is tudtul he is menge zuma tew he Hudiyu he ziyà te menge inged te kenà menge Hudiyu, impenurù nu kandan he engkezi zan is kedtumana zan te kesug̵uan he imbilinbilin dengan ni Moises. Impenurù nu kun kandan he kenè dan sirkunsidara is menge anak dan he maama ne kenè dan en sunuza is menge vetasan tew te menge Hudiyu. 22Siguradu egkezineg dan he nekeuma ke en. Hengkey is meupiya he edhimuwen? 23Meupiya ke edtumanen nu is sambag dey. Duen kayi heepat he zuma tew he maama he zuen impenangdù dan diyà te Megbevayà sumalà is betasan tew. 24Duma ka kandan diyà te simbahan he Valey te Megbevayà, ne tampu ka te ed-ul-ulahan kandan sumalà is betasan te kegkelumpiyuwi kandan. Iyan ka vayad te ebpeveyazan kandan ne human dan ebpekepevangul. Emun edtumanen nu heini, egketuenan te langun he kenà benar is tudtul he nezineg dan mehitenged kenikew, su egkekeleduwan dan he mibentayan nu is imbilinbilin he kesug̵uan ni Moises. 25Ne is menge kenà Hudiyu mulà he nemeketuu, migkag̵i zey en dengan kandan pinaag̵i te surat is menge idsug̵ù dey kandan he kinahanglan he kenè dan megkaan te impemuhat diyà te kenà hustu he megbevayà wey kenè dan daan keena is lengesa wey is edlepaan he kenà ebpekelelengesa. Ne kinahanglan daan he kenè dan hileveti is kenè dan esawa.” 26Ne hein nepawà dutun miduma ni Pablo haazà is menge maama ne midtampu sikandin dutun te kedtumana zan te vetasan te kebpenlumpiyu. Ne midseled si Pablo ziyà te Valey te Megbevayà wey zin ikepesavut ke pira pa he andew ne human egketapus is kegkelumpiyuwi kandan su emun egketapus haazà ne zuen pemuhat te kada sevaha kandan.
Is Kedekepa ki Pablo Ziyà te Valey te Megbevayà
27Ne hein ikepitu en he andew, duen menge Hudiyu he tig-Asya he nekeahà ki Pablo ziyà te Valey te Megbevayà. Ne mibpetavang dan te utew mezakel he menge etew zutun te simbahan su wey zan mezakep si Pablo. 28Ne mibpememensag dan is egkag̵i te, “Sikiyu is menge zuma zey he Isreyilihanen, tevangi key! Iyan heini sikan is etew he in-eneb din is penurù din te minsan hendei he inged. Ne supak is impenurù din te tivuuk he kehudiyuwan wey supak daan te kesug̵uan tew wey kayi te simbahan tew. Ne g̵untaan impeseled din en kayi te simbahan tew is kenà menge Hudiyu ne neremerikan heini is simbahan he ebulusan te Megbevayà.” 29(Umba migkag̵i zan heini su neehè dan si Trupimu he zuma ni Pablo zutun te inged. Ne si Trupimu, tig-Ipisu he kenà Hudiyu, ne kunaan dan ke miduma ni Pablo he impeseled dutun te simbahan.) 30Ne ingkepauk haazà te langun he meg̵inged dutun te Hiruselim ne nengevurun dan ne migewezan dan si Pablo, ne miguyud dan sikandin pehendiyà te g̵awas dutun te simbahan ne midlekevan dan haazà is simbahan. 31Edhimetayan dan pezem sikandin, iyan, duen neketudtul te kepitan te menge sundaru he menge Rumanu he edsinamuk is tivuuk he meg̵inged te Hiruselim. 32Ne is kepitan duma is menge sundaru, migaanggaan dan is edhendutun te nengevurun he menge etew. Ne hein naahà te menge etew haazà is kepitan wey menge sundaru, mid-engkezan dan te ebpemug̵el si Pablo. 33Ne haazà is kepitan, mibeyaan din si Pablo ne midakep din ne insug̵ù din he hiketi sikandin te zezuwa he kedina. Ne zutun in-insè din te menge etew ke hentei haazà is etew ne hengkey is salè din. 34Ne mibpememensag he edtavak is menge etew asal selakew is tavak te kada sevaha. Ne g̵eina te utew meg̵urub ne kenà egkekeleduwan dutun te kepitan ke hengkey is hustu he neulaula, ne tenged dutun insug̵ù din te menge sundaru he uwita zan si Pablo ziyà te kutà. 35Hein nekeuma zan diyà te heg̵ezan dutun te kutà mibitbit dan si Pablo tenged te utew ed-iseg is kedsinamuk te menge etew. Ne ed-eg̵awen pezem si Pablo zutun te menge etew 36ne ebpememensag dan is egkag̵i te, “Edhimetayan tew!”
Is Ketezengan ni Pablo Ziyà te Menge Etew
37Ne zutun te edseled dan en te kutà, migkag̵i si Pablo ziyà te kepitan ke sikandin te, “Egkehimu ve ke zuen lalag ku kenikew?” Ne migkag̵i haazà is kepitan te, “Metau ke ves te kineg̵iyan he Gerisyahanen? 38Kenè ke ve iyan kes tig-Ihiptu he malù en neug̵et guntaan he midsukul te gubirnu ne mibpengulu te heepat he libu he menge tulisan diyà te tanà he kenà ed-ubpaan te etew?” 39Ne midtavak si Pablo te, “Hudiyu a he sakup te zekelà he inged diyà te prubinsya he Silisya su ziyà a ianak te Tarsu. Edhengyuen ku kenikew he tug̵uti a he melelag̵i ku is menge etew.” 40Ne midtug̵utan din, ne si Pablo, midhitindeg dutun te heg̵ezan, ne imbayew zin is belad din he tuus te zuen egkeg̵iyen din dutun te menge etew, ne hein mid-engked is keg̵urub dan, migkag̵i si Pablo te kineg̵iyan he Hibriyuhanen.
Terpilih Sekarang Ini:
Nengeulaula 21: mbbNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2001, Wycliffe Bible Translators, Inc., All rights reserved.